1 Ket napasamak a dagiti Nephita a saan a ^anapapatay babaen dagiti armas ti gubat, kalpasan ti panangipumponda kadagiti napapatay—ita saan a mabilang ti kaadu dagiti napapatay, gapu iti kaaduda—kalpasan ti panangipumponda kadagiti minatayda nagsublida amin iti dagdagada, ken iti balbalayda, ken iti assawada, ken kadagiti annakda.

2 Ita adu a babbai ken ubbing ti napapatay babaen ti espada, kasta met nga adu kadagiti arbanda ken kadagiti pangenda; kasta met nga adu ti nadadael dagiti kinelleng a bukbukelda, agsipud ta napayatpayatan ida dagiti pangen ti tattao.

3 Ket ita kas iti kaadu dagiti Lamanita ken dagiti Amlicita a napapatay iti teppang ti karayan Sidon ti naipuruak iti ^adandanum ti Sidon; ket kitaen adda dagiti tulangda iti lansad ti ^bbaybay, ket aduda.

4 Ket nailasin dagiti ^aAmlicita manipud kadagiti Nephita, agsipud ta ^bminarkaanda ti bagbagida iti nalabaga iti mugingda a maitutop iti wagas dagiti Lamanita; nupay kasta saanda kiniskisan dagiti uloda a kas kadagiti Lamanita.

5 Ita nakiskisan dagiti ulo dagiti Lamanita; ket ^alamulamoda, malaksid iti lalat a naitapar iti lomoda, kasta met ti kalasagda, a naikaratay kadakuada, ken dagiti baida, ken dagiti panada, ken dagiti batoda, ken dagiti palsiitda, ken dadduma pay.

6 Ket napugot ti kudil dagiti Lamanita, a maitutop iti marka a naikabil kadagiti ammada, a ^alunod kadakuada gapu iti panaglabsing ken iti isusuppiatda a maibusor kadagiti kabsatda, a buklen da Nephi, Jacob, ken Jose, ken Sam, a nalinteg ken nasantuan a lallaki.

7 Ket pinanggep dagiti lallaki a kabsatda a papatayen ida, ngarud nailunodda; ket nangikabil ti Apo a Dios iti ^amarka kadakuada, wen, kada Laman ken Lemuel, kasta met kadagiti lallaki nga annak ni Ismael, ken dagiti babbai nga Ismaelita.

8 Ket napasamak daytoy tapno mailasin dagiti kaputotanda kadagiti kaputotan dagiti lallaki a kabsatda, tapno iti kasta mataginayon ti Apo a Dios dagiti taona, tapno saanda a ^amailaok ken mamati kadagiti biddut a ^bkaugalian a mangipaneknek iti pannakadadaelda.

9 Ket napasamak nga asino man a makilaok iti kaputotanna kadagiti Lamanita mangipaay met iti umarngi a lunod iti kaputotanna.

10 Ngarud, naawagan iti dayta a nagan ti asinoman a nangipalubos iti bagina a maallilaw dagiti Lamanita, ket adda naikabil a marka kaniana.

11 Ket napasamak nga asino man a saan a mamati iti ^akaugalian dagiti Lamanita, ngem mamati kadagidiay a kasuratan a nairuar iti daga ti Jerusalem, kasta met iti kaugalian dagiti ammada, nga umisu, a namati kadagiti bilin ti Dios ken nangtungpal kadagitoy, naawaganda iti Nephita, wenno dagiti tattao ni Nephi, manipud iti dayta a kanito—

12 Ket isuda dagiti nagsurat kadagiti ^apudno a kasuratan kadagiti tattaoda, ken kasta met iti tattao dagiti Lamanita.

13 Ita agsublitayo manen kadagiti Amlicita, agsipud ta adda met ^amarka a naikabil kadakuda; wen, nangikabilda iti marka ti bagbagida, wen, uray ti nalabaga a marka kadagiti mugingda.

14 Kasta ti pannakatungpal ti balikas ti Dios, ta kastoy dagiti balikas nga imbagana ken ni Nephi: Kitaen, inlunodko dagiti Lamanita, ket mangikabilkto iti marka kadakuada tapno maisina ida ken dagiti kaputotanda manipud kenka ken dagiti kaputotam, manipud iti daytoy a kanito ken iti agnanayon, malaksid no agbabawida kadagiti kinadakesda ket ^akumamangda kaniak tapno addanto asik kadakuada.

15 Ket manen: Mangikabilakto iti marka kenkuana a mangilaok iti kaputotanna kadagiti kakabsatmo, tapno mailunoddanto met.

16 Ket manen: Mangikabilakto iti tao a makirinupak kenka ken iti kaputotam.

17 Ket manen, kunak saanto maawagan a kaputotam ti tao a mangumsi kenka; ket bendisionankanto, ken asino man a maawagan a kaputotam, manipud ita ken iti agnanayon; ket dagitoy ti kari ti Apo ken ni Nephi ken iti kaputotanna.

18 Ita saan nga ammo dagiti Amlicita a tungtungpalenda dagiti balikas ti Dios idi rugianda a markaan dagiti mugingda; nupay kasta nagparangda a nabatad a ^apanagsuppiat iti Dios; ngarud masapol a mayetnag ti lunod kadakuada.

19 Ita kayatko a maawatam nga inyegda iti bagbagida ti ^alunod; ken kasta met nga inyeg ti tunggal tao a nailunod ti bukodna a pangngeddeng.

20 Ita napasamak a saan unay nga adu nga aldaw kalpasan ti dangadang a naangay iti daga a Zarahemla, babaen kadagiti Lamanita ken dagiti Amlicita, addaan sabali pay a buyot dagiti Lamanita a nangserrek kadagiti tattao ni Nephi, iti ^aisu met laeng a lugar a nangsabatan ti immuna a buyot kadagiti Amlicita.

21 Ket napasamak nga adda buyot a naibaon a mangabog kadakuada iti dagada.

22 Ita gapu ta addaan iti ^asugat ni Alma saan a napan mismo tapno makidangadang iti daytoy a kanito maibusor kadagiti Lamanita;

23 Ngem nangibaon iti adu a buyot a makirupak kadakuada; ket napanda ket adu ti pinatayda a Lamanita, ket inabogda dagiti nabati kadagiti beddeng ti dagada.

24 Ket kalpasanna nagsublida manen ket rinugianda a nangibangon ti kappia iti daga, saandan a nariribukan kadagiti kabusorda iti sumagmamano a kanito.

25 Ita napasamak amin dagitoy a banag, wen, nalpas ken naggibus amin dagitoy a gubat ken panagsususik iti maikalima a tawen ti panagturay dagiti ukom.

26 Ket iti maysa a tawen rinibu ken pinullo a ribu a kararua ti naibaon iti agnanayon a lubong, tapno apitenda ti ^agunggonada a maynnurot kadagiti aramidda, nasayaatda man wenno dakesda, tapno apitenda ti agnanayon a ragsak wenno agnanayon a pagladingitan, a mayannurot iti espiritu a kinayatda a tungpalen, nasayaat man nga espiritu wenno dakes.

27 Agsipud ta umawat ti tunggal tao kadagiti ^atangdan iti tao a kinayatna a ^btungpalen, ket mayannurot daytoy kadagiti balikas ti espiritu ti pammadto; ngarud maaramid koma a mayannurot iti kinapudno. Ket kasta ti panaggibus ti maikalima a tawen ti panagturay dagiti ukom.