1 Ket ita napasamak iti maikasangapulo ket maysa a bulan ti maikasangapulo ket siam a tawen, iti maikasangapulo nga aldaw ti bulan, nakita dagiti soldado dagiti Lamanita nga umas-asideg nga agturong iti daga ti Ammonihah.

2 Ket kitaen, nabangon manen ti siudad, ket nangikabil ni Moroni iti soldado iti igid dagiti beddeng ti siudad, ket nagibukbokda iti darat iti aglawlaw tapno mangsalaknib kadakuada manipud kadagiti pana ken bato dagiti Lamanita; ta kitaen, nakilabanda babaen kadagiti bato ken pana.

3 Kitaen, kinunak a ti siudad ti ^aAmmonihah ket naibangon manen. Ibagak kadakayo, wen, a nabangon manen ti dadduma a pasetna daytoy; ket gapu ta naminsan a dinadael daytoy dagiti Lamanita gapu iti kinadangkes dagiti tattao, impagarupda nga agbalinto manen a nalaka a biktima para kadakuada.

4 Ngem kitaen, anian ti kinakaro ti pannakaupayda; gapu ta kiaten, nangbuntuon ti tambak a daga dagiti Nephita iti aglawlawda, nangato unay daytoy tapno agbalinda nga epektibo ta saan a makaibakal dagiti Lamanita kadagiti batoda ken dagiti panada kadakuada, ken saanda a makapan kadakuada malaksid no babaen iti lugar a pagserkanda.

5 Ita nasdaaw unay dagiti hepe a kapitan dagiti Lamanita iti daytoy a tiempo, gapu iti kinasirib dagiti Nephita iti panangisagana kadagiti natalged a luglugarda.

6 Ita impagarup dagiti lider dagiti Lamanita, gapu iti kinaadu ti bilangda, wen, impagarupda nga addaanda iti pribilehio a mangraut kadakuada a kas iti inaramidda idi agingga ita; wen, ket insaganada met ti bagbagida kadagiti kalasag, ken kadagiti kabal ti barukong; ket insaganada met ti bagbagida kadagiti kawes a lalat, wen, napuskol unay a kawes a mangabbong iti kinalamolamoda.

7 Ket gapu ta nakasaganada iti kasta impagarupda a nalakada a parmeken ken sakupen dagiti kakabsatda iti sangol ti pannakaadipen, wenno mangpapatay ken mangmasaker kadakuada sigun iti pagragsakanda.

8 Ngem kitaen, kasta unay ti siddaawda, ta ^anakasaganada para kadakuada, iti wagas a saan pay pulos a naam-ammo kadagiti annak ni Lehi. Ita nakasaganada para kadagiti Lamanita, tapno makigubat sigun iti wagas dagiti instruksion ni Moroni.

9 Ket napasamak a napalalo ti siddaaw dagiti Lamanita, wenno dagiti Amalickiahite iti wagas ti panagsaganada a makigubat.

10 Ita, no bimmaba koma ni ari Amalickiah manipud iti ^adaga ti Nephi, a lider ti soldadona, mabalin a naraut koma dagiti Lamanita dagiti Nephita iti siudad ti Ammonihah; maipapan daytoy kiaten, saan a maseknan isuna maipapan iti ipapatay dagiti taona.

11 Ngem kitaen, saan a bimmaba a mismo ni Amalickias tapno makigubat. Ket kitaen, saan a naitured a rauten dagiti hepe a kapitanna dagiti Nephita iti siudad ti Ammonihah, gapu ta binalbaliwan ni Moroni ti panangimaton kadagiti ar-aramid kadagiti Nephita, isu a naupay dagiti Lamanita kadagiti pagsanudanda a lugar ket saanda kabaelan a rauten ida.

12 Ngarud nagsanudda iti let-ang, ket intugotda dagiti soldadoda ket nagmartsada nga agturong iti daga ni Noe, ta impagarupda a dayta ti sumaruno a kasayaatan a lugar para kadakuada a rauten dagiti Nephita.

13 Ta saanda ammo a sinarikedkedan ni Moroni, wenno nangbangon kadagiti ^asarikedked a natalged, para iti tunggal siudad iti amin a daga iti aglawlaw; ngarud, natibker ti determinasionda a nagmartsada nga agturong iti daga ni Noe; wen, immasideg dagiti hepe a kapitanda ket nagsapatada a dadaelenda dagiti tattao iti dayta a siudad.

14 Ngem kitaen, iti sidaawda, ti siudad ni Noe, nga agingga ita ket maysa a nakapuy a lugar, ket nagbalin itan a napigsa, babaen ti wagas ni Moroni, wen, uray pay a rimbawanna ti pigsa ti siudad ti Ammonihah.

15 Ket ita, kitaen, daytoy ti kinasirib ni Moroni; gapu ta impagarupna a mabutengdanto iti siudad ti Ammoniha; ket gapu ta agingga ita ti siudad ni Noe ti kakapsutan a paset ti daga, ngarud agmartsadanto sadiay tapno makigubat; ket napasamak daytoy sigun kadagiti tarigagayna.

16 Ket kitaen, dinutokan ni Moroni ni Lehi nga agbalin a hepe a kapitan kadagiti tattao iti dayta a siudad; ket ^aisu met laeng a Lehi ti nakilaban kadagiti Lamanita iti tanap iti daya ti karayan Sidon.

17 Ket ita kitaen napasamak nga, idi naammuan dagiti Lamanita a ni Lehi ti mangkontrol ti siudad naupayda manen, gapu ta nagbutengda unay ken ni Lehi; nupay kasta nagkari babaen iti sapata dagiti hepe a kapitanda a rauten ti siudad; ngarud, inturongda dagiti soldadoda.

18 Ita kitaen, saan a makastrek iti aniaman a dalan dagiti Lamanita kadagiti natalged a sarikedkedda malaksid iti pagserkan, gapu iti kinangato ti naibuntuon a daga, ken ti kinauneg ti kanal a nakali iti aglawlaw, malaksid no babaen iti pagserkan.

19 Ket gapu ta nakasagana dagiti Nephita a mangdadael kadagiti amin a mangpadas a sumang-at tapno sumrek iti sarikedked babaen ti aniaman a sabali a dalan, babaen ti panangipuruakda kadagiti batbato ken panpana kadakuada.

20 Ngarud nakasaganada, wen, maysa a grupo dagiti kapigsaan a tattaoda, babaen kadagiti espadada ken dagiti tiradorda, a mangtiro kadagiti amin a mangpadas nga sumrek iti natalged a lugarda babaen ti lugar a pagserkan; ket ngarud nakasaganada a depensaan dagiti bagbagida maibusor kadagiti Lamanita.

21 Ket napasamak nga inturong dagiti kapitan dagiti Lamanita dagiti soldadoda a sumrek iti lugar a pagserkan, ket rinugianda ti makilaban kadagiti Nephita, tapno makastrekda iti natalged a lugarda; ngem kitaen, napaatrasda iti sagpaminsan, agingga a napapatayda iti nakaad-adu a bilang a panangpapatay.

22 Ita idi naammuanda a saanda a makagun-od iti bileg kadagiti Nephita babaen ti pagserkan, rinugianda ti nagkali kadagiti igid ti dagada tapno maaddaan pagserkan dagiti soldadoda, tapno maaddaanda iti agpapada a gundaway a makilaban; ngem kitaen, napapatayda kadagitoy a panangpadasda babaen kadagiti batbato ken panpana a naitiro kadakuada; ket imbes a punnuenda dagiti kanalda babaen ti pananggaburda kadagiti naibuntuon a daga iti igid, napunnoda iti bilang dagiti natnatay ken nasugsugatan a bagbagida.

23 Ngarud naaddaan iti isu amin bileg dagiti Nephita kadagiti kabusorda; ket talaga nga impadas dagiti Lamanita a papatayen dagiti Nephita agingga a napapatay amin dagiti hepe a kapitanda; wen, ket nasurok a sangaribu kadagiti Lamanita ti napapatay; wen, ket nasurok a sangaribu kadagiti Lamanita ti napapatay; bayat a, iti sabali a bangir, awan uray maysa a kararua dagiti Nephita ti napapatay.

24 Adda agarup limapulo dagiti nasugsugatan, isuda dagiti naipasango kadagiti panpana dagiti Lamanita iti pagserkan, ngem nasalaknibanda babaen kadagiti kabalda, ken dagiti kabal ti barukongda, ken dagiti kabal ti uloda, isu nga adda kadagiti saksakada dagiti sugsugatda, adu kadagitoy ti nakaro unay.

25 Ket napasamak, nga idi nakita dagiti Lamanita a napapatay amin dagiti hepe a kapitanda naglibasda iti let-ang. Ket napasamak a nagsublida iti daga ni Nephi, tapno ipakaammoda iti arida, ni Amalickiah, a maysa a Nephita babaen ti pannakayanak, ti maipapan iti kinadakkel a bilang dagiti napapatay kadakuada.

26 Ket napasamak a kasta unay ti pungtotna kadagiti taona, gapu ta saanna a nagun-od ti tarigagayna kadagiti Nephita; saanna a nasakup ida iti sangol ti pannakaadipen.

27 Wen, kasta unay ti pungtotna, ket ^ainlunodna ti Dios, ken ni Moroni pay, nga agkarkari babaen ti maysa a ^bsapata nga inumenna ti darana; ket gapu daytoy ta tinungpal ni Moroni dagiti bilbilin ti Dios iti panagsaganana para iti kinatalged dagiti taona.

28 Ket napasamak, nga iti sabali a bangir, talaga a ^anagyaman dagiti tattao ni Nephi iti Apo a Diosda, gapu iti awan kapada a bilegna iti panangisalakan kadakuada manipud kadagiti kabusorda.

29 Ket kasta ti nagpatingga ti maikasangapulo ket siam a tawen ti panagturay dagiti ukukom kadagiti tattao ni Nephi.

30 Wen, ket adda ti agtultuloy a kappia kadakuada, ken kasta unay ti kinarang-ayda iti simbaan gapu iti panangipangag ken kinagaget nga intedda iti balikas ti Dios, a naideklara kadakuada da Helaman, ken Shiblon, ken Corianton, ken Ammon ken dagiti kakabsatna, wen, ken babaen kadagiti amin a naordenan babaen ti ^anasantuan nga orden ti Dios, a nabuniagan gapu iti panagbabawi, ken naibaon tapno mangasaba kadagiti tattao.