1 Nao i bin hapen se, Alma i stat blong talemaot toktok blong God long ol pipol, stat long graon blong Sarahemla, mo afta, truaot long evri ples long graon.

2 Mo hemia ol toktok we hem i talem long ol man long jos we oli stanemap long bigtaon blong Sarahemla, folem histri blong hemwan bakegen, i talem:

3 “Mi, Alma, mi bin kasem konsekresen tru long papa blong mi, Alma, blong kam wan hae pris blong jos ia blong God; hem i bin gat paoa mo atoriti we i kam long God blong mekem ol samting ia, luk, mi talem long yufala se hem i stat blong stanemap wan jos long graon we i bin stap long ol boda blong Nifae; yes, graon we oli singaotem graon blong Momon; yes, mo hem i bin baptaesem ol brata blong hem long wota blong Momon.

4 Mo luk, mi talem long yufala, oli bin kam fri mo kamaot long ol han blong ol man blong king Noa, tru long sore mo paoa blong God.

5 Mo luk, afta long hemia, oli kam slef long ol han blong Ol Man blong Leman long waelples; yes, mi talem long yufala, oli stap long kalabus, mo bakegen, Lod i mekem oli kamaot long fasin blong stap slef tru long paoa blong toktok blong hem; mo hem i tekem yumi i kam long graon ia mo yumi stat blong stanemap jos ia blong God long ples ia, long evri ples blong graon ia tu.

6 Mo nao luk, mi talem long yufala, ol brata blong mi, yufala blong jos ia, ?yufala i bin holemtaet inaf long tingting blong yufala, long saed blong taem ia we ol papa blong yufala oli stap long kalabus? Yes, mo ?yufala i bin holemtaet inaf long tingting blong yufala, long saed blong fasin we God i gat sore mo fasin blong hem blong gat longfala tingting long olgeta? Mo antap long samting ia, ?yufala i bin holemtaet inaf long tingting blong yufala, se hem i bin sevem sol blong olgeta long hel?

7 Luk, hem i jenisim hat blong olgeta; yes, hem i wekemap olgeta long wan dip slip, mo oli wekap long God. Luk, oli stap long medel blong ol klaod blong tudak; be, laet blong toktok ia we i no gat en, i bin saenem sol blong olgeta; yes, ol rop blong ded, mo ol jen blong hel, oli bin raonem olgeta, mo wan ded we i no gat en i stap wet long olgeta.

8 Mo nao mi askem yufala, ol brata blong mi, ?yufala i ting se olgeta oli bin lus olgeta? Luk, mi talem long yufala, No, oli no bin lus.

9 Mo bakegen mi askem, ?yufala i ting se ol rop blong ded oli brok, mo se ol jen blong hel we i bin raonem olgeta, oli kamaot? Mi talem long yufala, Yes, oli bin kamaot, mo sol blong olgeta i gro bigwan, mo oli singim singsing blong lav blong pemaot man. Mo mi talem long yufala se Lod i sevem olgeta.

10 ?Mo nao mi askem yufala se folem wanem kondisen nao Lod i sevem olgeta? ?Yes, long wanem stamba tingting nao we oli bin gat hop blong kasem fasin blong sevem man? ?Wanem nao i bin mekem olgeta oli kamaot long ol rop blong ded, yes, mo tu, long ol jen blong hel?

11 Luk, mi save talem long yufala—?papa blong mi Alma i no bin biliv long ol toktok we oli kamaot long maot blong Abinadae? ?Mo yufala i ting se hem i no wan tabu profet? ?Yufala i ting se hem i no talemaot ol toktok blong God, mo papa blong mi Alma i bilivim olgeta?

12 Mo folem fet blong hem, wan bigfala jenis i bin hapen long hat blong hem. Luk mi talem long yufala se evri samting ia i tru.

13 Mo luk, hem i prijim ol toktok long ol papa blong yufala, mo tu, wan bigfala jenis i bin hapen long hat blong olgeta. Mo oli bin putum tingting blong olgeta daon mo oli putum tras blong olgeta long tru God we i stap laef. Mo luk, oli bin fetful kasem en; from hemia God i bin sevem olgeta.

14 Mo nao luk, mi askem yufala, ol brata blong mi blong jos: ?yufala i bin bon long God long saed blong spirit? ?Yufala i bin kasem pikja blong hem long fes blong yufala? ?Yufala i ting se yufala i bin kasem bigfala jenis ia long hat blong yufala?

15 ?Yufala i stap praktisim fet long fasin blong pemaot man, we i kam long hem we i bin mekem yufala? ?Yufala i lukluk i go fored wetem wan ae blong fet, mo luk bodi ia we i save ded i girap long wan bodi we i nomo save ded, mo roten bodi ia i girap long wan bodi we i nomo save roten, blong stanap long fored blong God blong hem i jajem yufala folem ol wok we yufala i bin mekem long taem we yufala i gat bodi ia we i save ded?

16 Mi talem long yufala: ?Traem tingbaot se yufala i harem voes blong Lod, we i talem long yufala, long dei ia: Kam long mi yufala we mi blesem yufala, from luk, ol wok blong yufala oli ol wok blong stret mo gud fasin long fes blong wol?

17 ?O traem tingbaot se yufala i save giaman long Lod long dei ia, mo talem: ‘Lod, ol wok blong mifala oli bin ol stret mo gud wok long fes blong wol,’ mo yufala i ting se hemia bae i sevem yufala?

18 ?O sapos no, traem tingbaot taem bae God i karem yufala i kam long kot blong hem wetem sol blong yufala we i fulap wetem rong mo sore, mo yufala i rimemba evri rong blong yufala, yes, yufala i rimemba stret evri fasin nogud blong yufala, yes, bae yufala i rimemba se yufala i no bin wantem save long ol komanmen blong God?

19 Mi talem long yufala, ?yufala i ting se yufala i save luk God long dei ia wetem wan klin hat mo ol klin han? Mi talem long yufala se, ?yufala i ting se yufala i save leftemap ae blong yufala wetem pikja blong God we i stap long fes blong yufala?

20 Mi talem long yufala, ?yufala i ting se Lod i save sevem yufala taem yufala i givim yufala long devel blong kam ol man blong hem?

21 Mi talem long yufala, bae yufala i save long dei ia se Lod i no save sevem yufala; from i no save gat wan man we Lod i save sevem hem, hemia nomo sapos hem i wasem klos ia i kam waet. Yes, ol klos blong hem oli mas kam klin gud kasem taem we evri mak i kamaot, tru long blad blong man ia we ol papa blong yumi oli bin tokbaot, we bae hem i kam blong pemaot ol pipol blong hem aot long ol sin blong olgeta.

22 Mo nao mi askem long yufala, ol brata blong mi. ?Bae yufala i filim olsem wanem, sapos yufala i stanap long fored blong kot blong God, wetem blad mo evri kaen doti mak i stap long ol klos blong yufala? Luk, ?wanem nao ol samting ia bae oli talem agensem yufala?

23 Luk, ?bae oli no talemaot se yufala i ol man blong kilim man i ded, yes, mo tu, se oli faenem rong blong yufala long evri kaen fasin nogud?

24 Luk, ol brata blong mi. ?Yufala i ting se wan man olsem i save gat wan ples blong sidaon long hem long kingdom blong God, wetem Ebraham, wetem Aesak, mo wetem Jekob, mo tu, evri tabu profet, we ol klos blong olgeta oli kam klin, mo oli no gat mak, oli klin gud tumas mo oli waet?

25 Mi talem long yufala: No; sapos nomo yufala i mekem Krieta blong yumi i wan man blong giaman long stat, o sapos hem i wan man blong giaman long stat, yufala i no save traem blong ting se man olsem i save gat wan ples long kingdom blong heven; be bae oli sakemaot olgeta from oli ol pikinini blong kingdom blong devel.

26 Mo nao luk, mi talem long yufala, ol brata blong mi, sapos yufala i bin gotru long wan jenis long hat, mo sapos yufala i bin filim blong singim singsing blong lav blong pemaot man, bae mi askem: ?yufala i save filim samting ia naoia?

27 ?Yufala i bin stap wokbaot long wol ia, we laef blong yufala i no gat rong long fored blong God? ?Yufala i save talem se sapos God i singaotem yufala naoia blong ded, insaed long yufala bakegen, bae yufala i ting se tingting blong yufala i bin stap daon inaf? ?Se ol klos blong yufala oli klin, mo oli kam waet tru long blad blong Kraes ia, we bae hem i kam blong pemaot ol pipol blong hem, aot long ol sin blong olgeta?

28 Luk, ?yufala i bin karemaot long yufala fasin blong gat hae tingting? Mi talem long yufala, sapos yufala i no bin mekem samting ia yet, yufala i no rere blong mitim God. Luk, yufala i mas rere kwik; from kingdom blong heven i kam kolosap, mo ol man olsem ia bae oli no gat laef we i no save finis.

29 Luk, mi talem, ?i gat wan long medel blong yufala we i no bin karemaot fasin ia blong wantem samting blong narafala man? Mi talem long yufala se man olsem ia i no rere; mo mi wantem blong hem i mas rere kwik, from aoa i stap kam kolosap, mo hem i no save wanem taem bae samting ia i hapen; from man olsem ia bae oli no save faenemaot se hem i no gat rong.

30 Mo bakegen mi talem long yufala, ?i gat wan long yufala we i stap jikim brata blong hem, o we i hivimap ol hadtaem antap long hemwan?

31 !Sore tumas long wan man olsem, from hem i no rere, mo taem i kolosap we hem i mas sakem sin o Lod i no save sevem hem!

32 !Yes, sore tumas long yufala evriwan we yufala i man blong wokem rabis fasin; sakem sin, sakem sin, from Lod God i bin talemaot samting ia!

33 Luk, hem i sendemaot wan toktok long evri man blong kam, from hem i stretem ol han blong sore i go long olgeta, mo hem i talem: ‘Sakem sin, mo bae mi akseptem yufala.’

34 Yes, hem i talem: ‘Kam long mi mo bae yufala i save tekem mo kakae frut blong tri blong laef; Yes, bae yufala i kakae bred mo dring ol wota blong laef fri nomo;

35 Yes, kam long mi mo karem i kam ol wok blong stret mo gud fasin, mo bae oli no save katemdaon yufala mo sakem yufala i go long faea—

36 From luk, taem i kam kolosap we eni man we i no karem gudfala frut i kam, o eni man we i no mekem ol wok blong stret mo gud fasin, ol sem man ia, bae oli krae wetem laod voes mo krae sore.’

37 !O yufala ol man blong mekem ol rabis fasin, yufala we i fulap long ol samting nating blong wol, yufala we i talemaot se yufala i bin save ol rod blong stret mo gud fasin, be stil, yufala i go long rabis rod, olsem wan sipsip we i no gat man we i stap lukaotem hem, i nomata we wan man blong lukaot long sipsip i bin singaotem yufala mo i stil stap singaotem yufala, be yufala i no lisin gud long voes blong hem!

38 Luk, mi talem long yufala se, gudfala man blong lukaot long sipsip i singaotem yufala; yes, mo hem i singaotem yufala long nem blong hem bakegen, we i nem blong Kraes; mo sapos yufala i no lisin gud long voes blong gudfala man blong lukaot long sipsip, long nem we hem i stap singaotem yufala wetem, luk, yufala i no sipsip blong gudfala man blong lukaot long sipsip.

39 Mo nao sapos yufala i no sipsip blong gudfala man blong lukaot long sipsip, ?yufala i blong wanem yad? Luk, mi talem long yufala se, devel i man blong lukaot long sipsip blong yufala, mo yufala i blong yad blong hem; mo nao ?huia i save tanem baksaed long hemia? Luk, mi talem long yufala, eni man we i tanem baksaed blong hem long samting ia, hem i wan giaman man mo hem i wan pikinini blong devel.

40 From mi talem long yufala se, eni samting we i gud, i kam long God, mo eni samting we i nogud i kam long devel.

41 From hemia, sapos wan man i karem i kam ol gudfala wok, hem i lisin long voes blong gudfala man blong lukaot long sipsip, mo hem i stap folem hem; be eni man we i karem ol nogud wok i kam, semfala man ia i kam wan pikinini blong devel, from hem i lisin long voes blong hem, mo i stap folem hem.

42 Mo eni man we i mekem samting ia i mas kasem pei blong hem long hem; from hemia, pei blong hem we hem i kasem, hem i ded long saed blong ol samting blong stret mo gud fasin, from hem i ded long evri gudfala wok.

43 Mo nao, ol brata blong mi, mi wantem yufala blong lisin long mi, from mi toktok wetem paoa blong sol blong mi; from luk, mi bin toktok long yufala long wan klia fasin blong mekem se yufala i no save mestem, o mi bin toktok folem ol komanmen blong God.

44 From oli singaotem mi blong toktok long fasin ia nao, folem tabu oda blong God, we i stap long Kraes Jisas; yes, oli talem long mi blong stanap mo testifae long pipol ia long ol samting we ol papa blong yumi oli bin talemaot long saed blong ol samting we bae oli kam.

45 Mo i no hemia nomo. ?Yufala i no ting se miwan mi save ol samting ia? Luk, mi testifae long yufala se mi save se ol samting we mi bin talemaot long yufala oli tru. Mo ?olsem wanem nao yufala i ting se mi save se oli tru?

46 Luk, mi talem long yufala se, Tabu Spirit blong God i bin mekem mi save ol samting ia. Luk, mi bin livim kakae mo prea plante dei blong mi save ol samting ia miwan. Mo nao mi save long miwan se oli tru; from Lod God i bin soemaot olgeta long mi tru long Tabu Spirit blong hem; Mo hemia spirit blong revelesen we i stap long mi.

47 Mo antap long samting ia, mi talem long yufala se oli bin talem long mi se, ol toktok we ol papa blong yumi oli bin talemaot oli tru, long sem fasin tu, folem spirit blong profesi we i stap long mi, we i folem tu wanem Spirit blong God i soemaot.

48 Mi talem long yufala, se mi save long miwan se eni samting we bae mi talem long yufala, long saed blong samting we bae i kam, i tru; mo mi talem long yufala, se mi save se Jisas Kraes bae i kam, yes, Pikinini ia, Wan Pikinini Ia Nomo blong Papa, we i gat fulap gladhat, mo sore, mo trutok. Mo luk, hem nao we bae i kam blong tekemaot ol sin blong wol, yes, ol sin blong evri man we oli biliv semmak evri taem long nem blong hem.

49 Mo nao mi talem long yufala se, hemia hem i oda we oli singaotem mi folem, yes, blong prij long ol brata blong mi we mi lavem tumas, yes, mo evriwan we oli stap long graon; yes, blong prij long evriwan, ol olfala tugeta wetem ol yangfala, long olgeta we oli stap long kalabus tugeta wetem olgeta we oli fri; yes, mi talem long yufala, ol olfala, mo olgeta medel man, mo olgeta we oli stap gro yet i kam antap; yes, blong talemaot strong long olgeta se oli mas sakem sin mo oli mas bon bakegen.

50 Yes, Spirit i talem se: ‘Sakem sin, yufala evriwan long evri en blong wol, from kingdom blong heven i stap kam kolosap; yes, bae Pikinini blong God i kam long glori blong hem mo long paoa blong tingting blong hem, long hae nem, long paoa mo rul blong hem.’ Yes, ol brata blong mi we mi lavem tumas, mi talem long yufala se, Spirit i talem: ‘Luk, glori blong King blong ful wol ia, mo tu, King blong heven bae i no longtaem i saen long medel blong evri pikinini blong ol man.’

51 Mo tu, Spirit i talem long mi se, yes, i talem long mi wetem wan strong voes, i talem: ‘Go mo talem long ol pipol ia—Sakem sin, from se, sapos yufala i no sakem sin, yufala i no save go stap long kingdom blong heven.’

52 Mo bakegen mi talem long yufala, Spirit i talem: ‘Luk, oli putum akis long rus blong tri; from hemia, evri tri we i no karem gudfala frut bae oli katemdaon mo sakem i go long faea, yes, wan faea we i no save stop, yes wan faea we oli no save kilim i ded. Luk, mo tingbaot, Tabu Wan i bin talem samting ia.’

53 Mo nao olgeta brata blong mi we mi lavem tumas, mi talem long yufala, ?yufala i ting se yufala i save go agensem ol samting ia; yes, yufala i save putum ol samting ia long saed, mo purumbut long Tabu Wan andanit long leg blong yufala; yes, yufala i save fulap long hae tingting long hat blong yufala; yes, bae yufala i gohed blong werem ol klos we oli sas plante mo putum hat blong yufala long ol samting nating blong wol, long ol rij samting blong yufala?

54 Yes, bae yufala i gohed blong stap soem se yufala i moa gud bitim ol narafalawan, yes, bae yufala i gohed long ol fasin ia blong givim hadtaem long ol brata blong yufala, olgeta ia we tingting blong olgeta i stap daon mo oli wokbaot folem tabu oda blong God, we tru long hem nao, oli kam joenem jos ia, mo oli bin kam klin tru long Tabu Spirit, mo oli mekem ol wok we oli blong fasin blong sakem sin—

55 Yes, mo ?bae yufala i gohed blong tanem baksaed blong yufala long ol puaman, mo olgeta we oli nidim help, mo no serem ol samting blong yufala wetem olgeta?

56 Mo las toktok, yufala evriwan we i gohed long ol fasin nogud, mi talem long yufala se olgeta ia oli olgeta we bae oli katemdaon olgeta mo sakem olgeta i go long faea, be nomo sapos oli sakem sin kwiktaem.

57 Mo nao mi talem long yufala, yufala evriwan we i wantem blong folem voes blong gudfala man blong lukaot long sipsip, yufala i kamaot long ol nogud man, mo yufala i stap defren, mo no tajem ol samting blong olgeta we oli no klin; mo luk, bae oli tekemaot nem blong olgeta nogud man, blong mekem se oli no kaontem olgeta wetem nem blong olgeta we oli stret mo gud, blong mekem se toktok blong God i save hapen, we i talem: ‘Ol nem blong ol nogud man bae oli no miks wetem ol nem blong ol man blong mi;

58 From ol nem blong olgeta we oli stret mo gud bae oli raetemdaon long buk blong laef, mo bae mi givim long olgeta wan ples long raet han blong mi.’ Mo nao, ol brata blong mi, ?yufala i gat wanem blong talem agensem hemia? Mi talem long yufala, sapos yufala i toktok agensem hemia, i oraet nomo, from toktok blong God i mas hapen.

59 ?Huia long yufala we i man blong lukaot long sipsip we i gat plante sipsip be i no luklukaotem gud olgeta, blong ol wael dog oli no save go insaed mo kakae ol animol blong hem? Mo luk, ?sapos wan wael dog i go insaed long ol grup blong animol blong hem, bae hem i no ronemaot hem? Yes, mo long en, sapos hem i save, bae hem i kilim hem i ded.

60 Mo nao, mi talem long yufala se gudfala man blong lukaot long sipsip i stap singaotem yufala; mo sapos yufala i lisin gud long voes blong hem bae hem i tekem yufala i go long yad blong hem, mo yufala i sipsip blong hem; mo hem i talem long yufala blong no letem wan rabis wael dog i kam insaed, blong yufala i no save ded.

61 Mo nao mi, Alma, mi givim oda long yufala long lanwis blong hem we i bin talem long mi, blong yufala i folem olgeta toktok we mi bin talemaot long yufala.

62 Mi toktok folem wei blong givim oda long yufala, we i blong jos; mo long olgeta we oli no blong jos, mi toktok folem wei blong invitesen, mi talem: Kam mo kasem baptaes afta yu sakem sin, blong mekem se yufala tu i save tekem mo kakae frut blong tri blong laef.”