1 Ao e a koro bukina bwa n te ririki naba anne, nooria ^aNibwaai e anganako te kaintekateka ni motikitaeka nakon te mwaane ae arana Titerom.

2 Bwa ngkai aia tua ma aia tautaeka a kateaki ni ^abwanaia te botanaomata, ao naake a ^brinea te buakaka a bon mwaiti riki nakoia ake a rinea te raoiroi, ngaia are a bon tau nakon te kamaunaki, bwa a buakaka aia tua.

3 Eng, ao tiaki ti aio; bon aomata ngaia aika a bonotaninga, n te aro are aki kona n tautaekanaki n te tua ke te momotiraoi, ma a na ti kairaki nakon kamaunakia.

4 Ao e a koro bukina bwa e a kua Nibwaai ibukin aia bure; ao e ^aanganako te kaintekateka ni motikitaeka, ma ni katabea bwa e na tataekina ana taeka te Atua i nanon nikiran ana bong ni maiu, ao tarina naba are Riaai, ni kabanea ana bong ni maiu;

5 Bwa a uringa ana taeka tamaia are Ereman are e taekinna nakoia. Ao aikai taeka ake e taekin:

6 Nooria, natiu mwaane, I tangiria bwa kam na uringnga ni kaawakin ana tua te Atua; ao I tangiria bwa kam na tataekin taeka aikai nakoia te botanaomata. Nooria, I a tia n anganingkami araia ara moan ^abakatibu ake a otinako man te aba are Ierutarem; ao aio are I a tia ni karaoia bwa ngkana kam uringa arami kam na kona n uringia; ao ngkana kam uringia kam na kona n uringa aia mwakuri; ao ngkana kam uringa aia mwakuri kam na ataia naba bwa e taekinaki, ao e koreaki naba, bwa a bon ^braoiroi.

7 Ngaia are, natiu mwaane, I tangiria bwa kam na karaoa ae raoiroi, bwa kam na tataekinaki, ao e na koreaki naba, n aron are e a tia n taekinaki ma ni koreaki ibukiia.

8 Ao ngkai natiu mwaane, nooria iai riki te bwai ae I tangiria mai iroumi, are I tangiria bwa kam na aki karaoi bwaai aikai bwa kam na kamoamoa iai, ma kam na karaoi bwaai aikai bwa kam na kaikoi ^akaubwaimi i karawa, eng, are akea tokina, ao are e aki kona ni mauna; eng, bwa e aonga n reke iroumi te bwai n tangira are e ^bkakawaki are te maiu ae akea tokina, are iai ara kantaninga ni katautaua bwa a bon tia n anganaki ara bakatibu.

9 O uringnga, uringnga, natiu mwaane, ana ^ataeka te uea are Beniamina ake e taekin nakoia ana botanaomata; eng, uringnga bwa akea riki te kawai ke te anga are e kona te aomata ni kamaiuaki iai, ma ti rinanon raraan Iesu Kristo ni ^bkamaiu, are e na roko; eng, uringnga bwa e roko bwa e na ^ckabooa te ^daonaba.

10 Ao uringa naba ana ^ataeka Amureki ake e taekin nakon Teeterom, n te kaawa are Amonia; bwa e taku nakoina bwa e bon koaua bwa te Uea e na roko ni kabooia ana botanaomata, ma e na aki roko ni kabooia i nanon aia bure, ma e na kabooia man aia bure.

11 Ao iai mwaakana are e anganaki mai iroun te Tama bwa e na kabooia man aia bure ibukin te rairannano; ngaia are e a tia ni ^akanakoia anera bwa a na tataekina rongorongon aron te rairannano, are e kairiri nakon mwaakan te Tia Kabomwi, nakon kamaiuan tamneia.

12 Ao ngkai, natiu mwaane, uringnga, uringnga bwa bon i aon te ^abwa are ara Tia Kabomwi, are Kristo, natin te Atua, are kam na riai ni katea iai ^baami; bwa ngkana te riaboro e kanakoa te ang mai irouna ae korakora, eng, ana kanoa i buakon te ukeuke n anti, eng, ngkana ni kabane te atibu ae bwaka mai karawa ao te ^cangibuaka ae korakora a bwaka iaomi, bon akea korakoraia iaomi ni katikingkami nakon marawan te nanokawaki ao te maraia ae aki totoki, ibukin te bwa are ko kateaki iaona, are bon aan te kateitei ni koaua, aan te kateitei are ngkana aomata a kateitei iaona ao aki kona ni bwaka.

13 Ao e a koro bukina bwa aikai taeka ake Ereman e ^areireinia natina mwaane; eng, e bon reireinia bwaai aika mwaiti ake a bon aki koreaki, ao bwaai naba aika a mwaiti aika a koreaki.

14 Ao a bon uring ana taeka; ao ngaia are a mwananga nako, ni kaawakina ana tua te Atua, bwa a na reirei ana taeka te Atua i buakoia ana botanaomata ni kabane Nibwaai, ni moa man te kaawa are te Mari;

15 Ao ma ikekei nakon te kaawa are Kite; ao man te kaawa are Kite nakon te kaawa are Mureki;

16 Ao man te kaawa teuana nakon are teuana, ni karokoa ae a tia ni waaki nako i buakoia ana botanaomata ni kabane Nibwaai ake a mena n te aba are e nako maiaki; ao ma ikekei nakon te aba are Taraemera, i buakoia Reimwanaite.

17 Ao e a koro bukina bwa a bon kabwarabwara ma te mwaaka ae korakora, n te aro are a bon kabaei wiia ^ataan birinako aika a mwaiti ake a tia n nako mai irouia Nibwaite, n te aro are a roko ni kaoti aia bure ma ni bwabetitoaki nakon te rairannano, ao ma ni kaokaki naba n te tai ae waekoa nakoia Nibwaite bwa a na waaki ni karaoiroa mwiin taiani kaairua ake a tia ni karaoi.

18 Ao e a koro bukina bwa Nibwaai ao Riaai a bon kabwarabwara nakoia Reimwanaite ma te mwaaka ao te kariaiakaki n anga te tua, bwa iai irouia te mwaaka ao te kariaiakaki n anga te tua are a tia n anganaki bwa a na kona n ^ataetae, ao a bon anganaki naba te bwai are a na riai n taekinna—

19 Ngaia are a bon taetae n te aro ae korakora kamiimina nakoia Reimwanaite, n ^aanai nanoia bwa a na kakoauaia, n te aro are waniua te ngaa Reimwanaite ake a mena n te aba are Taraemera ao n aaba ake i rarikina ake a bon bwabetitoaki, ma ni kakoaua buakakan kateia aia bakatibu.

20 Ao e a koro bukina bwa Nibwaai ao Riaai a bon waaki mai ikekei nakon te aba are Nibwaai.

21 Ao e a koro bukina bwa a bon anaaki irouia ana taanga ni buaka Reimwanaite ma n teweaki nako nanon te ^anne ni kaikain; eng, n te nne ni kaikain are a teweaki nako nanona Amon ma tarina irouia ana toro Rimwaai.

22 Ao i mwin are a tia n teweaki nako nanon te nne ni kaikain n akea kanaia i nanon boong aika a mwaiti, nooria, a bon rin i nanon te nne ni kaikain n anaia bwa aonga n tiringia.

23 Ao e a koro bukina bwa Nibwaai ao Riaai a bon otabwaniniaki n te ^aai, n te aro are a bon rawa ni katokaa baia i aoia bwa a maaku bwa mwiina ao a kabuekaki. Ma e ngae n anne, ao a bon aki bue Nibwaai ao Riaai; ao a bon tei inukan te ai ao a bon aki bue.

24 Ao ngke a nooria bwa a bon otabwaniniaki n te ^aboua ae te ai, ao ngke a bon aki bue iai, a bon ninikoria nanoia.

25 Bwa a nooria bwa Reimwanaite a bon rawa ni katokai baiia i aoia; ao a rawa naba ni kaania, ma a tei n te aro ae a oreaki bwa a na babanga n taetae ibukin te miimii.

26 Ao e a koro bukina bwa a tei i buakoia Nibwaai ao Riaai ao a waaki n taetae nakoia, ni kangai: Tai maaku, bwa nooria, bon te Atua ae kaota te bwai ae kamiimi aio, are e kaotia nakoimi bwa kam aki kona ni katokai baimi iaora n tiringira.

27 Ao nooria, ngke a tia n taekin taeka aikai, e bon ruru te aonaba, ao oon te nne ni kaikain a bon ruru n te aro ae aongkoa a na bwaka nako aontano; ma nooria, a bon aki bwaka. Ao nooria, naake a mena n te nne ni kaikain bon Reimwanaite ao Nibwaite ake taan birinako.

28 Ao e a koro bukina bwa a bon rabunaki n te nang ae ^arootongitong, ao e roko i aoia te kakamaaku ae aki manikangareaki.

29 Ao e a koro bukina bwa e roko te ^abwanaa ae kanga mai iaon te nang are e rootongitong ae kangai: Rairinanomi, rairinanomi, ao tai manga ukoukora kan tiringakia au toro are I a tia ni kanakoia nakoimi bwa a na taekina te rongorongo ae kakukurei.

30 Ao e a koro bukina bwa ngke a ongo te bwanaa aio, ma n nooria bwa bon tiaki te bwanaa ae kanga te baa, ao tiaki naba te bwanaa ae korakora ae riao karongoana, ma nooria, bon te ^abwanaa ae rau ae kororaoi beebetena, ae kanga aron te wirikiriki, ao e bon ninia nako te tamnei—

31 Ao e ngae ngke e beebete te bwanaa, nooria e bon korakora rurun te aonaba, ao oon te nne ni kaikain a manga ruru riki, ae kanga a na bwaka nako aontano; ma nooria te nang are e rootongitong, are e rabuna aoia, e bon aki uamae—

32 Ao nooria e a manga roko riki te bwanaa arei, ni kangai: Rairinanomi, rairinanomi, bwa e a kan roko uean karawa; ao tai manga ukoukora riki kan tiringakia au toro. Ao e a koro bukina bwa e a manga ruru riki te aonaba, ao oon te nne ni kaikain a bon ruru.

33 Ao e a manga roko riki te bwanaa te katen tai, ma n taekin taeka aika a kamimi ake aki kona n taekinaki iroun te aomata; ao a manga ruru naba taian oo, ao e ruru te aonaba n te aro ae kanga e na bwenaua.

34 Ao e a koro bukina bwa aki kona ni birinako Reimwanaite ibukin te nang are e rorotongitong are e bon rabuna aoia; eng, ao a bon aki kona ni kamwaingaki ibukin te maaku are e roko i aoia.

35 Ao ngkanne bon iai temanna mai i buakoia ae e bon bungiaki bwa te Nibwaite, are e a bon tia ngkoa ni kaaina ana ekaretia te Atua ma e a tia ni birinako mai irouia.

36 Ao e a koro bukina bwa e rairaki, ao nooria, e noora i buakon te nang are e rorotongitong moamoan Nibwaai ma Riaai; ao nooria, a bon rianako ^araneaneaia, n aiaron ubuia anera. Ao e nooria bwa a tararake moamoaia nako karawa; ao aroia titebo ma a taetae ni kawai ke a tabeki rake bwanaia nakon te aomata ae a nooria.

37 Ao e a koro bukina bwa te aomata aio e bon takarua nakoia aomata ake a uanao, bwa a na rairaki n nooria. Ao nooria, a bon anganaki te korakora bwa a na rairaki ao ma n nooria; ao a bon noora moamoaia Nibwaai ma Riaai.

38 Ao a taku nakon te mwaane aei: Nooria, tera nanon bwaai aikai ni kabane, ao antai ae kakarabakau ma mwaane aikai?

39 Ngkai aran te mwaane aei bon Aminatabu. Ao Aminatabu e taku nakoia: A bon kakarabakau ma ana anera te Atua.

40 Ao e a koro bukina bwa a taku Reimwanaite nakoina: ^aTera ae ti na karaoia, bwa e aonga ni kamwawaki te nang ae rootongitong aei mai iaora?

41 Ao Aminatabu e taku nakoia: Kam na riai n ^arairinanomi, ma n takarua nakon te bwanaa, ni karokoa ae reke ami ^bonimaki iroun Kristo, are kam reireinaki taekana iroun Aramwa, ma Amureki, ao Teeterom; ao ngkana kam karaoa aio, e na kamwawaki te nang are e rootongitong mai iaomi.

42 Ao e a koro bukina bwa a bane n tang nakon bwanan teuare e a tia n ioioa te aonaba; eng, a bon tang ni karokoa ae e kamaenakoaki te nang are e rootongitong.

43 Ao e a koro bukina bwa ngke a taratara nako, ma n nooria bwa te nang are e rootongitong e a kamaenakoaki bwa e na aki rabuna aoia, nooria, a nooria bwa a ^aotabwaniniaki, eng, ni kabane aomata n te boua ae te ai.

44 Ao Nibwaai ao Riaai a bon mena iboni buakoia; eng, a bon otabwaniniaki; eng, a bon mena i nukan te ai ae uramwaka, ma a bon aki kabuanibwai iai, ao e aki rota naba oon te nne ni kaikain; ao a bon onrake n te ^akimwareirei are e aki kona ni kabwarabwaraki ao a on n te mimitong.

45 Ao nooria, e ruo ^aTamnein te Atua ae Tabu ma i karawa, ma n rin inanoia, ao a kaonaki n aron ae a onrake n te ai, ao a bon kona n ^btaekin taeka aika a kamiimi.

46 Ao e a koro bukina bwa iai te bwanaa ae roko nakoia, eng, te bwanaa ae tangiraoi, ae kanga aron te wirikiriki, ao e kangai:

47 Te ^arau, te rau e na mena iaomi, ibukin ami onimaki iroun au Moan Tangiraki are e a kaman iai man moan katean te aonaba.

48 Ao ngkai, ngke a ongo aio a tabeki rake mataia bwa a na taraa te tabo are e roko mai iai te bwanaa; ao nooria, a noora ^akarawa ae e uki; ao anera a ruo mai karawa ma ni buokiia.

49 Ao tao bon tenibubua te aomata ake a noori ma n ongo bwaai aikai; ao a bon tuangaki bwa a na nako ao a na aki miimi, ao a na aki naba nanououa.

50 Ao e a koro bukina bwa a bon mwananga nako, ma ni ibuobuoki nakoia aomata, n tataekin bwaai ni kabane ake a tia n ongo ma n noori, ni kabutai taabo ake a uakaan, n te aro are a mwaiti Reimwanaite ake a kakoauaia, ibukin korakoran te bwai ni kakoaua are a tia ni karekea.

51 Ao ni kabane ake a ^akakoaua a bon kawenei naba aia bwai ni buaka, ma aia kairiribai ao kateia aia bakatibu.

52 Ao e koro bukina bwa a bon anga nakoia Nibwaite aaba ake a bwaibwai iai.