1 Nooria, ngkai e a koro bukina bwa ngke Nibwaai e a tia n taekin taeka aikai, iai mwaane tabemwaang ake a mena i buakoia ao a birinakon te kaintekateka ni motikitaeka; eng, bon niman ake a nako, ao a taku imarenaia, i nanon mwanangaia:

2 Nooria, ngkai ti nang ataia bwa tao te aomata aio te burabeti ao te Atua e a tia n anganna te tua bwa e na taetae ni burabetii bwaai aikai aika a kamiimi nakoira. Nooria, ti bon aki kakoaua bwa e a tia; eng, ti bon aki kakoaua bwa bon te burabeti; ma e ngae n anne, ngkana te bwai ae e taekinna aio ibukin mataniwia taan moti e bon koaua, bwa e a mate, ao ngkanne ti na kakoauai ana taeka riki ake e a tia n taekin bwa a koaua.

3 Ao e a koro bukina bwa a kabanea korakoraia ni biri, ma n roko n te kaintekateka ni motikitaeka; ao nooria, e a bwaka nako aontano mataniwiia taan moti, ao e bon ^awene i nanon raraana.

4 Ao ngkai nooria, ngke a noora aio ao e bon korakora miimiia, n te aro are a bwaka nako aontano; bwa a bon aki kakoauai taeka ake e a tia n taekin Nibwaai ni kaineti ma mataniwiia taan moti.

5 Ma ngkai, ngke a nooria ao a kakoaua, ao e roko irouia te maaku bwa mwiina ao e roko irouia taian motikitaeka ni kabane are e a tia n taekin Nibwaai bwa a na roko nakoia aomata; ngaia are a ruru, ma ni bwaka nako aontano.

6 Ngkai, n te tai naba are e a tiringaki te tia moti—are e bon ewaraki iroun tarina are e bwaina te kunnikai are e raba iai bwa antai ngaia, ao e birinako, ao ana toro a biri ma n tuangiia aomata, n takaruaea taekan te tiriaomata;

7 Ao nooria a ikotiia te botanaomata nakon te tabo are e mena iai te kaintekateka ni motikitaeka—ao nooria, a bon rangi ni miimii ngke a nooriia mwaane ake niman ake a bwaka nako aontano.

8 Ao ngkai nooria, akea te bwai ae a ataia aomata ni kaineti ma aomata ake a uanao ake a ikotaki n ana ^aonaroka Nibwaai; ngaia are a taku imarenaia: Aikai mwaane aika a tiringa te tia moti, ao e a tia te Atua n oroia bwa a na aki kona ni birinako mai iroura.

9 Ao e a koro bukina bwa a tauiia, ma ni kabaeiia ao n tewenakoia nako nanon te nne ni kaikain. Ao iai te katanoata are e kanakoaki bwa e a tiringaki te tia moti, ao taan tiringnga a bon anaaki ao ma n teweaki nako nanon te nne ni kaikain.

10 Ao e a koro bukina bwa n te bong are i mwina a ikotaki aomata bwa a na rainanoanga ma n ^aaki mamatam, n tain taunakin te tia moti are e rietata ma ni kakannato are e a tia n tiringaki.

11 Ao ngaia are taan moti naba ake a mena n ana onaroka Nibwaai, ma n ongo ana taeka a bon ikotaki naba n tain te taunimate.

12 Ao e a koro bukina bwa a kakae mai irouia aomata, ni kangai: Angaa naake niman ake a kanakoaki bwa a na kakae ni kaineti ma mataniwia taan moti bwa tao e a mate? Ao a kaeka ni kangai: Ni kaineti ma naake niman are kam taku bwa kam kanakoia, ti bon aki ataia; ma bon iai niman ake taan tiriaomata, ake a tia n teweaki nako nanon te nne ni kaikain.

13 Ao e a koro bukina bwa taan moti a tangiria bwa a na uotaki nako mataia; ao a kairaki, ao nooria bon ngaiia naake niman ake a kanakoaki; ao nooria taan moti a kakae mai irouia ni kaineti ma te bwai are e riki, ao a tuangiia bwaai ni kabane ake a tia ni karaoai, ni kangai:

14 Ti biri ma n roko nakon te tabo are e mena iai te kaintekateka ni motikitaeka, ao ngke ti noori bwaai ni kabane n aron are e kakoaua ibukiia Nibwaai, ti bon rangi ni miimi n te aro are ti bwaka nako aontano; ao ngke ti a okira arora i mwin miimira, nooria a bon teweira nako nanon te nne ni kaikain.

15 Ngkai, ibukin tiringakin te mwaane aei, ti bon aki ataia bwa antai ae tiringnga, ma ti aei ae ti ataia, ti biri ma n roko ikai n aron are kam tangiria, ao nooria e a bon mate, n aron ana taeka Nibwaai.

16 Ao e a koro bukina bwa taan moti a kabwarabwara te bwai arei nakoia aomata, ma n takarua ni kaitaraa Nibwaai ni kangai: Nooria, ti ataia bwa Nibwaai aio e a tia ni boraraoi ma temanna bwa e na tiringa te tia moti, bwa e aonga n taekinna nakoira, bwa e aonga n rairiira nakon ana onimaki, bwa e aonga n riki ngaia bwa te aomata ae kakannato, ae rineaki mai iroun te Atua, ao te burabeti.

17 Ao ngkai nooria, ti na bon kamwanea te aomata aio, ao e na kaota ana kairua ma ni kaota nakoira te tia tiringa raoi te tia moti aio.

18 Ao e a koro bukina bwa a kainaomataaki naake niman n te bong are e taunimate te aba iai. Ma e ngae n anne ao a bon kabuakakaiia taan moti ibukin taeka ake a tia n taekin ni kaitaraa Nibwaai, ma n itabaraaraa ma temanna i mwin temanna, n te aro are a bon kabaei wiia.

19 Ma e ngae n anne, a tua bwa e na uotaki Nibwaai ma ni kabaeaki ao e na uotaki nako mataia aomata aika a uanao, ao a waaki n titirakinna n te aekaki ae bati bwa e aonga ni bure ana karaki, bwa aonga ni kunea burena bwa a na tiringnga—

20 A taku nakoina: Bon ngkoe te tia kamwamwane; antai te aomata ae e a tia ni karaoa te tiriaomata aio? Ngkai naba ao tuangira, ma ni kaota am kairua; ma ni kangai, Nooria aio te mwaane; ao ti na anganiko naba maium ngkana ko tuangira, ma n kaota koauan te boraraoi are ko karaoia mangaia.

21 Ma Nibwaai e taku nakoia; O taian ^aburababa, ake a aki korotobibiaki nanomi, kam mataki, ao kam ^bbonotaninga, kam ataia bwa maannra te Uea ae Atuami ni kariaia bwa kam na waakina aromi aio ni kawain te bure?

22 O kam riai n tatakarua ma n ^ananokawaki, ibukin te urubwai ae korakora are e tataningaingkami n te tai aei, ngkana kam aki rairinanomi.

23 Nooria kam taku bwa I a tia ni boraraoi ma te mwaane temanna bwa e na tiringa Titioram, mataniwiia ara tia moti. Ma nooria, I taku nakoimi, e riki aei ibukina bwa I taetae ni kakoaua nakoimi ni kaineti ma te bwai aio; eng, bwa te bwai ni kakoaua nakoimi, bwa I ata te buakaka ma mwakuri aika bati n ribaki i buakomi.

24 Ao ibukina bwa I karaoa aio, kam taku bwa I a tia ni boraraoi ma te mwaane temanna bwa e na karaoa te bwaai aei; eng, ibukina bwa I kaota nakoimi te kanikina ao kam un irou, ma n ukoukora anaakin maiu.

25 Ao ngkai nooria, N na kaota riki nakoimi te kanikina teuana, ao nooria bwa tao kam na ukoukora tiringakiu ibukin te bwai aei.

26 Nooria I taku nakoimi: Nako nakon batan Tiantam, are ^atarin Titioram, ma ni kangai nakoina—

27 E a tia Nibwaai are e baka ni burabeti, are e taetae ni burabetia te buakaka ae korakora ni kaineti ma te botanaomata aei, n tia ni boraraoi ma ngkoe, are ko a tiringa iai Titioram are tarim?

28 Ao nooria, e na kangai nakoimi, E tuai.

29 Ao kam na kangai nakoina: Ko a tia n tiringa tarim?

30 Ao e na tei ma te maaku, ma n aki ataa te bwai ae e na taekinna. Ao nooria, e na kakewekewe nakoimi; ao e na baka ni miimii; ma e ngae n anne, e na bon taekinna nakoimi bwa bon akea burena.

31 Ma nooria, kam na tuoa, ao kam na kunea te raraa iaon rabin ana kunnikai.

32 Ao ngkana kam a tia n noora aio, kam na kangai: E roko mai ia te raraa aio? Ti na kanga n ataia bwa tao raraan tarim?

33 Ao ngkanne e na bon rurubenebene, ma n taraa ni mairake, n aron ae roko te mate irouna.

34 Ao ngkanne kam na kangai: Ibukin maakum aei ao te mairake are e oti imoamoam, nooria, ti bon ataia bwa bon te tia bure ngkoe.

35 Ao ngkanne e na korakora riki te maaku irouna; ao ngkanne e na kaota te koaua nakoimi, ma n aki manga kakewea are e a tia ni karaoa te tiritiri aio.

36 Ao ngkanne e na kangai nakoimi, bwa Ngai, ae Nibwaai, bon akea te bwai ae I ataia ni kaineti ma te bwai are e riki ma ti are I anganaki mai iroun mwaakan te Atua. Ao ngkanne kam na ataia bwa Ngai te aomata ae I kokoaua, ao bwa I kanakoaki mai iroun te Atua nakoimi.

37 Ao e a koro bukina bwa a bon nako ma ni karaoia, n aron are e a tia Nibwaai n taekinna nakoia. Ao nooria, taeka ake e a tia n taekin a bon koaua; bwa n aron te taeka are e kakewekewe iai; ao n aron naba te taeka are e bon kaota ana bure.

38 Ao e bon kairaki bwa e na kaotia bwa bon ngaia te tia tiritiri, n te aro are a kainaomataaki naake niman, ma Nibwaai naba.

39 Ao bon iai tabemwaang Nibwaite ake a kakoauai ana taeka Nibwaai; ao bon iai naba tabemwaang, ake a kakoauai aia koaua naake niiman, bwa a bon tia n rairaki i nanon tikuia n te nne ni kaikain.

40 Ao ngkai bon iai aomata tabemwaang, are a taekinna bwa Nibwaai bon te burabeti.

41 Ao iai tabemwaang ake a kangai: Nooria, bon ngaia te atua, bwa ngke tiaki te atua ao e bon aki kona n atai bwaai ni kabane. Bwa nooria, e a tia n tuangira taian iiango ake inanora, ma n tuangira naba bwaai; ma n tia naba ni kairira nakon ataakin te tia tiringa raoi mataniwiia ara taan moti.