2010–2019
Kev Hloov Siab Los Ntseeg rau ntawm Leej Txiv Saum Ntuj Ceeb Tsheej thiab tus Tswv Yexus Khetos uas Tob Heev thiab Kav Ntev
Kaum Hli Ntuj Xyoo 2018

Kev Hloov Siab Los Ntseeg rau ntawm Leej Txiv Saum Ntuj Ceeb Tsheej thiab tus Tswv Yexus Khetos uas Tob Heev thiab Kav Ntev

Los ntawm Txwj Laug Quentin L. Cook

Ntawm Pawg Kaum Ob tug Thwj Tim

Peb lub ntsiab yog kom tej yam peb ua hauv tsev thiab tej yam peb ua tom lub Koom Txoos yuav sib luag zog kom peb muaj siab ntseeg ntau dua, hnov tau tus Ntsuj Plig zoo dua, thiab hloov siab los ntseeg tiag tiag rau ntawm Leej Txiv Saum Ntuj Ceeb Tsheej thiab tus Tswv Yexus Khetos.

Ib yam li Thawj Tswj Hwm Russell M. Nelson tau hais puag tas, lub Koom Txoos cov thawj coj tau rau rau siab ua hauj lwm ntev los lawm kom npaj qhia “nyob hauv tsev thiab lub Koom Txoos txhawb nqa kom kawm cov lus qhuab qhia, kom kev ntseeg muaj zog, thiab txhawb nqa kev teev tiam Vajtswv.” Thawj Tswj Hwm Nelson txawm tshaj tawm hais tias peb yuav hloov ib yam kom thiaj ncav tau “ib txoj kev tshiab kom muaj kev qhia txoj moo zoo hauv tsev thiab hauv lub Koom Txoos sib npaug.”1

Kom thiaj ncav tau tej hom phiaj no—uas yog Thawj Tswj Hwm Russell M. Nelson qhia txog thiab coj kev kom ua, thiab raws li Thawj Pawg Thawj Tswj Hwm thiab Pawg Kaum Ob tug Thwj Tim tau txiav txim siab yuav ua—peb yuav hloov lub caij sib ntsib thaum hnub Sunday raws li nram qab no, pib thaum lub Ib Hlis Ntuj 2019.

Lub Caij Sib Ntsib Thaum Hnub Sunday

Tej kev sib ntsib thaum Hnub Sunday yuav muaj kev sib ntsib 60 feeb txhua hnub Sunday kom noj lub cim nco txog, es kev sib ntsib no yuav tsom ntsoov tus Cawm Seej, txoj kab ke ntawm kev noj lub cim nco txog, thiab cov lus hais uas txhawb nqa sab ntsuj plig. Tom qab ntawd siv ob peb na this mus tom hoob kawm, lub Koom Txoos cov mej zeej yuav koom ib hoob kawm rau 50 feeb uas yuav hloov txhua Hnub Sunday.

  • Yuav muaj Hnub Caiv Kev Kawm Vaj Lug Kub thaum thawj hnub Sunday thiab hnub Sunday thib peb hauv ib lub hli.

  • Yuav muaj tej kev sib ntsib rau tej pawg Pov Thawj Hwj, Koom Haum Niam Tsev, thiab Koom Haum Ntxhais Hluas thaum hnub Sunday thib ob thiab hnub Sunday thib plaub.

  • Tej kev sib ntsib thaum hnub Sunday thib tsib yuav yog tus npisov coj.

Koom Haum Me Nyuam Yaus yuav sib ntsib txhua hnub Sunday thaum lub sij hawm 50 feeb no thiab yuav muaj ib lub sij hawm hu nkauj thiab tej hoob kawm thiab.

Daim Duab
Lub Caij Sunday

Hais txog lub caij sib ntsib thaum hnub Sunday, tau ntau xyoo lub Koom Txoos cov tuam thawj coj paub hais tias rau peb cov mej zeej ib txhia ces mus koom lub koom txoos tau peb teev tag nrho yeej nyuaj heev. Qhov no kuj muaj tseeb rau cov niam txiv uas muaj me nyuam me, cov me nyuam uas koom Koom Haum Me Nyuam Yaus, cov mej zeej laus, cov nyuam qhuav los ntseeg tshiab, thiab lwm tus neeg.2

Tiam sis yeej muaj ntau yam ntxiv rau txoj kev hloov no tsis hais qhov uas siv sij hawm tsawg dua thaum hnub Sunday. Thawj Tswj Nelson tau hais ua tsaug rau nej sawv daws rau qhov nej tau rau rau siab ua raws li nws cov lus caw nej yav tas los no, thiab vim yog nej ua li ntawd Vajtswv tej dej tej num tau mus zoo dua. Thawj Tswj Hwm Nelson thiab tag nrho cov thawj coj ntawm lub Koom Txoos puav leej xav kom ib tsoom niam txiv, me nyuam yaus, tub hluas, ntxhais hluas, cov laus, cov hluas, cov los ntseeg tshiab muaj kev xyiv fab ntau dua hauv txoj moo zoo—dhau los ntawm ib txoj kev coj uas qhia hauv tsev thiab lub Koom Txoos txhawb nqa. Lub ntsiab thiab tej koob hmoov ntawm txoj kev hloov no thiab lwm txoj kev hloov uas muaj tsis ntev tas los no yog:

  • Kev hloov siab los ntseeg rau ntawm Leej Txiv Saum Ntuj Ceeb Tsheej thiab tus Tswv Yexus Khetos thiab ntxiv zog rau txoj kev ntseeg rau ntawm Nkawd.

  • Ntxiv zog rau cov neeg thiab tsev neeg los ntawm tej txheej txheem qhia hauv tsev, uas lub Koom Txoos txhawb nqa uas pab yus ua neej zoo siab raws li txoj moo zoo zoo dua.

  • Saib Hnub Caiv rau nqi heev, es tsom ntsoov txoj kab ke ntawm lub cim nco txog.

  • Pab tag nrho Leej Txiv Saum Ntuj Ceeb Tsheej cov me nyuam nyob ob sab ntawm daim ntaub thaiv los ntawm kev qhia txoj moo zoo thiab txais tej kab ke thiab tej kev khi lus thiab tej koob hmoov ntawm lub tuam tsev.

Kev Kawm Txoj Moo Zoo uas Qhia hauv Tsev thiab lub Koom Txoos Txhawb Nqa

Lub caij sib ntsib thaum hnub Sunday cia peb muaj sij hawm ntxiv rau tsev neeg hmo ua ke los yog kev kawm txoj moo zoo nyob hauv tsev thaum hnub Sunday, los yog thaum lwm lub sij hawm raws li neeg thiab tsev neeg xaiv ua. Tej zaum muaj tau kev ua si rau tsev neeg hmo ua ke thaum hnub Monday los yog lwm lub sij hawm. Vim yog li no, cov thawj coj tseem yuav tsum tsis txhob teem tej kev sib ntsib thiab tej kev ua si tom lub Koom Txoos rau thaum hnub Monday tsaus ntuj. Txawm yog li ntawd los, lub sij hawm uas siv rau tsev neeg hmo ua ke, txoj kev kawm txoj moo zoo los yog tej kev ua si rau neeg thiab tsev neeg nyias yeej teem tau raws li nyias tej kev xav tau.

Daim Duab
Come, Follow Me—For Individuals and Families

Tej kev kawm txoj moo zoo hauv tsev neeg thiab ib leeg xwb tom tsev yuav muaj zog ntau dua los ntawm ib phau ntawv pab kawm tshiab hu ua Come, Follow Me resource for individuals and families uas phim tej yam uas qhia hauv Hnub Caiv Kev Kawm Vaj Lug Kub thiab Koom Haum Me Nyuam Yaus.3 Thaum lub Ib Hlis Ntuj, lub Koom Txoos cov tub hluas ntxhais hluas thiab cov laus thiab cov nyob hauv lub Koom Haum Me Nyuam Yaus yuav kawm Phau Tshiab. Phau ntawv pab kawm tshiab Come, Follow Me rau tib neeg thiab tsev neeg—kuj duav Phau Tshiab—yog npaj tseg kom pab cov mej zeej kawm txoj moo zoo hauv tsev. Nws piav hais tais: “Phau ntawv pab kawm no yog rau txhua tus neeg thiab txhua tsev neeg hauv lub Koom Txoos. Yog npaj tseg kom pab [peb] kawm txoj moo zoo zoo dua—txawm nyob [peb] ib leeg xwb los yog nrog [peb] tsev neeg. … Cov ntsiab tseem ceeb hauv phau ntawv pab kawm [tshiab] yog npaj raws li ib tug txheej txheem uas hloov txhua lub lim tiam.”4

Cov lus qhia hauv Koom Haum Me Nyuam Yaus los ntawm phau Come, Follow Me yuav ua raws li tib tug txheej txheem kawm no txhua lub lim tiam thiab. Cov hoob kawm Hnub Caiv Kev Kawm Vaj Lug Kub rau cov hluas thiab cov laus huv tib si yuav hloov kom txheem tau phau ntawv pab kawm tshiab Come, Follow Me thaum thawj hnub Sunday thiab hnub Sunday thib peb. Thaum hnub Sunday thib ob thiab thib plaub, Pawg Pov Thawj Hwj thiab Koom Haum Niam Tsev yuav yeej meem kawm cov lus los ntawm lub Koom Txoos cov thawj coj, es tsom ntsoov cov lus los ntawm cov yaj saub uas nyob niaj hnub nim no.5 Pawg Pov Thawj Hwj Aloos thiab cov ntxhais hluas yuav kawm txoj moo zoo thaum ob hnub Sunday ntawd.

Phau ntawv pab kawm hauv tsev muaj “Tswv Yim rau Kev Kawm Vaj Lug Kub hauv Tsev Neeg thiab Tsev Neeg Hmo Ua Ke.”6 Cov ntsiab tseem ceeb rau txhua lub lim tiam muaj tej tswv yim kawm thiab tej kev ua si zoo rau tib neeg thiab rau tsev neeg tib si. Phau ntawv pab kawm Come, Follow Me rau tib neeg thiab tsev neeg kuj muaj duab ntau uas yuav pab tib neeg thiab tsev neeg kawm zoo dua, twb yog cov me nyuam yaus thiab.7 Phau ntawv pab kawm tshiab no peb yuav muab pub rau txhua tsev neeg thaum Kaum Ob Hlis Ntuj xyoo no.

Thawj Tswj Hwm Nelson, hauv nws thawj zaj lus uas nws hais rau cov mej zeej ntawm lub Koom Txoos thaum lub Ib Hlis Ntuj, tau txhib kom peb taug kev ua raws li peb tej kev khi lus thiab npaj rau Yexus Khetos txoj Kev Rov Los Zaum Ob.8

Vim yog tej yam uas muaj los hauv lub ntiaj teb, yeej ntxim kom peb hloov siab los ntseeg tiag rau ntawm Leej Txiv Saum Ntuj Ceeb Tsheej thiab Yexus Khetos thiab Nws txoj Kev Theej Txhoj. Tus Tswv tau npaj peb, ib nqes dhau ib nqes, rau lub caij muaj xwm txheej phem uas peb nyob haud niaj hnub nim no. Tau ob peb xyoos no, tus Tswv tau coj peb los hais txog tej yam tseem ceeb heev xws li:

  • Saib Hnub Caiv thiab txoj kab ke dawb ceev ntawm lub cim nco txog rau nqi, uas peb hais txog ntau zaus tau peb xyoos lawm.

  • Raws li tus npisov kev coj, tej pawg txwj laug thiab Koom Haum Niam Tsev tsom ntsoov lub ntsiab ntawm lub Koom Txoos9 thiab pab cov mej zeej khi thiab ua raws li tej kev khi lus dawb ceev.

  • Kev txhawb nqa pab lwm tus neeg yog ib yam uas sawv daws zoo siab ua zoo dua.

  • Tej kev khi lus tom lub tuam tsev thiab tej kev tshawb nrhiav tsev neeg zaj keeb kwm tab tom rais los mus ua ib qho tseem ceeb ntawm txoj kev taug mus ua raws li tej kev khi lus.

Qhov kev hloov uas tshaj tawm tag kis no yog ib qho piv txwv ntxiv hais txog tej lus qhia uas kov yeej tau tej kev cov nyom hauv lub caij no.

Txog txij no lub Koom Txoos cov kev kawm vaj lug kub tau tsom ntsoov tej yam uas muaj los hauv lub Koom Txoos thaum hnub Sunday. Peb paub hais tias thaum peb muaj tej kev qhia zoo dua thiab muaj cov uas koom hoob kawm uas tau npaj rau sab ntsuj plig lawm, kev kawm vaj lug kub tom lub Koom Txoos thaum hnub Sunday yeej zoo dua ntais. Peb tau koob hmoov uas feem ntau tus Ntsuj Plig pab peb hloov siab los ntseeg zoo dua tom lub Koom Txoos.

Txoj kev kawm vaj lug kub hauv tsev neeg tshiab no yuav tsum pab tsev neeg coj txoj moo zoo thiab cwj pwm zoo dua hauv tsev neeg thiab rau lawv tus kheej thiab. Peb paub hais tias txoj kev hloov siab los ntseeg uas tob heev thiab kav ntev yuav muaj los hauv tsev neeg. Ntau xyoo dhau los, muaj kev tshawb fawb uas qhia peb tias rau cov tub hluas ntxhais hluas tej kev tshoov siab ntawm tus Vaj Ntsuj Plig Dawb Huv feem ntau muaj los thaum lawv kawm vaj lug kub thiab thov Vajtswv lawv tus kheej hauv tsev. Peb lub ntsiab yog kom tej yam peb ua hauv tsev thiab tej yam peb ua tom lub Koom Txoos yuav sib luag zoo kom peb muaj siab ntseeg ntau dua, hnov tau tus Ntsuj Plig zoo dua, thiab hloov siab los ntseeg tiag tiag rau ntawm Leej Txiv Saum Ntuj Ceeb Tsheej thiab tus Tswv Yexus Khetos.

Hais txog kev hloov no, yeej muaj qhov uas txhua tus neeg thiab txhua tsev neeg txiav txim siab tau saib yuav ua li cas thiaj nruab tau txoj kev kawm tshiab no rau hauv lawv lub neej. Piv txwv hais tias, txawm tias kev kawm no yeej yuav foom koob hmoov rau tag nrho txhua tsev neeg, los yeej tsim nyog rau cov hluas uas tsis tau yuav poj niam yuav txiv, cov tiav laus uas tsis muaj poj niam tsis muaj txiv, tej tsev neeg uas tsis yog mej zeej tag nrho, cov ntseeg tshiab,10 thiab lwm tus neeg sib sau ua ke kawm txoj moo zoo thiab ntxiv zog rau lawv tej kev ntseeg thaum lawv kawm ua ke kev kawm vaj lug kub tshiab no. Lawv cov uas xav ua li no ua tau tsis ua li cas.

Nyob ntau qhov chaw thoob ntiaj teb, cov mej zeej nyob me ntsis tsis mus tsev tom qab hnub Sunday tej kev sib ntsib kom noj ib pluag mov ua ke los yog sib raug zoo. Tsis muaj dab tsi hauv kev hloov uas tshaj tawm hnub uas yuav txiav qhov kev sib sau li ntawd hlo li.

Kom pab cov mej zeej npaj rau Hnub Caiv, tej pawg ntseeg twb xa ib tsab email, text, los yog tsab xa social media mus rau sawv daws hauv lawv pawg ntseeg thaum ob peb hnub ua ntej Hnub Caiv. Vim yog kev hloov uas peb tshaj tawm hnub no, peb yaum kom nej sib tiv tauj li no. Cov ntawv xa xov no yuav pab cov mej zeej nco qab txog hnub Sunday tej kev sib ntsib rau lub as thiv ntawd, thiab qhia tau lawv saib yuav kawm dab tsi, thiab txhawb nqa qhov uas sib tham txog txoj moo zoo hauv tsev. Tsis tas li ntawd xwb, tej kev sib ntsib thaum hnub Sunday rau cov neeg laus kuj yuav muab ntaub ntawv xov xwm pab ua rau tej kev kawm tom lub Koom Txoos thiab hauv tsev sib txuas zoo txhua lub as thiv.

Rau kev sib ntsib noj lub cim nco txog thiab lub sij hawm kawm hoob, peb yuav tsum ua tib zoo thov Vajtswv pab kom peb tsom ntsoov tej yam ntawm sab ntsuj plig ntau dua tej kev coj hauj lwm. Piv txwv hais tias, peb tshaj tawm tau tej kev tshaj tawm hauv tsab xa xov los yog luam tawm hauv ib daim ntawv. Txawm tias txoj kev sib ntsib noj lub cim nco txog yuav tsum muaj kev thov Vajtswv qhib thiab thov Vajtswv xaus, txoj kev sib ntsib thib ob tsuas thov Vajtswv xaus xwb los tau.11

Ib yam li tau hais lawm, txoj kev sib ntsib thaum hnub Sunday tshiab no yuav tsis pib mus txog thaum lub Ib Hlis Ntuj xyoo 2019. Nov yog vim ob peb yam. Ob yam tseem ceeb tshaj yog, qhov thib ib, kom muaj sij hawm faib tawm cov ntawv pab kawm Come, Follow Me rau tib neeg thiab tsev neeg thiab, qhov thib ob, kom tseg sij hawm rau ceg txheem ntseeg cov thawj tswj hwm thiab cov npisov kho tej caij sib ntsib kom cov ntseeg thiaj yuav sib ntsib tau ntxov dua.

Thaum peb cov ua thawj coj tau nrhiav kom tau kev tshwm sim, tej kev coj uas peb tau txais ob peb xyoos no yog kom ntxiv zog rau kev sib ntsib noj lub cim nco txog, saib Hnub Caiv rau nqi, thiab yaum thiab pab niam txiv thiab tib neeg ua rau lawv lub tsev ua ib qho chaw uas muaj tus ntsuj plig thiab kev ntseeg—ib qho chaw muaj kev zoo siab.

Tej Koob Hmoov Xav Tsis Thoob Li

Ces tej kev hloov no txhais li cas rau cov mej zeej ntawm Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg? Peb tso siab hais tias cov mej zeej yuav tau koob hmoov ntau nplua mias. Hnub Sunday yuav ua tau ib hnub kawm thiab qhia txoj moo zoo tom lub koom txoos thiab hauv tsev huv tib si. Thaum tib neeg thiab tsev neeg koom tej kev sib sab laj hauv tsev neeg, kawm tsev neeg zaj keeb kwm, txhawb nqa pab lwm tus neeg, teev tiam Vajtswv lawv tus kheej, thiab nyob ua ke ua ib tse neeg, ces Hnub Caiv yeej yuav yog ib hnub zoo kawg.

Daim Duab
Tsev neeg Carvalho

Muaj ib tse neeg nyob hauv Brazil uas koom ib ceg txheem ntseeg uas peb tau sim qhov kev pab kawm Come, Follow Me. Tus txiv tsev, Fernando, uas tau mus ua tub txib thiab nws thiab nws poj niam, Nancy, muaj plaub tug me nyuam, nws tau hais tias: “Thaum txoj kev kawm Come, Follow Me txawm muaj hauv peb ceg txheem ntseeg, kuv zoo siab heev, thiab kuv txawm xav rau kuv tus kheej hais tias ‘peb txoj kev kawm vaj lug kub hauv tsev yeej yuav hloov thiab.’ Tau muaj li ntawd hauv kuv lub tsev, thiab ua lub Koom Txoos ib tug thawj coj, kuv pom tias tau muaj li ntawd hauv lwm lub tsev thiab. … Tau pab peb sib tham txog cov vaj lug kub ntau hauv peb lub tsev. Kuv poj niam wb tau to taub zoo dua txog qhov uas peb tsev neeg kawm. … Tau pab peb … paub txoj moo zoo zoo dua, thiab ntxiv zog rau peb txoj kev ntseeg thiab zaj lus tim khawv. … Kuv ua tim khawv … hais tias kuv paub tus Tswv tau coj kev kom peb ua li no kom peb thiaj kawm tau tej ntsiab cai thiab tej lus qhuab qhia uas muaj hauv cov vaj lug kub. Ua li no yuav pab peb muaj kev tseeg, lus tim khawv, thiab qhov kaj hauv tsev neeg … hauv ib lub ntiaj teb uas poob lawm.”12

Nyob hauv tej ceg txheem ntseeg uas tau sim txoj kev tshiab no, tau muaj neeg coob heev uas nyiam txoj kev pab kawm tshiab no Come, Follow Me. Neeg coob heev hais tias lawv tsis nyeem cov vaj lug kub xwb, lawv rau rau siab kawm cov vaj lug kub. Thiab neeg coob heev hais tias txoj kev kawm no ntxiv zog rau kev ntseeg thiab tau pab pawg ntseeg ntau.13

Kev Hloov Siab Los Ntseeg uas Tob Heev thiab Kav Ntev

Lub hom phiaj ntawm tej kev hloov no yog kom cov laus cov hluas hloov siab los ntseeg yam tob heev thiab kav ntev. Thawj phab ntawv ntawm phau ntawv pab kawm no qhia hais tias: “Lub ntsiab ntawm tag nrho tej kev kawm thiab qhia txoj moo zoo yog peb peb hloov siab los ntseeg tiag thiab rais los mus ua zoo li Yexus Khetos. … Ua li no txhais tau tias peb vam khom Khetos hloov peb lub siab.”14 Qhov no “cev tes mus pab tus neeg lub siab thiab lub tsev hloov. Ua li no yuav tsum rau rau siab to taub thiab ua neej raws li txoj moo zoo. Yuav tsum muaj tus Vaj Ntsuj Plig Dawb Huv tshoov peb lub siab kom hloov siab los ntseeg tiag.”15

Lub hom phiaj tseem ceeb tshaj plaws thiab txoj koob hmoov zoo kawg nkaus los ntawm kev hloov siab los ntseeg tiag yog ua neeg tsim nyog txais tej kev khi lus thiab tej kab ke ntawm txoj kev ua raws li tej kev khi lus.16

Peb tso siab rau nej sib sab laj ua ke thiab nrhiav kom tau kev tshwm sim pab nruab tej kev hloov no hauv nej lub neej—es tsis txhob ua dhau qhov uas hais thiab tswj hwm tib neeg thiab tsev neeg. Yeej yuav muaj ntaub ntawv xov xwm ntxiv uas yuav tawm tuaj, suav ib tsab ntawv los ntawm Thawj Pawg Thawj Tswj Hwm.

Kuv ua tim khawv rau nej hais tias thaum Thawj Pawg Thawj Tswj Hwm thiab Pawg Kaum Ob tug Thwj Tim tau sib ntsib hauv lub tuam tsev, thiab tom qab uas peb tus yaj saub thov txog tus Tswv kom tau kev tshwm sim ua raws li tej kev hloov no, peb txhua tus tau hnov tus ntsuj plig tshoov peb tej siab tej ntsws pom zoo rau txoj kev hloov no. Russell M. Nelson yog peb tus Thawj Tswj Hwm thiab peb tus yaj saub. Tej kev tshaj tawm hnub no yuav coj tau koob hmoov los rau lawv cov uas ua raws li tej kev hloov no thiab nrhiav kom tau tus Vaj Ntsuj Plig Dawb Huv pab coj. Peb yuav nyob ze dua peb Leej Txiv Saum Ntuj Ceeb Tsheej thiab peb tus Tswv thiab tus Cawm Seej, Yexus Khetos, uas kuv ua tim khawv txog. Los ntawm Yexus Khetos lub npe, amees.

Lus Cim

  1. Russell M. Nelson, “Tej Lus Qhib Rooj Sab Laj,” Liahona, Kaum Ib Hlis Ntuj 2018, 8.

  2. Peb kuj paub hais tias, hauv lub xam khoo thiab ntau qhov chaw, tej kev sib ntsib tau ntaub ntawv xov xwm, kev kawm ntawv, thiab kev ua si tau luv zog.

  3. Kev pab kawm no yuav muaj hauv ntawv thiab hauv koospistawj.

  4. Come, Follow Me—For Individuals and Families (2019), vi.

  5. Saib “Come, Follow Me—For Elders Quorum and Relief Society,” Liahona, Tsib Hlis Ntuj 2018, 140. Tej kev sib tham txog lub tuam rooj sab laj tej lus hais yuav yog thaum hnub Sunday thib ob thiab thib plaub, tsis yog thaum hnub Sunday thib ob thiab thib peb.

  6. Saib Come, Follow Me—For Individuals and Families, 4. Cov tib neeg thiab tsev neeg yuav txiav txim siab saib tej qhov twg yuav yog kev kawm txoj moo zoo hauv tsev, tsev neeg hmo ua ke, thiab tej kev ua si twg yuav yog tsev neeg hmo ua ke (uas neeg feem coob tab tom hu ua hmo ua ke nkaus xwb. Vim tib neeg thiab tsev neeg yuav txiav txim siab txog qhov no, hmo ua ke thiab tsev neeg hmo ua ke yeej zoo ib yam thiab yog txhais ib yam li hauv tej kev tshaj tawm uas tau hais no.

  7. Saib Come, Follow Me—For Individuals and Families, 29.

  8. Saib Russell M. Nelson, “Thaum Peb Mus Tom Ntej Ua Ke,” Liahona, Plaub Hlis Ntuj 2018, 7.

  9. Saib Handbook 2: Administering the Church (2010), 2.2. Tej kev lav ris uas yog los saum ntuj los “suav tej kev pab cov mej zeej ua raws li Yexus Khetos txoj moo zoo qhia, muab haiv neeg Ixayees sib sau ua ke dhau ntawm cov tub txib tej hauj lwm, saib xyuas cov neeg pluag thiab cov neeg txom nyem, thiab pab tsa cov neeg tuag kom nto thaum ua cov tuam tsev thiab ua tej kab ke sawv lawv cev.” Kuj saib phau Lus Qhuab Qhia thiab Kev Khi Lus 110, uas hais txog txoj kev txum tim tej yawm sij uas tseem ceeb rov qab los.

  10. Ua tib zoo saib xyuas cov me nyuam uas muaj niam muaj txiv uas tsis yog mej zeej los yog tsis tshua tuaj tshawj. Cov uas tsis muaj poj niam muaj txiv kuj ntsib tau nrog ib tse neeg yog tias zoo rau txhua tus.

  11. Tej kev qhib txoj kev sib ntsib feem ntau yuav tsis yog ib yam uas ua thaum lub sij hawm rau txoj kev sib ntsib thib ob.

  12. Tsev neeg Fernando thiab Nancy de Carvalho, Brazil.

  13. Cov neeg thiab cov tsev neeg uas tau koom txoj kev sim, feem ntau, tau kawm txoj moo zoo ntau dua thiab tau kawm vaj lug kub ua ke thiab sib tham txog txoj moo zoo zoo dua hauv tsev. Lawv qhia tias lawv sib tham txog txoj moo zoo ntau dua nrog lawv tsev neeg thiab cov mej zeej tom lawv pawg ntseeg thiab nyiam qhov uas lawv kawm tib co vaj lug kub uas lawv tsev neeg kawm. Qhov no muaj tseeb tiag hais txog cov hluas.

  14. Come, Follow Me—For Individuals and Families, v; kuj saib 2 Kauleethaus 5:17.

  15. Come, Follow Me—For Individuals and Families, v.

  16. Saib Russell M. Nelson, “Thaum Peb Mus Tom Ntej Ua Ke,” 7.