Koroboki Aika Tabu
Ereman 8


Mwakoro 8

Taan moti aika a buakaka a ukoukora kakiriwean nanoia aomata bwa a na un ni kaitaraa Nibwaai—Aberaam, Mote, Tinoti, Tinoki, Eteati, Itaia, Ieremia, Riaai, ao Nibwaai a bane ni kakoaua Kristo—Ma n ana kairiri te tamnei ae raoiroi ao Nibwaai e katanoata tiringakin mataniwiia taan moti. Uakaan ma 23–21 I.K.

1 Ao ngkai e a koro bukina bwa ngke Nibwaai e a tia n taekin bwaai aikai, nooria, bon iai mwaane ake a kaaina ana koraki ni karaba Kateanton, ao a bon un ma n takarua ni kaitaraa, ma n taku nakoia aomata: E aera ngkai kam aki katika te mwaane aio ma ni kairia mai, bwa e na kabuakakaki n aron te bure are e a tia ni karaoia?

2 E aera ngkai kam taratara te aomata aio ma n ongora n ana taeka ni kabuakaka ni kaaitaraia te botanaomata aio ao ni kaitaraa ara tua?

3 Bwa nooria, e a tia n taetae Nibwaai nakoia ni kaineti ma buakakan aia tua; eng, a mwaiti bwaai ake e taekin Nibwaai ake aki kona ni koreaki; ao bon akea ae taekinna are kaitaraa ana tua te Atua.

4 Ao a bon un taan moti akekei irouna ibukina bwa e akamataataa nakoia aia mwakuri aika a roo; ma e ngae n anne, a bon rawa ni katokai oin baia iaona, bwa a maaku bwa mwiina ao a na tangitang aomata ni kaaitaraia.

5 Ngaia are a bon tang nakoia aomata ni kangai: E aera ngkai kam kariaia te aomata aio bwa e na taetae ni kabuakakaira? Bwa nooria e bon kabuakakaia te botanaomata aio ni kabane eng, bwa ti na kamaunaki; eng, ao riki bwa ara kaawa aikai a na anaaki mai iroura, bwa a na akea nnera iai.

6 Ao ngkai ti bon ataia bwa e aki kona n riki aio, bwa nooria, ti bon korakora, ao a korakora ara kaawa, ngaia are akea korakoraia ara kairiribai iaora.

7 Ao e a koro bukina bwa a bon kakiriwei nanoia aomata bwa a na un ni kaitaraa Nibwaai, ma ni karekea te itabaraaraa; bwa iai tabeman ake a takarua ni kangai: Katuka te mwaane aio, bwa bon te aomata ae raoiroi, ao bwaai ake e taekin a na bon koro bukiia ngkana ti aki rairinanora.

8 Eng, nooria, taian motikitaeka ni kabane ake e taekin koauaia a na bon bane n roko iaora; bwa ti ataia bwa e taekina te koaua nakoira ni kaineti ma buakakara. Ao nooria a bon mwaiti, ao e bon aatai ni koaua bwaai ni kabane ake a na bwakarira n aron naba ataakin ara bure irouna.

9 Eng, ao nooria, ngke arona bwa tiaki te burabeti e na bon aki kona n taekin koaua aika a kaineti ma bwaai aikai.

10 Ao e a koro bukina bwa aomata ake a ukoukora kan tiringakin Nibwaai a bon kairoroaki ibukin maakuia bwa a na aki katokai baia iaona; ngaia are e a manga waaki riki n taetae nakoia, ngke e nooria bwa e tangiraki n aron aia taratara tabeman, n te aro are a bon maaku ake nikiraia.

11 Ngaia are e a bon kairoroaki bwa e na manga taetae riki nakoia ni kangai: Nooria, tariu, kam tuai ni wareka are te Atua e angan temanna te aomata te korakora, ae Mote, bwa e na orea ranin aTaari are Uraura, ao a bwenaua ikai ao ikekei, n te aro are I-Iteraera, ake bon ara bakatibu, a rinanona iaon te tano ae mwau, ao e in te ran i aoia aia taanga ni buaka Aikubita ma ni kabwautiia?

12 Ao ngkai nooria, ngkana te Atua e angan te aomata aio te mwaaka, e aera ngkai kam uneaki imarenami, ma n taku bwa e a tia n aki anganai te mwaaka are N na kona n atatai iai ni kaineti ma taian motikitaeka ake a na bwakaringkami ngkana kam aki rairinanomi?

13 Ma, nooria, kam aki ti kakewei au taeka, ma kam kakewei naba taeka ni kabane ake a taekin ara bakatibu, ao taeka naba ake a taekinaki iroun te aomata ae korakora aio, ae Mote, are iai te mwaaka ae korakora are e anganaki, eng, taeka ake e taekin ni kaineti ma rokon te Mesia.

14 Eng, tiaki bwa e taetae ni kakoaua bwa e na roko Natin te Atua? Ao ngke e atabeka rake te naeta are e buraati i nanon te rereua, ao e na bon tabekaki rake naba teuare e na roko.

15 Ao te mwaiti are e na tararake nakon te naeta e na bon akamaiuaki, ao ai aron naba te mwaiti are e na taraa Natin te Atua ma te onimaki, n iai irouia te nano ae raraoma, ao a na bmaiu, n te maiu are akea tokina.

16 Ao ngkai nooria, e aki ti taekin koauan bwaai aikai Mote, ma ataian burabeti naba aika a tabu, man ana tai Mote nakon ana bong Aberaam.

17 Eng, ao nooria, aAberaam e noora rokona, ao e onrake n te kakaitau ma te kimwareirei.

18 Eng, ao nooria I taku nakoimi, bwa Aberaam e aki ti atai bwaai aikai, ma a bon amwaiti ake a tia ni weteaki i mwaain ana tai Aberaam ake a weteaki n ana bbaire te Atua; eng, n aron ana botaki Natina; ao e riki aio bwa e aonga ni kaotaki nakoia te botanaomata, ngaa ma ngaa te ririki i mwaain rokona, bwa te kabomwi e kona naba n reke nakoia.

19 Ao ngkai I tangiria bwa kam na ataia, bwa man ana tai naba Aberaam ao a bon mwaiti burabeti ake a tataekin koauan bwaai aikai; eng, nooria, te burabeti are aTinoti e bon ninikoria n tataekina te koaua; are e tiringaki ibukina.

20 Ao nooria, aTinoki naba, ma Eteati naba, ma bItaia naba, ma cIeremia (Ieremia bon te burabeti naba are e taekina koauan uruakan dIerutarem) ao ngkai ti a ataia bwa e bon uruakaki Ierutarem n aron ana taeka Ieremia. O ngkanne e aera ngkai e aki roko Natin te Atua, n aron ana taeka ni burabeti?

21 Ao ngkai kam na kauntaekaia bwa e uruakaki aIerutarem ke e aki? Kam na taekinna bwa aki tiringaki bnatin Tetekia, ni kabane ma ti cMureki? Eng, ao kam aki nooria bwa ana kariki Tetekia a mena irarikira, ao a kakioaki nako man te aba are Ierutarem? Ma nooria, tiaki ti aio—

22 Ara bakatibu are Riaai e kakioaki nako mai Ierutarem ibukina bwa e kakoaua ibukin bwaai aikai. Nibwaai e kakoaua naba ibukin bwaai aikai, ao angiia naba ara bakatibu, ni karokoa te tai aio; eng, a bon kakoaua ibukin arokon Kristo, ma n ingainga, ma ni kimwareirei n ana bong are e na roko iai.

23 Ao nooria, bon ngaia te Atua, ao e mena irouia, ao e bon kaotia nakoia, n te aro are a kabooaki irouna; ao a bon anganna te mimitong, ibukin te bwai are e na roko.

24 Ao ngkai, I nooria bwa kam atai bwaai aikai ma n aki kona ni kakewei ti ngkana kam taekina ae kewe, ngaia are kam a tia ni bure n aio, bwa kam totokoi bwaai ni kabane, e ngae ngke e a bon tiraua bwaai ni kakoaua are kam a tia ni karekei, eng, kam a bon tia ni karekei bwaai ni akabane, i karawa ao iaon te aba, ao bwaai ni kabane ake iaon te aba a kakoaua bwa a bon koaua.

25 Ma nooria, kam a tia n totokoa te koaua, ma ni akaitaraa Atuami ae tabu; ao n te tai aei, kam aki kaikoi bkaubwaimi i karawa, are akea iai te bwai ae kona ni mka, ao akea te bwai ae kona n roko iai ae bareka, ma kam kaikoa ibukimi te un ae korakora n te bong ni cmotikitaeka.

26 Eng, n te tai aei ao kam a bon tai, ibukin ami tiriaomata ma ami awenenibure ma buakakami, nakon te kamaunaki ae aki totoki; eng, ao ngkana kam aki rairinanomi ao e na waekoa n roko iroumi.

27 Eng, nooria e a bon kaan ma ami mataroa; eng, nakon te kaintekateka ni motikitaeka, ao ukeuke; ao nooria, e a tiringaki ami tia moti, ao e awene i nanon raraana; ao e a bon tia n tiringaki biroun tarina, are e ukoukora te kan tekateka n te kaintekateka ni motikitaeka.

28 Ao nooria, a bon kaai ni kaaina te koraki ni karaba, are e akateaki iroun Kateanton ao teuare e buakaka are e ukoukora kamaunakin tamneia aomata.