1 Futsi kwenteka kutsi umnyaka wemashumi layimfica nesihlanu waphela kanjalo nawo, nebantfu bacala kutikhohlwa leto tibonakaliso kanye naleto timangaliso labebativile, bacala kancane kancane kutsi bangabe basamangaliswa sibonakaliso noma simangaliso lebesivela ezulwini, kangangekutsi bacala kutsi babe lukhuni etinhlitiyweni tabo, baphumphutseka etingcondvweni tabo, futsi bacala kungakukholwa konkhe loko labebakuvile nalabebakubonile—

2 Bacabanga etinhlitiyweni tabo tintfo letitsite letilite, kutsi betentiwe bantfu kanye nangemandla adeveli, kute tidukise tiphindze tikhohlise tinhlitiyo tebantfu; ngaleyo ndlela Sathane waphindze watitfola tinhlitiyo tebantfu, kangangekutsi wawaphumphutsekisa emehlo abo futsi wabadukisa kutsi bakholwe kutsi imfundziso yaKhristu beyiyintfo lebulima futsi lelite.

3 Futsi kwenteka kutsi bantfu bacala kutsi bakhule bacine ebubini kanye nasetinengisweni; abatange bakholwe kutsi bekutawuphindze kube khona letinye tibonakaliso noma timangaliso lebetisatawuniketwa; futsi Sathane bekahamba azulazula, adukisa tinhlitiyo tebantfu, abalinga aphindze abenta kutsi bente bubi lobukhulu eveni.

4 Waphela kanjalo-ke umnyaka wemashumi layimfica nesitfupha; kanjalo nemnyaka wemashumi layimfica nesikhombisa; kanjalo nemnyaka wemashumi layimfica nesiphohlongo; kanjalo nemnyaka wemashumi layimfica nemfica;

5 Kanjalo neminyaka lelikhulu bese yendlulile kusukela emalangeni aMosiya, lobekayinkhosi kubantfu bemaNefi.

6 Iminyaka lengemakhulu lasitfupha nemfica bese yendlulile kusukela Lehi ashiya eJerusalema.

7 Futsi iminyaka leyimfica bese yendlulile kusukela esikhatsini lebekuniketwe ngaso lesibonakaliso, lebebakhulume ngaso baphrofethi, sekutsi Khristu bekayawufika emhlabeni.

8 Manje emaNefi acala kubala sikhatsi sawo kusukela ngalesikhatsi lebekuniketwe ngaso lesibonakaliso, noma kusukela ekufikeni kwaKhristu; ngako-ke, iminyaka leyimfica beseyendlulile.

9 Nefi, lobekanguyise waNefi, lobekagcine lemibhalo, akatange asabuyela eveni laseZarahemla, futsi akatange atfolakale ndzawo kulo lonkhe live.

10 Futsi kwenteka kutsi bantfu bachubeka nekuhlala ebubini, nanoma kushumayela kanye nekuphrofetha kwakukunyenti emkhatsini wabo; ngaleyo ndlela wendlula kanjalo-ke nemnyaka welishumi, kanjalo nemnyaka welishumi nakunye wendlula ngaleyo ndlela ebubini.

11 Futsi kwenteka kutsi ngemnyaka welishumi nakutsatfu kwacala kwaba khona timphi kanye netincabano kulo lonkhe live; ngoba tigebengu taGadiyantoni bese titinyenti kakhulu, futsi bese tibulele bantfu labanyenti kakhulu, tabhubhisa nemadolobha lamanyenti kakhulu, tandzisa nekufa lokunyenti kakhulu kanye nekubulawa kwebantfu lokunyenti kulo lonkhe live, kangangekutsi kwadzingeka kutsi bonkhe bantfu, emaNefi kanye nemaLamani, batsatse tikhali bayawukulwa nato.

12 Ngako-ke, onkhe emaLamani labekaphendvukele eNkhosini ahlangana nabomnakabo, emaNefi, aphoceleleka, kuvikela timphilo tabo kanye nebesifazane babo kanye nebantfwana babo, kutsi atsatse tikhali alwe naleto tigebengu taGadiyantoni, yebo, futsi kanjalo nekutsi agcine emalungelo abo, netinzuzo telibandla labo nekukhonta kwabo, nemandla abo ekutimela, kanye nenkhululeko yabo.

13 Futsi kwenteka kutsi ngaphambi kwekutsi lomnyaka welishumi nakutsatfu wendlule emaNefi esatjiswa ngekubhujiswa nya ngenca yalemphi, leyaba yimbi kakhulu.

14 Futsi kwenteka kutsi lawo maLamani labekahlangene nemaNefi abalwa kanye nemaNefi;

15 Sicalekiso sawo sasuswa kuwo, futsi sikhumba sawo sabese siba mhlophe njengesemaNefi;

16 Emajaha abo kanye nemadvodzakati abo aba mahle kakhulu, abalwa kanye nemaNefi, abitwa ngekutsi ngemaNefi. Futsi waphela kanjalo-ke umnyaka welishumi nakutsatfu.

17 Futsi kwenteka ekucaleni kwemnyaka welishumi nakune, imphi emkhatsini wetigebengu kanye nebantfu baNefi yachubeka futsi yaba yimbi kakhulu; noko, bantfu baNefi bake batfola kutehlula letigebengu, kangangekutsi batiphocelela kutsi tibaleke tibuyele emuva batikhipha emaveni abo batiyisa etintsabeni kanye nasetindzaweni tato letifihlakele.

18 Waphela kanjalo-ke umnyaka welishumi nakune. Ngemnyaka welishumi nesihlanu taphuma tatokulwa nebantfu baNefi; futsi ngenca yebubi bebantfu baNefi, kanye netincabano tabo letinyenti kanye nekuphikisana, tigebengu taGadiyantoni takhona kubacinela.

19 Waphela kanjalo-ke umnyaka welishumi nesihlanu, ngaleyo ndlela bantfu bebasesimeni setinhlupheko letinyenti; nenkemba yekubhujiswa beseyilengela etikwabo, kangangekutsi besebatawushaywa ngiyo, futsi loku kungenca yebubi babo.