Teeb lub Hauv Paus ntawm Ib txoj Hauj Lwm Tseem Ceeb
Tej zaj lus uas peb qhia los ntawm tej kev lig kev cai uas peb ua hauv peb tsev, txawm yog tej yam me thiab yooj yim los, tej ntawd yeej tseem ceeb zuj zus tuaj hauv lub ntiaj teb niaj hnub no.
Peb cov niam tsev txiv tsev hauv Xi-oos, peb muaj ib lub luag hauj lwm dawb ceev kom peb cov me nyuam xav xav muaj kev xyiv fab, txoj kev kaj, thiab qhov tseeb ntawm Yexus Khetos txoj moo zoo. Thaum peb tu peb cov me nyuam, peb tsim tej kab lig kev cai hauv peb tsev thiab siv tej txheej txheem sib tham thiab coj cwj pwm hauv peb tsev neeg. Thaum peb ua li ntawd, tej kab lig kev cai ntawd yuav tsum ua rau peb cov me nyuam coj yam ntxwv zoo kom lawv thiaj li yuav muaj zog thaum lawv raug tej teeb meem ntawm lub neej no.
Tau ntau xyoo peb tsev neeg nyiam mus pw nraum zoov nyob saum cov Roob Uintah hauv lub xeev Utah qaum teb sab hnub tuaj. Peb mus deb li 20 mais (32 km) taug ib txoj kev av mus txog ib lub hav ntsuab ntsuab zoo nkauj, muaj ncej zeb siab heev thiab ib tug dej ntshiab txias txias. Txhua xyoo, vim kuv thiab Susan wb xav pab wb cov me nyuam thiab wb cov xeeb leej xeeb ntxwv rov qab saib txoj moo zoo cov lus qhuab qhia thiab tej kab ke rau nqi, wb hais kom wb rau tus tub thiab lawv tsev neeg npaj ib zaj lus txog ib yam uas lawv xav tias yog ib yam tseem ceeb ntawm lub hauv paus ntawm ib tsev neeg uas tsom ntsoov rau Khetos. Ces peb tsev neeg sib sau ua ke rau kev sib ntsib teev tiam Vajtswv hauv ib qho chaw uas tsis muaj lwm tus neeg, thiab txhua tsev neeg nyias qhia nyias zaj.
Xyoo no, peb cov xeeb leej xeeb ntxwv tau sau lub ntsiab ntawm lawv zaj lus rau ib lub pob zeb, ces ib lub dhau ib lub, muab cov pob zeb faus ua ke, kom ua piv txwv txog ib lub hauv paus ruaj khov rau ib lub neej zoo siab. Lawv puav leej tau qhia qhov tseeb uas yeej yuav tsis hloov hais tias Yexus Khetos yog tus ncej zeb tag ntawm lub hauv paus ntawd.
Raws li Yaxayas hais tias, “Twb yog vim li ntawd tus Tswv uas kav ib puas tsav yam thiaj hais tias, Kuv muab ib lub pob zeb uas twb sim thiab tawv heev uas yog tus cag cog ruaj khov los tiag lub nroog Xi-oos.”1 Yexus Khetos yog tus cag cog ruaj khov nyob hauv Xi-oos lub hauv paus. Yog Nws uas tau muab qhov no tshwm sim rau tus Yaj Saub Yauxej Xamiv hais tias: “Yog li ntawd, tsis txhob nkees ua tej yam zoo, vim nej tab tom teeb lub hauv paus ntawm ib txoj hauj lwm loj. Thiab los ntawm tej yam me yuav muaj tej yam uas loj tawm los.”2
Tej zaj lus uas peb qhia los ntawm tej kev lig kev cai uas peb ua hauv peb tsev, txawm yog tej yam me thiab yooj yim los, tej ntawd yeej tseem ceeb zuj zus tuaj hauv lub ntiaj teb niaj hnub no. Tej yam me thiab yooj yim uas yuav ua ib txoj hauj lwm tseem ceeb hauv peb cov me nyuam lub neej no yog dab tsi?
Tsis ntev tas los, Thawj Tswj Hwm Russell M. Nelson hais lus rau ib pawg loj nyob ze Toronto, Canada, thiab hais kom cov niam tsev txiv tsev nco txog peb txoj kev lav ris dawb ceev qhia peb cov me nyuam. Nyob hauv tej kev lav ris tseem ceeb uas nws hais, Thawj Tswj Hwm Nelson hais txog tej dej num uas peb cov niam tsev txiv tsev yuav tsum qhia peb cov me nyuam kom to taub vim li cas peb txais lub cim nco txog, qhov uas lawv yug los nyob hauv kev khi lus tseem ceeb npaum li cas, thiab qhov uas tsim nyog npaj thiab txais tus yawg suab txoj koob hmoov, thiab nws yaum cov niam tsev txiv tsev coj lawv tsev neeg nyeem vaj lug kub ua ke.3 Los ntawm tej hauj lwm no, peb tus yaj saub hais peb kom hloov peb lub tsev ua “tej chaw dawb huv uas muaj kev ntseeg.”4
Nyob hauv Phau Ntawv Maumoos, Enos sau ntawv txog kev ris txiaj uas nws muaj rau nws txiv tus yam ntxwv, tus uas “qhia [Enos] txog nws yam lus, thiab qhia [Enos] raws li tus Tswv tej kev cob qhia thiab kev qhuab ntuas.” Ces Enos muaj kev txaus siab hais tias, “Thiab cia li qhuas kuv tus Vajtswv lub npe vim yog tej yam ntawd.”5
Kuv nyiam tej kab lig kev cai me me thiab yooj yim uas wb tau ua hauv wb tsev tau 35 xyoo uas wb sib yuav. Wb cov kab lig kev cai feem ntau yeej yog tej yam me me uas muaj nqis heev. Piv txwv hais tias:
-
Thaum hmo ntuj thaum kuv tseem tsis nyob tsev, raws li Susan qhia, kuv yeej paub tias wb tus tub hlob yuav coj wb tsev neeg nyeem vaj lug kub thiab thov Vajtswv.6
-
Ib txoj kab lig kev cai ntxiv—wb yeej tsis tawm lub tsev li los sis tsis tham xov tooj tiav ua ntej hais tias, “Kuv hlub koj.”
-
Peb lub neej yeej tau koob hmoov vim tau teem sij hawm kom sib tham nrog txhua tus tub. Muaj ib zaug thaum kuv nrog ib tug tub tham, kuv nug nws txog qhov uas nws xav npaj mus ua tub txib. Tom qab wb sib tham me ntsis, nws nyob twj ywm rau ib me pliag, ces nws ua tib zoo xav thiab hais tias, “Txiv, koj puas nco qab thaum kuv me me thiab wb pib sib tham li no?” Kuv teb hais tias, “Nco mas.” Nws hais tias, “Es, kuv twb cog lus rau koj tias kuv yuav mus ua tub txib, thiab koj thiab Niam tau cog lus rau kuv tias neb yuav mus ua tub txib thaum neb laus thiab.” Ces nws nyob twj ywm ib me pliag ntxiv. “Neb puas muaj teeb meem uas tab kaum neb kom neb ua tsis taus—vim tej zaum kuv pab tau neb os?”
Txawm yog peb xav tias tej tsev neeg kab lig kev cai zoo xws li kev thov Vajtswv, kev nyeem vaj lug kub, tsev neeg hmo ua ke, thiab kev koom lub Koom Txoos kev sib ntsib yog tej yam me thiab yooj yim, tej no pab muaj kev hlub, kev saib rau nqi, kev koom siab thiab kev nyab xeeb. Vim muaj tus ntsuj plig pab thaum ua tej yam no, peb cov me nyuam txais kev pov hwm kom txhob raug tus yeeb ncuab tej xib xub hluav taws uas muaj nyob hauv neeg ntiaj teb kab lig kev cai niaj hnub no.
Ua rau peb nco txog Hilamas cov lus txawj ntse rau nws tus tub hais tias: “Thiab nim no, kuv ob tug tub es, nco ntsoov, nco ntsoov tias twb yog nyob rau saum lub pob zeb uas yog peb tus Txhiv Dim, tus uas yog Khetos, Vajtswv Leej Tub, uas neb yuav tsum cog neb lub hauv paus; xwv kom thaum tus dab phem yuav xa nws tej cua muaj zog, muaj tseeb tiag, nws tej xub nyob hauv tej khaub zig cua, muaj tseeb tiag, thaum tag nrho nws tej lawg thiab nws tej cua daj cua dub uas muaj zog yuav los raug neb, tej ntawd yuav tsis muaj hwj chim kov yeej neb kom cab tau neb mus rau hauv tus kwj tob tob ntawm kev nyuaj siab thiab kev txom nyem uas tsis muaj qhov kawg, vim yog lub pob zeb uas neb tau cog rau saud, uas yog lub hauv paus ruaj nrees, ib lub hauv paus uas yog neeg cog rau saud lawv yuav tsis vau.”7
Ntau xyoo tas los, thaum kuv yog ib tug npisov, ib tug txiv neej laus xav nrog kuv tham. Nws piav txog thaum nws tau tawm lub Koom Txoos thiab tso tej kab lig kev cai ncaj ncees ntawm nws niam nws txiv tseg thaum nws yog ib tug tub hluas. Nws piav txog kev tu siab heev uas nws muaj hauv nws lub neej thaum nws nrhiav kev xyiv fab uas kav ib txhis los ntawm kev zoo siab uas neeg ntiaj teb muaj rau tib me pliag xwb. Thaum nws laus me ntsis, nws twb hnov Vajtswv tus Ntsuj Plig tej lus mos muag kom coj nws rov qab nco txog tej zaj lus, tej txheej txheem, tej kev xav, thiab kev nyab xeeb ntawm sab ntsuj plig zoo li nws muaj thaum nws yog ib tug tub hluas. Nws hais tias nws ris nws niam nws txiv txiaj rau nkawd tej kab lig kev cai, thiab nws tej lus uas hais niaj hnub no yeej zoo li Enos tej lus puag thaum ub hais tias: “Cia li Qhuas kuv tus Vajtswv lub npe vim yog tej yam ntawd.”
Raws li kuv tau kawm, tus txiv neej zoo txoj kev rov qab los rau txoj moo zoo yeej zoo li lwm tus thiab Vajtswv cov me nyuam uas ncaim tau ib ntu, lawv rov qab los rau tej yam uas lawv tau kawm thiab ua thaum lawv yog cov tub hluas ntxhais hluas. Thaum ntawd, peb kawm tus uas sau paj lug lub tswv yim, uas ntuas cov niam tsev txiv tsev hais tias, “Qhia me nyuam kom paub ua nws lub neej, nws yuav nco ntsoov tej lus ntawd mus tas nws sim neej.”8
Txhua tus niam tsev txiv tsev muaj tej lub sij hawm thaum lawv nyuaj siab thiab nyuaj rau lawv rau siab thiab muaj zog thaum lawv tu lawv cov me nyuam. Tiam sis, thaum cov niam tsev txiv tsev muab siab rau ntseeg los ntawm lawv txoj kev qhia cov me nyuam tsis tu tsis tseg nrog kev hlub thiab ua txhua yam lawv ua tau kom pab lawv cov me nyuam, lawv muaj kev cia siab ntxiv hais tias cov noob uas lawv cog yuav tuaj cag hauv lawv cov me nyuam lub siab lub ntsws.
Mauxes to taub txog qhov uas yuav tsum qhia tsis tu tsis tseg. Nws qhia hais tias, “Nej yuav tsum muab [tej lus ntawd] qhia rau nej tej me nyuam, thiab niaj hnub hais txog tej lus ntawd, tsis hais thaum nej nyob hauv tsev, thaum nej taug kev, thaum nej so thiab thaum nej ua hauj lwm.”9
Peb txhos caug ntawm peb cov me nyuam ib sab thaum thov Vajtswv ua ke, peb saib xyuas lawv thaum peb tsev neeg nyeem vaj lug kub, peb hlub lawv thaum peb koom ua ke muaj tsev neeg hmo ua ke, thiab peb txhawj txog lawv thaum peb txhos caug nyob peb ib leeg thov Vajtswv. Auj, peb yeej xav kom cov noob uas peb cog rau hauv peb cov me nyuam lub siab lub ntsws tuaj cag.
Kuv ntseeg hais tias tsis yog peb cov me nyuam yuav tsum “to taub zoo” tam sim ntawd thaum peb qhia, xws li thaum peb nyeem vaj lug kub los sis muaj tsev neeg hmo ua ke los sis mus koom cov Hluas Kev Sib Koom thiab lwm txoj kev sib ntsib hauv lub Koom Txoos. Tsis yog lawv yuav tsum to taub tias tej yam ntawd tseem ceeb heev thaum lub sij hawm ntawd, tiam sis lawv yuav tsum paub hais tias peb cov niam tsev txiv tsev puas muab siab rau ntseeg txaus kom ua raws li tus Tswv tej lus qhia hais tias yuav tsum rau siab ua neej, qhia, ntuas, thiab hais tej yam uas yog los ntawm Yexus Khetos txoj moo zoo. Yog ib txoj hauj lwm uas los ntawm peb txoj kev ntseeg—kev ntseeg hais tias muaj ib hnub cov noob uas tau cog rau hauv cov tub hluas ntxhais hluas lub siab yuav tuaj cag thiab txhawv tuaj.
Tej yam uas peb hais txog thiab tej yam uas peb qhuab qhia yeej qhia peb tias tej yam twg yuav tswhm sim rau peb. Thaum peb tsim tej kab lig kev cai zoo uas qhia txog Khetos cov lus qhuab qhia, tus Vaj Ntsuj Plig Dawb Huv ua tim khawv txog qhov tseeb ntawm peb tej zaj lus no thiab ua rau cov noob ntawm txoj moo zoo uas cog tob rau hauv peb cov me nyuam lub siab loj tuaj los ntawm tej yam peb ua tsis tu tsis tseg. Kuv hais lus tim khawv li no los ntawm Yexus Khetos lub npe, amees.