1 Ket ita napasamak a bayat ti panagbiahe ni Alma manipud iti daga ti Gideon nga agpaabagatan, nga agturong iti daga ti Manti, kitaen, iti siddaawna, ^anasabatna dagiti ^blallaki nga annak ni Mosiah nga agbibiahe nga agturong iti daga ti Zarahemla.

2 Ita kadua ni Alma dagitoy lallaki nga annak ni Mosiah idi ^aumuna a nagparang ti anghel kenkuana; ngarud nalaus ti rag-o ni Alma a nakitana dagiti kakabsatna; ket ti nakainayon pay iti rag-ona, isu ti kakabsatna pay la ida iti Apo; wen, ket ad-addan a pimmigsada iti pannakaammo iti kinapudno; agsipud ta tattaoda nga addaan iti umno a pannakaawat ken sireregta a ^bsinukimatda dagiti nasantuan a kasuratan, tapno maammuanda ti balikas ti Dios.

3 Ngem saan la a daytoy; impaayanda ti bagida iti adu a ^apanagkararag, ken panagayuno; ngarud adda kadakuada ti espiritu ti pammadto, ken ti espiritu ti paltiing, ket no ^bmangisuroda, mangisuroda nga addaan iti bileg ken turay ti Dios.

4 Ket insursuroda ti balikas ti Dios iti uneg ti sangapulo ket uppat a tawen kadagiti Lamanita, naaddaanda iti dakkel a ^aballigi a ^bnangidanon kadagiti adu iti pannakaammo iti kinapudno; wen, babaen ti bileg dagiti balikasda adu ti nayasideg iti sanguanan iti altar ti Dios, tapno awaganda ti naganna ken ^cmangipudno iti basbasolda kenkuana.

5 Ita dagitoy ti kasasaad a napasaranda iti panagbibiaheda, ta adu ti rigrigatda; napalalo ti sinagabada, nga agpadpada iti bagi ken iti panunot, kas iti bisin, waw ken bannog, kasta met ti napalalo ti ^apanagbannog ti espiritu.

6 Ita dagitoy ti panagbiaheda: ^aPinanawanda ti amada, ni Mosiah, iti umuna a tawen dagiti ukom; gapu ta ^bsaanda inawat ti pagarian a tinarigagayan ti amada nga italek kadakuada, kasta met a daytoy ti kapanunotan dagiti tattao;

7 Nupay kasta pimmanawda iti daga ti Zarahemla, ket innalada dagiti espadada, ken gayangda, ken baida, ken panada, ken palsiitda; ket inaramidda daytoy tapno maipaayanda ti nagbagida iti taraon para ti bagbagida iti kaaddada iti langalang.

8 Ket kasta a pimmadawda a napan iti langalang a kaduada ti bilang a pinilida, tapno mapan iti daga ti Nephi, tapno ikasaba iti balikas ti Dios kadagiti Lamanita.

9 Ket napasamak a nagbiaheda iti adu nga aldaw iti langalang, ket nagayuno ken ^anagkararag iti napalalo tapno ipaay ti Apo kadakuada ti paset ti Espirituna, ket agtaeng kadakuada, tapno agbalinda a ^bramit dagiti ima ti Dios a mangipaay, no mabalin, kadagiti kabsatda, dagiti Lamanita, ti pannakaammo iti kinapudno, iti pannakaammo iti kinalaad dagiti ^ckaugalian dagiti ammada, a saan nga umisu.

10 Ket napasamak a ^asinarungkaran ida ti Apo iti ^bEspirituna, ket kinunana kadakuada: ^cMaliwliwakayo. Ket naliwliwada.

11 Ket imbaga pay ti Apo kadakuada: Mapankayo kadagiti Lamanita, dagiti kabsatyo, ket patalgedanyo ti balikasko; ngem nasken a ^anaanuskayo iti naunday a panagitured ken rigrigat, tapno makaipakitakayo kadakuada kadagiti nasayaat a pagwadan babaen kaniak, ket aramidenkayo a ramit dagiti imak iti pannakaisalakan ti adu a kararua.

12 Ket napasamak a ti puspuso dagiti lallaki nga annak ni Mosiah, kasta met dagiti kaduada, timmuredda a napan kadagiti Lamanita tapno ipakdaar kadakuada iti balikas ti Dios.

13 Ket napasamak idi nakadanonda iti nagbedngan ti daga dagiti Lamanita, a ^anagsisinada ket napan ti tunggal maysa, a sitatalek iti Apo nga agkikitadanto manen iti paggibusan ti ^bpanagapitda; ta impagarupda a naindaklan ti trabaho nga insayangkatda.

14 Ket talaga a naindaklan, ta insayangkatda ti mangikasaba ti balikas ti Dios kadagiti ^aatap ken nasukir ken nakaam-amak a tattao; tattao a maay-ayatan a mangpapatay kadagiti Nephita, ken mangtakaw ken mangsamsam kadakuada; ket kalikaguman dagiti pusoda dagiti kinabaknang, wenno iti balitok ken pirak, ken dagiti napapateg a bato; ngem pinanggepda a gun-oden dagitoy a bambanag babaen ti panagpapatay ken panagsamsamda, tapno saanda a pagbannogan ida babaen kadagiti imada.

15 Ngarud nasadutda unay a tattao, adu kadakuada ti agdaydayaw kadagiti didiosen, ket naitinnag kadakuada ti ^alunod ti Dios gapu kadagiti ^bkaugalian dagiti ammada; nupay kasta naidiaya kadakuada dagiti kari ti Apo no la ketdi agbabawida.

16 Ngarud, daytoy ti ^agapu nga insayangkat dagiti lallaki nga annak ni Mosiah ti trabaho, ta bareng no mapagbabawida ida; ta bareng maipakaammoda kadakuada ti plano ti pannakasubbot.

17 Ngarud nagsisina ti tunggal maysa, ket napanda kadakuada, agmaymaysa ti tunggal maysa, a mayannurot iti balikas ken bileg ti Dios a naited kenkuana.

18 Ita gapu ta ni Ammon ti panguloda, wenno isu ti nangasikaso kadakuada, ken pimmanaw kadakuada, kalpasan ti ^apanangbendisionna kadakuada a mayannurot iti sumagmamano nga akemda, a naibinglaynan ti balikas ti Dios kadakuada, wenno inasikasona ida sakbay ti ipapanawna; ket iti kasta napanda iti nadumaduma a biahe iti intero a daga.

19 Ket napan ni Ammon iti daga ti Ismael, ti daga a nakaipanaganan dagiti lallaki nga annak ni ^aIsmael, a nagbalin met a Lamanita.

20 Ket iti iseserrek ni Ammon iti daga ti Ismael, tiniliw dagiti Lamanita ket pinungoda, kas nakairuamanda a mangpungo ti amin a Nephita a matnag kadagiti imada, ken impanda ida iti sanguanan ti ari; ket ngarud adda iti pagragsakan ti ari a mangpatay kadakuada, wenno agtalinaedda a balud, wenno ipupokda ida iti pagbaludan, wenno pagtalawenda ida iti daga, a mayannurot iti pagayatan ken pakaragsakanna.

21 Ket ngarud naipan ni Ammon iti sanguanan ti ari a mangituray iti daga ti Ismael; ket Lamoni ti naganna; ken kaputotan ni Ismael.

22 Ket dinamag ti ari ken ni Ammon no tarigagayanna ti agnaed iti daga a kaduana dagiti Lamanita, wenno kadagiti taona.

23 Ket kinuna ni Ammon kenkuana: Wen, tarigagayak ti makipagtaeng kadagitoy a tao iti sumagmamano a panawen; wen, ket mabalin nga agingga a matayak.

24 Ket napasamak a naragsakan ni ari Lamoni kenni Ammon, ket pinawarwarna dagiti naikagalutnanna; ket kinayatna nga alaen ni Ammon ti maysa kadagiti babbai nga annakna nga agbalin nga asawana.

25 Ngem kinuna ni Ammon kenkuana: Saan, ngem agbalinak a katulongam. Ngarud nagbalin ni Ammon a katulongan ni ari Lamoni. Ket napasamak a natudingan a kaduana dagiti dadduma a katulongan a mangkita kadagiti ipastoran ni Lamoni, a segun iti kaugalian dagiti Lamanita.

26 Ket kalpasan ti tallo nga aldaw a panaserbina iti ari, bayat a kaduana dagiti Lamanita a katulongan a mangyabog kadagiti arbanda iti yan ti danum, a managan iti danum ti Sebus, ken yabog amin dagiti Lamanita dagiti arbanda sadiay, tapno makaalada iti danum—

27 Ngarud, bayat nga ababogen da Ammon ken dagiti katulongan ti ari kadagiti arbanda iti yan ti danum, kitaen, sumagmamano a Lamanita, a nangiwayway kadagiti arbanda iti yan ti danum, ti timmakder ken nangwarawara kadagiti arban da Ammon ken dagiti katulongan ti ari, ket winarawarada ida isu a nagtatarayda a ti la adda a nagturturonganda.

28 Ita nagtanabutob dagiti katulongan ti ari, a kinunada: Papatayennatayo ita ti ari, kas kadagiti kabsattayo gapu ta nawarawara dagiti arbanda iti kinadakes dagitoy a lallaki. Ket nagsangitda iti kasta unay, a kunada: Kitaen, nawarawaran dagiti arbantayo.

29 Nagsangitda ita gapu iti butengda a mapapatay. Ita idi nakita ni Ammon daytoy dimmakkel ti pusona iti rag-o; ta, kinunana, ipakitak ti bilegko kadagitoy padak a katulongan, wenno ti bileg nga adda kaniak, iti panangisublik kadagitoy arban iti ari, tapno magun-odko ti puspuso dagitoy padak a katulongan, tapno maiturongko ida a mamati kadagiti balikasko.

30 Ket ita, dagitoy ti pampanunoten ni Ammon, idi nakitana ti rigrigat dagiti imbilangna a kakabsatna.

31 Ket napasamak a pinatpatiray-okanna ida kadagiti balikasna, a kinunana: Kakabsatko, agragsakkayo ket intayo sapulen dagiti arban, ket ummongentayo ida ken isublitayo ida iti yan ti danum; ket iti kasta mataginayontayo dagiti arban iti ari ket saannatayo a papatayen.

32 Ket napasamak a napanda sinapul dagiti arban, ket sinurotda ni Ammon, ket nalaus ti panagdardarasda ket sinurotda dagiti arban ti ari, ket inummongda manen ida iti lugar nga addaan ti danum.

33 Ket nagsagana manen dagidiay a lallaki a mangwarawara kadagiti arbanda; ngem kinuna ni Ammon kadagiti kabsatna: Alikubkobenyo dagiti arban tapno saanda a makaadayo; ket mapanak ken makirangetak kadagitoy a lallaki a nangwarawara kadagiti arbantayo.

34 Ngarud, inaramidda ti imbilin kadakuada ni Ammon, ket napan ken nakiranget kadagidiay nakatakder iti yan ti dandanum ti Sebus; ket saan a bassit ti bilangda.

35 Ngarud saanda nagbuteng ken ni Ammon, agsipud ta impagarupda a kabaelan ti maysa kadakuada a mangpatay kaniana mayannurot iti pagragsakanda, agsipud ta saanda ammo nga inkari ti Apo ken ni Mosiah nga ^aisalakanna dagiti lallaki nga annakna kadagiti imada; ken awan a pulos ti ammoda maipanggep iti Apo; ngarud maayatanda a mangdadael kadagiti kabsatda; ket daytoy a gapu ti namkuatanda a mangwarawara kadagiti arban ti ari.

36 Ngem nakasaganan ni ^aAmmon ket rinugianna a pinalsiitan ida; wen, babaen ti naisangsangayan a pigsana pinalsiitanna ida; ket napapatayna ti ^bsumagmamano kadakuada isu a nangrugi ti kasta unay a siddaawda iti pigsana; nupay kasta nagpungtotda gapu iti pannakapapatay dagiti kabsatda, ket inkeddengda a nasken a maparmekda; ngarud, iti pannakakitada a ^csaanda matiruan kadagiti batoda, nangalada iti pagpang-or a pangpatayda kenkuana.

37 Ngem kitaen, tunggal tao a mangitag-ay iti pang-or a pangdangran ken ni Ammon, tinagbatna dagiti takiagda babaen ti espadana; ta nabaelanna dagiti layatda babaen ti panangtagbatna kadagiti takiagda babaen ti iking ti espadana, isu a nangrugi a nasdaawda; ket rinugianda ti nanglibas kenkuana; wen, ket saan a bassit ti bilangda; ket napagtarayna ida babaen iti pigsa ti takiagna.

38 Ita innem kadakuada ti natuang a napalsiitan, ngem awan kadakuada ti pinatayna malaksid ti dadauloda a nangusaranna iti espadana; ket kas iti kaadu ti nailayat kenkuana ti tinagbatna a takiagda, ket saan a bassit ti bilangda.

39 Ket idi napaadayonan ida, nagsubli ket pinainumda dagiti pangenda sada insubli ida iti pagpastoran ti ari, ket napanda iti ari, a bagbagkatenda dagiti takiag a tinagbat ti espada ni Ammon, dagidiay nagpanggep a mangpatay kenkuana; ket binagkatda nga impan iti ari a kas pammaneknek kadagiti bambanag a naaramidda.