Sehluko 17
Jesu uyala bantfu kutsi bazindle ngemavi Akhe futsi bathandazele kuwacondza—Uphilisa labagulako babo—Uthandazela bantfu, asebentisa lulwimi lolungeke lubhalwe—Tingilosi tiyabasebentela futsi umlilo utungeleta bantfwana babo. Cishe ngemnyaka weNkhosi wema-34.
1 Buka kwenteka kutsi ngesikhatsi Jesu sekawakhulumile lamavi waphindze wabuka esicukwini, watsi kubo: Bukani, sikhatsi sami sesifikile.
2 Ngiyabona kutsi nibutsakatsaka, nekutsi ngeke niwacondze onkhe lamavi lengiyaletwe nguBabe kutsi ngiwakhulume kini ngalesi sikhatsi.
3 Ngako-ke, hambani niye emakhaya enu, nizindle ngetintfo lengitishito, nicele kuBabe, egameni lami, kute nicondze, nilungise tingcondvo tenu tilungele likusasa, futsi ngitawuphindze ngite kini.
4 Kodvwa manje sengiya kuBabe, futsi etikwaloko ngiyawutibonakalisa etiveni letilahlekile taka-Israyeli, ngoba atikalahleki kuBabe, ngoba yena uyati kutsi watiyisa ngakuphi.
5 Futsi kwenteka kutsi ngesikhatsi Jesu sekakhulumile kanjalo, waphindze waphonsa emehlo akhe esicukwini, buka bese bakhala, babuka kuye ngekugcila shangatsi bebatamcela kutsi ahlale nabo sikhashana lesidze.
6 Watsi kubo: Bukani, inhlitiyo yami igcwele sihawu ngani.
7 Ninabo yini labagulako emkhatsini wenu na? Baletseni la. Ninabo yini labangakhoni kuhamba, labangaboni, noma labachutako, labakhubatekile, labanebulephelo, nalabo labafe luhlangotsi, labangakhulumi, noma labo labesetinhlungwini noma ngayiphi indlela na? Baletseni la kute ngitawubelapha, ngoba nginesihawu ngani; inhlitiyo yami igcwele bubele.
8 Ngoba ngiyabona nifisa kutsi nginitjengise kutsi ngentani kubomnakenu eJerusalema, ngoba ngiyabona kutsi lukholo lwenu lwenele kutsi nginelaphe.
9 Futsi kwenteka kutsi ngesikhatsi sekakhulume kanjalo, sonkhe sicuku, kanyekanye, saya ngaphambili, labagulako babo nalabeva buhlungu, nalabangakhoni kuhamba, nalabangaboni, nalabangakhoni kukhuluma, kanye nabo bonkhe labasetinhlungwini noma ngayiphi indlela; futsi wabelapha bonkhe ngamunye ngesikhatsi baletfwa ngaphambili kuye.
10 Bonkhe, labo labebalashiwe kanye nalabo labebaphila, baguca phansi etinyaweni takhe, bamkhonta; futsi bonkhe labo labebeta esicukwini bamanga tinyawo takhe, kangangekutsi batimantisa tinyawo takhe ngetinyembeti tabo.
11 Futsi kwenteka kutsi wabayaleta kutsi baletse bantfwana babo labancane.
12 Ngako-ke babaletsa bantfwana babo labancane babahlalisa phansi bamtungeleta, Jesu wema emkhatsini; sicuku savula indlela bate bonkhe baletfwa kuye.
13 Futsi kwenteka kutsi ngesikhatsi bonkhe sebaletsiwe, naJesu sekeme emkhatsini, wayaleta sicuku kutsi siguce phansi.
14 Futsi kwenteka kutsi ngesikhatsi sebaguce phansi, Jesu wabubula ngekhatsi kwakhe, watsi: Babe ngikhatsatekile ngenca yebubi bebantfu bendlu yaka-Israyeli.
15 Futsi ngesikhatsi sekashito lamavi, naye lucobo lwakhe waguca phansi; buka wathandaza kuBabe, tintfo latikhuluma angeke tibhalwe, futsi sicuku sakufakazela loko labo labamuva.
16 Futsi bafakaza ngalendlela: Liso alikate likubone loku, noma indlebe ayikate ikuve loku, ngaphambilini, tintfo letinkhulu futsi naletimangalisako kangaka ngesikhatsi sibona futsi siva Jesu atikhuluma kuBabe;
17 Futsi kute lulwimi lolungatikhuluma, kute umuntfu longatibhala, noma kute tinhlitiyo tebantfu letingaticabanga tintfo letinkhulu futsi naletimangalisa kangaka ngesikhatsi sibona siphindze siva Jesu atikhuluma; futsi kute namunye longayicabanga intfokoto leyagcwala imiphefumulo yetfu ngesikhatsi simuva asithandazela kuBabe.
18 Futsi kwenteka kutsi ngesikhatsi Jesu sekacedzile kuthandaza kuBabe, wasukuma; kodvwa beyiyinkhulu kakhulu intfokoto esicukwini kangangekutsi senganywa.
19 Futsi kwenteka kutsi Jesu wakhuluma kubo, wabacela kutsi basukume.
20 Basukuma, watsi kubo: Nibusisiwe ngenca yelukholo lwenu. Manje bukani, intfokoto yami igcwele.
21 Ngesikhatsi sekawashito lamavi, wakhala, sicuku sakufakazela loko, waphindze watsatsa bantfwana babo labancane, ngamunye nangamunye, wababusisa, wabathandazela kuBabe.
22 Ngesikhatsi sekakwentile loku waphindze wakhala;
23 Wakhuluma esicukwini, watsi kuso: Bukani bantfwana benu.
24 Futsi ngesikhatsi bacalata kutsi babone baphonsa emehlo abo ezulwini, babona emazulu avuleka, babona tingilosi tehla tiphuma ezulwini shangatsi betisekhatsi emlilweni; tehlela phansi taphindze tatungeleta labo bantfwana, batungeletwa ngemlilo; tingilosi tabasebentela.
25 Sicuku sabona saphindze seva futsi sakufakazela loku; futsi bayati kutsi bufakazi babo buliciniso ngoba bonkhe ngamunye batibonela baphindze bativela, wonkhe umuntfu ngekwakhe; bebasibalo lesingangetinkhulungwane letimbili kanye nemakhulu lasihlanu ebantfu; kuso bekukhona emadvodza, besifazane kanye nebantfwana.