1 Manje kwenteka kutsi ngesikhatsi Jesu sekatishito letintfo watichazela sicuku; wabachazela tonkhe tintfo, letinkhulu naletincane.

2 Watsi: Lemibhalo lengcwele, lebenite yona, Babe ungiyaletile kutsi ngininike yona; ngoba bekukuhlakanipha kwakhe kutsi inikwe titukulwane letitako.

3 Watichaza tonkhe tintfo, kusukela ekucaleni kute kube sikhatsi lapho ayawuta ngenkhatimulo yakhe—yebo, nato tonkhe tintfo letiyawukwenteka emhlabeni wonkhe, kute kube ngulapho tonkhe tisekelo temkhatsi tiyawuncibilikiswa kushisa lokuvutsako, nemhlaba ugogcwe ndzawonye njengencwadzi, emazulu nemhlaba kwendlule;

4 Futsi kute kube kungelilanga lelikhulu kanye nelekugcina, lapho bonkhe bantfu, tonkhe tihlobo, kanye nato tonkhe tive kanye netilimi tiyawuma embikwaNkulunkulu, kute tehlulelwe ngemisebenti yato, noma ngabe mihle noma ngabe mibi—

5 Uma imihle, bavukele ekuphileni kwaphakadze; kani uma imibi, bavukele ekulahlweni; njengobe kulinganisene, kunye kulunye luhlangotsi nalokunye kulolunye luhlangotsi, ngekwebubele, nangekulunga kanye nangebungcwele lobukuKhristu, lobekakhona ngaphambi kwekutsi umhlaba ubekhona.

6 Manje angeke kubhalwe kulencwadzi ngisho nencenye yalokulikhulu yetintfo Jesu latifundzisa ngekweliciniso kubantfu;

7 Kodvwa bukani bongcwengcwe baNefi bacuketse incenye lenyenti yaletintfo latifundzisa kubantfu.

8 Futsi letintfo ngitibhalile, letiyincenye lencane yetintfo latifundzisa bantfu; futsi ngitibhale ngenhloso yekutsi tiphindze tiletfwe kulabantfu, tivela kubeTive, ngekwemavi Jesu lawakhuluma.

9 Futsi uma sebakutfolile loku, lokudzingekako kutsi babe nako kucala, kuvivinya lukholo lwabo, uma kuyawukwenteka kutsi bayawutikholwa letintfo uma kunjalo tintfo letinkhulu tiyawukwembulwa kubo.

10 Uma kwenteka kutsi bangatikholwa letintfo, uma kunjalo tintfo letinkhulu tiyawugodlwa kubo, kangangoba bayawulahlwa ngelicala.

11 Bukani, besengitawutibhala letintfo, tonkhe letaticoshwe kubongcwengcwe baNefi, kodvwa iNkhosi yakuvimba loko, itsi: Ngitawuluvivinya lukholo lwebantfu bami.

12 Ngako-ke, mine, Mormon, sengibhala tintfo lengiyaletwe ngato yiNkhosi. Manje mine, Mormon, sengenta siphetfo senkhulumo yami, sengiyachubeka nekubhala tintfo lengiyaletwe ngato

13 Ngako-ke, ngifuna kutsi nibone kutsi iNkhosi yabafundzisa ngempela bantfu, sikhatsi lesingemalanga lamatsatfu; emvakwaloko yativeta kubo njalo nje, futsi yahlephula sinkhwa njalo nje, yasibusisa, yabaniketa.

14 Futsi kwenteka kutsi yabafundzisa yaphindze yabasita bantfwana besicuku losekukhulunywe ngaso, yaluchacha lulwimi lwabo, bakhuluma kuboyise babo tintfo letinkhulu naletimangalisako, letinkhulu kwendlula loko lebeyikwembulele bantfu; yaluchacha lulwimi lwabo kute bakhone kukhuluma.

15 Futsi kwenteka kutsi emvakwekutsi seyenyukele ezulwini—kwesibili emvakwekutsi itibonakalise kubo, seyihambile yaya kuBabe, seyiphilise bonkhe labagulako babo, kanye nalabangakhoni kuhamba babo, seyivule emehlo alabo labebangaboni babo yavula tindlebe talabebangeva, seyente lonkhe luhlobo lwekwelapha emkhatsini wabo, yavusa nendvodza ekufeni, futsi seyiwatjengisile emandla ayo kubo, seyinyukele kuBabe—

16 Bukani, kwenteka kutsi ngakusasa sicuku sabutsana ndzawonye, bonkhe bababona futsi babeva labantfwana; yebo, ngisho netinswane tayivula imilomo yato takhuluma tintfo letimangalisako; futsi letintfo labatikhuluma akuvunyelwanga kutsi kube khona namunye umuntfu lotibhalako.

17 Futsi kwenteka kutsi bafundzi Jesu labekabakhetsile bacala kusukela ngaleso sikhatsi kuya embili kubhabhatisa kanye nekufundzisa bonkhe labo labeta kubo; futsi bonkhe labo labebabhajatiswa egameni laJesu bagcwaliswa ngaMoya loNgcwele.

18 Labanyenti babo babona futsi beva tintfo letatingakhulumeki, letingakavunyelwa kutsi tibhalwe.

19 Futsi bafundzisa, basitana lomunye kulomunye; baba netintfo tonkhe ngalokufanako emkhatsini wabo, wonkhe umuntfu enta ngekulunga, lomunye nalomunye.

20 Futsi kwenteka kutsi benta tonkhe tintfo njengobe Jesu bekabayaletile.

21 Futsi labo labebabhajatiswa egameni laJesu babitwa ngelibandla laKhristu.