Cov Poj Niam thiab Kev Kawm txoj Moo Zoo hauv lub Tsev
Tus Cawm Seej yog tus yam ntxwv zoo tshaj plaws uas qhia nej tias nej yuav ua hauj lwm tseem ceeb npaum li cas kom tsom ntsoov rau kev kawm txoj moo zoo hauv tsev.
Kuv cov muam, kuv zoo siab kawg koom nrog nej sawv daws. Yeej yog ib lub sij hawm zoo kawg nkaus nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Tus Tswv muab Nws txoj kev txawj ntse nchuav rau Nws lub Koom Txoos zoo ib yam Nws tau cog lus.
Nej nco ntsoov Nws tau hais li cas: “Yuav ntev npaum li cas tej dej ntws mam li huv? Lub hwj chim twg thiaj yuav cheem tau ceeb tsheej? Tib yam nkaus li tib neeg twb tsis muaj peev xwm muab nws txhais npab uas qaug zog los thaiv tus dej Missouri kom txhob ntws raws li tau tsim kom ntws, los yog ua kom tus dej ntws nce toj, ces tib neeg twb cuam tshuam tsis tau qhov uas tus Muaj Hwj Chim Tag Nrho yuav muab tej kev txawj ntse nchuav saum ntuj ceeb tsheej los rau Tsoom Haiv Neeg Ntseeg hauv Hnub Nyoog Kawg.”1
Ib feem ntawm tus Tswv txoj kev qhia niaj hnub no yog vim Nws nchuav Nws txoj kev tseeb mus ib txhis rau hauv Nws cov neeg lub siab ceev zog. Nws tau qhia meej hais tias Leej Txiv Saum Ntuj Ceeb Tsheej cov ntxhais yuav ua ib txoj hauj lwm tseem ceeb rau kev qhia ceev zog no. Ib qho puav pheej txog txuj ci tseem ceeb no yog qhov uas Nws qhia Nws tus yaj saub kom tsom ntsoov rau kev qhia txoj moo zoo hauv tsev thiab nyob hauv txhua tsev neeg.
Tej zaum nej xav paub, “Cov poj niam uas rau siab ntseeg ua li cas lawv thiaj li pab tau tus Tswv muab kev txawj ntse nchuav rau Nws Tsoom Haiv Neeg Ntseeg?” Tus Tswv teb nyob hauv “Tsev Neeg: Ib txoj Kev Tshaj Tawm rau lub Ntiaj Teb.” Nej nco ntsoov tej lus ntawd, tiam sis tej zaum nej yuav paub ib lub ntsiab tshiab thiab paub tias tus Tswv twb pom tej kev hloov uas muaj tam sim no ua ntej. Nyob hauv kev tshaj tawm no, Nws txib cov muam kom ua cov uas qhia txoj moo zoo hauv lawv tsev neeg zoo li no hais tias: “Cov niam tsev txoj kev lav ris thib ib yog tu lawv cov me nyuam.”2 Kev tu lawv li no kuj hais txog kev qhia lawv kom paub qhov tseeb thiab kev txawj ntse ntawm txoj moo zoo.
Kev tshaj tawm kuj hais tias: “Nyob rau tej kev lav ris tseem ceeb dawb ceev no, tej niam tsev txiv tsev yuav tsum sib pab xws li nkawd nyob sib txig.”3 Nkawd yeej nyob sib txig, nkawd muaj peev xwm loj hlob tuaj ntawm sab ntsuj plig thiab txais tau kev txawj ntse ntxiv, yog li ntawd nkawd thiaj li koom siab kom ib leeg pab ib leeg. Nkawd sib txig vim nkawd yuav txais kev tsa nto ua ke. Muaj tseeb tiag, cov txiv neej thiab cov poj niam txais tsis tau kev tsa nto thaum nyob ib leeg xwb.
Yog li ntawd, yog vim li cas Vajtswv ib tug ntxhais uas sib txig thiab koom siab li no yuav txais kev lav ris kom tu nws cov me nyuam kom txais tau qhov tseem ceeb tshaj plaws uas peb txhua tus yuav tsum txais, uas yog kev paub qhov tseeb uas los saum ntuj los? Raws li kuv xav, yeej ib txwm yog tus Tswv txoj kev txij thaum tau tsim tsev neeg hauv lub ntiaj teb no los.
Piv txwv hais tias, yog Evas uas tau txais kev txawj ntse hais tias Adas yuav tsum noj cov txiv los ntawm tsob ntoo ntawm kev paub qhov zoo thiab qhov phem kom nkawd ua raws li tag nrho Vajtswv tej lus txib thiab muaj ib tsev neeg. Kuv tsis paub vim li cas Evas tau paub li no ua ntej, tiam sis Adas thiab Evas yeej koom siab thaum Adas tau paub lawm.
Ib tug yam ntxwv ntxiv txog qhov uas tus Tswv siv cov poj niam tej txiaj ntsim txawj tu tsev neeg yog thaum Nws ntxiv dag zog rau Hilamas cov tub. Chob kuv lub siab thaum kuv nyeem zaj no thiab nco txog kuv niam cov lus nplij kuv lub siab thaum kuv yuav mus ua ib tug tub rog.
Hilamas sau hais tias:
“Lawv niam tau qhia lawv hais tias, yog lawv ntseeg, Vajtswv yuav cawm lawv dim.
“Thiab lawv qhia lawv niam cov lus rau kuv, hais tias: Peb ntseeg tias peb niam yeej paub li ntawd.”4
Txawm kuv tsis paub tag nrho yog vim li cas tus Tswv muab kev lav ris tu tsev neeg rau cov muam uas rau siab ntseeg, kuv ntseeg tias yog vim nej txawj hlub lawv. Yeej yuav tsum muaj kev hlub loj heev thiaj li xav pab lwm tus ntau dua li yus xav pab yus tus kheej. Nov yog Khetos txoj kev hlub dawb paug rau tus neeg uas nej tu. Kev muaj siab hlub yeej yog los ntawm qhov uas tus uas tu neeg tau coj zoo kom tsim nyog txais Yexus Khetos txoj Kev Theej Txhoj. Kuv xav tias lub ntsiab lus ntawm Koom Haum Niam Tsev, uas kuv niam coj yam ntxwv zoo, yeej yog los ntawm Vajtswv. Cov lus no hais tias: “Txoj Kev Hlub Yeej Tsis Plam Ib Zaug Li.”
Vim nej yog Vajtswv cov ntxhais, nej yeej ib txwm muaj peev xwm paub txog lwm tus tej kev xav tau thiab hlub lawv. Yog vim li ntawd, nej thiaj li haj yam txawj hnov tus Ntsuj Plig tej lus ntxhi. Tus Ntsuj Plig yeej coj tau nej paub xav li cas, hais li cas, thiab ua li cas kom tu tib neeg tus Tswv thiaj li nchuav tau kev txawj ntse, qhov tseeb, thiab kev ua siab loj rau lawv.
Nej cov muam uas hnov kuv lub suab tam sim no nyias muaj nyias lub neej. Nej ib txhia yog cov me nyuam ntxhais uas tuaj rau koom haum poj niam kev sib ntsib thawj zaug. Nej ib txhia yog cov ntxhais hluas uas npaj tu nej tsev neeg ib yam li Vajtswv xav kom nej ua. Nej ib txhia nyuam qhuav yuav txiv tiam sis tseem tsis tau muaj me nyuam; ib txhia yog cov niam tsev hluas uas muaj ib ob tug me nyuam. Nej ib txhia yog cov niam tsev uas muaj cov ntxhais hluas thiab tub hluas thiab lwm tus muaj me nyuam uas tau mus ua tub txib ntxhais txib lawm. Nej ib txhia muaj me nyuam uas lawv txoj kev ntseeg ploj zuj zus thiab nyob deb ntawm nej. Nej ib txhia nyob nej ib leeg tsis muaj ib tug khub. Nej ib txhia yog pog los sis niam tais.
Tiam sis, txawm yog li cas los xij, nej yeej yog ib feem tseem ceeb ntawm Vajtswv tsev neeg thiab nej tsev neeg huv tib si, tsis hais thaum yav tom ntej, nyob hauv lub neej no, los sis nyob hauv lub ntuj ntsuj plig los yog. Vajtswv tso siab rau nej kom nej siv nej txoj kev hlub thiab txoj kev ntseeg tus Tswv Yexus Khetos kom tu Nws tsev neeg thiab nej tsev neeg ntau npaum li nej tu tau.
Qhov nyuaj yog qhov uas yus yuav tsum paub tias nej yuav tu leej twg, tu li cas, thiab tu thaum twg. Nej xav tau tus Tswv txoj kev pab. Nws paub lwm tus lub siab, thiab Nws paub thaum twg lawv txaus siab txais tau nej txoj kev tu. Qhov uas pab nej ua tau yog nej txoj kev thov Vajtswv nrog kev ntseeg. Nej yeej tso siab rau Nws kom coj nej txoj hau kev.
Nws twb hais li no hais tias: “Thov Leej Txiv tuav kuv lub npe, muaj siab ntseeg hais tias nej yuav txais tau, thiab nej yuav muaj tus Vaj Ntsuj Plig Dawb Huv nrog nej nyob, uas tshwm sim txhua tsav txhia yam uas tsim nyog rau noob neej.”5
Ntxiv rau kev thov Vajtswv, kev kawm vaj lug kub tiag tiag yuav pab nej txoj kev txawj tu neeg loj hlob tuaj. Nov yog Nws txoj kev cog lus: “Tsis txhob txhawj ua ntej hais tias nej yuav hais dab tsi; tiam sis khaws tej lus uas cawm neeg txoj sia cia rau hauv nej lub cim xeeb tsis tu ncua, thiab yuav muab qhov uas nej yuav tsum hais rau txhua tus neeg los rau nej nyob rau lub sij hawm ntawd kiag.”6
Yog li ntawd nej yuav siv sij hawm ntau thov Vajtswv thiab xav mus xav los txog tej yam ntawm sab ntsuj plig. Vajtswv yuav nchuav qhov tseeb rau nej thiab nej txoj kev txawj tu nej tsev neeg yuav loj tuaj.
Yuav muaj sij hawm thaum nej xav tias nej maj mam kawm tu neeg. Yuav tsum muaj kev ntseeg kom nyiaj mus tom ntej. Tus Cawm Seej tau hais tej lus no kom txhawb nqa nej hais tias:
“Yog li ntawd, tsis txhob nkees ua tej yam zoo, vim nej tab tom teeb lub hauv paus ntawm ib txoj hauj lwm loj. Thiab los ntawm tej yam me yuav muaj tej yam uas loj tawm los.
“Saib seb, tus Tswv kom neeg yuav tsum muaj lub siab thiab kev txaus siab ua; thiab cov uas txaus siab ua thiab mloog lus yuav noj tej uas zoo ntawm thaj av Xi-oos thaum hnub nyoog kawg no.”7
Qhov uas nej nyob no hmo no qhia tias nej txaus siab txais tau tus Tswv txoj kev caw kom nej tu lwm tus. Qhov no muaj tseeb rau txhua tus tsis hais tus hluas tshaj plaws los yog. Nej yeej yuav paub nej yuav tsum tu leej twg hauv nej tsev neeg. Yog nej thov Vatjswv tiag tiag, nej yuav xav txog ib lub npe los yog ib lub ntsej muag. Yog nej thov Vajtswv kom paub ua li cas los sis hais li cas, nej yuav txais kev teb. Txhua zaus nej mloog lus, nej lub hwj chim kom tu nej tsev neeg yuav loj tuaj. Nej yuav npaj thaum nej tu nej tus kheej cov me nyuam.
Tej zaum ib tug niam tsev uas muaj tub hluas ntxhais hluas yuav xav thov Vajtswv kom paub tu ib tug tub los sis tus ntxhais uas tsis xav txais nws txoj kev tu. Tej zaum nej yuav xav thov Vajtswv kom paub leej twg yuav muaj hwj huam pab nej tus me nyuam sab ntsuj plig. Vajtswv hnov thiab teb cov niam tsev uas txhawj xeeb tej lus thov, thiab Nws xa kev pab.
Tsis tas li ntawd, tej zaum ib tug pog nyob no mob siab vim nws cov me nyuam thiab cov xeeb leej xeeb ntxwv muaj kev nyuaj siab txhawj xeeb. Tej zaum muaj tej zaj txog tsev neeg hauv cov vaj lug kub yuav qhia nej thiab pab nej ua siab loj.
Yeej muaj ib zaj lus uas peb kawm tau los ntawm Evas thiab Adas, thiab txhua tsev neeg hauv Phau Ntawv Maumoos txog qhov uas yuav ua li cas thaum tu siab tias cov me nyuam tsis hloov siab hais tias: cia li hlub lawv tsis tu tsis tseg.
Peb muaj tus Cawm Seej tus yam ntxwv thaum Nws tu Nws Leej Txiv Saum Ntuj Ceeb Tsheej cov me nyuam ntsuj plig uas ntxeev siab. Txawm yog lawv thiab peb ua rau lwm tus mob, tus Cawm Seej tseem ncav tes.8 Nws tau hais nyob hauv 3 Nifais txog nws cov kwv tij thiab cov muam, uas Nws twb xav tu: “Auj nej cov neeg ntawm tsev neeg Ixayees … ntau zaus kuv twb sau nej los ib yam li ib tug poj qaib sau nws cov me nyuam los rau hauv nws qab tis, thiab tau tu nej.”9
Txawm nej laus npaum li cas los, nej tsev neeg zoo li cas los, thiab nej muaj kab lig kev cai dab tsi los, tus Cawm Seej yog tus yam ntxwv zoo tshaj plaws uas qhia nej tias nej yuav ua hauj lwm tseem ceeb npaum li cas kom tsom ntsoov rau kev kawm txoj moo zoo hauv tsev.
Thaum nej hloov tej yam ntxim saib ntxim ua hauv nej tsev neeg nej yuav muaj nej txoj kev siab hlub ntawd. Yuav ua rau nej loj hlob tuaj ntawm sab ntsuj plig. Thaum nej thov Vajtswv pab nej tsev neeg, nej yuav hnov nej txoj kev hlub thiab tus Cawm Seej txoj kev hlub lawv. Yuav muaj lub txiaj ntsim ntawm sab ntsuj plig no ntxiv zuj zus tuaj thaum nej nrhiav kom tau. Nej tsev neeg yuav paub tias nej hlub lawv thaum nej thov Vajtswv nrog kev ntseeg uas loj dua li qub.
Thaum nej tsev neeg sib sau ua ke nyeem vaj lug kub, nej twb tau nyeem lawm thiab thov Vajtswv txog tej ntawd kom npaj nej tus kheej. Nej twb tau nrhiav sij hawm thov Vajtswv kom tus Ntsuj Plig tshoov nej lub siab. Ces, thaum txog nej thib nyeem ntawv, nej tsev neeg yuav paub tias nej hlub Vajtswv thiab ntseeg Nws tej lus. Nws thiab Nws tus Ntsuj Plig yuav tu lawv.
Kev nchuav qhov tseeb yuav los rau txhua tsev neeg uas sib sau ua ke yog tias nej thov Vajtswv thiab npaj siab txais. Tej zaum nej yuav tsum siv zog thiab siv sij hawm, tiam sis yuav muaj txuj ci tseem ceeb. Kuv nco qab ib zaj lus uas kuv niam qhia kuv thaum kuv yog ib tug me nyuam. Kuv tseem nco txog daim qhia kev uas nws tau ua txog tus Thwj Tim Povlauj tej kev ncig mus. Kuv xav paub nws ua li cas ho nrhiav tau sij hawm thiab muaj dag zog ua li ntawd. Thiab txog hnub no kuv tau koob hmoov vim nws hlub tus Thwj Tim uas rau siab ntseeg ntawd.
Nej txhua tus yuav nrhiav kev kom pab txhawb nqa kev nchuav qhov tseeb rau nej tsev neeg nyob hauv tus Tswv lub Koom Txoos. Nej txhua tus yuav thov Vajtswv, kawm, thiab xav mus xav los kom paub tias nej yuav tsum ua li cas. Tiam sis kuv paub li no tiag: thaum nej sib koom nrog Vajtswv cov tub, nej txhua tus yuav muaj feem nrog qhov txuj ci tseem ceeb uas yog kev kawm thiab kev ua neej raws li txoj moo zoo uas yuav pab kom Ixayees sib sau ua ke sai sai thiab yuav npaj Vajtswv tsev neeg rau tus Tswv Yexus Khetos txoj kev rov qab los. Los ntawm Yexus Khetos lub npe dawb ceev, amees.