1 Ket kitaen, ita napasamak a ti sumaruno a panggepmi isu ti pananggun-od iti siudad ti Manti; ngem kitaen, awan ti wagas a mabalin a pakaituronganmi kadakuada iti ruar ti siudad babaen kadagiti babassit nga armado a grupomi. Agsipud ta kitaen, nalagipda ti naaramidmi sakbay daytoy a tiempo agingga ita; ngarud saanmi a ^amaallilaw ida nga umadayo manipud kadagiti sarikedkedda.

2 Ket ad-aduda nga amang ngem ti soldadomi isu a saanmi maitured ti mapan ken rauten ida kadagiti sarikedkedda.

3 Wen, ket nagbalin a kasapulan a pagtrabahuan dagiti soldadomi ti panangmantener kadagidiay paset ti daga a nagun-odmi manen kadagiti sanikuami; ngarud nagbalin a kasapulan nga aguraykami, tapno makaawatkami iti ad-adu a pigsa manipud iti daga ti Zarahemla ken kasta met kadagiti baro a suplay ti probision.

4 Ket napasamak a talaga a nangibaonnak iti maysa nga embahada iti gobernador ti dagami, tapno maipakaammo kenkuana ti maipanggep kadagiti kasasaad dagiti tattaomi. Ket napasamak a talaga nga inur-uraymi nga umawat kadagiti probision ken puersa manipud iti daga ti Zarahemla.

5 Ngem kitaen, bassit laeng ti nagunggonaanmi iti daytoy; gapu ta inaldaw met nga umaw-awat dagiti Lamanita iti dakkel a puersa, ken kasta met ti adu a probision; ket kasta ti kasasaadmi iti daytoy a periodo ti panawen.

6 Ket agdarasudos dagiti Lamanita a mangraut kadakami iti sagpaminsan, inkeddengda babaen ti estratehia a mangpapatay kadakami; nupay kasta saankami a makapan a makigubat kadakuada, gapu kadagiti natatalged a lugarda ken dagiti sarikedkedda.

7 Ket napasamak a talaga a nagur-uraykami kadagitoy naririgat a kasasaad iti las-ud ti adu a bulan, uray agingga a dandanin mataykamil gapu iti kinakurang ti taraon.

8 Ngem napasamak a talaga nga immawatkami iti taraon, a nabanbantayan a naidanon kadakami babaen ti dua ribu a soldado tapno mangtulong kadakami; ket daytoy amin ti tulong nga inawatmi, tapno madepensaanmi ti bagbagimi ken ti pagilianmi manipud iti pannakatnag kadagiti ima dagiti kabusormi, wen, tapno makilaban iti kabusor a saan a mabilang ti kinaaduna.

9 Ket ita ti gapu kadagitoy a pannakaibabainmi, wenno ti gapu no apay a saanda nangibaon iti ad-adu pay a puersa kadakami, saanmi nga ammo; ngarud naladingitkami ken napnokami met iti buteng, ta amangan a no iti aniaman a pamay-an dumteng dagiti panangukom ti Dios iti dagami, iti pannakarba ken namimpinsan a pannakadadaelmi.

10 Ngarud inbukbokmi dagiti rikriknaenmi iti panagkararag iti Dios, ta papigsaennakami ken isalakannakami manipud kadagiti ima dagiti kabusormi, wen, ken ikkannakami pay iti puersa tapno mapagtalinaedmi dagiti siudadmi, ken dagiti dagami, ken dagiti sanikuami, para iti pangsuporta kadagiti tattaomi.

11 Wen, ket napasamak a sinarungkarannakami ti Apo a Diosmi nga addaan kadagiti pammatalged nga isalakannakami; wen, isu a talaga a nagsao isuna iti kappia kadagiti kararuami, ken impaayna kadakami ti nabileg a pammati, ken talaga a nakaigapuan a kasapulan a namnamaenmi iti pannakaisalakanmi babaen kenkuana.

12 Ket nagturedkami iti bassit a puersa nga inawatmi, ken natibker ti determinasionmi a mangparmek kadagiti kabusormi, ken ^amangpatalinaed kadagiti dagami, ken dagiti sanikuami, ken dagiti assawami, ken annakmi, ken ti panggep ti ^blibertadmi.

13 Ket isu nga inaramidmi ti amin a kabaelanmi a labanan kadagiti Lamanita, nga adda iti siudad ti Manti; ket impatakdermi dagiti toldami iti igid ti let-ang, nga asideg iti siudad.

14 Ket napasamak nga iti kabigatanna, nga idi nakita dagiti Lamanita nga addakami kadagiti beddeng iti asideg ti let-ang nga asideg iti siudad, imbaonda dagiti espiada iti aglawlawmi tapno matakuatanda ti bilang ken puersa ti soldadomi.

15 Ket napasamak nga idi nakitada a saankami a napigsa, sigun iti bilangmi, ken iti butengda ta amangan nga isinami ida manipud iti suportada malaksid no rummuarda a makigubat laban kadakami ken patayendakami, ken impagarupda pay a nalaka laeng a dadaelendakami babaen iti kinaadu ti soldadoda, ngarud rinugianda nga agaramid kadagiti panagsagana tapno makigubat laban kadakami.

16 Ket idi nakitami nga agar-aramidda kadagiti panagsagana tapno mangraut kadakami, kitaen, binilinko ni Gid, agraman ti bassit a bilang dagiti soldado, a masapul nga aglemmeng isuna iti let-ang, ken masapul nga aglemmeng met ni Teomner ken ti bassit a bilang dagiti soldado iti let-ang.

17 Ita adda ni Gid ken dagiti taona iti kannawan ken dagiti dadduma iti kannigid; ket idi nailemmengda ti bagbagida, kitaen, nagbatiak, a kaduak ti nabati iti soldadoko, iti dayta met laeng a lugar a nakaipatakderanmi nga immuna kadagiti toldami idi panagsaganami iti tiempo nga umay makigubat dagiti Lamanita.

18 Ket napasamak a talaga a rimmaut dagiti Lamanita agraman ti nakaad-adu nga soldadoda laban kadakami. Ket idi immayda ken dandanin a rautendakamin babaen kadagiti espadada, imbilinko dagiti soldadok, dagidiay a kaduak, nga umatras iti let-ang.

19 Ket napasamak a sipapardas unay a kinamatdakami dagiti Lamanita, gapu ta kasta unay ti panagtarigagayda a makamatankami tapno mapapataydakami; ngarud kinamatdakami iti let-ang; ket limmabaskami iti tengnga da Gid ken Teomner, isu a saanda a natakuatan dagiti Lamanita.

20 Ket napasamak nga idi limmabas dagiti Lamanita, wenno idi limmabas ti soldado, rimmuar da Gid ken Teomner manipud kadagiti nalimed a lugarda, ket sinabatda dagiti espia dagiti Lamanita tapno saanda a makasubli iti siudad.

21 Ket napasamak nga idi nasabatda ida, nagtarayda iti siudad ket rinautda kadagiti guardia a nabati a mangbantay iti siudad, isu a talaga a pinapatayda ida ken tinagikuada ti siudad.

22 Ita naaramid daytoy gapu ta talaga a pinalubosan dagiti Lamanita ti intero nga soldadoda, malaksid iti sumagmamano laeng a guardia, tapno maiturongda iti let-ang.

23 Ket napasamak a nagun-od da Gid ken Teomner babaen iti daytoy a wagas ti panangtagikua dagiti sarikedkedda. Ket napasamak a nagturongkami iti daga ti Zarahemla, kalpasan ti napaut a panagdaliasatmi iti let-ang.

24 Ket idi nakita dagiti Lamanita nga agmarmartsada nga agturong iti daga ti Zarahemla, kasta unay ti butengda, amangan no adda plano a nairanta a mangiturong kadakuada iti pannakadadael; ngarud rinugianda ti nagsanud manen iti let-ang, wen, uray pay a nagsublida iti isu met laeng a dalan a naggapuanda.

25 Ket kitaen, rabii idi ket impatakderda dagiti toldada, gapu ta impagarup dagiti hepe a kapitan dagiti Lamanita a nabannog dagiti Nephita gapu iti panagmartsada; ket impagarupda a napagsanudda ti intero nga soldadoda ngarud saanda a pinanunot ti maipanggep iti siudad ti Manti.

26 Ita napasamak nga idi rabiin, imbilinko a saan a maturog dagiti soldadok, ngem ketdi masapul nga agmartsada babaen iti sabali a dalan nga agturong iti daga ti Manti.

27 Ket gapu iti daytoy a panagmartsami iti rabii, kitaen, addakami iti labes dagiti Lamanita iti kabigatanna, isu a talaga a nakadanonkami sakbay kadakuada iti siudad ti Manti.

28 Ket ngarud napasamak a, ta babaen iti daytoy nga estratehia ket talaga a natagikuami ti siudad ti Manti nga awan iti pamapatay.

29 Ket napasamak nga idi simmangpet dagiti soldado dagiti Lamanita iti asideg ti siudad, ket nakitada a nakasaganakami a makilaban kadakuada, kasta unay ti siddaawda ken napalalo a butengda, isu a talaga a naglibasda iti let-ang.

30 Wen, ket napasamak a naglibas dagiti soldado dagiti Lamanita manipud iti amin a paset daytoy a disso ti daga. Ngem kitaen, inkuyogda ti adu kadagiti babbai ken ubbing manipud iti daga.

31 Ket kukuamin amin ^adagidiay siudad a naala dagiti Lamanita, iti daytoy a panawen; ket agsubsubli dagiti ammami ken dagiti babbai ken annakmi kadagiti pagtaenganda, isuda amin malaksid kadagidiay naala a balud ken inkuyog dagiti Lamanita.

32 Ngem kitaen, bassit dagiti soldadomi a mangmantener iti kasta unay a bilang dagiti siudad ken adu unay a sanikua.

33 Ngem kitaen, agtalekkami iti Diosmi a nangted kadakami iti balligi kadagidiay a daga, isu a nagun-odmi dagidiay siudad ken dagidiay daga, a kukuami idi.

34 Ita saanmi ammo ti rason no apay a saan nga ited ti gobierno ti ad-adu a puersa kadakami; saan met ammo uray dagidiay soldado a nakikadua kadakami ti rason no apay a saankami nakaawat iti napipigsa a puersa.

35 Kitaen, saanmi ammo ngem ketdi no ania ta saankayo agballigi, ket naalukoymo dagiti grupo ti soldado a mapan iti dayta a paset ti daga; no kasta, saanmi tarigagayan ti agtanabutob.

36 Ket no saan a kasta, kitaen, suspetsami nga addaan iti sumagmamano a ^apaksyon iti gobierno, ta saanda mangibaon iti ad-adu pay a soldado a tumulong kadakami; gapu ta ammomi nga ad-aduda ngem iti impatulodda.

37 Ngem, kitaen, awan ti aniamanna daytoy—agtalekkami nga ^aisalakannakami ti Dios, iti laksid ti kinakapuy dagiti soldadomi, wen, ken isalakannakami manipud kadagiti ima dagiti kabusormi.

38 Kitaen, daytoy ti maikaduapulo ket siam a tawen, iti ud-dina, ket dakami ti akinkukua dagiti dagami; ket naglibas dagiti Lamanita iti daga ni Nephi.

39 Ket dagidiay lallaki nga annak dagiti tattao ni Ammon, a dagiti paborable nga insaok, isuda dagiti kaduak iti daga ti Manti; ket sinuportaran ida ti Apo, wen, ken linapdanna ida a mapapatay babaen ti espada, isu nga awan uray ^amaysa a persona ti napapatay.

40 Ngem kitaen nagsagabada iti adu a sugat; nupay kasta nagtalinaedda a natibker iti dayta a ^alibertad a babaen iti dayta pinawaya ida ti Dios; ket naingetda a laglagipen ti Apo a Diosda iti inaldaw; wen, talaga nga agtultuloy a nagtulnogda kadagiti alagadenna, ken dagiti panangukomna, ken dagiti bilinna; ket nabileg ti pammatida kadagiti padto maipanggep iti umay.

41 Ket ita, ay-ayatek a lalaki a kabsatko, ni Moroni, sapay koma ta ti Apo a Diostayo, a nangsubbot kadatayo ken nangwayawaya kadatayo, agtultuloy a pagtalinaedennaka iti imatangna; wen, ket paboranna koma dagitoy a tattao, uray pay tapno agballigika a manggun-od ti pannakatagikua amin nga innala kadatayo dagiti Lamanita, a para iti suportatayo. Ket ita, kitaen, gibusak ti suratko. Siak ni Helaman, ti lalaki nga anak ni Alma.