1 Ket ita napasamak iti rugi ti maikaduapulo ket lima a tawen a panagturay dagiti ukom kadagiti tattao ni Nephi, nakaipasdekda iti kappia iti nagbaetan dagiti tattao ni Lehi ken dagiti tattao ni Morianton maipanggep iti dagdagada, ken narugian ti maikaduapulo ket lima a tawen nga addaan kappia;

2 Nupay kasta, saanda napagpaut a mataginayon ti intero a kappia iti daga, gapu ta nangrugi ti panagsususik dagiti tattao maipapan iti pangulo nga ukom a ni Pahoran; ta kitaen, adda parte dagiti tattao a nagtarigagay a baliwan ti sumagmamano a partikular a punto ti linteg.

3 Ngem kitaen, saan a baliwan ni Pahoran wenno ipalubos a mabaliwan ti linteg; ngarud, saanna nga inimdengan dagidiay nangipeksa iti timekda kadagiti kiddawda maipapan iti pannakabalbaliw ti linteg.

4 Ngarud, nakapungtot kenkuana dagidiay agtarigagay a masapul a mabaliwan ti linteg, ket tinarigagayanda a masapul a saanen nga isu ti pangulo nga ukom iti daga; ngarud timmaud ti maysa a nabara a panagsusupiat maipapan iti daytoy a banag, ngem saan a nagresulta iti pammapatay.

5 Ket napasamak a naawagan iti tattao-ti-ari dagidiay nagtarigagay a maikkat ni Pahoran iti trono iti pangukoman, gapu ta tarigagayanda unay a masapul a mabaliwan ti linteg iti wagas tapno mapadisi ti nawaya a gobierno ken mangipatugaw iti maysa nga ari iti daga.

6 Ket inawat dagidiay nagtarigagay a masapul nga agtalinaed ni Pahoran a pangulo nga ukom ti nagan a dagiti nawaya a tao; ket kasta ti pannakabingayda, gapu ta nagsapata wenno nakitulag dagiti nawaya a tao a mataginayon ti kalinteganda ken ti pagrebbengan ti relihionda babaen ti nawaya a gobierno.

7 Ket napasamak a narisut babaen ti timek dagiti tattao daytoy a banag a panagsususikda. Ket napasamak a kimmanunong ti timek dagiti tattao kadagiti nawaya a tao, ket napagtalinaed ni Pahoran ti pangukoman, a nakaigapuan ti panagragsak unay dagiti kakabsat ni Pahoran ken kasta met ti adu a tattao para iti kinawaya, a namagulimek met kadagiti tattao-ti-ari, ta saanda naitured a bumusor ngem obligadoda a mangtaginayon iti panggep ti wayawaya.

8 Ita dagidiay kimmanunong para kadagiti ari isu dagidiay ^anatan-ok a pannakayanak, ket gun-odenda ti agbalin nga ari; ket suportado ida babaen dagidiay manggun-od iti bileg ken turay kadagiti tattao.

9 Ngem kitaen, maysa a kritikal a panawen para iti panagsususik kadagiti tattao ni Nephi; gapu ta kitaen, sinugsogan manen ni Amalickiah ti puspuso ti tattao dagiti Lamanita a bumusor kadagiti tattao dagiti Nephita, ket ummongenna dagiti solsoldado manipud iti amin a paset ti dagana, ket inarmasanna ida, ket agsagsagana a makigubat iti amin a kinaregta; gapu ta ^anagsapatan nga inumen ti dara ni Moroni.

10 Ngem kitaen, makitatayonto a naidaras-daras ti inaramidna a kari; nupay kasta, insaganana ti bagina ken dagiti soldadona a makigubat kadagiti Nephita.

11 Ita saan unay a kas idin ti kaadu dagiti buyotna, gapu iti rinibu a napapatay kadagiti ima dagiti Nephita; ngem iti laksid ti nakaad-adu a pukawda, nakaurnong ni Amalickiah iti nakaskasdaaw ti kinaadu ti soldado, isu a saan a nagamak a bimmaba iti daga a Zarahemla.

12 Wen, simmurot ni Amalickiah a bimmaba, a nangidaulo kadagiti Lamanita. Ket maikaduapulo ket lima idi a tawen ti panagturay dagiti ukom; ket iti dayta met la a panawen ti panangrugida a nangurnos kadagiti panagsususikda maipanggep iti pangulo nga ukom, a ni Pahoran.

13 Ket napasamak nga idi nadamag dagiti tattao a nainaganan iti tattao-para iti-ari a bumabbaba dagiti Lamanita tapno makigubat kadakuada, naragsakan ti puspusoda; ket nagkedkedda nga agarmas, gapu ta kasta unay ti pungtotda iti pangulo nga ukom, ken kasta met kadagiti ^atattao para iti wayawaya, isu a saanda nagiggem ti armas tapno salakniban ti pagilianda.

14 Ket napasamak nga idi nakita ni Moroni daytoy, ken kasta met a nakitana ti idadateng dagiti Lamanita iti nagbeddengan ti daga, nalaus ti pungtotna gapu iti kinasukir dagidiay tattao a nagrigrigatanna a tinaginayon nga addaan iti kasta unay a regta; wen, napalalo ti ungetna; napno ti kararuana iti pungtot kadakuada.

15 Ket napasamak a nangipatulod iti panagdawat, babaen ti timek dagiti tattao, iti gobernador ti daga, a tartarigagayanna a nasken a basaenna, ket itedna kenkuana (Moroni) ti bileg a mangpilit kadagiti sumupsuppiat a mangsalaknib iti pagilianda wenno mapapatayda.

16 Gapu ta pakaseknanna nga umuna ti pannakaisardeng ti kasta a panagsususik ken panagririri dagiti tattao; ta kitaen, pakaigapuan daytoy iti amin a pannakadadaelda manipud idi agingga ita. Ket napasamak a naipaay daytoy a sigun iti timek dagiti tattao.

17 Ket napasamak a binilin ni Moroni a nasken a mapan makiranget ti soldadona kadagiti tattao-ti-ari, tapno guyodenda nga ipababa ti kinapalangguadda ken ti kinangato ti kasasaadda ket ipatasda ida iti daga, wenno masapul nga agarmasda ken suportaran ti panggep ti kinawaya.

18 Ket napasamak a dimmarup dagiti buyot a nakiranget kadakuada; ket pagpatinggaenda ti kinapalangguadda ken ti kinangato ti kasasaadda, isu nga idi inlayatda dagiti igamda a makirupak kadagiti tattao ni Moroni napasagda ket naidasagda iti daga.

19 Ket napasamak nga adda uppat a ribu kadagiti ^asimmuppiat ti napasag babaen iti espada; ket natiliw ken naibalud dagiti dadaulo a saan a napapatay iti dangadang, agsipud ta awan ti panawen para iti pannakabistada iti daytoy a gundaway.

20 Ket dagiti nabati kadagiti sumupsuppiat, imbes a napasagda iti daga babaen ti espada, simmukoda iti pagalagadan ti wayawaya, ket napilitanda a mangibayog iti ^awagayway ti wayawaya kadagiti torreda, ken kadagiti siudadda, ken agarmas a pangsalaknibda iti pagilianda.

21 Ket iti kasta pinagpatinggana ni Moroni dagidiay tao-ti-ari, isu nga awanen ti naammuan nga agnagan a dagiti tattao-ti-ari; ket iti kasta pinagpatinggana ti kinasukir ken kinapalangguad dagidiay tao a nangibagbaga a dara ti kinatan-ok; ngem naipababada a mangipakumbaba ti bagbagida a kas kadagiti kabsatda, ken makiranget a situtured para iti pannakawayawayada manipud iti pannakaadipen.

22 Kitaen, napasamak a bayat ti panangparmek ni ^aMoroni kadagiti gubat ken panagsususik kadagiti taona, ken panangipaturayna iti kappia ken sibilisasion kadakuada, ken panagaramidna kadagiti annuroten para iti panagsagana iti gubat a maibusor kadagiti Lamanita, kitaen, dimteng dagiti Lamanita iti daga ti Moroni, nga adda kadagiti beddeng iti igid ti baybay.

23 Ket napasamak a saan pay a naan-anay ti pigsa dagiti Nephita iti siudad ti Moroni; ngarud napagsanud ida ni Amalickiah, a nangpapatay iti adu. Ket napasamak a tinagikua ni Amalickiah ti siudad, wen, panangtagikua iti amin a trinserada.

24 Ket dimmanon dagiti naglibas iti siudad ti Moroni iti siudad ti Nephihah; ken kasta met nga inummong ti tattao iti siudad ti Lehi ti bagbagida a sangsangkamaysa, ket nagsaganada ket sisasaganada a makidangadang kadagiti Lamanita.

25 Ngem napasamak a saan a pinalubosan ni Amalickiah dagiti Lamanita a mapan makidangadang iti siudad ti Nephihah, ngem pinagtalinaedna ida iti igid ti baybay, a nangibati kadagiti lalaki iti tunggal siudad tapno mangasikaso ken mangsalaknib kadaytoy.

26 Ket kasta ti panangituloyna, a mangtagikua iti adu a siudad, ti siudad ti Nephihah, ken ti siudad ti Lehi, ken ti siudad ti Morianton, ken ti siudad ti Omner, ken ti siudad ti Gid, ken ti siudad ti Mulek, adda amin dagitoy kadagiti beddeng ti daya nga asideg iti igid ti baybay.

27 Ket kasta ti pannakagun-od dagiti Lamanita, babaen ti sikap ni Amalickiah, iti adu a siudad, babaen iti saan a mabilang a buyotna, nga amin dagitoy natrinseraan iti wagas a ^apanangtrinsera ni Moroni; nga amin dagitoy nagbalin a sarikedked dagiti Lamanita.

28 Ket napasamak a nagmartsada a nagturong iti beddeng ti daga a Bountiful, a pinapanawda dagiti Nephita ken adu ti pinapatayda.

29 Ngem napasamak a sinabat ida ni Teancum, a ^anangpapatay ken ni Morianton ken nangkamat kadagiti taona iti ililibasda.

30 Ket napasamak a kinamatna met ni Amalickiah, bayat ti pannagmartsada kadagiti adu a buyotna tapno mabalin a matagikuana ti daga a Bountiful, ken kasta met ti daga iti amianan.

31 Ngem kitaen nakasabat iti pannakapaay babaen ti pananglapped ni Teancum ken dagiti taona, agsipud ta nabilegda a mannakigubat; ta rinimbawan ti tunggal tao ni Teancum dagiti Lamanita iti pigsada ken iti kabaelanda iti gubat, isu a nagundawayanda dagiti Lamanita.

32 Ket napasamak a riniribukda ida, uray la a pinapatayda ida agingga iti sumipnget. Ket napasamak a binangon ni Teancum ken dagiti taona dagiti toldada iti beddeng ti daga a Bountiful; ken binangon ni Amalickiah dagiti toldana iti beddeng ti takdang iti igid ti baybay, ket kastoy a wagas ti pannakapapanawda.

33 Ket napasamak nga idi rumabiin, nagar-arudok ni Teancum ken ti katulonganna a rimmuar iti sipnget, ket napanda iti kampo ni Amalickiah; ket kitaen, rinimbawan ida ti pannakaturog gapu iti napalalo a bannogda, a maigapu ti panagbannogda ken ti pudot iti aldaw.

34 Ket napasamak a sililimed a nagarudok ni Teancum iti tolda ti ari, ket dinuyokna iti pika ti pusona; ket napatayna a dagus ti ari a saanna nariing dagiti katulonganna.

35 Ket nagsubli manen a sililimed iti kampona, ket kitaen, matmaturog dagiti taona, ket riniingna ida ken imbagana amin a banag nga inaramidna.

36 Ket imbilinna a nasken nga agsagana dagiti buyotna, ta amangan la ketdi a makariing dagiti Lamanita ket dumarupda kadakuada.

37 Ket kasta ti panaggibus ti maikaduapulo ket lima a panagturay dagiti ukom kadagiti tattao ni Nephi; ket kasta ti panaggibus dagiti aldaw ni Amalickiah.