1 Ao ngkai e a koro bukina bwa n aia kaitibwi ma uoua n ririki n tautaeka taan moti ao e rikirake ni korakora te itabaraaraa, n te aro are a riki taian buaka ni kabuta te aba i buakoia ana botanaomata Nibwaai.

2 Ao bon te koraki ni kamwarua ni ^akaraba ake a waakina te mwakuri n urubwai ma ni buakaka aio. Ao e bane te ririki anne i nanon te buaka; ao e bwanin naba te kaitibwi ma teniua n ririki i nanon te buaka.

3 Ao e a koro bukina bwa n te ririki aio ao Nibwaai e tang nakon te Uea, ni kangai:

4 O te Uea, tai kariaia bwa a na tiringaki te botanaomata aio n te kabaang; ma O te Uea, karokoa te ^arongo nakon te aba, bwa e na kakiriwea nanoia bwa a na uringa te Uea ae Atuaia, ao tao a na kona n rairinanoia ma n rairaki nakoim.

5 Ao e bon karaoaki, n aron ana taeka Nibwaai. Ao e roko te rongo ae korakora iaon te aba, i buakoia ana botanaomata Nibwaai ni kabane. Ao ngaia are n te kaitibwi ma aua n ririki ao e reiti nako te rongo, ao te mwakuri n tiritiri n te kabaang e bon keenako ma e korakora te tiritiri n te rongo.

6 Ao te mwakuri n urubwai aio e bon reitinako n te kaitibwi ma nimaua n ririki. Bwa e oreaki te tano n te aro are e a mwautakataka, ma n aki anga uaana n tain te kariki uaa; ao e a oreaki te aba ni kabuta, i buakoia Reimwanaite ao Nibwaite naba, n te aro are a oreaki ao a mate ngaa ma ngaa ni mwakoron te aba are a buakaka riki kaaina.

7 Ao e a koro bukina bwa aomata a nooria bwa a na mate n te rongo, ao a moanna n ^auringa aia Uea ae Atuaia; ao a moanna n uringa ana taeka Nibwaai.

8 Ao aomata a waaki ni bubuti ma mataniwiia aia taan moti ma aia tia kairiri, ao a taku nakon Nibwaai: Nooria, ti bon ataia bwa ngkoe ana aomata te Atua, ao ngaia are taang nakon te Uea ae Atuara bwa e na kanakoa te rongo aio mai iroura, bwa mwiina ao ana ^ataeka ni kabane ake e a tia n taekin ni kaineti ma kamaunakira a na koro bukiia.

9 Ao e a koro bukina bwa taan moti a bon taekin taeka ake e kan ongo Nibwaai. Ao e a koro bukina bwa ngke Nibwaai e nooria bwa a tia n rairinanoia te botanaomata ma n nanorinano ni bwaini kunnikai aika raerobwa, ao e a manga tang riki nakon te Uea, ni kangai:

10 O te Uea, nooria a rairinanoia te botanaomata aio; ao a tia ni kamaunaia ana koraki Kateanton mai i buakoia n te aro are akea, ao a tia ni karabai ma n taunii aia babaire ni karaba.

11 Ao ngkai, O te Uea, ibukin aia nanorinano aio ko kona ni katannakoa unim, e na marau nako unim ngkai ko kamaunaia aomata ake a bubuaka ake ko a tia n tiringia.

12 O te Uea, ko kona ni katannakoa unim, eng, unim ae korakora, ma ni karekea te anga are e na toki te rongo n te aba aei.

13 O te Uea, ko kona n ongo irou, ma ni karekea te anga ae e na karaoaki nanon au taeka, ma ni kabwaka te ^akarau iaon te aba, bwa e aonga ni kariki uaanikai, ao ana wiita n tain te wiita.

14 O te Uea, ko bon ongo n ^aau taeka ngke I kangai, Ke e roko te rongo, bwa e aonga n toki te tiritiri n te kabaang; ao I ataia bwa ko kona n te tai aei, n ongo n au taeka, bwa ko a tia n taekina ae kangai: Ngkana a rairinanoia te botanaomata aio ao N na kamaiuia.

15 Eng, O te Uea, ao ko nooria bwa a tia n rairinanoia, ibukin te rongo ao taian aoraki ma urubwai ake a tia n roko i aoia.

16 Ao ngkai, O te Uea, ko kona ni katannakoa unim, ma ni kataia riki bwa tao a na toro iroum ke aki? Ao ngkana e riki aio, O te Uea, ko kona ni kakabwaiaia n aron am taeka are ko a tia n taekinna.

17 Ao e a koro bukina bwa n te kaitibwi ma onoua n ririki ao te Uea e bon katannakoa unna mai irouia aomata, ma ni karekea te anga are e na bwaka iai te ^akarau iaon te aba, n te aro are e a bon kariki uaanikai n tain te uaanikai. Ao e bon koro bukina bwa e karika te wiita n tain te wiita.

18 Ao nooria, a bon kimwareirei ma n atonga te Atua bwa e mimitong, ao e a kaonaki te aonaba n te kimwareirei; ao a bon aki manga ukoukora kan tiringan Nibwaai, ma a bon karietata bwa te burabeti ae ^akakannato, ao ana aomata te Atua, ae iai irouna te mwaaka ma te kariaiakaki n anga te tua ae e anganaki mai iroun te Atua.

19 Ao nooria, Riaai, are tarina, e bon aki bwaka ^ai aana n aron te kororaoi.

20 Ao ngaia are e bon koro bukina bwa ana aomata Nibwaai a manga nakoraoi riki aroia n te aba, ao a manga waaki riki ni karaoa aia tabo ake aki maekanaki, ao a moanna ni kamwaita aia kariki ma ni kabuta te aba, ni karokoa ae a rabuna aon te aba, i meang ao i maiaki, ma i taari ni wairio nako taari ni waerake.

21 Ao e a koro bukina bwa e bane te kaitibwi ma onoua n ririki i nanon te rau; ao te ^aekaretia e a bon kabuta aon te aba; ao mwaitia aomata ake Nibwaite ao Reimwanaite, a boni kaaina te ekaretia; ao e bon reke irouia te rau ae korakora ae rianako iaon te aba; ao ikai are e a toki iai te kaitibwi ma itiua n ririki.

22 Ao riki bon iai te rau irouia n te kaitibwi ma waniua n ririki, ma ti iai tabeua taian itabaraaraa ni kaineti ma kanoan taian reirei ake a tia n anga reirei iai taian burabeti.

23 Ao n te kaitibwi ma ruaiwa n ririki ao e a korakora te mangaongao. Ma e a koro bukina bwa Nibwaai ma Riaai, ao tariia aika a mwaiti ake a atai kanoan raoi taian reirei, bwa a tia ni karekei taian ^akaotioti ni katoa bong, ngaia are a bon kabwarabwara nakoia, n te aro are a bon katoka te mangaongao n te ririki naba anne.

24 Ao e a koro bukina bwa n aia kawanibwi n ririki n tautaeka taan moti i aoia ana botanaomata Nibwaai, bon iai tabeman taan birinako mai i buakoia ana botanaomata Nibwaai, ake a bon tia ni kawaria Reimwanaite tabeua te ririki n nako, ma ni katokaa i aoia te ara ae Reimwanaite, ao iai riki tabeman ake bon Reimwanaite ni koaua, ake a kaunaki irouia, ke irouia taan birinako akekei, ngaia are a kateirakea te buaka ma tariia.

25 Ao a bon karaoa te tiriaomata ma te mwakuri n iowawa n anaibwai; ao i mwina a manga okirikaki nakon te rereua ma taabo aika a raba, ni karabaia bwa aonga n aki kona ni kuneaki, ma n raka mwaitia ni katoa bong, n aron mwaitia taan birinako ake a kawaria.

26 Ao ngaia are e aki maan te tai, eng, i nanon te maan ae aki bati te ririki ao a bon riki bwa te koraki ni kamwarua ae korakora; ao a ukoukorii ana babaire aika a raba Kateanton; ao ngaia are a riki bwa ana taan iraa Kateanton.

27 Ngkai nooria, a bon karaoa te kamangao ae korakora taan kamwarua aikai, eng, ni karaoa te urubwai ae korakora i buakoia ana botanaomata Nibwaai, ao i buakoia naba te botannaomata ae Reimwanaite.

28 Ao e a koro bukina bwa e bon riai bwa e na katokaki te mwakuri n urubwai aio; ngaia are a kanakoa te taanga ni buaka aika korakora ae aintoa mwaanena nakon te rereua ao iaon te maunga bwa a na ukoukora te koraki ni kamwarua aio, ma n tiringia.

29 Ma nooria, e a koro bukina bwa n te ririki naba anne ao a bon kakioaki n oki nakon oin abaia. Ao ikai are e a toki iai aia kawanibwi n ririki n tautaeka taan moti i aoia ana botanaomata Nibwaai.

30 Ao e a koro bukina bwa ni moan waakinan te kawanibwi ma teuana n ririki ao a bon mwananga riki ni kaitaraa te koraki ni kamwarua aio, ma n tiringia aika a mwaiti; ao ngaia e bon mwaiti naba raoia aika a bua.

31 Ao a bon kairoroaki bwa a na manga oki ni kitana te rereua ma taian maunga nako oin abaia, ibukin korakoran rianakon mwaitia taan kamwarua ake a kaona te maunga ma te rereua.

32 Ao e a koro bukina bwa e a toki te ririki aio. Ao taan kamwarua a bon reiti nako n rikirake ma n rikirake ni matoatoa, n te aro are a bon tei ni kaitarai aia taanga ni buaka Nibwaite ae bwanin, ao Reimwanaite naba; ao a bon karika te maaku ae korakora bwa e na roko i aoia aomata ni kabane ake iaon te aba.

33 Eng, a bon kawaria aika a mwaiti ni mwakoron te aba ae bati, ma ni karaoi urubwai aika a korakora nakoia; eng, ma n tiringia aika a mwaiti, ma ni kairia tabeman bwa bure nakon te rereua, eng, ao riki aia aine ma natiia.

34 Ngkai te buakaka ae korakora aio, are e roko nakoia aomata ibukin aia bure, e bon kakiriwea nanoia bwa a na uringa aia Uea ae Atuaia.

35 Ao ikai are e a toki iai aia kawanibwi ma teuana n ririki n tautaeka taan moti.

36 Ao n te kawanibwi ma uoua n ririki ao a manga ^amwaninga naba taekan te Uea ae Atuaia. Ao n te kawanibwi ma teniua n ririki ao a moanna ni matoatoa i nanon te bure. Ao n te kawanibwi ma aua n ririki ao a bon aki kaeti aroia.

37 Ao e a koro bukina bwa n te kawanibwi ma nimaua n ririki ao a bon rikirake ni matoatoa ao ni matoatoa riki n aroia ni kainikatonga, ao ni buakakaia; ao ibukin anne a manga tai riki nakon te kamaunaaki.

38 Ao ngaia are e a toki te kawanibwi ma nimaua n ririki.