1 Ket ita napasamak a nakaawatak iti surat manipud ken ni Ammoron, ti ari, nga imbagana nga itedna kadakami ti siudad ti Antiparah no itedko dagidiay natiliwmi a balbalud iti gubat.

2 Ngem nangipatulodak iti surat iti ari, a siguradokami nga umdas dagiti puersami a mangala iti siudad ti Antiparah babaen ti puersami; ket ipagarupmi a saan a nainsiriban no iyawatmi dagiti balbalud para iti dayta a siudad, ken ta iyamatmi laeng dagiti naibalbaludmi a kas kasukatna.

3 Ket nagkedked ni Ammoron iti suratko, gapu ta saanna a kayat ti agsinnukat kadagiti balbalud; ngarud rinugianmi ti agsagana a mapan makilaban iti siudad ti Antiparah.

4 Ngem talaga a pimmanaw dagiti tattao ti Antipara iti siudad, ket naglibasda kadagiti sabali a siudadda, a kukuada, tapno sarikedkedan ida; ket isu a nasakupmi ti siudad ti Antiparah.

5 Ket kastoy a naggibus ti maikaduapulo ket walo a tawen ti panagturay dagiti ukom.

6 Ket napasamak nga iti panangrugi ti maikaduapulo ket siam a tawen, nakaawatkami kadagiti suplay ti probision, ken kasta met iti nayon ti soldadomi, manipud iti daga ti Zarahemla, ken manipud iti daga iti aglawlaw, nga agdagup iti bilang nga innem a ribu a soldado, a nainayon dagiti innem a pulo kadagiti ^alallaki nga annak dagiti Ammonite nga immay nakitipon kadagiti kakabsatda, ti bassit a grupok a buklen ti dua ribu. Ket ita kitaen, napigsakami, wen, ken adu pay ti naiyeg kadakami a probision.

7 Ket napasamak a tarigagaymi ti makigubat iti soldado a naikabil a mangsalaknib iti siudad ti Cumeni.

8 Ket ita kitaen, ipakitak kenka nga apaman a natungpalmi ti tarigagaymi; wen, babaen ti napigsa a puersami, wenno babaen iti maysa a paset ti napigsa a puersami, talaga a pinalawlawanmi, iti rabii, ti siudad ti Cumeni, apagbiit sakbay a makaawatda kadagiti suplay ti probision.

9 Ket napasamak a nagkampokami iti aglawlaw ti siudad iti adu a rabii; ngem naturogkami nga adda iti asidegmi dagiti espadami, ken adda latta agguardia, tapno saankami a maraut dagiti Lamanita iti rabii ket papatayendakami, a pinadasda iti adu a daras; ngem kas iti kaadu ti daras a pinadasda daytoy ti nasugsugatan wenno napapatay kadakuada.

10 Kamaudiananna talaga a simmangpet dagiti probisionda, ket sumrekda koman iti siudad iti rabii. Ket dakami, imbes a Lamanita, dakami dagiti Nephita; ngarud, talaga nga innalami ida ken dagiti probisionda.

11 Ket iti laksid ti pannakaputed dagiti Lamanita iti suportada kalpasan daytoy a wagas, determinadoda latta a mangmantener iti siudad; ngarud nagbalin a kasapulan nga alaenmi dagidiay probision ket ipatulodmi dagitoy idiay Judea, ken dagiti baludmi iti daga ti Zarahemla.

12 Ket napasamak a saan nga adu nga aldaw ti napalabsen sakbay a nangrugi a mapukaw kadagiti Lamanita ti amin a namnama a tulong; ngarud insukoda ti siudad kadagiti imami; ket gapu iti daytoy natungpalmi dagiti planomi iti pananggun-od iti siudad a Cumeni.

13 Ngem napasamak nga adu unay dagiti baludmi isu nga, iti laksid ti kinadakkel ti bilangmi, obligadokami nga usaren ti amin a puersami a mangtaginayon kadakuada, wenno mangpapatay kadakuada.

14 Agsipud ta kitaen, pinilit ti nakaad-adu kadakuada ti aglibas, ket makilabanda babaen kadagiti bato, ken babaen kadagiti pang-or, wenno aniaman a banag a maiggamanda, isu a talaga a napapataymi ti nasurok a dua ribu kadakuada kalpasan ti panangisukoda iti bagbagida a balud ti gubat.

15 Ngarud mainugot unay kadakami, a nasken a gibusanmi ti biagda, wenno bantayan ida, a siiggem iti espada, agingga iti daga a Zarahemla; ken kasta met a saanen nga umdas ti abastomi para kadagiti tattaomii, iti laksid ti naalami manipud kadagiti Lamanita.

16 Ket ita, kadagidiay a kritikal a kasasaad, nagbalin a serioso unay a banag ti panangikeddeng maipapan kadagitoy a balud iti gubat; nupay kasta, naisolbarmi nga ippan ida iti daga ti Zarahemla; ngarud nangpilikami iti maysa a paset dagiti soldadomi, ket dinutokanmi ida a mangidaulo kadagiti baludmi a mapan iti daga a Zarahemla.

17 Ngem napasamak a nagsublida iti kabigatanna. Ket ita kitaen, saanmi dinamag kadakuada ti maipanggep kadagiti balud; gapu ta kitaen, adda dagiti Lamanita a mangraut kadakami, ket nagsublida iti nainggundawayan a tiempo tapno isalakandakami iti pannakatnag kadagiti imada. Ta kitaen, nangipatulod ni Ammoron kadagiti baro a suplay ti probision a mangsuporta kadakuada ken kasta met ti nagadu nga soldado ti soldado.

18 Ket napasamak a dagidiay soldado nga imbaonmi a kadua dagiti balud ket talaga a simmangpet iti naingundawayan a tiempo tapno malapdan ida, ta dandanida a parmekennakami.

19 Ngem kitaen, situtured a nakilaban ti bassit nga soldadoko a dua ribu ket innem a pulo; wen, natibkerda iti sanguanan dagiti Lamanita, ket impakatda ti pammapatay kadagidiay amin a bimmusor kadakuada.

20 Ket idi dandanin a sumuko ti nabati nga soldadomi iti sanguanan dagiti Lamanita, kitaen, natibker ken saan a naupay dagidiay dua ribu ken innem a pulo.

21 Wen, ket talaga a nagtulnog ken nagtungpalda a mangaramid iti tunggal balikas ti bilin nga addaan ti kinaeksakto; wen, ken iti kinapudnona a sigun iti pammatida a naaramid daytoy kadakuada; ken talaga a nalagipko dagiti balikas nga imbagada kaniak a dagiti ^ainnada ti nangisuro kadakuada.

22 Ket ita kitaen, isuda dagitoy nga annakko, ken dagidiay soldado a napili a mangbayabay kadagiti balud, ti nakautanganmi kadaytoy naindaklan a balligi; gapu ta isuda ti nangparmek kadagiti Lamanita; ngarud napasanudda iti siudad ti Manti.

23 Ket tinaginayonmi ti siudadmi a Cumeni, ket saankami amin a nadadael babaen ti espada; nupay kasta, nagsagabakami iti dakkel a pannakapukaw.

24 Ket napasamak a kalpasan ti panaglibas dagiti Lamanita, imbilinko a dagus a maala dagiti soldadok a nasugsugatan manipud kadagiti natnatay, ket impaaramidko a maagasan dagiti sugsugatda.

25 Ket napasamak nga adda dua gasut, manipud iti dua ribu innem a pulok, ti naglusdoy gapu iti pannakaadas ti dara; nupay kasta, sigun iti kinaimbag ti Dios, ken iti dakkel a panagsiddaawmi, ken kasta met ti kinaragsak ti intero nga soldadomi, awan uray maysa kadakuada ti natay; wen, ken ^aawan met uray maysa kadakuada ti saan a nasugattan.

26 Ket ita, nakaskasdaaw ti pannakaitalimengda para kadagiti intero nga soldadomi, wen, ta maisalakanda idinto nga adda sangaribu kadagiti kakabsatmi ti napapatay. Ket nainkalintegan nga ipabigbigmi dayta iti namilagruan a ^abileg ti Dios, gapu iti niasangsangayan a ^bpammatida iti dayta a naisuro kadakuada a patien—nga adda nalinteg a Dios, ken ta siasinoman a saan a nagduadua, maitalimengda babaen ti nakaskasdaaw a bilegna.

27 Ita daytoy ti pammati dagitoy insaok; agtutuboda, ken natibker ti panunotda, ken talaga nga agtultuloy ti panagtalekda iti Dios.

28 Ket ita napasamak a kalpasan ti kasta a panangasikasomi kadagiti nasugsugatan a soldadomi, ken panangitabonmi kadagiti nataymi ken kasta met kadagiti natay dagiti Lamanita, nga adu, kitaen, talaga a dinamagmi ken ni Gid maipanggep kadagiti balud a kaduada a nangrugi a mapan iti daga a Zarahemla.

29 Ita ni Gid isu ti nadutokan a hepe a kapitan dagiti grupo ti tattao tapno mangbantay kadakuada a mapan iti daga.

30 Ket ita, dagitoy dagiti balikas nga imbaga kaniak ni Gid: Kitaen, talaga a rinuguianmi ti mapan iti daga ti Zarahemla a kadua dagiti baludmi. Ket napasamak a nasabatmi dagiti espia dagiti soldadomi, a nabaon a siputan ti kampo dagiti Lamanita.

31 Ket impukkawda kadakami, a kunada—Kitaen, agmarmartsa dagiti soldado dagiti Lamanita nga agturong iti siudad ti Cumeni; ket kitaen, rautenda ida, wen, ken papatayenda dagiti tattaotayo.

32 Ket napasamak a talaga a nangngeg dagiti baludmi ti pukawda, a nakaigapuan ti panagturedda; ket immalsa ti panagrebeldeda kontra kadakami.

33 Ket napasamak a gapu iti panagrebeldeda talaga nga tiniromi ida kadagiti espadami. Ket napasamak a talaga a napardas ti taray dagiti grupoda a simmarakusok kadagiti espadami, iti kastoy, napapatay ti ad-adu a bilang kadakuada; ket nakalusot dagiti nabati kadakuada ket naglibasda kadakami.

34 Ket kitaen, idi naglibasda ket saanmi a nakamatan ida, napardas ti panagmartsami nga agturong iti siudad ti Cumeni; ket kitaen, talaga nga apagisu ti idadanonmi tapno matulonganmi dagiti kakabsatmi iti panangsalaknib iti siudad.

35 Ket kitaen, nawayawayaankami manen manipud kadagiti ima dagiti kabusormi. Ket napadayawan ti nagan ti Diosmi; ta kitaen, isu ti nangwayawaya kadakami; wen, a nangaramid kadagitoy naindaklan a banag para kadakami.

36 Ita napasamak a siak, ni Helaman, idi nangngegko dagitoy a balikas ni Gid, napnoak iti kasta unay a ragsak gapu iti kinaimbag ti Dios iti panangsalaknibna kadakami, tapno saankami amin a mapapatay; wen, ket agtalekak a ^asimrek dagiti kararua dagidiay napapatay iti paginanaan a Diosda.