Ua ib tug Neeg Yug Yaj
Kuv cia siab hais tias cov uas nej mus ua kev txhawb pab rau yuav xav tias nej yog lawv ib tug phooj ywg thiab paub tias, nej yog lawv tus phab ej thiab tus neeg uas lawv tso siab rau.
Ib xyoos tas los no, kuv tau ntsib ib tug me nyuam hauv teb chaws Chile uas ua rau kuv luag nyav. Nws hais rau kuv “Nyob zoo, kuv yog David. Koj puas yuav tham txog kuv hauv lub tuam rooj sab laj?”
Thaum kuv nyob ntsiag to, kuv tau xav txog David cov lus. Peb sawv daws yeej xav kom luag lwm tus pom thiab paub peb. Peb xav ua neeg tseem ceeb, xav kom nco ntsoov peb, thiab xav hnov txoj kev hlub.
Cov viv ncaus thiab nus, peb nyias muaj nyias nqis. Txawm tias tsis muaj leej twg uas hais txog nej hauv lub tuam rooj sab laj los, tus Cawm Seej paub thiab hlub nej. Yog nej xav seb qhov ntawd puas muaj tseeb, ces cia li xav tias Nws twb “muab [nej] txaug rau saum [Nws] tej xib teg.”1
Vim paub tias tus Cawm Seej hlub peb, tej zaum peb xav tias peb yuav ua li cas, es thiaj qhia rau Nws paub tias peb hlub Nws.
Tus Cawm Seej nug Petus tias, “Koj puas hlub kuv … ?”
Petus teb tias, “Tus Tswv; koj yeej paub tias kuv hlub koj. Yexus teb tias, Cia li yug kuv cov me nyuam yaj.”
Thaum nug li no zaum thib ob thiab peb hais tias, “Koj puas hlub kuv?” Petus nyuaj siab tiam sis qhia nws txoj kev hlub thaum nws hais tias: “Tus Tswv, koj yeej paub txhua yam tsa; koj yeej paub tias kuv hlub koj. Yexus teb hais tias, Yug kuv coj yaj.”2
Petus twb ua rau Khetos paub tias nws yeej yog ib tug uas yuav raws Khetos qab puas yog? Thaum nkawd sib ntsib ntawm ntug dej hiav txwv, nws “cia li tso” nws cov vas ntaus ntses es caum tus Cawm Seej.3 Petus txawm ua neeg uas cawm tau tib neeg. Nws ua thwj tim nrog tus Cawm Seej thaum Nws pab txhua tus thiab qhia lwm tus txog Yexus Khetos txoj moo zoo.
Tiam sis tus Tswv uas sawv rov qab los paub tias Nws yuav tsis nyob ntawm Petus ib sab lawm, es qhia nws tias yuav pab lwm tus li cas thiab thaum twg. Thaum tus Cawm Seej tsis nyob lawm, Petus yuav tsum nrhiav kev pab los ntawm tus Ntsuj Plig, txais kev tshwm sim rau nws tus kheej, thiab muaj kev ntseeg thiab ua siab loj ua kiag xwb. Tus Cawm Seej xav ntsoov txog Nws cov yaj, thiab xav kom Petus yuav ua tej yam Nws ua yog tias Nws tsis nyob ntawd. Nws hais kom Petus ua ib tug tswv yug yaj.
Lub Plaub Hlis Ntuj tas los no, Thawj Tswj Hwm Russell M. Nelson caw kom peb pab pub Leej Txiv cov yaj thaum peb ua txoj kev txhawb pab tib neeg.4
Yuav kom peb ua tau raws li nws cov lus caw ntawd, peb yuav tsum muaj ib lub siab li tus uas yug yaj thiab to taub tej yam uas tus Tswv cov yaj xav tau. Ces peb yuav tsum ua li cas es peb thiaj li yuav ua tau tus Tswv cov neeg yug yaj?
Ib yam li txhua lo lus nug, peb yuav saib Yexus Khetos, peb tus Cawm Seej—tus Tswv Yug Yaj Zoo. Tus Tswv yeej paub thiab suav tag nrho nws cov yaj, lawv yeej tau kev saib xyuas, thiab lawv yeej tau raug sib sau ua ke los rau hauv Vajtswv pab yaj.
Paub thiab Raug Suav
Yam li thaum peb sim ua raws li tus Cawm Seej, peb yuav tsum paub thiab suav kom tau Nws txhua tus yaj. Peb muaj cov viv ncaus los sis tej tsev neeg uas peb yuav tsum saib xyuas thiab pab kom peb paub tseeb tias yeej suav tus Tswv txhua tus yaj thiab nco ntsoov lawv txhua tus. Suav txhua tus tsis yog muaj naj npawb rau sawv daws; tiam sis txhais tau tias kom txhua tus hnov tus Cawm Seej txoj kev hlub vim peb saib xyuas lawv rau Nws. Ua li ntawd, sawv daws yuav pom tias lawv Leej Txiv Saum Ntuj Ceeb Tsheej yeej paub lawv tiag tiag li.
Kuv nyuam qhuav ntsib ib tug ntxhais hluas uas tau mus ua kev txhawb pab rau ib tug viv ncaus uas hlob nws ntau xyoo. Tiam sis, nkawd pom tias nkawd ob leeg nyiam nkauj. Thaum tus ntxhais hluas no mus xyuas tus viv ncaus no, ces nkawd hu nkauj ua ke, thiab sib tham txog tej nkauj uas nkawd nyiam. Nkawd ua tau ib txoj kev ua phooj ywg uas foom koob hmoov rau nkawd ob leeg lub neej.
Kuv cia siab hais tias cov uas nej mus txhawb pab yuav xav tias nej yog lawv ib tug phooj ywg thiab paub tias, nej yog lawv tus phab ej, thiab ib tug neeg uas lawv tso siab rau—ib tug uas paub txog lawv tej teeb meem thiab yuav txhawb nqa lawv.
Tsis ntev tas los no, kuv tau mus ua txoj kev txhawb pab rau ib tug viv ncaus uas kuv los sis kuv tus khub tsis paub zoo. Tom qab kuv nrog Jess, kuv tus khub uas muaj 16 xyoo tham, nws hais tias, “Wb yuav tsum ua kom wb paub nws zoo dua.”
Wb cia li txiav txim tias wb yuav thaij ib daim duab es muab xa mus rau nws kom nws thiaj paub tias wb zoo li cas. Kuv tau tuav lub xov tooj, thiab Jess nyem thaij ib daim duab. Npaj xub thawj uas wb ua txoj kev txhawb pab wb tau txiav txim ua ib khub ua ke.
Thaum wb mus ntsib nws wb nug hais tias seb nws puas xav kom wb thov Vajtswv pab nws li cas. Nws kuj piav txog nws tej kev nyuaj siab thiab zoo siab hlo thov kom wb yuav thov Vajtswv pub rau nws. Vim nws tso siab ntseeg wb, peb thiaj tau sib raug zoo heev. Yog ib qho cib fim zoo kom nco ntsoov txog nws thaum kuv thov Vajtswv txhua hnub.
Thaum nej thov Vajtswv, rau cov uas nej ua txoj kev txhawb pab rau, nej yuav hnov tau Yexus Khetos txoj kev hlub rau lawv. Faib qhov kev hlub ntawd rau lawv. Yeej tsis muaj ib qho uas zoo tshaj qhov uas pab pub nws cov yaj kom lawv hnov tau Nws txoj kev hlub—los ntawm nej los?
Saib Xyuas
Qhov thib ob uas yuav ua rau peb hlub tau tus Tswv cov yaj ib yam li tus uas yug yaj yog saib xyuas Nws cov yaj. Yam li peb ua mej zeej hauv Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb muaj txheej txheem, peb kho tau txhua yam tsav. Peb yeej pab tau sai thiab ua tau ib phaj khoom qab zib rau lawv noj. Tiam sis puas yuav tsum ua lwm yam thiab?
Cov yaj puas paub tias peb saib xyuas lawv nrog txoj kev hlub thiab peb puas yuav mus pab lawv?
Hauv Mathais 25 peb nyeem tias:
“Nej cov uas tau kuv txiv txoj koob hmoov, nej cia li los nyob lub teb chaws uas nws twb npaj cia rau nej … :
“Thaum kuv tshaib plab, nej pub mov rau kuv noj, thaum kuv nqhis dej; nej pub dej rau kuv haus; thaum kuv tuaj ua qhua, nej hu kuv los hauv nej tsev: …
“Thaum cov neeg ncaj ncees hnov li ntawd lawv yuav teb hais tias, Tus Tswv, thaum twg ais peb pom koj tshaib plab peb tau muab mov rau koj noj? los sis pom koj nqhis dej thiab muab dej rau koj haus no?
“Thaum twg ais pom koj tuaj ua qhua peb tau hu koj los so hauv peb tsev?”5
Lo lus tseem ceeb yog pom. Cov ncaj ncees pom cov uas xav tau kev pab vim lawv saib xyuas thiab pom ntsoov. Peb yeej ua zoo saib pab tau thiab nplij, ua tau koob tsheej thiab pab tau. Thaum peb ua, peb tau kev cog lus uas sau tseg hauv Mathais: “Thaum uas nej tau pab kuv cov kwv tij no ib tug, txawm yog tus ntawd muaj hwj chim yau dua cov …,twb yog nej pab kuv ntag.”6
Muaj ib tug phooj ywg—peb lam hu nws ua John—piav tias yuav zoo li cas yog peb pom tau luag lwm tus tej kev nyuaj uas tsis hnov txog: “Ib tug viv ncaus hauv peb pawg ntseeg tau sim txo nws txoj sia. Ob hlis tom qab ntawd, pom tias hauv peb pawg pov thawj hwj tsis tau muaj ib tug uas nrog nws tus txiv tham txog qhov no. Kuv twb tsis tau ua thiab. Ces, kuv thiaj li mus thov tus txiv mus nrog kuv noj su. Nws yog ib tug neeg txaj muag, thiab lus tsawg. Thaum kuv hais rau nws hais tias, ‘Koj tus poj niam tau sim txo nws txoj sia. Tej zaum koj nyuaj siab heev. Koj puas xav sib tham txog qhov no?’ nws cia li pib quaj. Wb tau sib tham thiab ntaus kev phooj ywg sai sai.”
John hais ntxiv tias, “Kuv xav tias tej zaum peb cia li xav tias ua khoom qab zib xwb es tsis tas saib seb peb yuav tsum ua li cas thiaj pab tau zoo zoo thiab hlub lawv.”7
Tej zaum peb cov yaj ploj lawm, los sis mob siab heev, los sis txhob txwm xav khiav; vim peb yog tus tswv yug yaj, peb ua tau thawj tus uas pom tau tias lawv xav tau kev pab li cas. Peb mloog thiab hlub lawv es tsis txhob txiav txim txog lawv thiab mloog tus Vaj Ntsuj Plig Dawb Huv qhia seb peb yuav tsum pab lawv li cas.
Cov viv ncaus thiab cov nus, lub ntiaj teb zoo thiab muaj kev cia siab vim tej yam zoo uas nej ua. Thaum nej thov tus Tswv txoj kev pab seb peb yuav tsum pab cov uas peb mus txhawb pab li cas, ces nej yuav pom kev tseeb. Nej txoj hauj lwm ua neeg txhawb pab yog los saum ntuj ceeb tsheej los. Rau siab thov kom thiaj yuav paub tias yuav tsum pab lawv li cas.
Sib sau ua ke ua Vajtswv Pab Yaj
Qhov thib peb, peb xav coj tau peb cov yaj rov qab los rau ntawm Vajtswv. Yuav kom ua tau li no, peb yuav tsum saib seb peb cov yaj nyob qhov twg thaum lawv taug txoj kev khi lus thiab kam nrog lawv taug kev mus muaj kev ntseeg. Peb txoj hauj lwm dawb ceev yog ua kom paub lawv lub siab thiab pab kom lawv mus rau tus Cawm Seej.
Nyuaj rau Viv Ncaus Josivini hauv Fiji pom nws txoj kev mus tom ntej rau ntawm txoj kev ntawm kev khi lus—tiag tiag. Nws tus phooj ywg paub tias nws nyeem tsis tau nws cov vaj lug kub vim nws yeej tsis pom kev. Nws muab tau ib lub tsom iav tshiab rau Josivini thiab ib tug xaum daj rau tus viv ncaus no khij tau txhua zaus uas nws pom Yexus Khetos hauv Phau Ntawv Maumoos. Nov yog ib qho kev txhawb pab uas yooj yim tiam sis pab tau Josivini mus tau hauv lub tuam tsev rau thawj zaug 28 xyoo tom qab nws ua kev cai raus dej.
Txawm tias peb cov yaj muaj zog los sis qaug zog, zoo siab los sis nyuaj siab, peb yeej pab tau kom tus twg los tsis taug kev nws ib leeg xwb. Peb yeej hlub tau lawv txawm lawv txoj kev ntseeg ntawm sab ntsuj plig nyob qhov twg los xij. Yam li thaum peb thov Vajtswv kom peb to taub lawv tej siab zoo me ntsis, kuv hais lus tim khawv tias Leej Txiv Saum Ntuj Ceeb Tsheej yuav coj peb kev thiab Nws tus Ntsuj Plig yuav nrog nraim peb mus. Peb yuav muaj lub cib fim ua “cov tim tswv puag ncig” lawv thaum Leej Txiv mus ua lawv ntej.8
Tus Tswv caw peb los pub Nws pab yaj, kom saib xyuas Nws pab yaj ib yam li Nws yuav saib lawv. Nws caw peb ua cov neeg yug yaj hauv txhua lub teb chaws, rau txhua haiv neeg. (Thiab xav hais rau koj, Txwj Laug Uchtdorf, peb yeej hlub thiab xav tau cov tswv yug yaj Yelemis thiab.) Thiab Nws xav kom Nws cov tub hluas ntxhais hluas yuav los pab ua txoj hauj lwm no.
Peb cov neeg hluas yeej ua tau ib co neeg yug yaj zoo tshaj plaws. Ib yam li Thawj Tswj Hwm Russell M. Nelson hais, “lawv yog cov zoo tshaj plaws uas tus Tswv tau xa los rau ntiaj teb no.” Lawv yog cov “ntsuj plig zoo,” peb “cov neeg zoo tshaj,” uas raws tus Cawm Seej.9 Nej sim xav txog lub hwj chim yog muaj cov yug yaj uas zoo npaum li ntawd saib xyuas Nws cov yaj? Thaum peb ua ke txhawb pab nrog cov tub ntxhais hluas no mas, peb yuav pom tej yam zoo heev.
Cov tub hluas thiab ntxhais hluas, peb xav tau nej! Yog nej tsis tau muaj cov neeg uas nej yuav tsum mus txhawb pab, cia li nrog nej tus Thawj Tswj Hwm rau Koom Haum Niam Tsev los sis pawg pov thawj hwj tham. Lawv yeej yuav zoo siab hlo vim nej kam los pab paub thiab suav Nws cov yaj, yuav saib xyuas, thiab coj lawv rov qab los nrog Vajtswv nyob ua ke.
Thaum txog hnub uas peb txhos caug ntawm peb tus Cawm Seej ob txhais ko taw, yog peb tau tus Nws pab yaj, kuv thov kom peb yuav teb tau ib yam li Petus hais tias: “Tus Tswv; koj yeej paub tias kuv hlub koj.”10 Cov no, Koj cov yaj, tau kev hlub, lawv yeej nyob zoo, thiab lawv nyob tsev lawm. Los ntawm Yexus Khetos lub npe, amees.