1 Ug sa ingon niana atong taposon ang pagbuhat sa kalangitan ug sa yuta, ug kining tanan nga daghan kaayo.

2 Ug ang mga Dios miingon sa ilang kaugalingon: Sa ikapito nga panahon taposon nato ang atong buhat, nga atong gikauyonan; ug mamahulay kita sa ikapito nga panahon gikan sa tanan natong buhat nga atong gikauyonan.

3 Ug gitapos sa mga Dios sa ikapito nga panahon, tungod kay sa ikapito nga panahon mamahulay sila gikan sa ilang tanang buhat diin sila (ang mga Dios) nagkauyon nga ilang pormahon; ug gibalaan kini. Ug sa ingon mao ang ilang mga paghukom sa higayon nga nagkauyon sila sa pagporma sa mga langit ug sa yuta.

4 Ug nanaog ang mga Dios ug giumol kini nga mga henerasyon sa langit ug sa yuta, sa dihang giumol kini nianang adlawa nga giumol sa mga Dios ang yuta ug ang kalangitan,

5 Sumala sa tanan nga ilang gisulti mahitungod sa matag tanom sa kaumahan sa wala pa kini sa yuta, ug sa matag hilba sa kaumahan sa wala pa kini motubo; kay ang mga Dios wala magpaulan sa yuta dihang nagkauyon sila sa pagbuhat niini, ug wala pa mag-umol og tawo aron motikad sa yuta.

6 Apan dihay misulbong nga usa ka gabon gikan sa yuta, ug mibisibis sa tibuok yuta.

7 Ug ang mga Dios miumol sa tawo gikan sa abog sa yuta, ug mikuha sa iyang espiritu (nga mao ang espiritu sa tawo), ug mibutang niini ngadto kaniya; ug giginhawa ngadto sa lungag sa iyang mga ilong ang ginhawa sa kinabuhi, ug ang tawo nahimo nga usa ka buhing kalag.

8 Ug ang mga Dios naghimo og tanaman, sa may silangan nga bahin sa Eden, ug didto gibutang nila ang tawo, kansang espiritu gibutang nila ngadto sa lawas nga ilang giumol.

9 Ug gikan sa yuta gihimo sa mga Dios nga motubo ang matag kahoy nga makapahimuot sa panan-aw ug maayo alang sa pagkaon; ang kahoy sa kinabuhi, usab, diha sa taliwala sa tanaman, ug ang kahoy sa kahibalo sa maayo ug daotan.

10 Dihay miagos nga suba gikan sa Eden, aron mobisibis sa tanaman, ug gikan didto nabahin kini ug nahimong upat ka sapa.

11 Ug gikuha sa mga Dios ang tawo ug gibutang siya sa Tanaman sa Eden, aron mogalam niini ug moatiman niini.

12 Ug gisugo sa mga Dios ang tawo, nga nag-ingon: Sa matag kahoy sa tanaman gawasnon ka nga mokaon,

13 Apan sa kahoy sa kahibalo sa maayo ug daotan, ayaw pagkaon niini; kay sa higayon nga mokaon ka niana, ikaw sa pagkatinuod mamatay. Karon ako, si Abraham, nakakita nga nagsubay kadto sa panahon sa Ginoo, nga nagsubay sa panahon sa Kolob; kay gani wala pa itudlo sa mga Dios ngadto ni Adan ang iyang pag-ihap.

14 Ug miingon ang mga Dios: Maghimo kita og katabang alang sa lalaki, kay dili maayo nga mag-inusara ang lalaki, busa maghimo kita og katabang alang kaniya.

15 Ug gipahinanok sa mga Dios si Adan; ug natulog siya, ug gikuha nila ang usa sa iyang mga gusok, ug gitakpan ang unod sa dapit niini;

16 Ug gikan sa gusok nga gikuha sa mga Dios gikan sa lalaki, nag-umol sila og babaye, ug gidala siya ngadto sa lalaki.

17 Ug miingon si Adan: Kini mao ang bukog sa akong mga bukog, ug unod sa akong unod; karon pagatawgon siya og Babaye, tungod kay gikuha siya gikan sa lalaki;

18 Busa ang lalaki mobiya sa iyang amahan ug sa iyang inahan, ug mounong ngadto sa iyang asawa, ug sila mahimong usa ka unod.

19 Ug silang duha mga hubo, ang lalaki ug ang iyang asawa, ug wala maulaw.

20 Ug gikan sa yuta giumol sa mga Dios ang matag mananap sa kaumahan, ug ang matag langgam sa kahanginan, ug gidala sila ngadto ni Adan aron masuta kon unsa ang iyang itawag kanila; ug bisan unsa ang itawag ni Adan sa matag buhi nga binuhat, kana kinahanglan mao ang ngalan niana.

21 Ug si Adan mihatag og mga ngalan sa tanan nga mga baka, sa langgam sa kahanginan, sa matag mananap sa kaumahan; ug alang kang Adan, dihay usa ka katabang nga angay kaniya.