1 Ket napasamak a rinubruban dagiti Amalekita ken dagiti Amulonita ken dagiti Lamanita nga adda iti daga ti Amulon, ken kasta met iti daga ti Helam, ken adda iti daga ti ^aJerusalem, ken iti kamaudiananna, iti amin a daga iti aglawlaw, a saan pay a namalbaliw ken saan pay a nangawat iti nagan nga ^bAnti-Nephi-Lehi, nga agpungtot kadagiti kabsatda.

2 Ket nagbalin a nalabes ti gurada kadakuada, nga uray la a rinugianda ti immalsa iti arida, nga uray la a saanda bigbigen nga isu ti arida; ngarud, nagarmas a nakirupak maibusor kadagiti tattao dagiti Anti-Nephi-Lehi.

3 Ita intalek ti ari ti pagarian iti lalaki nga anakna, ket ninagananna iti Anti-Nephi-Lehi.

4 Ket natay ti ari iti dayta met la a tawen a panangrugi dagiti Lamanita nga agsagana a makigubat maibusor kadagiti tattao ti Dios.

5 Ita idi nakita da Ammon ken dagiti kabsatna ken amin dagiti simmurot kenkuana ti panagsagana dagiti Lamanita a mangdadael kadagiti kabsatda, immayda iti daga ti Midian, ket sadiay nasarakan ni Ammon amin dagiti kabsatna; ket manipud sadiay immayda iti daga ti Ismael tapno ^amakapagiinnumanda ken ni Lamoni ken kasta met dagiti kabsatna nga Anti-Nephi-Lehi, no ania ti aramidenda a mangsalaknib iti bagbagida maibusor kadagiti Lamanita.

6 Ita awan ti uray no maysa a kararua kadagiti tattao a namalbaliw iti Apo ti agarmas maibusor kadagiti kabsatda; saan, saanda pay pulos agaramid ti aniaman a panagsagana iti gubat; wen, ken kasta met ti imbilin kadakuada ti arida.

7 Ita, dagitoy dagiti balikas nga imbagana kadagiti tattao maipanggep iti daytoy a banag: Agyamanak iti Diosko, ay-ayatek a tattaok, ta siimbag ti naindaklan a Diostayo a nangibaon kadagitoy kabsattayo, dagiti Nephita, tapno kasabaandatayo, ken tapno mapapati kadagiti ^akaugalian dagiti dakes nga ammatayo.

8 Ket kitaen, agyamanak iti naindaklan a Diosko ta inikkannatayo iti paset ti espirituna a mangpalukneng iti puspusotayo, ta naluktantayo ti pannakikinnaawatantayo kadagitoy a kakabsat, dagiti Nephita.

9 Ket kitaen, agyamanak pay iti Diosko, ta babaen ti pannakalukat daytoy a pannakikinnaawatan napapatitayo kadagiti ^abasoltayo, ken iti adu a pammapatay a naaramidtayo.

10 Ken agyamanak pay iti Diosko, wen, ti naindaklan a Diosko, ta nangipaay kadatayo tapno makapagbabawitayo kadagitoy a bambanag, ken kasta met a ^apinakawannatayo kadagidiay adu a basbasol ken pammapatay a naaramidtayo, ken inikkatna ti ^bmanidsidir a basol iti puspusotayo, babaen ti pannakaikari ti Anakna.

11 Ket ita kitaen, kakabsatko, agsipud ta daytoy laeng ti amin a maaramidtayo (ta datayo ti kangrunaan a napukaw iti amin a sangkataoan) ti agbabawi kadagiti amin a basoltayo ken ti adu a pammapatay a naaramidtayo, ken dawaten iti Dios a ^amaikkatda manipud iti puspusotayo, ta ti la naan-anay a panagbabawi ti maaramidtayo iti Dios tapno maikkat dagiti mansatayo—

12 Ita, kapatgan nga ay-ayatek a kakabsatko, gapu iti panangikkat ti Dios iti mansatayo, ket nagbalin a nasilap dagiti espadatayo, saantayo ngaruden a mansaan pay dagiti espadatayo iti dara dagiti kabsattayo.

13 Kitaen, kunak kadakayo, Saan, pagtalinaedentayo dagiti espadatayo a saan a mamansaan iti dara dagiti kabsattayo; agsipud ta nalabit, a no mansaantayo manen dagiti espadatayo saandanton a ^amaugasan pay babaen ti dara ti Anak ti naindaklan a Diostayo, a maibukbokto para iti pannakasubbot ti basbasoltayo.

14 Ket kinaasiannatayo ti naindaklan a Dios, ket impalubosna a maammuantayo dagitoy a bambanag tapno saantayo a mapukaw; wen, ket insaksakbayna nga impalubos a maammuantayo dagitoy a bambanag, agsipud ta ay-ayatenna dagiti ^akararuatayo a kas iti panangayatna kadagiti annaktayo; ngarud, gapu iti asina sinarungkarannatayo babaen dagiti anghelna, tapno maipakaammo ti ^bplano ti pannakaisalakan kadatayo ken kasta met kadagiti sumarsaruno a sangkaputotan.

15 O, anian a kinamanangngaasi ti Diostayo! Ket ita kitaen, tangay nabaelantayon nga inikkat ti mansatayo, ket napasilapen dagiti espadatayo, idulintayo ida tapno agtalinaed ti kinasilapda, a kas pammaneknektayo iti Diostayo iti maudi nga aldaw, wenno iti aldaw a maawagantayo nga agtakder iti sangona tapno maukom, tapno saantayo mamansaan dagiti espadatayo iti dara dagiti kabsattayo manipud iti pannangtedna kadatayo iti balikasna ken pinagbalinnatayo a nadalus iti dayta.

16 Ket ita, kakabsatko, no panggependatayo a dadaelen dagiti kabsattayo, kitaen, ilemmengtayo dagiti espadatayo, wen, uray pay no ikalitayo iti nauneg iti daga, tapno agtalinaedda a nasilap, a kas pammaneknek a saantayo pulos nga inaramat ida iti maudi nga aldaw; ket no dadaelendatayo dagiti kabsattayo, kitaen, ^amapantayo iti Diostayo ket maisalakantayo.

17 Ket ita napasamak nga idi naigibus ti ari ti panagsaona, ken nakapaguummong a sangsangkamaysa amin dagiti tattao, innalada dagiti espadada, ken amin nga armas a naaramat iti pannakapagayus ti dara ti tao, ket ^ainkalida ida iti nauneg iti daga.

18 Ket daytoy ti inaramidda, ta iti imatangda maysa daytoy a pammaneknek iti Dios, ken kasta met kadagiti tattao, a ^apulos a saanda aramaten manen dagiti armas para mangsayasay iti dara ti tao; ket daytoy ti inaramidda, a mamasingked ken ^bmakitulag iti Dios, nga imbes a pagsayasayenda ti dara dagiti kabsatda ^citdenda ketdi ti biagda; ken imbes nga alaenda manipud iti kabsat itdenda ketdi kenkuana; ken imbes a palabsenda dagiti aldawna nga awan ar-aramidenda agtrabahoda ketdi a sigagaed babaen dagiti imada.

19 Ket kasta a nakitatayo a, idi mapapati dagiti Lamanita ken maammuanda ti kinapudno, ^anatibkerda, ket agsagabada ti patay imbesnga agaramidda iti basol; ket kasta a nakitatayo nga inkalida dagiti armasda iti kappia, wenno inkalida dagiti armasda a pakigubat, para iti kappia.

20 Ket napasamak a nagsagana ti kakabsatda, a dagiti Lamanita, a makigubat, ket immayda iti daga ti Nephi para iti panggep a mangdadael iti ari, ken tapno ikabilda ti sabali a kasukatna, ken kasta met a mangdadael kadagiti tattao nga Anti-Nephi-Lehi iti ruar ti daga.

21 Ita idi nakita dagiti tattao ti irarautda kadakuada napanda sinabat ida, ket ^aindasayda ti bagida iti daga iti imatangda, ket rinugianda nga inawagan ti nagan ti Apo; ket kasta ti kasasaadda idi rinugian dagiti Lamanita a darupen ida, ken rinugianda a patayen ida iti espada.

22 Ket kasta nga awan ti nasabatda a panagkedked, a pinapatayda ti sangaribu ken lima kadakuada; ket ammotayo a nabendisionanda, agsipud ta napanda makipagnaed iti Diosda.

23 Ita idi nakita dagiti Lamanita a saan nga agsanud dagiti kabsatda manipud iti espada, wenno aglisi iti kanawan nga ima wenno iti kanigid, ngem agiddada ket ^amaungaw, ken dinayawda ti Dios uray pay iti mismo a pannakaungawda iti espada—

24 Ita idi nakita dagiti Lamanita daytoy ^anagparbengda a mangpatay kadakuada; ket adu kadakuada ti ^bmasbaalan ti pusona kadagiti kabsatda a natay iti espada, agsipud ta nagbabawida kadagiti banag a naaramidda.

25 Ket napasamak nga indissoda dagiti armas a pakigubatda, ket saandan a pinidut pay ida, agsipud ta nakaro ti nariknada a leddaang iti pammapatay a naaramidda; ket nagpaidasayda a kas kadagiti kabsatda, a nangnamnama iti kaasi dagiti ima a nakalayat a mangpapatay kadakuada.

26 Ket napasamak a nakitipon dagiti tattao ti Dios iti ad-adu pay ngem iti bilang dagiti napapatay iti dayta nga aldaw; ket nalinteg a tattao dagiti napapatay, ngarud awan ti pamkuatantayo nga agduadua iti ^apannakaisalakanda.

27 Ket awan ti dakes a tao kaduada ti napapatay; ngem adda nasursurok ngem sangaribu ti naiturong ti pannakaammo iti kinapudno; kasta a makitatayo nga agaramat ti adu a ^awagas ti Apo iti pannakaisalakan dagiti taona.

28 Ita dagiti Amalekita ken Amulonita ti kadakkelan ti bilang kadagiti Lamanita a nagpapatay iti nakaad-adu kadagiti kabsatda, ti kadakkelan a bilang kadakuada ti mainugot iti ^aorden dagiti ^bNehor.

29 Ita, kadagiti nakitipon kadagiti tattao ti Apo, ^aawan ti Amalekita wenno Amulonita, wenno mainugot iti orden ni Nehor, ngem kaputotan ida da Laman ken Lemuel.

30 Ket kasta a nalawag a matarusantayo, a kalpasan ti ^apannakalawlawag dagiti tattao babaen ti Espiritu ti Dios, ken naaddaandan iti nawadwad a ^bpannakaammo kadagiti banag a maipanggep iti kinalinteg, sa kalpasanna ^cimmikay nga agturong iti basol ken aglabsing, agbalinda a natangtangken, ket iti kasta agbalin a ^dnakarkaro ti kasasaadda ngem no saanda koma a naam-ammuan dagitoy a bambanag.