1 Ket ita napasamak a napan dagiti lallaki nga annak ni Alma kadagiti tattao, tapno iwaragawag ti balikas kadakuada. Ket mismo a ni Alma saan met a makainana, ket napan met.

2 Ita awanen ti ibagatayo maipapan iti panangaskasabada, malaksid nga inkasabada ti balikas ken ti kinapudno, sigun iti espiritu ti padto ken paltiing; ket nangasabada sigun iti ^anasantuan nga orden ti Dios nga isu ti nakaawagan kadakuada.

3 Ket ita agsubliak iti salaysay maipapan kadagiti gubat iti nagbaetan dagiti Nephita ken Lamanita, iti maikasangapulo ket walo a tawen ti panagturay dagiti ukom.

4 Ta kitaen, napasamak a dagiti ^aZoramita ket nagbalin a Lamanita; ngarud, iti panangrugi ti maika sangapulo ket walo a tawen nakita ti tattao dagiti Nephita nga umay mangraut dagiti Lamanita kadakuada; ngarud nagsaganada a makigubat; wen, inummongda a sangsangkamaysa dagiti soldado iti daga ti Jershon.

5 Ket napasamak a dimteng dagiti Lamanita a kakuyog dagiti rinibuda; ket dimtengda iti daga ti Antionum, a daga dagiti Zoramita; ket maysa a lalaki nga agnagan iti Zerahemnah ti dadauloda.

6 Ket ita, agsipud ta ad-adda a dakes ken mammapatay ti kababalin dagiti Amalekita ngem dagiti Lamanita, kastada met iti bukbukodda, ngarud, nangdutok ni Zerahemnah kadagiti pangulo a kapitan kadagiti Lamanita, ket Amalekita ken Zoramita amin dagitoy.

7 Ita daytoy ti inaramidna tapno mataginayonna ti gurada kadagiti Nephita, tapno mabalinna nga iturayan ida iti pannakatungpal dagiti panggepna.

8 Ta kitaen, ti mangsugsog nga agpungtot kadagiti Nephita dagiti gandatna; daytoy ti inaramidna tapno maagawna ti dakkel a bileg kadakuada, ken kasta met a makagun-od iti bileg kadagiti Nephita babaen ti panangiyegna kadakuada iti pannakaadipen.

9 Ket ita ti mangsuporta kadagiti dagada, ken dagiti balayda, ken dagiti ^aassawada, ken dagiti annakda ti panggep dagiti Nephita, tapno masalaknibanda ida manipud kadagiti ima dagiti kabusorda; ken tapno mataginayonda met dagiti karbenganda ken dagiti gundawayda, wen, ken kasta met ti ^bkinawayada, tapno makapagdayawda iti Dios a mayannurot kadagiti tarigagayda.

10 Ta ammoda a no matiliw ida dagiti Lamanita, ta ti siasinoman nga ^aagdayaw iti Dios babaen iti ^bespiritu ken iti kinapudno, ti pudno ken ti sibibiag a Dios, dadaelen dagiti Lamanita.

11 Wen, ken ammoda met ti napalalo a gura dagiti Lamanita kadagiti ^akakabsatda, a naawagan a tattao ni Ammon—ket saanda a mangala kadagiti armas, wen, simrekda iti maysa a katulagan ket saanda a dadaelen daytoy—ngarud, no matiliw ida dagiti Lamanita madadaelda.

12 Ket saan nga ipalubos dagiti Nephita a madadaelda; ngarud inikkanda ida iti daga para iti tawidda.

13 Ket inted dagiti tattao ni Ammon kadagiti Nephita ti dakkel a paset ti sanikuada tapno suportaran dagiti soldadoda; ngarud napilitan dagiti Nephita, nga isuda laeng, ti mangsaranget kadagiti Lamanita, a naglalaok a kaputotan da Laman ken Lemuel, ken dagiti lallaki nga annak ni Ismael, ken amin dagidiay simmina manipud kadagiti Nephita, a dagiti Amalekita ken dagiti Zoramita, ken dagiti ^akaputotan dagiti padi ni Noe.

14 Ita dandani a kaadu dagidiay a kaputotan ti kaadu dagiti Nephita; ket iti kasta napilitan dagiti Nephita a makilaban kadagiti kakabsatda, uray pay iti pammapatay.

15 Ket napasamak bayat ti panagtitipon dagiti soldado dagiti Lamanita iti daga ti Antionum, kitaen, nakasagana dagiti soldado dagiti Nephita a makilaban kadakuada iti daga ti Jershon.

16 Ita, ti dadaulo dagiti Nephita, wenno ti lalaki a nadutokan nga agbalin a kangatuan a kapitan dagiti Nephita—ita ti kangatuan a kapitan ti nangidaulo ti panagmandar ti amin a soldado dagiti Nephita—ket Moroni ti naganna;

17 Ket inakem ni Moroni ti amin a panagmandar, ken ti panangimaton kadagiti gubatda. Ket duapulo ket lima laeng ti tawenna idi nadutokan a kangatuan a kapitan dagiti soldado dagiti Nephita.

18 Ket napasamak a kinalabanna dagiti Lamanita kadagiti beddeng ti Jershon, ket naarmasan dagiti taona kadagiti espada, ken kadagiti simeter, ken kadagiti amin a kita dagiti armas a pakigubat.

19 Ket idi nakita dagiti soldado dagiti Lamanita nga insagana dagiti tattao ni Nephi, wenno insaganana ni Moroni dagiti tattao kadagiti sarapa ti barukong ken addaan kadagiti kalasag-ti takiag, wen, ken kasta met kadagiti kalasag a mangsalaknib kadagiti uloda, ken nakakawesda pay iti napuskol a kawes—

20 Ita saan a nakasagana ti soldado ni Zerahemnah iti kasta a banag; addaanda laeng kadagiti espada ken kadagiti simeterda, kadagiti bai ken panada, kadagiti bato ken palsiitda; ket ^alamulamoda, malaksid iti lalat a naibarikes kadagiti lumoda; wen, lamulamoda amin, malaksid dagiti Zoramita ken dagiti Amalekita;

21 Ngem saanda a naarmasan kadagiti sarapa ti barukong, wenno kadagiti kalasag—ngarud, napalalo ti butengda kadagiti soldado dagiti Nephita gapu iti kabalda, nupay ad-adu nga amang ti bilangda ngem dagiti Nephita.

22 Kitaen, ita napasamak a saanda naitured a rauten dagiti Nephita kadagiti beddeng ti Jershon; ngarud pimmanawda iti daga ti Antionum ket napanda iti let-ang, ket nagdaliasatda iti aglawlaw iti let-ang, iti adayo iti igid ti karayan Sidon, tapno makastrekda iti daga ti Manti ket tagikuaenda ti daga; ta saanda nga impagarup a maammuan dagiti soldado ni Moroni no sadino ti napananda.

23 Ngem napasamak, apaman a pimmanawda iti let-ang, nangibaon ni Moroni kadagiti espia iti let-ang a mangbantay iti kampoda; ket ni Moroni, gapu ta ammona met dagiti padto ni Alma, nangibaon iti sumagmamano a lallaki a mapan kenkuana, ta tarigagayanna a kasapulan nga agdamag isuna iti Apo ^ano sadino ti rumbeng a papanan dagiti soldado dagiti Nephita tapno masalaknibanda ti bagbagida a maibusor kadagiti Lamanita.

24 Ket napasamak a dimteng ti balikas ti Apo ken ni Alma, ket impakaammo ni Alma kadagiti mensahero ni Moroni, nga agmarmartsa dagiti soldado dagiti Lamanita iti aglawlaw iti let-ang, tapno mairugida ti panangraut iti nakapkapuy a paset dagiti tattao. Ket napan dagidiay a mensahero ket imbagada ti mensahe ken ni Moroni.

25 Ita ni Moroni, a nangibati iti maysa a paset ti soldado iti daga ti Jershon, amangan no iti aniaman a wagas umay ti maysa a paset dagiti Lamanita iti dayta a daga ket tagikuaenna ti siudad, innalana ti nabati a paset ti soldadona ket nagmartsa iti daga ti Manti.

26 Ket imbilinna a kasapulan nga agtitipon amin dagiti tattao iti dayta a paset ti daga tapno makigubat kadagiti Lamanita, tapno ^asalaknibanda dagiti dagada ken ti pagilianda, dagiti karbenganda ken wayawayada; ngarud nakasaganada para iti panawen ti isasangpet dagiti Lamanita.

27 Ket napasamak nga imbilin ni Moroni a masapul a mailimed ti soldadona iti tanap nga asideg iti igid ti karayan Sidon, nga adda iti laud ti karayan Sidon iti let-ang.

28 Ket nangikabil ni Moroni kadagiti espia iti aglawlaw, tapno maammuanna no kaano ti isasangpet ti kampo ti soldado dagiti Lamanita.

29 Ket ita, gapu ta ammo ni Moroni ti gagem dagiti Lamanita, a panggepda a dadaelen dagiti kakabsatda, wenno sakupenda ida ken iyegda ida iti pannakaadipen tapno makaipasdekda iti pagarian para kadagiti bagbagida iti intero a daga;

30 Ken gapu ta ammona pay a ti kakaisuna a tarigagay dagiti Nephita ti mangtaginayon kadagiti dagada, ken ti ^akinawayada, ken ti simbaanda, ngarud napanunotna a saan a basol a masapul a salaknibanna ida babaen iti estratehia; ngarud, nasarakanna babaen kadagiti espiana no ania a ruta ti daliasaten dagiti Lamanita.

31 Ngarud, biningayna ti soldado ket inyegna ti maysa a paset iti tanap, ket inlemmengna ida iti daya, ken iti abagatan ti turod Riplah;

32 Ket ti nabati inlemmengna iti laud a tanap, iti laud ti karayan Sidon, ket agingga kadagiti beddeng ti daga a Manti.

33 Ket iti kasta kalpasan a naikabilna ti soldadona a mayannurot iti tarigagayna, nakasagana isuna a labanan ida.

34 Ket napasamak a simmang-at dagiti Lamanita iti amianan ti turod, a nakailemmengan ti maysa a paset ti soldado ni Moroni.

35 Ket bayat ti panaglabas dagiti Lamanita iti turod Riplah, ket immayda iti tanap, ket rinugianda ti bumallasiw iti karayan Sidon, ti nailemmeng a soldado iti abagatan ti turod, nga indauluan ti maysa a lalaki nga agnagan iti ^aLehi, ket impanguluanna ti soldado ket pinalawlawanda dagiti Lamanita iti dayaen ti likudanda.

36 Ket napasamak nga idi nakita dagiti Lamanita nga umas-asideg dagiti Nephita kadakuada iti likudanda, sinangoda ida ket rinugianda ti nakilaban iti soldado ni Lehi.

37 Ket nangrugi ti pammapatay iti agsumbangir, ngem ad-adda a nakabutbuteng iti biang dagiti Lamanita, ta sipaparang ti ^akinalamulamoda kadagiti nadagsen a tiro dagiti Nephita babaen kadagiti espada ken simeterda, a nangiyeg iti ipapatay iti dandani tunggal panagtiro.

38 Bayat iti sabali a bangir, pasaray nga addaan iti maysa a tao a nasugatan wenno napapatay kadagiti Nephita, babaen kadagiti espadada ken pannakaibus ti dara, ta nasalakniban dagiti napatpateg a paset ti bagida, wenno sikakabal dagiti napatpateg a paset ti bagida kadagiti panagtiro dagiti Lamanita, babaen dagiti ^akabal ti barukongda, ken dagiti kabal ti takiagda, ken dagiti kabal ti uloda; ket ngarud intultuloy dagiti Nephita ti pammapatay kadagiti Lamanita.

39 Ket napasamak a nagbuteng dagiti Lamanita, gapu iti nakaro a pannakadadael kadakuada, agingga a nangrugida a naglibas nga agturong iti karayan Sidon.

40 Ket kinamat ida da Lehi ken dagiti taona; ket napasanud ni Lehi ida iti dandanum ti Sidon, ket bimmallasiwda iti dandanum ti Sidon. Ket tinaginayon ni Lehi dagiti soldado iti igid ti karayan Sidon tapno saanda a bumallasiw.

41 Ket napasamak a linabanan ni Moroni ken ti soldado dagiti Lamanita iti tanap, iti sabali a bangir ti karayan Sidon, ket rinugianda a rinaut ida ken papatayen ida.

42 Ket naglibas manen dagiti Lamanita iti sanguananda, nga agturong iti daga ti Manti; ket linabanan manen ida dagiti soldado ni Moroni.

43 Ita iti daytoy a kasasaad ti kasta unay a pannakilaban dagiti Lamanita; wen, saan pay pulos a naammuan a makilaban iti kasta unay a kinapigsa ken kinatured, saan, uray pay manipud idi un-unana.

44 Ket naparegtada babaen kadagiti ^aZoramita ken kadagiti Amalekita, nga isuda dagiti kangatuan a kapitan ken dagiti dadauloda, ken babaen ken ni Zerahemnah, nga isu ti kangatuan a kapitanda, wenno kangatuan a dadaulo ken mangidadaulo kadakuada; wen, nakilabanda a kas kadagiti dragon, ket adu kadagiti Nephita ti napapatay babaen kadagiti imada, wen, gapu ta tiniroda ket nagudua ti adu kadagiti sarapa ti uloda, ken naduyokda ti adu kadagiti sarapa ti barukongda, ken tiniroda ti adu kadagiti takiagda; ket kasta ti panangtiro dagiti Lamanita iti narungsot a pungtotda.

45 Nupay kasta, naparegta dagiti Nephita babaen ti nasaysayaat a panggep, agsipud ta saanda a ^amakirangranget para iti monarkia wenno bileg ngem makirangrangetda para kadagiti balay ken ti ^bwayawayada, dagiti assawa ken dagiti annakda, ken kadakuada amin, wen, para kadagiti seremonia ti panagdaydayaw iti simbaanda.

46 Ket ar-aramidenda dayta a nariknada a ^apagrebbengan nga utangda iti Diosda; agsipud ta kinuna ti Apo kadakuada, ken kasta met kadagiti ammada, a: ^bNo la ketdi saankayo ​​a nakabasol iti ^cumuna a basol, wenno iti maikadua, saanyonto ipalubos ti bagbagiyo a mapapatay babaen kadagiti ima dagiti kabusoryo.

47 Ket manen, kinuna ti Apo a: ^aSalaknibanyo dagiti pamiliayo uray agingga iti pammapatay. Ngarud gapu iti daytoy a panggep ket nakilaban dagiti Nephita kadagiti Lamanita, tapno salaknibanda dagiti bagida, ken dagiti pamiliada, ken dagiti dagada, ti pagilianda, ken dagiti karbenganda, ken ti relihionda.

48 Ket napasamak nga idi nakita dagiti tattao ni Moroni ti kinarungsot ken kinapungtot dagiti Lamanita, dandanida nga immatras ken aglibas manipud kadakuada. Ket ni Moroni, idi nadlawna ti panggepda, nangibaon ken pinaregtana dagiti pusoda kadagitoy a pampanunot—wen, dagiti kapanunotan dagiti dagada, ti kinawayada, wen, ti wayawayada manipud iti pannakaadipen.

49 Ket napasamak a timmaliawda kadagiti Lamanita, ket ^anagpakaasida iti maymaysa a timek iti Apo a Diosda, para iti kinawayada ken ti wayawayada manipud iti pannakaadipen.

50 Ket nangrugida a nagtakder a sibibileg kontra kadagiti Lamanita; ket iti dayta met laeng nga oras a nagpakaasida iti Apo para iti wayawayada, rinugian dagiti Lamanita ti naglibas iti sanguananda; ket nagtalawda agingga iti dandanum ti Sidon.

51 Ita, ad-adu ti bilang dagiti Lamanita, wen, a mamindua nga ad-adu ngem dagiti Nephita; nupay kasta, napasanudda isu a nagtitiponda kas maysa a grupo iti tanap, iti igid ti karayan Sidon.

52 Ngarud pinalawlawan dagiti soldado ni Moroni ida, wen, uray pay iti agsumbangir ti karayan, ta kitaen, adda iti daya dagiti tattao ni Lehi.

53 Ngarud idi nakita ni Zerahemnah dagiti tattao ni Lehi iti daya ti karayan Sidon, ken dagiti soldado ni Moroni iti laud ti karayan Sidon, a napalawlawanda kadagiti Nephita, nagbutengda iti kasta unay.

54 Ita idi nakita ni Moroni ti panagbutengda, binilinna dagiti taona nga isardengdan ti pammapatay.