1 Manje kwenteka kutsi ngesikhatsi Jesu sekawakhulumile lamavi waphindze wagucukela esicukwini, waphindze wavula umlomo wakhe kuso, watsi: Ngicinisile, ngicinisile, ngitsi kini, Ningehluleli, kute nani ningetukwehlulelwa.

2 Ngoba ngaloko kwehlulela lenehlulela ngako, nani niyakwehlulelwa ngako; futsi nangaleso silinganiso lenilinganisa ngaso, nani niyakulinganiswa ngaso futsi.

3 Futsi ulunakeni lutsi lolusesweni lemnakenu, kodvwa ube ungaluboni lugodvo lolusesweni lakho na?

4 Noma ungasho kanjani kumnakenu kutsi: Ngivumele ngikhiphe lutsi lolusesweni lakho—kodvwa buka lugodvo lolusesweni lakho na?

5 Wena mtentisi, khipha kucala lugodvo lolusesweni lakho; emvakwaloko utawubona kahle kute ukhiphe lutsi lolusesweni lemnakenu.

6 Ningatiniki tinja lokungcwele, noma niphonse ematje enu laligugu etihhontjini, funa tiwagcobagcobe ngaphansi kwetinselo tato, bese tigucukela kini tiyanidzabudzabula.

7 Celani, nitawuphiwa; funani, nitawutfola; nconcotsani, niyawuvulelwa.

8 Ngoba nguloyo naloyo locelako, uyaniketwa; naloyo lofunako, uyatfola; futsi naloyo lonconcotsako uyavulelwa.

9 Ngumuphi kini, lokungatsi uma indvodzana yakhe icela sinkhwa, ayinike litje na?

10 Noma uma icela inhlanti, yena ayinike inyoka na?

11 Uma nine, lenibabi, nikwati kupha bantfwana benu tipho letinhle, angabanika kangakanani tintfo letinhle Babe losezulwini labo labacela kuye na?

12 Ngako-ke, konkhe lenifisa kutsi bantfu bakwente kini, kwenteni nani kubo, ngoba ngulowo umtsetfo kanye nalokushiwo baphrofethi.

13 Ngenani ngelisango lelincane; ngoba libanti lisango, kantsi nendlela ibanti, leholela ekubhujisweni, futsi labanyenti bayawuhamba ngayo;

14 Ngoba lincane lelisango, nendlela ingumntjuntju, leholela ekuphileni, futsi bambalwa labayitfolako.

15 Caphelani baphrofethi bemanga, labeta kini bembetse tingubo tetimvu, kodvwa ngekhatsi batimphisi letibukhali.

16 Niyawubati ngemisebenti yabo. Ngabe bantfu bangawakha yini emagelebisi etihlahleni temanyeva, noma emakhiwa elugaganeni na?

17 Kanjalo sonkhe sihlahla lesihle sitsela titselo letimnandzi; kodvwa sihlahla lesonakele sitsela titselo letimbi.

18 Sihlahla lesihle singeke sitsele titselo letimbi, noma sihlahla lesonakele sitsele titselo letimnandzi.

19 Sonkhe sihlahla lesingatseli titselo letinhle siyajutjwa, silahlwe emlilweni.

20 Ngaloko-ke, niyawubati ngemisebenti yabo.

21 Akusibo bonkhe labayawutsi kimi, Nkhosi, Nkhosi, labayawungena embusweni welizulu; kodvwa ngulabo labenta intsandvo yaBabe losezulwini.

22 Ngalelo langa labanyenti bayawukutsi kimi: Nkhosi, Nkhosi, asikaphrofethi yini ngelibito lakho, futsi ngelibito lakho sakhipha bodeveli, nangelibito lakho senta imisebenti leminyenti lemangalisako na?

23 Emvakwaloko ngiyawubaphendvula ngitsi: Angitange nginati; sukani kimi, nine benti balokubi.

24 Ngako-ke, noma ngubani lova lamavi ami futsi awente, ngitawumfanisa nendvodza lehlakaniphile, leyakha indlu yayo etikwelidvwala—

25 Kwase kuna imvula, kwefika tikhukhula, nemimoya yahhusha, yetama kuphephula lendlu; kodvwa ayiwanga, ngoba yayakhelwe esisekelweni selidvwala.

26 Futsi loyo naloyo lova lamavi ami kodvwa angawenti utawufaniswa nendvodza lesilima, leyakha indlu yayo etikwesihlabatsi—

27 Kwase kuna imvula, kwefika tikhukhula, nemimoya yahhusha, yaphephuka lendlu; yawa, kwaba kukhulu kuwa kwayo.