Peb Hluav Taws ntawm Kev Ntseeg
Rau cov uas nrhiav kev ntseeg thiab cia li ua neej raws li kev ntseeg ntawd, kaj ntug txoog ntawm kev ntseeg yuav los zuj zus los sis rov qab los.
Cov kwv tij thiab cov muam, qhov uas peb txais kev tshwm sim los saum ntuj los ntxiv dhau los ntawm Thawj Tswj Hwm Russell M. Nelson thiab peb cov thawj coj ntawm lub Koom Txoos uas qhia kom peb ua neej tshiab thiab dawb huv ntxiv,1 nyob hauv tsev thiab nyob hauv lub koom txoos, kawg siab kawg ntsws kawg dag kawg zog yeej yog ib qho zoo kawg yom?
Nej puas tau muaj cib fim ua ib yam dab tsi tshiab uas nej tsis tau npaj siab ua los sis xav tias nej tsis tsim nyog ua tiam sis nej tau koob hmoov vim nej tau sim ua?
Kuv twb xav li ntawd. Nov yog ib zaj lus.
Ob peb xyoos tas los, Txwj Laug Richard G. Scott, ib tug hauv Pawg Kaum Ob tug Thwj Tim, tau ua siab dawb caw kuv hais tias, “Gerrit, koj puas xav pleev kua kos duab nrog kuv?”
Txwj Laug Scott hais tias kev pleev kua kos duab tau pab nws saib thiab tsim tej yam tshiab. Nws tau sau hais tias: “Cia li sim ua kom txawj tsim tej yam tshiab, txawm yog tsis tshua txawj ua los yog. … Kev tsim tej yam tshiab yuav ua rau nej muaj siab xav ua tus Tswv tsaug rau nej lub neej thiab tej yam uas Nws tau tsim nyob hauv nej. … Yog nej muaj tswv yim, ces nej yuav xaiv ua ib yam uas nej tsis tas siv sij hawm ntau ua.”2
Thawj Tswj Hwm Henry B. Eyring piav hais tias nws nyiam kos duab vim yog los ntawm “kev hlub” xws li “kev hlub ntawm tus Tsim Ntuj Tsim Teb uas xav kom Nws cov me nyuam los ua neeg zoo li Nws—xav kom lawv tsim thiab ua tej yam tshiab.”3 Tej yam uas Thawj Tswj Hwm Eyring tsim li no qhia txog “kev muaj zeem muag ntawm sab ntsuj plig txog kev ua tim khawv thiab kev ntseeg.”4
Thawj Tswj Hwm Boyd K. Packer cov duab qhia txog ib zaj lus tseem ceeb ntawm txoj moo zoo: “Vajtswv yog tus uas Tsim Ntuj Tsim Teb thiab txhua yam nyob haud, thiab tag nrho lub ntiaj teb ua tim khawv txog tej uas Vajtswv tau tsim, thiab txhua tsav txhua yam hauv lub ntiaj teb, txuj ci science, thiab Yexus Khetos txoj moo zoo los yeej sib haum.”5
Amas ua tim khawv tias, “Txhua yam qhia tias muaj ib tug Vajtswv.”6 Peb cov me nyuam hauv lub Koom Haum Me Nyuam Yaus hu nkauj hais tias, “Thaum kuv hnov tus noog hu nkauj zoo zoo los sis ntsia lub ntuj xim xiav … kuv zoo siab kuv nyob hauv lub ntiaj teb zoo nkauj uas Leej Txiv Saum Ntuj Ceeb Tsheej tsim rau kuv.”7 Tus kws sau ntawv Victor Hugo zoo siab hais tias “kev txheeb ze ntawm tej yam thiab tib neeg nyob hauv lub ntiaj teb tag nrho, tsis hais lub hnub thiab kab me me los yog. … Txhua tus noog uas ya saum nruab ntug tuav txoj kev nyob mus ib txhis hauv lawv kaus taw. … Ib qho nebula yeej yog tsev ntsaum ntawm cov hnub qub.”8
Li ntawd kuv thiaj li rov qab hais txog Txwj Laug Scott cov lus caw kuv.
Kuv teb hais tias, “Txwj Laug Scott, kuv yeej xav txawj tsim tej yam tshiab thiab txawj saib li koj hais. Kuv zoo siab xav txog qhov uas Leej Txiv Saum Ntuj Ceeb Tsheej kos duab nrog cov huab thiab txhua yam xim ntawm lub ntuj thiab cov dej. “Tiam sis”—ces kuv nres tsis hais lus ib me ntsis—es kuv hais tias, “Txwj Laug Scott, kuv tsis muaj txuj ci pleev kua kos duab. Kuv txhawj tias yuav ua rau koj dhuav thaum koj sim qhia kuv.”
Txwj Laug Scott luag nyav thiab teem sij hawm rau wb sib ntsib. Thaum txog hnub wb yuav sib ntsib, nws tau npaj cov ntawv, cov kua xim, thiab tej tug pleev kua. Nws tau kos ob peb txoj kab rau cov ntawv thiab pab kuv pleev kua.
Wb twb siv nws daim duab zoo nkauj hu ua Campfire at Sunset ua yam ntxwv rau wb. Thaum wb kos duab, wb tau sib tham txog kev ntseeg—hais tias thaum peb saib txoj kev kaj thiab qhov sov ntawm hluav taws, ua rau kev tsaus ntuj thiab kev tsis paub meej ploj mus—tej lub sij hawm thaum peb nyob peb ib leeg tas ib hmo, hluav taws ntawm peb txoj kev ntseeg ua rau peb cia siab thiab nplij peb lub siab. Thiab kaj ntug yeej los. Peb lub hluav taws ntawm kev ntseeg—tej uas peb raug, nco ntsoov, thiab keeb kwm ntawm kev ntseeg Vajtswv txoj kev zoo thiab tej kev siab hlub hauv peb lub neej—twb txhawb peb dag zog kom dhau hmo ntuj.
Kuv ua tim khawv tias—rau cov uas nrhiav kev ntseeg thiab cia li ua neej raws li kev ntseeg ntawd—kaj ntug txoog ntawm kev ntseeg yuav los zuj zus los sis rov qab los. Txoj kev kaj yuav los thaum peb xav tau thiab thaum peb nrhiav, thaum peb ua siab ntev thiab ua raws li Vajtswv cov lus txib, thaum peb qhib siab rau Vajtswv txoj kev tshav ntuj, txoj kev kho kom zoo, thiab Nws tej kev khi lus.
Thaum wb pib pleev kua kos duab, Txwj Laug Scott yaum kuv hais tias, “Gerrit, txawm kawm ib zaug xwb los koj yuav kos duab txog ib yam uas koj yuav xav ceev cia thiab nco ntsoov.” Txwj Laug Scott hais yog lawm. Kuv nyiam nyiam daim duab txog wb hluav taws ntawm kev ntseeg uas Txwj Laug Scott pab kuv kos. Kuv yeej ib txwm tsis txawj kos duab thiab kuv tseem tsis tshua txawj, tiam sis kev nco ntsoov txog peb lub hluav taws ntawm kev ntseeg muaj tsib qho uas pab txhawb nqa peb.
Qhov thib ib, peb lub hluav taws ntawm kev ntseeg pab txhawb nqa peb kom nrhiav tau kev xyiv fab thaum tsim tej yam uas zoo.
Muaj kev xyiv fab thaum peb kawm thiab ua tej yam tshiab uas tsim nyog. Qhov no yeej muaj tseeb thaum peb tso siab thiab muaj kev ntseeg Leej Txiv Saum Ntuj Ceeb Tsheej thiab Nws Leej Tub, Yexus Khetos. Peb hlub tsis tau peb tus kheej kom cawm peb tus kheej. Tiam sis Leej Txiv Saum Ntuj Ceeb Tsheej hlub peb tshaj plaws thiab paub peb zoo dua li peb hlub thiab paub peb tus kheej. Tsim nyog uas peb tso siab rau tus Tswv thiab tsis txhob tso siab rau peb lub tswv yim.9
Puas muaj ib lub sij hawm thaum nej yog tib tug uas tsis tau txais kev caw ua koob tsheej txog lwm tus hnub yug?
Nej puas yog tus uas luag xaiv kawg, los sis tsis tau xaiv koj thaum lawv faib ua ob peb pawg?
Nej puas tau npaj rau kev xeem ntawv, xam phaj rau ib txoj hauj lwm, ib lub cib fim uas nej xav tau—es nej xav tias nej ua tsis zoo hlo li.
Nej puas tau thov Vajtswv kom sib raug zoo nrog lwm tus, es txawm yog li cas los, tsis tau muaj li ntawd?
Nej puas muaj mob uas kav ntev, nej tus khub tau tso nej tseg, los sis nej txhawj xeeb txog nej tsev neeg?
Tus Cawm Seej paub txog peb tej xwm txheej. Thaum peb siv peb txoj kev ywj siab uas Vajtswv pub rau peb thiab siv txhua yam peb muaj kom txo hwj chim thiab muaj kev ntseeg, ces peb tus Cawm Seej, Yexus Khetos, pab tau peb kov yeej tej teeb meem hauv lub neej no thiab muaj kev xyiv fab. Kev ntseeg yeej yog kev xav tau thiab kev xaiv kom ntseeg. Kev ntseeg kuj yog los ntawm kev ua raws li Vajtswv tej lus txib, uas Nws foom koob hmoov pub rau peb, thaum peb taug txoj kev ntawm Nws tej kev khi lus.
Thaum peb xav tias peb tsis paub meej, peb nyob peb ib leeg, peb chim siab, npau taws, poob siab, los sis xav tias peb nyob deb ntawm Vajtswv thiab Nws lub Koom Txoos, tej zaum peb yuav tsum siv zog thiab muaj kev ntseeg me ntsis ntxiv kom rov qab taug tau txoj kev ntawm Nws tej kev khi lus. Tiam sis ua li ntawd los yeej muaj nqis heev! Thov nej los, los sis rov qab los cuag tus Tswv Yexus Khetos! Vajtswv txoj kev hlub yeej muaj zog dua li kev tuag tej hlua—tsis hais ntawm sab cev nqaij daim tawv los sis ntawm sab ntsuj plig.10 Peb tus Cawm Seej txoj Kev Theej Txhoj yeej nyob mus ib txhis. Peb txhua tus ua yuam kev thiab ua tsis yog. Tej zaum, rau ib ntu, peb yuav poob zoo. Vajtswv hlub peb thiab nplij peb lub siab hais tias, txawm peb nyob qhov twg los txawm peb tau ua li cas los, peb yeej muaj cib fim rov qab mus cuag Nws. Nws tos txais peb muab peb puag.11
Qhov thib ob, peb lub hluav taws ntawm kev ntseeg ua rau peb txawj hnov tus Ntsuj Plig kom txawj txhawb pab lwm tus nrog rau tej kev tshiab uas zoo thiab dawb huv dua li qub.
Ua kev txhawb pab li no yuav ua rau peb pom tau txuj ci tseem ceeb thiab muaj cov koob hmoov los ntawm peb tej kev khi lus—yog qhov uas peb muaj Vajtswv txoj kev hlub thiab xav txhawb pab lwm tus los ntawm txoj kev hlub ntawd.
Tsis ntev tas los, kuv tus poj niam thiab kuv wb tau ntsib ib tug txiv tsev thiab ib tsev neeg uas tau koob hmoov vim ib tug tuav lub pov thawj hwj uas rau siab ntseeg tau los nrog lawv tus npisov tham thiab nug seb puas cia nws ua tus khub mus qhia tom tsev nrog tus txiv tsev no. Tus txiv tsev no tsis tshua muaj siab ntseeg thiab tsis xav mus qhia tom tsev. Tiam sis thaum tus txiv tsev no lub siab hloov, nws thiab tus tij laug uas tuav lub pov thawj hwj no pib mus xyuas “nkawd” tej tsev neeg. Ib zaug tom qab nkawd twb mus qhia tom tsev, nws tus poj niam—uas kuj tsis mus koom lub koom txoos thaum ntawd-—nws nug nws tus txiv seb zoo li cas. Tus txiv tsev lees hais tias, “Tej zaum kuv hnov dab tsi hauv kuv lub siab”—ces nws twb mus rau hauv chav ua mov haus cawv beer.12
Tiam sis tom qab ntawd, muaj kev tshoov siab, muaj neeg los txhawb pab nws, nws hloov siab, npaj mus rau lub tuam tsev, los rau lub koom txoos, thiab ua kev cai sib khi ua ib tsev neeg hauv lub tuam tsev dawb huv. Cia li xav seb cov me nyuam thiab cov xeeb leej xeeb ntxwv zoo siab npaum li cas rau lawv niam thiab txiv thiab rau tus khub txhawb pab uas los ua ib tug phooj ywg rau lawv txiv kom mus hlub thiab txhawb pab lwm tus.
Qhov thib peb txog lub hluav taws ntawm kev ntseeg uas txhawb peb lub siab: kev xyiv fab thiab cov koob hmoov los thaum peb xav hlub tus Tswv thiab lwm tus kawg siab kawg ntsws.
Cov vaj lug kub caw peb tso peb tus kheej rau ntawm lub thaj ntawm kev hlub thiab kev pab lwm tus. Nyob hauv Phau Qub, phau 2 Kev Cai qhia peb kom “hlub tus Tswv nej tus Vajtswv” kawg siab kawg ntsws, kawg dag kawg zog.13 Yausuas ntuas hais tias, “Hlub tus Tswv uas yog nej tus Vajtswv, ua raws li nws siab nyiam, mloog nws lus, muab siab npuab nws thiab ua nws tes hauj lwm kawg nej lub siab lub ntsws.”14
Nyob hauv Phau Tshiab, peb tus Cawm Seej qhia txog ob lo lus txib tseem ceeb: “Hlub tus Tswv uas yog koj tus Vajtswv kawg siab kawg ntsws, kawg plab kawg plawv thiab kawg lub dag lub zog, … thiab hlub koj tej kwv tij zej zog ib yam li koj hlub koj lub cev.”15
Nyob hauv Phau Ntawv Maumoos: Ib zaj Lus Tim Khawv Ntxiv txog Yexus Khetos, tus Vaj Ntxwv Npeyamis ua hauj lwm “nrog tag nrho lub dag zog ntawm nws lub cev thiab tej peev xwm ntawm tag nrho nws lub siab” thiab tau tsim kev thaj yeeb hauv thaj av.16 Nyob hauv phau Lus Qhuab Qhia thiab Kev Khi Lus, ib yam li txhua tus tub txib paub, tus Tswv hais kom peb ua hauj lwm rau Nws “kawg [peb] lub siab lub ntsws thiab lub dag lub zog.”17 Thaum Tsoom Haiv Neeg Ntseeg mus rau hauv Jackson County, tus Tswv tau txib lawv kom hwm Hnub Caiv los ntawm qhov uas lawv hlub “tus Tswv [lawv] tus Vajtswv kom kawg [lawv] lub siab thiab [lawv] lub dag lub zog; thiab [lawv] yuav tsum ua hauj lwm rau nws los ntawm Yexus Khetos lub npe.”18
Peb zoo siab vim tus Tswv caw peb siv tag nrho peb lub siab nrhiav tej kev dawb huv kom hlub Vajtswv thiab hlub cov nyob ib puag ncig peb thiab kom ntxiv dag zog rau peb txoj kev ntseeg Leej Txiv Saum Ntuj Ceeb Tsheej thiab Yexus Khetos nyob hauv tsev thiab nyob hauv lub koom txoos.
Qhov thib plaub, peb lub hluav taws ntawm kev ntseeg pab peb ua raws li tej txheej txheem ntawm kev ua neej ncaj ncees uas ua rau peb txoj kev ntseeg thiab txoj kev txawj hnov sab ntsuj plig muaj zog.
Tej cwj pwm dawb huv, tej txheej txheem ncaj ncees, los sis tej yam ntxwv no ib txhia yog kev thov Vajtswv; kev kawm vaj lug kub; kev yoo mov; kev nco txog peb tus Cawm Seej thiab tej kev khi lus los ntawm kab ke txais lub cim nco txog; kev faib cov koob hmoov ntawm txoj moo zoo los ntawm kev ua tub txib, kev ua hauj lwm hauv lub tuam tsev thiab tsev neeg zaj keeb kwm, thiab lwm yam kev pab; kev sau ib phau ceev xwm txheej; thiab li ntawd.
Thaum tej txheej txheem ncaj ncees thiab tej kev xav tau ntawm sab ntsuj plig koom ua ib ke, ces lub sij hawm no thiab yav nyob mus ib txhis los ua ib ke thiab. Muaj txoj kev kaj thiab txoj sia ntawm sab ntsuj plig thaum peb ua tib zoo coj raws li peb ntseeg ua rau peb nyob ze dua li peb Leej Txiv Saum Ntuj Ceeb Tsheej thiab peb tus Cawm Seej, Yexus Khetos. Thaum peb nyiam ua raws nraim li tej lus ntawm txoj kev cai thiab lub ntsiab huv tib si, ces tej yam uas nyob mus ib txhis yuav teev rau hauv peb lub siab ib yam li lub lwg dej rau hauv ntiaj teb.19 Thaum peb mloog lus txhua hnub thiab haus cov dej uas cawm txoj sia, peb nrhiav tau tej lus teb, kev ntseeg, thiab lub zog kom kov yeej tej teeb meem niaj hnub nrog lub siab ntev, lub zeem muag, thiab kev xyiv fab.
Qhov thib tsib, thaum peb ua raws li tej txheej txheem zoo thiab nrhiav tej kev tshiab kom hlub Vajtswv thiab pab lwm tus npaj ntsib Nws, peb lub hluav taws ntawm kev ntseeg pab tau peb nco ntsoov tias kev los ua neeg zoo tag nrho yog los ntawm Khetos, tsis yog los ntawm peb tus kheej los sis los ntawm neeg ntiaj teb tej kev xav.
Vajtswv tej lus caw peb yeej yog los ntawm kev hlub vim Yexus Khetos yog “txoj kev, qhov tseeb, thiab txoj sia.”20 Rau cov uas ris nra hnyav, Nws caw lawv “Los cuag kuv,” thiab rau cov uas los cuag Nws, Nws cog lus tias, “Kuv yuav cia nej so.”21 “Cia li los cuag Khetos, thiab cia li los ua neeg zoo tag nrho dhau los ntawm nws, … hlub Vajtswv kawg nej lub siab thiab lub dag lub zog, ces nws txoj kev tshav ntuj yeej txaus rau nej, xwv kom nws txoj kev tshav ntuj yuav cia nej los ua neeg zoo tag nrho dhau los ntawm Khetos.”22
Nyob hauv tej lus no “nws txoj kev tshav ntuj yuav cia nej los ua neeg zoo tag nrho dhau los ntawm Khetos” los muaj kev nplij siab, kev kaj siab lug, thiab kev cog lus kom peb ntseeg thiab tso siab rau tus Tswv tsis hais thaum peb raug tej yam uas peb tsis xav tau los sis tsis tsim nyog rau peb raug vim peb tsis tau ua txhaum los yog, tsis hais tom qab peb tau ua zoo npaum li peb ua tau los yog.
Peb txhua tus muaj tej lub sij hawm thaum peb xav tias peb tsis zoo, tsis paub zoo, thiab peb tsis tsim nyog. Tiam sis thaum peb rau siab hlub Vajtswv thiab txhawb pab rau peb cov neeg zej zog, peb yuav paub tias Vajtswv hlub peb thiab txais kev tshoov siab tshiab rau peb lub neej kom ua neeg dawb huv ntxiv.
Nrog kev khuv leej, peb tus Cawm Seej txhawb nqa peb thiab cog lus tias peb yuav muaj peev xwm “txiv mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus”23 Khetos cov lus qhuab qhia, peb tus Cawm Seej txoj Kev Theej Txhoj, thiab qhov uas peb ua raws nraim li Nws tej kev khi lus kawg siab kawg ntsws yuav pab peb paub Nws txoj kev tseeb thiab tso peb dim.24
Kuv ua tim khawv tiasYexus Khetos txoj moo zoo uas muaj txhij txhua thiab Nws txoj hau kev zoo siab txum tim rov qab los nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, hauv cov vaj lug kub dawb huv, thiab cov yaj saub txij thaum tus Yaj Saub Yauxej Xamiv mus txog Thawj Tswj Hwm Russell M. Nelson puav leej qhia txog tej no. Kuv ua tim khawv tias Nws tej kev khi lus yuav ua rau peb txais tau lub txiaj ntsim zoo tshaj plaws uas peb Leej Txiv Saum Ntuj Ceeb Tsheej cog lus rau peb hais tias: “Nej yuav tau txoj sia nyob mus ib txhis.”25
Thov kom peb txais tau Nws cov koob hmoov thiab txoj kev xyiv fab thaum peb lub hluav taws ntawm kev ntseeg ua rau peb lub siab sov so thiab muaj kev cia siab, kuv thov li no los ntawm Yexus Khetos lub npe dawb huv, amees.