1 Ao e a koro bukina bwa n te kanimabwi ma aua n ririki ao e a korakora te kakauntaeka i nanon te ekaretia, ao e a bon korakora naba te ^aitabaraaraa i buakoia te botanaomata, n te aro are e a korakora kawawaean te raraa.

2 Ao naake a kakaitara a bon tiringaki ma ni kakioaki nako man te aba, ao a bon nako nakon aia uea Reimwanaite.

3 Ao e a koro bukina bwa a bon waaki ni kakiriwea nanoia Reimwanaite bwa a na buaka ni kaaitaraia Nibwaite; ma nooria, e korakora maakuia Reimwanaite, n te aro are a bon rawa ni kan ongora n aia taeka naake a birinako.

4 Ma e a koro bukina bwa n aia kanimabwi ma onoua n ririki n tautaeka taan moti, ao bon iai ^ataan birinako ake a nako mai irouia Nibwaite nakoia Reimwanaite; ao e nakoraoi aia waaki ma ake tabemwaang ni kakiriweia bwa a na un ni kaaitaraia Nibwaite; ao n te ririki anne ao a bane ni katauraoi ibukin te buaka.

5 Ao n te kanimabwi ma itiua n ririki ao a ruorikaaki ni buaka ma Nibwaite, ao a waakina aia mwakuri ni kamamate; eng, n te aro are n aia kanimabwi ma waniua n ririki n tautaeka taan moti ao a bon tokanikai ma ni karekea te aba are Taraemera; eng, ao ni kabane te aba, nakon naba te aba are e kaan ma te Aba ni Mari.

6 Ao Nibwaite ma ana taanga ni buaka Moronaaia a bon kakioaki nako nakon te Aba ni Mari.

7 Ao ikekei are a kamatoatoaia ni kaaitaraia Reimwanaite mai taari maeao, nako mainiku; ao anauna bon tebongina ana bong tei Nibwaite ni mwananga, iaon tian te rain are a tia ni kamatoatoa ma ni katikuia iai aia taanga ni buaka bwa a na tararua abaia are i meang.

8 Ao ngaia are taan birinako ake Nibwaite, man ana ibuobuoki aia taanga ni buaka Reimwanaite, a tia ni karekei ni kabane aia bwai Nibwaite ake a mena n te aba are e nako maiaki. Ao aio ake a bane ni karaoaki n aia kanimabwi ma waniua ao ruaiwa n ririki n tautaeka taan moti.

9 Ao e a koro bukina n aia kaonobwi n ririki n tautaeka taan moti, ao Moronaaia ma ana taanga ni buaka a karekea te tokanikai ao n anai mwakoron te aba ae mwaiti; eng, a manga anai kaawa aika a mwaiti ake a tia n reke i nanon baia Reimwanaite.

10 Ao e a koro bukina bwa n aia kaonobwi ma teuana n ririki n tautaeka taan moti a bon tokanikai ma ni manga karekea iteran aia bwai ni kabane.

11 Ngkai buaia Nibwaite ae korakora aio, ma te tiritiri ae korakora are e riki iboni irouia, e na bon aki riki ngke arona bwa akea bubuakaia ma aia mwakuri aika bati n ribaki imarenaia eng, ao e mena naba i buakoia naake a tataekinna bwa a kaaina ana ekaretia te Atua.

12 Ao e riki aio ibukin te ^akainikatonga are inanoia, ibukin rianakon ^bkaubwaia, eng, ibukin rawan nanoia nakoia ake a ^ckainnano, a tauii kanaia mai irouia ake a baki, a tauii aia kunnikai mai irouia naake akea karabaia, man oroi tabaia tariia ake a nanorinano, a bwainingarei bwaai ake a tabu, a kakewea tamnein te taeka ni burabeti ao ni kaotioti, a tiriaomata, a iraa n iowawa, a kewe, a kimoa, a wenenibure, a teirake n itabaraaraa n ae korakora, ma ni birinako nakon te aba are Nibwaai, i buakoia Reimwanaite—

13 Ao ibukin korakoran buakakaia aio, ao aroia ni ^akamoamoaa oin korakoraia, a bon katukaki ma oin korakoraia; ngaia are e aki nakoraoi aroia, ma a bon karawawataki ma n oreaki, ao ma n kakioaki mai imataia Reimwanaite, ni karokoa ae a bua angiin abaia.

14 Ma nooria, e bon kabwarabwara iaon bwaai aika a bati Moronaaia nakoia te botanaomata ibukin buakakaia, ma ^aNibwaai naba ao Riaai, ake bon natin Ereman, a kabwarabwara iaon bwaai aika a mwaiti nakoia te botanaomata, eng, ma n taetae ni burabetii bwaai aika a mwaiti nakoia ni kaineti ma buakakaia, ao tera ae e na reke nakoia ngkana aki rairinanoia man aia bure.

15 Ao e a koro bukina bwa a bon rairinanoia, ao ngke a rairinanoia ao a bon nakoraoi aroia.

16 Bwa ngke Moronaaia e nooria bwa a rairinanoia e bon waaki ni kairiria man te tabo teuana nakon te tabo teuana, ao man te kaawa ae bubura teuana nakon te kaawa ae bubura teuana, ni karokoa ae e a manga oki nakoia teuana iteran aia bwai ao teuana iteran abaia ni kabane.

17 Ao ngaia are e a toki aia kaonobwi ma teuana n ririki n tautaeka taan moti.

18 Ao e a koro bukina bwa n aia kaonobwi ma uoua n ririki n tautaeka taan moti, ao Moronaaia e a aki manga kona ni karekei bwaai irouia Reimwanaite.

19 Ngaia are a bon katuka aia babaire ibukin karekean nikiran abaia, bwa a bon rang mwaiti Reimwanaite n te aro are e a bon kaangaanga ibukiia Nibwaite bwa a na korakora riki i aoia; ngaia are Moronaaia e kamwakuriia ana taanga ni buaka ni kabane bwa a na tararuai mwakoro ni kabane ake a tia n anai.

20 Ao e a koro bukina bwa, ibukin korakoran mwaitia Reimwanaite ao a bon korakora maakuia Nibwaite bwa mwiina ao a na konaaki, ma n toubekaki, ma n tiringaki, ao ma ni kamaunaki.

21 Eng, a bon uringa ana taeka ni burabeti Aramwa, ao ana taeka naba Motiaea; ao a nooria bwa a tia n riki bwa te botanaomata ae bonotaninga, ao a tia ni kaakea ana tua te Atua.

22 Ao a tia ni bita ma n toubekaa ana ^atua Motiaea i aan waeia, ke te bwai are e a tia te Uea n tua bwa e na anganiia te botanaomata; ao a nooria bwa a buakaka aia tua, ao bwa a tia n riki bwa te botanaomata ae buakaka, n te aro ae a buakaka n ai aroia Reimwanaite.

23 Ao ibukin aia bure ao e a moanna ni ^akekerikaki te ekaretia; ao a moanna n aki kakoaua tamnein te taeka ni burabeti ao tamnein te kaotioti; ao e bon kaaitarai moaia ana motikitaeka te Atua.

24 Ao a nooria bwa a riki ni ^amamaara, n aekaia tariia, Reimwanaite, ao Tamnein te Uea e a bon aki kaawakinia; eng, e a bubai mai irouia ibukina bwa ^bTamnein te Uea e aki kona ni maeka n taian tembora aika ^caki tabu—

25 Ngaia are te Uea e a katoka kamaiuakia ni mwaakana are e kamiimii ao akea kabotauana bwa a bwaka nakon te aro ni ^akakewekewe ao ni kakaamaaku buakakaia; ao a nooria bwa e korakora riki mwaitia Reimwanaite nakoia, ao ngkana aki ^bnim ma te Uea ae Atuaia ao a na boni kamaunaaki.

26 Bwa nooria, a nooria bwa korakoraia Reimwanaite bon aekan naba korakoraia, ni boraoi korakoraia aia mwaane. Ao ikai are a bwaka nakon riaoan te tua ae korakora aio; eng, ngaia are a riki ni mamaara, ibukin riaoan te tua irouia, i nanon te maan ae e ^aaki bati te ririki.