Mwakoro 16
Nibwaite ake a kakoaua Tamuera a bwabetitoaki iroun Nibwaai—E aki kona n tiringaki Tamuera n taian kanoa ni katebe ao atibu irouia Nibwaite ake aki rairinanoia—A kamatoai nanoia tabemwaang, ao tabemwaang a nooria anera—Taan aki kakoaua a taku bwa e bon aki riai bwa e na kakoauaki Kristo ao rokona i Ierutarem. Uakaan ma 6–1 I.K.
1 Ao ngkai, e a koro bukina bwa a bon mwaiti ake a bon ongo n ana taeka Tamuera, are te Reimwanaite, ake e taekin ngke e mena iaon oon te kaawa. Ao mwaitia ake a kakoauai ana taeka a bon mwananga nako n ukoukora Nibwaai; ao ngke a roko ma ni kunea a bon kaoti aia bure nakoina ma n aki kakewei, ao a tangiria bwa a na bwabetitoaki nakon te Uea.
2 Ma mwaitia ake a aki kakoauai ana taeka Tamuera a bon un irouna; ao a karebanaia n taian atibu iaon te oo, ao a mwaiti naba ake a katebea ni kanoan aia kai ni katebe ngke e tei iaon te oo; ma Tamnein te Uea e bon raonna, n te aro are e bon aki kona ni boo n aia atibu ma aia kanoa ni katebe.
3 Ao ngkai ngke a nooria bwa e aki kona ni bo irouia, a bon mwaiti riki ake a kakoauai ana taeka, n te aro are a kawara Nibwaai bwa a na bwabetitoaki.
4 Bwa nooria, Nibwaai e bwabwabetito, ma n tataetae ni burabeti, ma ni kakabwarabwara, man tatakaruaea te rairannano nakoia aomata, ma ni kaoti kanikina ma kamiimi, ma ni karaoi amwakuri aika a kamiimi i buakoia aomata, bwa aonga n ataia bwa e a bkaan roko Kristo—
5 E tuangiia bwaai aika a kan roko, bwa a aonga n ataia ma n uringnga n te tai are a riki iai bwa a kaman kaotaki nakoia i mwaain taia, ma te kantaninga bwa a na kakoauai; ngaia are; mwaitia ake a kakoauai ana taeka Tamuera a bon nakoina bwa a na bwabetitoaki, bwa a kawaria ma n rairinanoia ma ni kaoti aia bure.
6 Ma angiia riki a bon aki kakoauai ana taeka Tamuera; ngaia are ngke a nooria bwa e aki kona ni boo n aia atibu ma aia kanoa ni katebe, a bon takarua nakoia aia mataniwi ni kangai: Anaa te aomata aio ao kabaea, bwa nooria iai irouna te riaboro; ao ibukin mwaakan te riaboro are irouna e bon aki kona n teke n ara atibu ma ara kanoa ni katebe; ngaia are anaia ao kabaea, ao kairia nako.
7 Ao ngke a mwananga bwa ana katokai baia iaona, nooria, e bon kibanako man te oo, ao e birinako man te aba, eng, n nakon oin abana, ma ni waaki ni kakabwarabwara ao n tataetae ni burabeti i buakoia ana botanaomata.
8 Ao nooria, bon akea taekana ae manga ataaki riki i buakoia Nibwaite; ao anne aroia aomata aikai.
9 Ao ikai are e a toki iai aia kawanibwi ma onoua n ririki n tautaeka taan moti i aoia ana botanaomata Nibwaai.
10 Ao ikai are e a toki naba aia kawanibwi ma itiua n ririki n tautaeka taan moti, ao angiia aomata a tiku n aroia ni kainikatonga ao ni buakaka, ao tabeman a nakonako n te aro ae kororaoi imatan te Atua.
11 Ao aikai bwaai aika a riki naba, n aia kawanibwi ma waniua n ririki n tautaeka taan moti.
12 Ao bon iai ma ti tabeua taian bitaki n aron aia waaki aomata, ao a bon mwaiti riki aomata aika a matoatoa riki n te bure, ao a karaoi bwaai aika a bati ake a kaaitarai ana tua te Atua, n aia kawanibwi ma ruaiwa n ririki n tautaeka taan moti.
13 Ma e a koro bukina bwa n aia karuabwi n ririki n tautaeka taan moti, ao a bon mwaiti akanikina aika a korakora aika anganaki aomata, ma mwakuri aika a kamiimi; ao a bmoanna ni kakoroaki bukin aia taeka burabeti.
14 Ao aanera a kaoti nakoia aomata, aomata aika a wanawana, ma n taekina nakoia te rongorongo ae raoiroi ae moan te kakimwareirei; ngaia are n te ririki aei ao a moanna ni kakoroaki bukin koroboki aika tabu.
15 Ma e ngae n anne, ao aomata a moanna ni kamatoatoai nanoia, ngaia ni kabane ma tiaki naake a matoatoa riki ni kakoaua, ake Nibwaite ao Reimwanaite naba, ao a moanna n onimakina oin korakoraia ao aoin wanawanaia, ni kangai:
16 Iai tabeua bwaai ake a bon tia ni kamanennanti n taekin ao a eti, ma i buakon aika a mwaiti; ma nooria, ti bon ataia bwa ni kabane taian mwakuri aika a korakora ma ni kamimi ake a tia n taekinaki a bon aki kona ni koro bukiia ni kabane.
17 Ao a moanna ni kaetieti ma ni kauntaeka imarenaia, ni kangai:
18 Bwa e bon aaki riai bwa te aomata n aron Kristo e na roko; ao ngkana e na roko, ao bon ngaia Natin te Atua, are Taman karawa ma aonaba, n aron are e a tia n taekinaki, e aera ngkai e bon aki kaotia nakoira ao nakoia naba ake a mena i Ierutarem?
19 Eng, e aera ngkai e aki kaotia nakoira n te aba aei ao n te aba naba are Ierutarem?
20 Ma nooria, ti bon ataia bwa aio te akatei ae buakaka, are ti a tia n anganaki irouia ara bakatibu, bwa a karekea te anga are ti na kakoaua te bwai teuana ae korakora ma ni kamiimi are e na koro bukina, ma tiaki i buakora, man te aba ae raroa, te aba ae ti aki ataia; ngaia are a na katikuirai nanon te aki ataibwai, bwa ti aki kona n noora bkoauaia n oin matara.
21 Ao man ana mwakuri ni kamwamwane ao ni kaminonano teuare e buakaka, a na bon mwakuria te mwakuri ae kaminonano ae tiaki kona n oota iai, are e na tautauira bwa ti na toronaki n aia taeka, ao ti na riki naba bwa aia toro, bwa ti na bon onimakinia bwa a na reireinira te taeka; ao ngaia are a na katikuira i nanon te aki ataibwai bwa are ti na bon anga ngaira nakoia, i nanon ara bong ni maiu ni kabane.
22 Ao a bon mwaiti bwaai ake a iangoi inanoia, ake a bon burababa ma n aakea manenaia; ao a bon tabetabe, bwa Tatan e bon kakiriwea nanoia bwa a na aki toki ni karaoa te bure; eng, e bon waaki nako ni kabutai taian uarongorongo ma kakauntaeka ni kabuta te aba, bwa e aonga ni kamatoatoai nanoia aomata ni karaoa te bwai ae raoiroi ma ni kaitara te bwai ae e na roko.
23 Ao e ngae ngke iai kanikina ma kamiimi ake a mwakuriaki i buakoia ana botanaomata te Uea, ao mwakuri ni kamiimi ake a karaoaki, ma Tatan e bon korakora ana tautau iaon nanoia aomata ni kabuta aon te aba.
24 Ao ikai are e a toki iai aia karuabwi n ririki n tautaeka taan moti i aoia ana botanaomata Nibwaai.
25 Ao ikai are e a toki iai ana boki Ereman, n aron ana rongorongo Ereman ma natina mwaane.