Sim, Sim, Sim
Tus Cawm Seej tab tom tso Nws lub npe rau hauv nej lub siab. Thiab nej hnov Khetos txoj kev hlub dawb paug rau lwm tus neeg thiab nej tus kheej.
Kuv cov kwv tij thiab cov muam, kuv zoo siab vim kuv muaj lub cib fim no hais lus rau nej. Lub rooj sab laj no tau txhawb nqa thiab raug kuv lub siab heev. Tus Vaj Ntsuj Plig Dawb Huv tau muab cov nkauj uas lawv hu thiab tej lus uas sawv daws tau hais cog rau hauv peb tej siab tej ntsws. Kuv thov Vajtswv kom tib tug Ntsuj Plig ntawd yuav coj kuv tej lus los rau hauv nej lub siab thiab.
Ntau xyoo tas los lawm, kuv tau ua tus pab cuam thib ib rau koog chaw tus thawj tswj hwm tim sab hnub tuaj hauv Teb Chaws Amelikas. Muaj ntau lub sij hawm, thaum uas peb tsav tsheb mus xyuas peb tej ceg ntseeg me me, nws hais rau kuv tias, “Hal, thaum peb ntsib leej twg, yog peb ua zoo rau lawv ib yam li lawv tab tom muaj teeb meem loj ces, kab hais tias ib nrab sij hawm ces peb yuav xav tau yog lawm lauj.” Tsis yog hais tias nws hais yog lawm xwb, tiam sis kuv twb kawm tau ntau xyoo no hais tias nws kwv yees tsawg heev thiab. Hnub no kuv xav txhawb nqa nej thaum nej raug tej teeb meem no.
Vajtswv tus uas hlub peb tau tsim peb lub neej hauv ntiaj teb no kom thiaj sim tau peb lub siab thiab pab peb txhua leej txhia tus tau loj hlob tuaj. Nej yeej nco qab Vajtswv cov lus hais txog Nws cov me nyuam thaum Tsim Ntuj Tsim Teb raug hais tias: “Thiab peb yuav sim lawv seb, lawv puas kam ua txhua yam uas tus Tswv lawv tus Vajtswv txib lawv ua.”1
Txij thaum chiv keeb los, tej kev sim siab yeej tsis yooj yim. Peb raug teeb meem vim peb lub cev txawj ploj txawj tuag. Peb sawv daws nyob hauv ib lub ntiaj teb uas Dab Ntxwg Nyoog haj yam siv zog los tawm tsam qhov tseeb thiab peb txoj kev zoo siab. Tej thaum nej yuav xav hais tias lub ntiaj teb thiab nej lub neej haj yam muaj kev kub ntxhov xwb.
Kuv xav qhia nej li no: tus Vajtswv uas hlub nej uas cia nej raug tej kev sim siab no kuj tau npaj ib txoj hau kev rau nej tau nyiaj mus dhau tej no thiab. Leej Txiv Saum Ntuj Ceeb Tsheej hlub neeg ntiaj teb kawg Nws thiaj txib Nws Tib Leeg Tub los pab peb.2 Nws tus Tub, Yexus Khetos, tau pub Nws txoj sia rau peb. Yexus Khetos tau ris tag nrho peb tej txhaum hauv lub Vaj Khexemanes thiab saum tus ntoo khaub lig. Nws raug txhua yam kev nyuaj siab, kev mob siab, thiab tej yam uas kawj los ntawm peb tej kev txhaum xwv kom Nws yuav nplij tau thiab ntxiv zog rau peb thaum peb mus dhau txhua txoj kev sim siab hauv lub neej no.3
Nej nco qab hais tias tus Tswv tau hais rau Nws cov tub qhev hais tias:
“Leej Txiv thiab kuv wb yog ib tug. Kuv nrog Leej Txiv thiab Leej Txiv nrog kuv; thiab rau qhov nej tau txais yuav kuv, nej twb nrog kuv thiab kuv twb nrog nej.
“Yog li ntawd, kuv nyob nrog nraim nej, thiab kuv yog tus tswv yug yaj zoo, thiab yog lub pob zeb ntawm Ixayees. Tus uas cog rau saum lub pob zeb no yuav tsis vau ib zaug li.”4
Peb tus yaj saub, Thawj Tswj Hwm Russell M. Nelson, kuj tau tau nplij peb siab ib yam nkaus. Tsis tas li ntawd xwb, nws piav hais tias peb muaj cuab kav cog rau ntawm lub pob zeb thiab tso tus Tswv lub npe rau ntawm peb lub siab kom pab coj peb mus dhau peb tej kev cov nyom.
Nws hais tias: “Txawm nej raug kev nyuaj siab tas sim no los, cia li nco qab ntsoov hais tias, lub neej no yeej tsis yooj yim li. Yuav tsum raug kev cov nyom thiab kev nyuaj siab hauv lub neej no. Thaum nej nco qab hais tias ‘yeej tsis muaj ib yam dab tsi uas Vajtswv yuav ua tsis tau li’ (Lukas 1:37), nej yuav tsum paub tias Nws yog nej Leej Txiv. Nej yog ib tug tub los sis ntxhais uas raug tsim los muaj yam ntxwv zoo li Nws, es yog tias nej uas neeg tsim nyog ces yuav txais kev tshwm sim los pab nej ua tej yam ncaj ncees. Nej muaj cai ris tus Tswv dawb huv lub npe. Nej yuav tsim nyog hais lus sawv cev rau Vajtswv lub npe uas dawb ceev (saib Lus Qhuab Qhia thiab Kev Khi Lus 1:20).”5
Thawj Tswj Hwm Nelson cov lus pab peb nco txog lo lus cog tseg hauv zaj lus thov Vajtswv rau lub cim nco txog, ib txoj kev cog lus uas peb Leej Txiv Saum Ntuj Ceeb Tsheej yuav ua raws yog peb ua raws li lo lus cog tseg ntawd.
Mloog cov lus uas hais tias: “Au Vajtswv, Leej Txiv tus uas Nyob Mus Ib Txhis, peb thov koj ntawm koj Leej Tub, Yexus Khetos lub npe, kom koj foom koob hmoov thiab tshwj cov mov mog no tseg cia kom dawb huv rau lawv sawv daws cov tau noj; kom lawv cov uas tau noj kom nco txog koj Leej Tub lub cev, thiab ua tim khawv rau koj, Au Vajtswv, Leej Txiv tus uas Nyob Mus Ib Txhis, kom lawv txaus siab txais koj Leej Tub lub npe, thiab nco ntsoov txog nws, thiab coj raws li nws tej lus txib uas nws tau muab rau lawv; kom lawv thiaj li yuav muaj nws Leej Ntsuj Plig niaj hnub nrog lawv nyob. Amees.”6
Txhua zaus peb hais lo lus amees thaum lawv hais zaj lus thov Vajtswv ntawd rau peb, peb thiaj cog lus hais tias thaum peb noj daim khob cij peb lees hais tias peb kam ris Yexus Khetos lub npe dawb huv, yuav nco ntsoov txog nws tas mus li, thiab yuav coj raws li Nws cov lus txib. Peb thiaj tau lus cog tseg hais tias peb yuav muaj Nws tus Ntsuj Plig nrog nraim peb nyob tas mus li. Vim muaj cov lus cog tseg no, tus Cawm Seej thiaj yog lub pob zeb uas peb yuav sawv tau saud es muaj kev puaj phais thiab tsis tas yuav ntshai tej kev cua daj cua dub uas peb yuav raug.
Thaum kuv muab tej kev khi lus thiab tej koob hmoov uas cog lus tseg no xav mus xav los, kuv thiaj xav paub seb qhov uas peb kam los ris Yexus Khetos lub npe txhais tau li cas tiag.
Thawj Tswj Hwm Dallin H. Oaks piav tias: “Tseem ceeb heev kom peb to taub hais tias thaum peb noj lub cim nco txog peb tsis yog ua tim khawv hais tias peb txais Yexus Khetos lub npe. Peb ua tim khawv tias peb yeej txaus siab ua li ntawd. (Saib Lus Qhuab Qhia thiab Kev Khi Lus 20:77.) Qhov uas peb tsuas ua tim khawv hais tias peb kam ua qhia tias yuav tsum ua ib yam dab tsi ntxiv ua ntej peb yuav los ris lub npe dawb huv ntawd twb yog qhov uas tseem ceeb heev.”7
Kab lus uas hais tias peb yeej “txaus siab txais” Nws lub npe qhia peb hais tias peb xub los ris Nws lub npe thaum peb tau ua kev cai raus dej, txoj kev ris Nws lub npe yeej tsis tiav tas thaum peb los ua kev cai raus dej. Peb yuav tsum sib zog ua hauj lwm los ris Nws lub npe hauv tag nrho peb lub neej, muaj li ntawd thaum peb rov qab khi lus rau ntawm lub rooj noj lub cim nco txog thiab ua tej kev khi lus hauv tus Tswv cov tuam tsev dawb huv.
Ces yog li ntawd peb txhua tus yuav tsum muaj ob lo lus nug uas hais tias “Kuv yuav tsum ua dab tsis thiaj ris tau Nws lub npe?” thiab “Kuv yuav ua li cas thiaj paub tias kuv tab tom ua zoo?”
Thawj Tswj Hwm Nelson twb qhia zoo txog qhov no. Nws hais tias peb ris tau tus Cawm Seej lub npe thiab peb muaj cuab kav ua tus neeg sawv cev hais lus rau Nws. Thaum peb ua tug neeg sawv cev hais lus rau Nws, peb ua hauj lwm pab Nws. “Vim ib tug tib neeg ua li cas thiaj yuav paub tau tus Tswv uas nws tsis tau ua hauj lwm rau, thiab tus uas yog ib tug qhua rau nws, thiab nyob deb ntawm tej kev xav thiab ntawm tej uas nws lub siab nyiam?”8
Yuav tsum muaj kev ntseeg thov Vajtswv thiaj hais tau lus sawv cev rau Nws. Yuav tsum mob siab thov rau Leej Txiv Saum Ntuj Ceeb Tsheej kom thiaj kawm tau seb peb yuav hais cov lus twg thiaj los pab tus Cawm Seej ua Nws tej hauj lwm. Peb yuav tsum tsim nyog tau lo lus cog tseg uas hais tias: “Txawm yog los ntawm kuv lub suab los sis los ntawm kuv cov tub qhe lub suab, yeej zoo ib yam.”9
Tab sis mas txoj kev hais lus sawv Nws cev yeej yog ntau tshaj txoj kev ris Nws lub npe xwb. Yuav tsum muaj tej kev xav hauv peb nruab siab peb thiaj tsim nyog ua Nws cov tub qhe.
Tus yaj saub Maumoos piav txog tej kev xav uas ua rau peb tsim nyog thiab ua rau peb muaj cuab kav los ris Nws lub npe. Tej kev xav no muaj kev ntseeg, kev cia siab, thiab kev siab hlub, uas yog Khetos txoj kev hlub dawb paug.
Maumoos piav hais tias:
“Vim kuv xav tias nej yeej muaj kev ntseeg Khetos vim yog nej lub siab mos siab muag; vim tias yog nej tsis muaj kev ntseeg nws ces twb tsis tsim nyog suav nej nrog cov neeg ntawm nws lub koom txoos.
“Thiab ntxiv, kuv cov kwv tij uas kuv hlub es, kuv yuav hais rau nej ntsig txog kev cia siab. Yuav ua li cas nej thiaj muaj tau kev ntseeg, tsuas yog tias nej yuav tsum muaj kev cia siab xwb?
“Thiab nej yuav cia siab rau yam dab tsi? Saib seb kuv hais rau nej tias nej yuav tsum muaj kev cia siab dhau los ntawm Khetos txoj kev theej txhoj thiab lub hwj chim ntawm nws txoj kev sawv rov los, cia siab tias yuav muab nej tsa sawv rau txoj sia nyob mus ib txhis thiab muaj li no los twb vim yog nej txoj kev ntseeg nws raws li txoj kev cog lus.
“Yog li ntawd, yog tias ib tug neeg muaj kev ntseeg nws yuav tsum muaj kev cia siab; vim tias yog tsis muaj kev ntseeg ces yeej muaj tsis tau kev cia siab.
“Thiab ntxiv, saib seb kuv hais rau nej tias nws twb muaj tsis tau kev ntseeg thiab kev cia siab, tsuas yog tias nws yuav ua siab mos siab muag thiab txo siab txo ntsws xwb.
“Yog tsis li ntawd, nws txoj kev ntseeg thiab txoj kev cia siab twb tsis muaj qab hau, vim twb tsis muaj ib tug uas Vajtswv pom zoo, tsuas yog cov uas muaj siab mos siab muag thiab txo siab txo ntsws xwb; thiab yog tias ib tug neeg muaj siab mos siab muag thiab txo siab txo ntsws, thiab lees los ntawm tus Vaj Ntsuj Plig Dawb Huv lub hwj chim tias Yexus yog tus Khetos, nws yuav tsum muaj kev siab hlub; vim tias yog nws tsis muaj kev siab hlub ces nws tsis muaj nuj nqis dab tsi; yog li ntawd nws yuav tsum muaj kev siab hlub.”
Tom qab piav txog kev siab hlub, Maumoos hais ntxiv tias:
“Tiam sis kev siab hlub twb yog Khetos txoj kev hlub uas dawb paug, thiab yuav nyob mus ib txhis; thiab tus uas Vajtswv pom hais tias muaj txoj kev siab hlub ntawd thaum txog hnub kawg, tus ntawd yuav tau zoo.
“Yog li ntawd, kuv cov kwv tij uas kuv hlub es, cia li thov Leej Txiv kawg siab kawg ntsws, xwv kom nej yuav muaj txoj kev hlub no puv npo, uas nws tau muab rau tag nrho cov uas coj raws li nws Leej Tub, Yexus Khetos, tiag tiag; xwv kom nej yuav hloov los ua Vajtswv cov tub; xwv kom thaum nws yuav tshwm los peb yuav zoo li nws, vim peb yuav pom nws tseeb tias nws zoo li cas tiag; xwv kom peb yuav muaj txoj kev cia siab li no; xwv kom Vajtswv yuav ua rau peb hloov ua neeg huv ib yam li nws twb huv. Amees.”10
Kuv zaj lus tim khawv qhia tias tus Cawm Seej tab tom tso Nws lub npe hauv nej tej siab tej ntsws. Rau nej feem coob, nej txoj kev ntseeg txog Nws tab tom loj hlob tuaj. Nej haj yam muaj kev cia siab thiab xav zoo zoo txog yav tom ntej. Thiab nej hnov Khetos txoj kev hlub dawb paug rau lwm tus neeg thiab nej tus kheej.
Kuv pom li no hauv cov tub txib uas ua hauj lwm pab neeg thoob ntiaj teb no. Kuv pom li no hauv cov mej zeej uas hais lus rau lawv cov phooj ywg thiab tsev neeg pab qhia lawv txog Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Cov txiv neej, poj niam, cov tub thiab ntxhais hluas, thiab cov me nyuam yaus muaj kev hlub rau tus Cawm Seej lawv thiaj los txhawb nqa lawv cov neeg zej zog.
Thaum twg pib hnov xov txog tej kev xwm txheej loj heev hauv ntiaj teb no, cov mej zeej npaj los mus cawm tib neeg, tej thaum yuav hla dej hiav txwv, txawm tsis muaj neeg thov kom lawv ua li ntawd. Tej thaum lawv tos tsis tau txog thaum tej chaw uas raug kev puas tsuaj lawm txais tau lawv.
Kuv paub hais tias hnub no nej ib txhia uas mloog kuv cov lus yuav xav tias nej txoj kev ntseeg thiab kev cia siab tab tom puas tsuaj vim nej raug teeb meem ntau dhau. Thiab tej zaum nej tseem xav hnov txoj kev hlub ntawd.
Cov kwv tij thiab cov muam, tus Tswv muab cib fim rau nej tau hnov thiab faib Nws txoj kev hlub. Nej muaj cuab kav thov Vajtswv es ntseeg tau hais tias tus Tswv yuav coj nej mus hlub ib tug neeg sawv cev rau Nws. Nws yeej teb cov neeg uas txo hwj chim li nej tej zaj lus thov. Nej yuav hnov Vajtswv txoj kev hlub rau nej thiab tau tus neeg uas nej sawv cev mus pab rau Nws. Thaum nej pab Vajtswv cov me nyuam kov yeej lawv tej teeb meem, yuav ua rau nej tej teeb meem ib nyuag sib. Yuav ntxiv zog rau nej txoj kev ntseeg thiab kev cia siab.
Kuv twb paub tseeb hais tias qhov no muaj tseeb. Hauv tag nrho kuv lub neej, kuv tus me poj niam tau hais lus sawv cev rau tus Tswv thiab tau ua hauj lwm pab lwm tus neeg sawv cev rau Nws. Yam li kuv twb qhia dua, wb ib tug npis sov hais ib zaug rau kuv tias, “Kuv xav tsis thoob kiag li. Txhua zaus uas kuv hnov txog ib tug neeg hauv peb pawg ntseeg uas muaj teeb meem, kuv khiav mus pab. Tiam sis txog thaum kuv tuaj txog mas, zoo nkaus li koj tus poj niam twb ua kuv ntej los pab lawm.” Tau muaj li ntawd hauv txhua qhov chaw uas wb tau nyob 56 xyoo tas los no.
Nim no ib hnub twg nws tsuas hais tau ob peb lo lus xwb. Cov uas nws hlub sawv tus Tswv cev ib sij tuaj xyuas nws. Txhua hmo thiab sawv ntxov kuv nrog nws hu nkauj thiab wb thov Vatswv ua ke. Kuv yog tus uas hais lus thov Vajtswv thiab hu nkauj. Tej thaum kuv pom nws qhib qhov ncauj sim hu cov lus rau zaj nkauj. Nws nyiam hu cov me nyuam yaus tej zaj nkauj. Zaj xov uas nws nyiam tshaj plaws yog cov lus uas lawv hu hauv zaj “Kuv Tab Tom Sim Ua Neeg Zoo Li Yexus.”11
Hnub i, tom qab hu cov lus rau zaj ntawd uas hais tias: “Ib leeg hlub ib leeg li Yexus hlub nej. Sim ua siab zoo thaum ua txhua yam,” nws hais lus ntxhi, tiam sis hnov tau meej hais tias, “Sim, sim, sim.” Kuv xav hais tias thaum kuv tus poj niam mus pom Nws, ces nws yuav pom tias peb tus Cawm Seej tau tso Nws lub npe rau hauv kuv tus poj niam nruab siab thiab tias nws twb rais los mus ua neeg zoo li Yexus lawm. Tam sim no Nws tab tom nqa kuv tus poj niam mus dhau plaws nws tej kev cov nyom, ib yam li Nws yuav nqa nej mus dhau nej tej teeb meem thiab.
Kuv hais kuv zaj lus tim khawv rau nej hais tias tus Cawm Seej paub thiab hlub nej. Nws paub nej lub npe ib yam li nej paub Nws lub. Nws paub txog nej tej teeb meem. Nws twb raug txhua yam no dua. Dhau los ntawm Nws txoj Kev Theej Txhoj, Nws tau kov yeej lub ntiaj teb. Thaum nej kam los ris Nws lub npe, nej yuav pab nqa lwm tus neeg tej nra kom tej ntawd yuav sib. Ces nyob nyob nej yuav pom hais tias nej haj yam paub tus Cawm Seej thiab tias nej haj yam hlub Nws. Nws lub npe yuav nyob rau hauv nej lub siab thiab raug muab cim cia hauv nej lub paj hlwb. Yog lub npe uas nej yuav tsum raug hu los ua. Kuv hais lus tim khawv li no, muaj kev ris txiaj rau nws txoj kev ua siab zoo rau kuv, thiab rau nej, es hais li no los ntawm Yexus Khetos lub npe, amees.