1 Ket napasamak iti maika sangapulo ket maysa a tawen a panagturay dagiti ukom kadagiti tattao ni Nephi, iti maikalima nga aldaw ti maikadua a bulan, kalpasan iti kaadda unay ti kappia iti daga ti Zarahemla, kalpasan iti kinaawan kadagiti gubgubat wenno panagsususik iti sumagmamano a tawen, uray agingga iti maikalima nga aldaw ti maikadua a bulan iti maika sangapulo ket maysa a tawen, adda nagwaras a damag ti gubat iti intero a daga.

2 Ta kitaen, simrek ti soldado dagiti Lamanita iti sikigan ti let-ang, iti igid ti daga, agingga iti siudad ti ^aAmmonihah, ket rinugianda a papatayen dagiti tattao ken dadaelen ti siudad.

3 Ket ita napasamak, sakbay a nakaurnong dagiti Nephita iti umdas a buyot a mangpapanaw kadakuada iti daga, ^anadadaeldan dagiti tattao nga adda iti siudad ti Ammonihah, kasta met ti sumagmamano iti aglawlaw ti nagbedngan ti Noe, ken inalada ti dadduma a balud iti langalang.

4 Ita napasamak a tinarigagayan dagiti Nephita a maala dagiti naipanaw a balud iti langalang.

5 Ngarud, isu a natudingan a pangulo a kapitan dagiti buyot dagiti Nephita, (ket Zoram ti naganna, ket addaan iti dua nga annak, da Lehi ken Aha)—ita ni Zoram ken dagiti dua nga annakna, iti pannakaammona a nangato a saserdote ni Alma ti simbaan, ken iti pannakangngegna nga adda kenkuana ti espiritu ti pammadto, ngarud napanda kenkuana ket tinarigagayanda a maammuan kenkuana no kayat ti Apo a mapanda iti langalang a mangsapul kadagiti kabsatda, a naala dagiti Lamanita a balud.

6 Ket napasamak a ^adinamag ni Alma iti Apo ti maipanggep daytoy a banag. Ket nagsubli ni Alma ket kinunana kadakuada: Kitaen, ballasiwen dagiti Lamanita ti karayan Sidon iti abagatan a langalang, iti labes pay ti igid ti daga ti Manti. Ket kitaen sabtenyo ida sadiay, iti daya ti karayan Sidon, ket sadiay yawatto ti Apo kadakayo dagiti kabsatyo a naala dagiti Lamanita a balud.

7 Ket napasamak a binallasiw da Zoram ken ket dagiti lallaki nga annakna ti karayan Sidon, a kadua dagiti soldadoda, ket nagmartsada a naturong iti labes ti igid ti Manti iti abagatan a let-ang, nga adda iti dayaen a sikigan ti karayan Sidon.

8 Ket nadanonda dagiti buyot dagiti Lamanita, ket nawarawara dagiti Lamanita ken naabogda iti langalang; ket innalada dagiti kabsatda a naala dagiti Lamanita a balud, ket awan ti uray no maysa a kararua a napukaw kadakuada a nabalud. Ket innala ida dagiti kabsatda a mangtagikua iti dagdagada.

9 Ket kasta ti panaggibus ti maika sangapulo ket maysa a tawen dagiti ukom, ta napapanaw dagiti Lamanita iti daga, ken dagiti tattao ni Ammonihah ket ^anadadael; wen, ti tunggal sibibiag a kararua dagiti Ammonihahita ket ^bnadadael, kasta met ti dakkel a siudadda, a kinunada a saan a madadael ti Dios, gapu iti kadakkelna.

10 Ngem kitaen, napanawan a saan mapagnaedan iti ^amaysa nga aldaw; ket rinangrangkay dagiti aso ken atap nga ayup ti let-ang dagiti bangkay.

11 Nupay kasta, naurnong dagiti bangkay kalpasan ti adu nga aldaw iti rabaw ti daga, ket nagaburanda iti narabaw a gabur. Ket ita agadiwara ti kasta unay nga angot sadiay ket saan a napan dagiti tattao a mangtagikua iti daga ti Ammonihah iti adu a tawen. Ket naawagan iti Pannakadadael dagiti ni Nehors; agsipud ta miembroda iti propesion ni ^aNehor, dagiti napapatay; ket nagtalinaed a nadadael ti dagdagada.

12 Ket saanen nga immay pay dagiti Lamanita a manggubat kadagiti Nephita agingga iti maika sangapulo ket uppat a tawen ti panagturay dagiti ukom kadagiti tattao ni Nephi. Ket kasta ti nagtultuloy a kappia iti tallo a tawen dagiti tattao ni Nephi iti amin a daga.

13 Ket napan inkasaba da Alma ken Amulek ti panagbabawi dagiti tattao kadagiti ^atemploda, ken kadagiti santuarioda, kasta met kadagiti ^bsinagogada, a nabangon iti wagas dagiti Hudio.

14 Ket amin a dumngeg kadagiti balikasda, nagtultuloy nga impaayda kadakuada ti balikas ti Dios, nga awan ti ^aindumduma a tattao.

15 Ket kasta a napan da Alma ken Amulek, kasta met ti adu pay a napili para iti trabaho, a mangikasaba iti balikas iti amin a daga. Ket nagbalin a sapasap ti pannakabangon ti simbaan iti amin a daga, iti amin a rehion iti aglawlaw, kadagiti amin a tao a Nephita.

16 Ket ^aawan ti naidaddaduma kadakuada; imbukbok ti Apo ti Espirituna iti amin a rabaw ti daga a mangisagana iti pampanunot dagiti annak ti tattao, wenno mangisagana iti ^bpuspusoda a mangawat iti balikas a nasken a maisuro kadakuada iti kanito a yaayna—

17 Tapno saanda agsukir iti balikas, tapno saanda nga agbalin a saan mamati, ket agturongda iti pakadadaelan, ngem umawatda ketdi iti balikas a sirarag-o, ket kas iti ^asanga a naisulbong iti pudno nga ^bubas, tapno makastrekda iti ^cpaginanaan ti Apo a Diosda.

18 Ita nangasaba dagiti ^apapadi a napan kadagiti tattao iti maibusor iti amin a kinaulbod, ken ^bpanangallilaw, ken ^cinnapal, ken riri, ken rurod, ken panangidanem, ken panagtakaw, panagagaw, panagsamsam, panagpapatay, pannakiabig, ken amin a kita ti kinaalas, inawaragawagda a saan koma a kastoy dagitoy a bambanag—

19 Inwaragawagda dagiti bambanag a rumbeng nga asidegen a dumteng; wen, inwaragawagda ti ^ayaay ti Anak ti Dios, ti panagsagaba ken ipapatayna, kasta met ti panagungar dagiti natay.

20 Ket adu kadagiti tattao ti nagdamag iti maipanggep iti lugar a sangpetan ti Anak ti Dios; ket naisuro kadakuada nga ^aagparangto kadakuada ^bkalpasan ti panagungarna; ket daytoy nangngegan dagiti tattao a napnuan iti rag-o ken ragsak.

21 Ket ita kalpasan ti pannakabangon ti simbaan iti intero a daga—kalpasan ti ^apanagballigida a maibusor iti sairo, ken naikasaban ti balikas ti Dios iti amin a kinatarnawna iti intero a daga, ken ibukbukbok ti Apo ti bendisionna kadagiti tattao—kasta ti panaggibus ti maika sangapulo ket uppat a tawen ti panagturay dagiti ukom kadagiti tattao ni Nephi.