1 Futsi ngicinisile, ngicinisile ngitsi kini nginaletinye timvu, letingasito talelive, noma telive laseJerusalema, noma nakuletinye tincenye telive letitungelete lapho sengike ngaya khona ngayawufundzisa.

2 Ngoba labo lengikhuluma ngabo ngulabo labasengakaliva livi lami; noma lengingakaze nangasiphi sikhatsi ngitibonakalise kubo.

3 Kodvwa ngitfole umyaleto lovela kuBabe wekutsi ngihambe ngiye kubo, nekutsi bayawuliva livi lami, futsi bayawubalwa kanye netimvu tami, kute kube khona umhlambi munye kanye nemelusi munye; ngako-ke ngiyahamba ngiyawutibonakalisa kubo.

4 Ngiyaniyaleta kutsi niwabhale lamavi emvakwekube sengihambile, kute kutsi uma kwenteka kutsi bantfu bami eJerusalema, labo labangibonile futsi baba nami emsebentini wami, bangaceli kuBabe egameni lami, kute batfole lwati ngani ngaMoya loNgcwele, kanjalo nangaletinye tive labangatati, kute kutsi lamavi leniyawuwabhala agcinwe futsi abonakaliswe kubo beTive, kute kutsi ngekuphelela kwebeTive, insali yentalelwane yabo, leyawube ihlakateke mhlaba wonkhe ngenca yekungakholwa kwabo, iletfwe, noma iletfwe ekwatini mine, uMhlengi wabo.

5 Ngaleso sikhatsi ngitawuyigcogca emagumbini lamane emhlaba; futsi ngaleso sikhatsi ngitawusigcwalisa sivumelwano Babe lasenta kubo bonkhe bantfu bendlu yaka-Israyeli.

6 Futsi babusisiwe beTive, ngenca yekukholwa kwabo kimi, kanye nakuMoya loNgcwele, lofakaza kubo ngami kanye nangaBabe.

7 Bukani, ngenca yenkholelo yabo kimi, kusho Babe, nangenca yekungakholwa kwenu, O ninendlu yaka-Israyeli, ngemalanga ekugcina liciniso liyawuta kubeTive, kutsi kuphelela kwaletintfo kuyawukwembulwa kubo.

8 Kodvwa maye, kusho Babe, kulabangakholwa beTive—ngoba nanoma sebete ngaphambili eveni lonkhe, futsi bahlakata bantfu bami lababendlu yaka-Israyeli; futsi bantfu bami lababendlu yaka-Israyeli bakhishelwe ngephandle kubo, bagcotjwagcotjwa ngaphansi kwetinyawo ngibo;

9 Futsi ngenca yesihawu saBabe kubeTive, ngetulu kwaloko netehlulelo taBabe kubantfu bami lababendlu yaka-Israyeli, ngicinisile, ngicinisile, ngitsi kini, emvakwako konkhe loku, ngente bantfu bami lababendlu yaka-Israyeli kutsi bashaywe, bahlushwe, babulawe, nekutsi bakhishelwe ngephandle emkhatsini wabo, nekutsi batondvwe ngibo, futsi babe yinhlekisa kanye nentfo yekwedzelelwa emkhatsini wabo—

10 Ngaleyo ndlela Babe ungiyalete kutsi ngitsi kini: Ngalelo langa lapho beTive bayawukona ngalokumelene nelivangeli lami, balahle livangeli leliphelele lami, batikhukhumete etinhlitiyweni tabo ngetulu kwetive tonkhe, nangetulu kwebantfu bonkhe bemhlaba wonkhe, bagcwale tonkhe tinhlobo temanga, netenkhohliso, nekuganga, kanye nato tonkhe tinhlobo tekutentisa, netekubulala, netebuphristimbumbulu, netebugwadla, kanye netinengiso letiyimfihlo; uma bayawukwenta tonkhe letintfo, balilahle livangeli leliphelele lami, bukani, kusho Babe, ngiyawulitsatsa livangeli lami leliphelele emkhatsini wabo.

11 Futsi ngaleso sikhatsi ngiyawusikhumbula sivumelwano sami lengasenta kubantfu bami, O ninendlu yaka-Israyeli, ngiyawuliletsa livangeli lami kubo.

12 Futsi ngiyawukukhombisa, O ninendlu yaka-Israyeli, kutsi beTive angeke babe nemandla ngetulu kwakho; kodvwa ngiyawusikhumbula sivumelwano sami kuwe, O ninendlu yaka-Israyeli, futsi uyakuba nelwati ngekuphelela kwelivangeli lami.

13 Kodvwa uma beTive batawuphendvuka babuyele kimi, kusho Babe, bukani bayawubalwa kanye nebantfu bami, O ninendlu yaka-Israyeli.

14 Futsi angeke ngivumele bantfu bami, lababendlu yaka-Israyeli, kutsi bahambe badzabule emkhatsini wabo, babagcobagcobe phansi, kusho Babe.

15 Kodvwa uma bangeke baphendvukele kimi, futsi balalele livi lami, ngitawubavumela, yebo ngitawubavumela bantfu bami, O ninendlu yaka-Israyeli, kutsi bahambe badzabule emkhatsini wabo, babagcobagcobe phansi, futsi bayawuba njengeluswayi loselulahlekelwe bunandzi balo, lolutsi kusuka ngaleso sikhatsi lungasasiti ngalutfo kodvwa kutsi lulahlwe ngaphandle, lunyatselwe ngaphansi kwetinyawo tebantfu bami, O ninendlu yaka-Israyeli.

16 Ngicinisile, ngicinisile, ngitsi kini, Babe ungiyalete kanjalo—kutsi nginike labantfu lendzawo kube lifa labo.

17 Ngaleso sikhatsi emavi emphrofethi Isaya ayawugcwaliseka, latsi:

18 Balindzi bakho bayawumemeta; ngelivi kanyekanye bayawuhlabela, ngoba bayawutibonela ngewabo emehlo ngesikhatsi iNkhosi iphindze ibuyisa iSiyoni.

19 Hlokomani ngenjabulo, hlabelani kanyekanye, nine tindzawo letitindzala taseJerusalema; ngoba iNkhosi ibadvudvutile bantfu bayo, iyihlengile iJerusalema.

20 INkhosi iwembulile umkhono wayo longcwele emehlweni etive tonkhe; futsi yonkhe imikhawulo yemhlaba iyawubona insindziso yaNkulunkulu.