1 Ket ita, anakko, adda ti maibagak maipapan iti nasaon a pannakaisubli; agsipud ta kitaen, ^abinalusingsing dagiti dadduma ti nasantuan a kasuratan, ket ^bnayawyawanda gapu iti daytoy a banag. Ket madlawko a maburiboran met ti panunotmo maipapan iti daytoy a banag. Ngem kitaen, ipalawagko daytoy kenka.

2 Kunak kenka, anakko, a kasapulan ti plano ti pannakaisubli iti paglintegan ti Dios; agsipud ta kasapulan a maisubli ti amin a bambanag iti umiso nga urnosda. Kitaen, kasapulan ken nainkalintegan, mayannurot iti bileg ken panagungar ni Cristo, a masapul a maisubli ti kararua ti tao iti bagina, ket nasken a maisubli met laeng ti tunggal ^apaset ti bagi iti bukodna.

3 Ket kasapulan iti ^akinalinteg ti Dios a nasken a ^bmaukom ti tao a mayannurot kadagiti ^caramidda; ket no nasayaat ti aramidda iti daytoy a biag, ken nasayaat ti tarigagay ti puspusoda, ta nasken met, iti ud-udina nga aldaw, a ^dmaisubli iti dayta a nasayaat.

4 Ket no dakes dagiti aramidda ^amaisublinto met kadakuada a dakes. Ngarud, maisublinto amin a banag iti umiso nga urnosda, iti tunggal banag iti sigud a sukogna—^bti pannakatay maibangon iti saan nga ipapatay, ^cpanagrupsa iti saan a panagrupsa—maibangon iti ^dawan patinggana a kinaragsak a mangtawid iti pagarian ti Dios, wenno iti awan patinggana a panagladingit a mangtawid iti pagarian ti sairo, ti maysa iti maysa a bangir, ti maysa iti sabali—

5 Maibangon ti maysa iti kinaragsak a mayannurot iti tarigagayna a kinaragsak, wenno nasayaat iti tarigagayna iti nasayaat; ket iti kinadakes ti sabali babaen ti tarigagayna a dakes; gapu ta tinarigagayanna ti agaramid iti dakes iti unos ti aldawna kastanto met ti pannakagunggonana iti dakes iti yaay ti rabii.

6 Ket kasta met iti sabali a bangir. No nagbabawi iti basbasolna, ket tinarigagayanna ti kinalinteg agingga iti gibus ti aldawna, kasta met a magunggonaanto iti kinalinteg.

7 ^aDagitoy dagiti sinubbot ti Apo; wen, dagitoy dagiti nayadayo, a nawaywayaan manipud iti dayta awan patinggana a rabii ti kinasipnget; ket iti kasta agtakderda wenno matinnagda; ta kitaem, isuda dagiti ^bbukodda nga ukom, no agaramidda iti naimbag wenno agaramidda iti dakes.

8 Ita, dagiti bilin ti Dios ket ^asaan a mabaliwan; ngarud, naisagana ti dalan tapno mabalin ti siasino man ti magna dita ket maisalakan.

9 Ket ita kitaen, anakko, saanmo isagmak ti ^amaysa pay a basol a maibusor iti Diosmo kadagidiay punto ti doktrina, a nakaisagmakam nga agbasol.

10 Saanmo ipagarup, agsipud ta naisaon ti maipanggep iti pannakaisubli, a maisublikanto iti kinaragsak manipud iti basol. Kitaem, kunak kenka, saan a kinaragsak ti ^akinadakes iti uray kaano man.

11 Ket ita, anakko, amin a tao nga adda iti kasasaad a ^anakaisigudan, wenno kunaek, iti ^bnailubongan a kasasaad, addada iti lungog iti kinapait ken iti kawar ti kinadangkes; ^cawananda iti Dios iti lubong, ket maisupadida iti nakaisigudan ti Dios; ngarud, addada iti kasasaad a maisupadi iti nakaisigudan a kinaragsak.

12 Ket ita kitaen, kayat kadi a sawen ti balikas a pannakaisubli ti panangala iti banag iti nakaisigudan a kasasaad ket ikabilna daytoy iti saan a nakaisigudan a kasasaad, wenno ikabil iti kasasaad a sungani iti nakaisigudan?

13 O, anakko, saan a kastoy ti mapasamak; ngem ti kayat a sawen ti pannakaisubli ket ti isusubli manen ti dakes iti dakes, wenno nailubongan iti nailubongan, wenno kinasairo iti kinasairo—nasayaat iti nasayaat; nalinteg iti nalinteg; nainkalintegan iti nainkalintegan; manangngaasi iti manangngaasi.

14 Ngarud, anakko, kitaem a manangngaasika kadagiti kakabsatmo; makikaduaka a ^analinteg, ^bmangeddengka a nalinteg, ken itultuloymo ti ^cnaimbag nga aramid; ket no aramidem amin dagitoy a bambanag awatemto ti gunggonam; wen, addanto ^dpanangngaasi a maisubli manen kenka; addanto nalinteg a panangukom a maisubli manen kenka; ket magunggonaankanto manen iti naimbag.

15 Gapu ta aniaman ti impaaymo maisublinto manen kenka; ket maisublinto; ngarud, ad-adda a kedngan ti balikas a pannakaisubli ti managbasol, ket saanna nga ikalintegan iti kaano man.