1 Manje kwenteka kutsi ngemnyaka wemashumi nesitfupha kusukela ekufikeni kwaKhristu, Lakhonewusi, umbusi welive, watfola incwadzi levela kumholi kanye nembusi walelicembu letigebengu; lawa ngemavi labebhaliwe, atsi:

2 Lakhonewusi, lohlonipheke kakhulu nalongumbusi lomkhulu walelive, buka, ngikubhalela lencwadzi, ngikunika ludvumo lolukhulu kakhulu ngenca yekucina kwakho, kanjalo nekucina kwebantfu bakho, ekugcineni loko lenicabanga kutsi kulilungelo kanye nenkhululeko yenu; yebo, nime kahle, shangatsi nisekelwe sandla sankulunkulu, ekuvikeleni inkhululeko yenu, nemphahla yenu kanye nelive lenu, noma loko lenikubita ngekwenu.

3 Futsi kubonakala kungidzabukisa, Lakhonewusi lohlonipheke kakhulu, kutsi ungaba silima kangaka futsi utichayise ngekucabanga kutsi ungamelana nemadvodza lanesibindzi nalamanyenti kangaka lalawulwa ngimi, lokungumanje eme ngemumo etikhalini tawo, alindzele ngekulangatelela livi lelitsi—Hambani nehlele kumaNefi niwabulale.

4 Mine, ngekwati umoya wabo wekungehluleki, sengike ngabavivinya emphini, ngati ngenzondo yabo lengapheli ngani ngenca yalokungalungi lokunyenti lenikwente kubo, ngako-ke uma bangehlela entansi batawukulwa nani bayawunivakashela ngembubhiso niphele nya.

5 Ngako-ke ngibhale lencwadzi, ngayivala ngesandla sami lucobo, ngoba ngikhatsatekile ngenhlalakahle yenu, ngenca yekucina kwenu kuloko lenikholelwa kutsi kulungile, kanye nebuchawe benu emphini.

6 Ngako-ke ngiyakubhalela, ngoba ngifisa kutsi ninikele loku kubantfu bami, emadolobha enu, tindzawo tenu, kanye naloko lokungekwenu, kunekutsi nivakashelwe ngenkemba nekutsi kubhujiswa kute etikwenu.

7 Noma-ke ngalamanye emagama, tinikeleni kitsi, bese nitihlanganisa natsi niphindze nati ngemisebenti yetfu lefihlekile, nibe bomnaketfu kute nani nifane natsi—hhayi tigcili tetfu, kodvwa bomnaketfu nalesibambisene nabo kuko konkhe lesinako.

8 Buka, ngiyafunga kuwe, uma ningakwenta loku, ngesifungo, angeke nibulawe; kodvwa uma ningakwenti loku, ngiyafunga kuwe ngesifungo, kutsi ngenyanga letako ngitawuyaleta emabutfo ami kutsi ehle atawukulwa nani, angeke asibambe sandla sawo futsi angeke aphephise lutfo, kodvwa ayawunibulala, ehlisele inkemba etikwenu nite niphele nya.

9 Buka, nginguGidiyani; ngingumbusi walelicembu leliyimfihlo laGadiyantoni; licembu nemisebenti yalo lengatiko kutsi mihle; futsi kwasendvulo kuphindze kwendluliselwe kitsi.

10 Ngikubhalela lencwadzi, Lakhonewusi, ngiyetsemba kutsi nitawunikela letindzawo tenu naloko lokukwenu, ngaphandle kwekucitsa ingati, kute bantfu bami babuyelwe ngemalungelo abo kanye nekuphatsa kwabo, labahlubuke kini ngenca yebubi benu ekubagodleleni emalungelo abo ekuphatsa, futsi ngaphandle kwekutsi nente loku, ngitawuphindzisela koniwa kwabo. NginguGidiyani.

11 Manje kwenteka kutsi ngesikhatsi Lakhonewusi atfola lencwadzi wamangala kakhulu, ngenca yesibindzi saGidiyani sekufuna kutsatsa live lemaNefi libe ngelabo, nekusongela bantfu kanye nekufuna kuphindzisela koniwa kwalabo labebangatange boniwe, ngaphandle kwekutsi bebatone bona ngekuhlubuka baye kuleto tigebengu letimbi naletinengekile.

12 Manje buka, lo Lakhonewusi, umbusi, bekayindvodza lelungile, futsi bekangesatjiswa ngulokufunwa kanye nangetisongo tesigebengu; ngako-ke akatange ayinake lencwadzi yaGidiyani, umbusi wetigebengu, kodvwa wenta kutsi bantfu bakhe bakhale eNkhosini bacele emandla kulungiselela sikhatsi leto tigebengu lebetitawehla ngaso kutawukulwa nabo.

13 Yebo, watfumela simemetelo kubo bonkhe bantfu, kutsi bagcogcele ndzawonye besifazane babo, bantfwana babo, imihlambi yabo yetimvu kanye nemihlambi yabo yetinkhomo kanye nako konkhe kwabo, ngaphandle kwelive labo, endzaweni yinye.

14 Futsi wenta kutsi kwakhiwe tincaba tibatungelete, nekucina kwato kube kukhulu kakhulu. Waphindze wenta kutsi emabutfo, emaNefi newemaLamani, noma abo bonkhe labo labebabalwa kanye nemaNefi, abekwe njengabogadzi atungelete kutsi abagadze, nekutsi abavikele etigebengwini emini nasebusuku.

15 Yebo, watsi kubo: Njengobe iNkhosi iphila, ngaphandle kwekutsi niphendvuke kubo bonkhe bubi benu, futsi nikhale eNkhosini, anisoze nanini nikhululwe etandleni taleto tigebengu taGadiyantoni.

16 Futsi abemakhulu aphindze amangalisa emavi kanye netiphrofetho taLakhonewusi kangangekutsi tabanga kwesaba kubo bonkhe bantfu; betama ngemandla abo kutsi bente njengekwemavi aLakhonewusi.

17 Futsi kwenteka kutsi Lakhonewusi wabeka tindvuna letinkhulu etikwawo onkhe emabutfo emaNefi, kutsi awahole ngesikhatsi tigebengu tehla tiphuma ehlane kutawukulwa nabo.

18 Manje indvuna lenkhulu kakhulu ngetulu kwato tonkhe tindvuna letinkhulu kanye nemekhuti lomkhulu wemabutfo onkhe emaNefi wabekwa, libito lakhe bekunguGidgidoni.

19 Manje kwakungumhambo emkhatsini wemaNefi kutsi kubekelwe tindvuna tawo letinkhulu, (ngaphandle kwalesikhatsi sabo sebubi) umuntfu lotsite lobekanemoya wekwembulelwa kanye newekuphrofetha; ngako-ke, lo Gidgidoni bekangumphrofethi lomkhulu emkhatsini wabo, aphindze futsi angumehluleli lomkhulu.

20 Manje bantfu batsi kuGidgidoni: Thandaza eNkhosini, bese uyasivumela kutsi sihambe sikhuphukele etintsabeni siye ehlane, kute sihlasele letigebengu sitibulale emaveni ato lucobo.

21 Kodvwa Gidgidoni watsi kubo: INkhosi iyala; ngoba uma singakhuphuka siyawukulwa nato iNkhosi iyawusinikela etandleni tato; ngako-ke sitawutilungiselela ekhatsi nekhatsi nemave etfu, futsi sitawugcogcela ndzawonye onkhe emabutfo etfu, angeke siyawukulwa nato, kodvwa sitawutilindza tize tite titawukulwa natsi; ngako-ke njengobe iNkhosi iphila, uma sikwenta loku itawutinikela etandleni tetfu.

22 Futsi kwenteka kutsi ngemnyaka welishumi nesikhombisa, ngasekupheleni kwalowo mnyaka, simemetelo saLakhonewusi sasesihambe lelive lonkhe, futsi besebatsetse emahhashi abo, netincola tabo, netinkhomo tabo, nemihlambi yabo yonkhe yetimvu kanye nemihlambi yabo yonkhe yetinkhomo, nalokuyinhlavu kwabo, kanye nako konkhe labebanako, bahamba ngetinkhulungwane kanye nangemashumi etinkhulungwane, bate bahamba bonkhe baya kuleyo ndzawo lebeyibekiwe kutsi batawuhlanganela kuyo, kute bativikele etitseni tabo

23 Futsi lelive lelalibekiwe bekulive laseZarahemla, live lelalisemkhatsini welive laseZarahemla kanye nelive iNala, yebo, emnceleni lowawusemkhatsini welive iNala kanye nelive iNcitsakalo.

24 Futsi kwabakhona tinkhulungwane letinyenti kakhulu tebantfu labebabitwa ngekutsi ngemaNefi, labagcogcana ndzawonye kulelive. Manje Lakhonewusi wenta kutsi bagcogcane ndzawonye eveni lelalingaseningizimu, ngenca yesicalekiso lesikhulu lesasisetikwelive lelingasenyakatfo.

25 Futsi baticinisa ngalokumelene netitsa tabo, bahlala eveni linye, balicembu linye, bawesaba emavi labekakhulunywe nguLakhonewusi, kangangekutsi baphendvuka etonweni tabo tonkhe; baphakamisela imithandazo yabo eNkhosini Nkulunkulu wabo, kutsi abakhulule ngaleso sikhatsi titsa tabo titawehla kutawukulwa nabo.

26 Baba nelusizi lolukhulu kakhulu ngenca yetitsa tabo. NaGidgidoni wenta kutsi bente tikhali temphi letitinhlobonhlobo, nekutsi bekumele bacine ngetivikelo, netihlangu, nemahawu, ngendlela labekabalayele ngayo.