1 Ita napasamak a kalpasan ti panaggibus ti biag ni Korihor, agsipud ta nakaawat ni Alma iti damdamag a balballikugen dagiti Zoramita dagiti wagas ti Apo, ken dayta a Zoram, a dadauloda, isungsungsongna ti puspuso dagiti tattao nga ^aagkurno kadagiti umel a ^bdidiosen, nangrugi manen a ^cnasaktan ti pusona gapu iti kinadangkes dagiti tattao.

2 Agsipud ta daytoy ti nakaigapuan ti nakaro a ^aladingit ni Alma a nakaammo iti kinadangkes dagiti taona; ngarud naglablabes ti panagladingit ti pusona gapu iti pannakaisina dagiti Zoramita kadagiti Nephita.

3 Ita naguummong a sangsangkamaysa dagiti Zoramita iti daga a ninagananda iti Antionum, nga adda iti dayaen ti daga a Zarahemla, a naiban-uyat iti asideg ti nagbedngan iti igid ti baybay, nga adda iti abagatan ti daga a Jershon, a nagbedngan met iti langalang iti abagatan, langalang a napno kadagiti Lamanita.

4 Ita nalaus ti buteng dagiti Nephita amangan ta no makikinnaawatan dagiti Zoramita kadagiti Lamanita, ket kaipapanan dayta ti dakkel a pukaw iti biang dagiti Nephita.

5 Ket ita, gapu ta ti ^apanangikasaba iti ^bbalikas addaan iti dakkel a pagannayasan nga ^citurong dagiti tattao nga agaramid iti nainkalintegan—wen, naaddaan daytoy ti nabilbileg a bungana kadagiti panunot dagiti tattao ngem iti espada, wenno aniaman a banag, a napasamak kadakuada—ngarud napanunot ni Alma a rumbeng laeng a nasken a padasenda ti saguday ti balikas ti Dios.

6 Ngarud innalana ni Ammon, ken ni Aaron, ken ni Omner; ngem imbatina ni Himni iti simbaan iti Zarahemla; ngem innalana dagiti immuna a tallo, ken kasta met ni Amulek ken ni Zeezrom, nga adda idi iti Melek; ken innalana met ti dua a lallaki nga annakna.

7 Ita saanna intugot ti inauna kadagiti lallaki nga annakna, ken ti naganna ket ^aHelaman; ngem Shiblon ken Corianton ti nagan dagiti innalana; ket dagitoy ti nagan dagiti kimmuyog kenkuana a napan kadagiti ^bZoramita, a mangikasaba kadakuada iti balikas.

8 Ita ^asumupsuppiat dagiti Zoramita kadagiti Nephita; ngarud inawatda idin ti balikas ti Dios a naikasaba kadakuada.

9 Ngem ^anatnagda kadagiti dakkel a biddut, agsipud ta saanda inkaskaso a tinungpal dagiti bilin ti Dios, ken dagiti annurotenna, a mayannurot iti paglintegan ni Moises.

10 Kasta met a saanda inkaskaso dagiti aramid iti simbaan, a mangituloy iti inaldaw a panagkararag ken yaararaw iti Dios, tapno saanda a maitebbang iti sulisog.

11 Wen, iti pakagupgopan, binallikugda dagiti wagas ti Apo iti namin-adu a daras; ngarud, gapu iti daytoy, napan da Alma ken dagiti kabsatna iti daga tapno ikasabada kadakuada ti balikas.

12 Ita, idi nakagtengda iti daga, kitaen, iti siddaawda nakitada a nagbangon dagiti Zoramita kadagiti sinagoga, ket inummongda a sangsangkamaysa ti bagbagida iti maysa nga aldaw iti makalawas, nga inawaganda dayta nga aldaw iti aldaw ti Apo; ket nagdaydayawda iti wagas a saan pay nakita da Alma ken dagiti kabsatna;

13 Ta adda lugar a nabangon iti tengnga ti sinagogada, lugar a pagtakderan, a nangatngato ngem iti ulo; nga aglaon ti rabawna iti maysa laeng a tao.

14 Ngarud, nasken a mapan ti asino man ti agtarigagay nga ^aagdaydayaw ket agtakder iti rabawna, ket itag-ayna dagiti imana a maiturong iti langit, ket immawag iti napigsa a timek, a kunana:

15 Nasantuan, nasantuan a Dios; patienmi a sika ti Dios, ken patienmi a nasantuanka, ken espirituka idi, ken espirituka ita, ken espiritukanto iti agnanayon.

16 Nasantuan a Dios, patienmi nga insinanakam manipud kadagiti kakabsatmi; ken saanmi a patien ti kaugalian dagiti kakabsatmi, nga impatawid kadakuada babaen iti inuubing nga aramid dagiti ammada; ngem patienmi a dakami ti ^apinilim nga agbalin a ^bnasantuan nga annakmo; ken kasta met nga impakaammom kadakami nga awanto ti Cristo.

17 Ngem sika met laeng ti idi, ita, ken ti agnanayon; ket dakami ti ^apinilim tapno maisalakankami, idinto a napili ti amin nga adda iti aglawlawmi a maipurwak iti impierno babaen iti ungetmo; ta iti dayta a kinasanto, O Dios, agyamankami kenka; ken kasta met nga agyamankami iti panangpilim kadakami, tapno saankami a maallilaw kadagiti minamaag a kaugalian dagiti kabsatmi, a namagtitipkel kadakuada a mamati ken ni Cristo, a nangiturong iti puspusoda nga agallaalla a kumayakay kenka, Diosmi.

18 Ket agyamankami manen kenka, O Dios, ta dakami ti napili ken nasantuan a tattao. Amen.

19 Ita napasamak a kalpasan ti pannakangngeg da Alma ken dagiti kabsatna ken dagiti lallaki nga annakna dagitoy a kararag, saan a marukod ti siddaawda.

20 Ta kitaen, napan ti tunggal tao ket nangidaton iti isu met laeng a kararag.

21 Ita inawaganda ti lugar iti Rameumptom, a kas maipatpatarus, ti nasantuan a pagtakderan.

22 Ita, manipud ditoy a pagtakderan indaton ti tunggal tao, ti isu met laeng a kararag iti Dios, nga agyamyamanda iti Diosda a napilina ida, ken ta saanna nga insungsong ida iti kaugalian dagiti kabsatda, ken ta saan a naguyugoy ti puspusoda a patien dagiti banag a dumteng, nga awan ti ammoda maipapan iti daytoy.

23 Ita, kalpasan a nakaidatonen ti amin a tao iti kastoy a wagas, nagsublida iti balbalayda, a pulos a ^asaanda pagsasaritaan manen ti Diosda agingga nga aguummongda manen a sangsangkamaysa iti nasantuan a pagtakderan, tapno mangidaton iti panagyaman babaen ti wagasda.

24 Ita idi nakita ni Alma daytoy ^analdaangan ti pusona; agsipud ta nakitana a dakes ken ballikugda a tattao; wen, nakitana a tarigagayan dagiti pusoda iti balitok, ken iti pirak, ken iti amin a kita ti napintas nga alikamen.

25 Wen, ken nakitana met a ^anaitag-ay ti puspusoda iti nalabes a kinapasindayag, iti kinapalangguadda.

26 Ket indanonna ti timekna iti langit, ket ^aimmawag, a kinunana: O, kasano ti kapautna, O Apo, ti panangipalugodmo nga agtalinaed dagiti katulongam ditoy baba iti lasag, a mangimatang iti kasta a kakaro a kinadakes dagiti annak ti tattao?

27 Kitaen, O Dios, ^aumaw-awagda kenka, ngem agliblibbiang met ti puspusoda iti kinatangsit. Kitaen, O Dios, umaw-awagda kenka iti ngiwngiwatda, idinto a ^bnatangsitda, uray pay iti kinaindaklan, kadagiti ubbaw a bambanag iti lubong.

28 Kitaen, O Diosko, dagiti agkakangina nga aruatenda, ken dagiti singsingda, ken dagiti ^apulserasda, ken dagiti arkosda a balitok, ken amin dagiti agkakangina a bambanag nga arkosda; ken kitaen, tarigagayan ti puspusoda kadagitoy, ket umaw-awagda pay kenka a kunada—Agyamankami, O Dios, agsipud ta napili a tattaokami para kenka, idinto a maungawto dagiti dadduma.

29 Wen, ket kunada nga impakaammom kadakuada nga awanto ti Cristo.

30 O Apo Dios, kasano ti kapaut ti panangipalubosmo iti kasta a kinadakes ken kinamangliliput kadagitoy a tao? O Apo, ikkannak kadi iti pigsa, tapno maibturak dagiti pagkapuyak. Agsipud ta agkapsutak, ket masaktan ti kararuak iti kasta a kinadakes dagitoy a tao.

31 O Apo, kasta unay ti leddaang ti pusok; liwliwaem koma ti kararuak ^aken ni Cristo. O Apo, ipaaymo koma a maaddaanak iti pigsa, tapno mabalinko a sagabaen nga addaan iti kinaanus dagitoy a rigrigat a dumteng kaniak, gapu iti kinadangkes dagitoy a tao.

32 O Apo, liwliwaem koma ti kararuak, ket ikkannak iti balligi, ken kasta met dagiti kaduak nga agtartrabaho—wen, ni Ammon, ken ni Aaron, ken ni Omner, ken kasta met ni Amulek ken ni Zeezrom, ken kasta met dagiti ^adua a lallaki nga annakko—wen, uray liwliwaem koma met amin dagitoy O Apo. Wen, liwliwaem koma dagiti kararuada ken ni Cristo.

33 Ipaaymo koma a maaddaanda iti pigsa, tapno maibturanda dagiti rigatda a dumteng kadakuada gapu iti kinadangkes dagitoy a tao.

34 O Apo, ipaaymo kadi ^akadakami nga agballigikami iti panangiturongmi manen kadakuada ken ni Cristo.

35 Kitaen, O Apo, dagiti ^akararuada ket napateg, ket adu kadakuada ti kabsatmi; ngarud, itdem kadakami, O Apo, ti bileg ken pagsiriban, tapno maidanonmi dagitoy, a kakabsatmi, manen kenka.

36 Ita napasamak nga idi naisao ni Alma dagitoy a balikas, nga ^aintipatna dagiti ^bimana kadagiti amin a kaduana. Ket kitaen, bayat nga intipatna dagiti imana kadakuada, napnoda iti Nasantuan nga Espiritu.

37 Ket kalpasan ti panagsisinada, ^asaanda pinampanunot ti bagbagida no ania ti kanenda, wenno ania ti inumenda, wenno no ania ti ikawesda.

38 Ket inikkan ida ti Apo tapno saanda nga agbisin, wenno mawaw; wen, ket inikkanna met ida iti pigsa, tapno saanda nga agsagaba iti ania man a ^arigrigat; malaksid iti panangalimon kadakuada ti rag-o ken ni Cristo. Ita mayannurot daytoy iti kararag ni Alma; ket gapu daytoy iti panagkararagna a ^bsipapammati.