1 Ket ita napasamak nga, apaman a nagun-od ni Amalickiah ti pagarian rinugianna a paregtaen ti puspuso dagiti Lamanita a maibusor kadagiti tattao ni Nephi; wen, nangtuding kadagiti tattao a makisarita kadagiti Lamanita manipud kadagiti torreda, maibusor kadagiti Nephita.

2 Ket iti kasta a talaga a nangpataud isuna iti emosion a maibusor kadagiti Nephita kadagiti puspusoda, iti kasta unay agingga nga iti maudi a paset ti maikasangapulo ket siam a tawen ti panagturay dagiti ukukom, gapu ta natungpalna dagiti planona agingga ita, wen, gapu ta naaramid nga ari kadagiti Lamanita, inkagumaanna pay nga agturay iti amin a daga, wen, ken amin dagiti tattao nga adda iti daga, dagiti Nephita kasta met dagiti Lamanita.

3 Ngarud natungpalna ti planona, gapu ta napatangkenna ti puspuso dagiti Lamanita ken nabusekna dagiti panunotda, ken nasugsuganna ida nga agpungtot, isu nga napagtiponna ti adu a bilang ti soldado a mapan makigubat maibusor kadagiti Nephita.

4 Agsipud ta determinado isuna, gapu iti kinaadu ti bilang dagiti taona, tapno mangparmek kadagiti Nephita ken mangiyeg kadakuada iti pannakaadipen.

5 Ket ngarud nangituding isuna kadagiti ^ahepe a kapitan dagiti Zoramita, gapu ta isuda ti makaammo unay iti puersa dagiti Nephita, ken kadagiti lugar a natalged, ken dagiti kakapsutan a paset dagiti siudadda; ngarud tinudinganna ida nga agbalin a hepe a kapitan kadagiti soldadona.

6 Ket napasamak a nagkampoda, ket nagdaliasatda nga agturong iti daga ti Zarahemla iti let-ang.

7 Ita napasamak a bayat ti pananggun-od ni Amalickiah iti bileg babaen ti panagulbod ken panangallilaw, ni Moroni, iti sabali a bangir, ^anagsagsagana nga agbalin a napudno dagiti pampanunot dagiti tattao iti Apo a Diosda.

8 Wen, pappapigsaennan ti soldado dagiti Nephita, ken nagbangbangon kadagiti babassit a puerto, wenno kadagiti luglugar a natalged; nangtumtumpok ti daga kadagiti aglawlaw tapno agtalinaed iti uneg dagiti soldadona, ken kasta met a nangbangbangon kadagiti pader a bato a mangpalawlaw kadakuada iti aglawlawda, iti aglawlaw dagiti siudadda ken kadagiti beddeng dagiti dagada; wen, iti amin nga aglawlaw ti daga.

9 Ket inkabilna ti ad-adu a bilang dagiti tattao kadagiti kakapsutan a sarikedkedda; ket iti kasta talaga a sinarikedkeddanna ken pinapigsana ti daga a tinagikua dagiti Nephita.

10 Ket isu a nagsagsagana isuna tapno ^asuportaran ti libertadda, dagiti dagada, dagiti assawada, ken dagiti annakda, ken dagiti kappiada, ken tapno agbiagda iti Apo a Diosda, ken tapno mataginayonda dayta nga inawagan dagiti kabusorda a panggep dagiti Kristiano.

11 Ket maysa a napigsa ken naingel a tao ni Moroni; maysa a tao nga addaan iti naan-anay a ^apannakaawat; wen, maysa a tao a saan a pagragsakan ti pammapatay; maysa a tao a pagragsakan ti karuruana ti libertad ken wayawaya ti pigilianna, ken kadagiti kakabsatna manipud iti pannakatagabo ken pannakaadipen;

12 Wen, maysa a tao a napno iti emosion ti pusona iti panagyaman iti Diosna, maipapan kadagiti adu a pribilehio ken bendision nga impaayna kadagiti taona; maysa a tao a kasta unay ti panagtrabaho para iti ^apagimbagan ken kinatalged dagiti taona.

13 Wen, ken maysa a tao a natibker iti pammati ken ni Cristo, ken ^anagkari babaen iti maysa a sapata a depensaanna dagiti taona, dagiti karbenganna, ken ti pagilianna, ken ti relihionna, uray pay iti pannakapukaw ti darana.

14 Ita naisuro kadagiti Nephita a depensaan ti bagbagida kadagiti kabusorda, uray pay iti panangpapatay no kasapulan; wen, ket naisuro pay kadakuada a ^asaanda a pulos nga agbalin a makapagura, wen, ken saan a pulos a mangitag-ay iti espada malaksid no maibusor iti kabusor, malaksid no iti panagpatalinaed a natalged dagiti biagda.

15 Ket daytoy ti pammatida, a parang-ayen ida ti Dios iti daga babaen ti panangaramidda iti kasta, wenno iti sabali a balikas, rumang-ayda iti daga no napudnoda iti panangtungpalda kadagiti bilbilin ti Dios; wen, pakdaaran ida nga aglibas, wenno agsagana iti gubat, sigun iti pannakaisarangda iti peligro;

16 Ken kasta pay, ta ipakaammo ti Dios kadakuada no sadino ti papananda tapno depensaanda ti bagbagida kadagiti kabusorda, ket babaen ti panangaramidda iti kasta, isalakan ida ti Apo; ket daytoy ti pammati ni Moroni, ket talaga a sigogloria ti pusona iti daytoy; ^asaan nga iti panangpapatay no di ket iti panagaramid iti naimbag, iti panangtaginayon kadagiti taona, wen, iti panangtungpal kadagiti bilbilin ti Dios, wen, ken panangkontra iti kinadangkes.

17 Wen, pudno, pudno kunak kadakayo, no kasdiayen amin a tattao, ken kastan, ken kastanto latta nga agnanayon, a kas ken ni Moroni, kitaen, agkintayegto koman iti agnanayon dagiti mismo a bileg ti impierno; wen, pulos a saan a maaddaan iti bileg ti ^asairo kadagiti puspuso dagiti annak ti tattao.

18 Kitaen, maysa isuna a tao a kas ken ni Ammon, ti lalaki nga anak ni Mosiah, wen, ken uray pay dagiti dadduma a lallaki nga annak ni Mosiah, wen, ken kasta met ni Alma ken dagiti lallaki nga annakna, gapu ta tattaoda amin ti Dios.

19 Ita kitaen, kasta met laeng ken ni Mproni ti panagserbi ni Helaman ken dagiti kakabsatna kadagiti tattao; gapu ta talaga nga inkasabada ti balikas ti Dios, ket talaga a binuniagda kas pakakitaan ti panagbabawi dagiti amin a tattao a dumngeg kadagiti balikasda.

20 Ket isu a napanda, ket talaga nga ^aimpakumbaba dagiti tattao ti bagbagida gapu kadagiti balikasda, isu a ^bnapaboranda unay iti Apo, ket isu nga awan ti makalapped kadakuada a mabang-aran manipud kadagiti gubat ken panaglalaban iti nagbabaetanda, wen, agingga iti las-ud ti uppat a tawen.

21 Ngem, kas kinunak, iti maudi a ngudo ti maikasangapulo ket siam a tawen, wen, nupay ti kinaadda ti kappia iti nagbabaetanda, napilitanda a makilaban kadagiti kakabsatda, a dagiti Lamanita..

22 Wen, ken iti kamaudiananna, saan a pulos a nagsardeng dagiti pannakigubatda kadagiti Lamanita iti las-ud ti adu a tawen, nupay iti adu a panagkedkedda.

23 Ita, ^anagladladingitda ta kasapulan a mangalada kadagiti armas tapno makilaban maibusor kadagiti Lamanita, gapu ta saanda a pagragsakan ti panangpapatay; wen, ket saan laeng a daytoy—nagladingitda nga agbalinda a wagas iti pannakaipan iti nakaad-adu kadagiti kakabsatda manipud iti daytoy a lubong iti agnanayon a lubong, a saanda a nakasagana a mapan iti presensia ti Diosda.

24 Nupay kasta, saanda mabalin nga ipalubos nga isakripisio ti biagda, ta mapapatay dagiti ^aassawada ken dagiti annakda babaen ti barbaro a kinaulpit dagidiay dati a kakabsatda, wen, ken ^bsimmiasin manipud iti simbaanda, ken pinanawanda ida ket napanna tapno papatayen ida babaen ti pannakikaduada kadagiti Lamanita.

25 Wen, saanda maibturan nga agragsak dagiti kakabsatda maipapan iti dara dagiti Nephita, bayat ti intero a periodo ti panawen nga adda dagidiay mangtungpal kadagiti bilbilin ti Dios, gapu ta ti kari ti Apo ket, no tungpalenda dagiti bilbilinna rumbeng a rumang-ayda iti daga.