1 Ha péina ápe ojehu oñembyaty peteĩ atyguasu tuicháva, Nefi tavayguakuérava, upe témplo jerére, oĩva tetã Abundancia-pe; ha omombaʼeguasu ha ohecharamo oñondive, ha ohechauka peteĩva ambuépe upe tuicha ha hechapyrãva ñemoambue oikovaʼekue.

2 Ha oñeʼẽ avei hikuái ko Jesucristo rehe, oñemeʼẽvaʼekuégui iñemano rehegua techaukaha.

3 Ha ojehu péicha oñeʼẽ jave hína hikuái oñondive, ohendu peteĩ ñeʼẽ oúvaicha yvágagui; ha omaʼẽ hikuái pe jerére, noikũmbýigui upe ñeʼẽ ohendúva; ha ndahaʼéi peteĩ ñeʼẽ pohýi, ni ndahaʼéi peteĩ ñeʼẽ atã; upevére, jepeve haʼe peteĩ ñeʼẽ kangymi oike ipypukuvehápe umi ohendúva ryepýpe, upéicha rupi ndaipóri hete pehẽngue oryryiʼỹva; heẽ, oike hiʼangakueraitépe, ha ohapy ikorasõkuéra.

4 Ha ojehu ohendu jey hikuái upe ñeʼẽ, ha noikũmbýi.

5 Ha mbohapyha jey ohendu hikuái upe ñeʼẽ, ha ojapysaka hikuái ohendu hag̃ua, ha omaʼẽ hikuái pe tyapu gotyo; ha omaʼẽ hikuái ñemovãʼỹme yvága gotyo, ouhágui upe tyapu.

6 Ha péina ápe, mbohapyha jeýpe oikũmby hikuái upe ñeʼẽ ohendúva, ha heʼi chupekuéra:

7 Péina ápe che Raʼy Ahayhuetéva, chembovyʼavéva, amboverapy haguépe che réra—pehendu chupe.

8 Ha ojehu, oikũmbývo omaʼẽ jey hikuái yvága gotyo; ha péina ápe, ohecha hikuái peteĩ Kuimbaʼe oguejýva yvágagui; ha oñemonde peteĩ ao morotĩme; ha haʼe oguejy ha oñemoĩ imbytepekuéra; ha opa atypegua resa omaña hese, ha noñanimái hikuái oipeʼa ijuru, ni oñeʼẽ hag̃ua peteĩva ambuéndi, ha ndoikuaái hikuái mbaʼépa heʼise upéva, oimoʼãgui hikuái haʼeha peteĩ ángel ojehechaukáva chupekuéra.

9 Ha ojehu haʼe oipyso ipo ha oñeʼẽ tavayguakuérape, heʼívo:

10 Péina ápe, Che haʼe Jesucristo, profetakuéra otestifikahague outaha yvórape.

11 Ha péina ápe, che haʼe yvóra resape ha rekove; ha hayʼúkuri pe kópa iroitévagui Túva omeʼẽvaʼekue chéve, ha amboverapy Túvape amoĩvo che ári yvóra angaipakuéra, ha upéva rupi añemoĩ Túva rembipotápe opa mbaʼépe iñepyrũmby guive.

12 Ha ojehu Jesús heʼipávo koʼã ñeʼẽ pe atyguasu hoʼa yvýpe; imanduʼágui hikuái ojeprofetisahague ijapytepekuéra Cristo ojehechaukataha chupekuéra ijejupi rire yvágape.

13 Ha ojehu Ñandejára oñeʼẽ chupekuéra heʼívo:

14 Pepuʼã ha peju cherendápe, pemoinge hag̃ua pende po che yképe, ha avei peñandu hag̃ua klávo rendague che po ha che pýpe, peikuaa hag̃ua che haʼeha Israel-gua Tupã, ha opa yvypegua Tupã, ha ajejukahague yvóra angaipakuérare.

15 Ha ojehu atyguasugua oñemotenonde, ha omoinge hikuái ipo ijyképe, ha oñandu hikuái klávo rendague ipo ha ipýpe; ha upéva ojapo hikuái, oñemotenondévo peteĩ teĩme opavave oñemotenonde peve, ha ohecha hikuái hesápe ha oñandu ipópe, ha oikuaa añetehápe ha omeʼẽ hikuái testimónio, haʼe haʼeha, upe ohaivaʼekuégui profetakuéra, ouvaʼerãha.

16 Ha opavave oho ha ohecha rire ijehegui, osapukái peteĩ ñeʼẽme, heʼívo:

17 Hosana! Ojehovasapyre Tupã Ijyvatevéva réra! Ha hoʼa hikuái Jesús py gotyo, ha otupaitũ chupe.

18 Ha ojehu haʼe oñeʼẽ Nefi-pe (Nefi oĩgui atyguasu apytépe) ha heʼi chupe ou hag̃ua hendápe.

19 Ha Nefi opuʼã ha oñemoag̃ui, ha ojayvy Ñandejára renondépe ha ohetũ ipýpe.

20 Ha Ñandejára heʼi chupe opuʼã hag̃ua. Ha haʼe opuʼã ha oñemboʼy henondépe.

21 Ha Ñandejára heʼi chupe: Che ameʼẽ ndéve puʼaka emongarai hag̃ua koʼã tavayguakuérape che ajupi jey vove yvágape.

22 Ha avei Ñandejára ohenói ambuépe, ha heʼi chupekuéra upéicha; ha omeʼẽ chupekuéra puʼaka oporomongarai hag̃ua. Ha heʼi chupekuéra: Péicha peporomongaraíta; ha ndaiporimoʼãi joavy pende apytépe.

23 Añetehápe che haʼe peẽme, oñearrepentíva iñangaipágui pene ñeʼẽ rupi, ha oñemongaraiséva che rérape, péicha pemongaraíta chupekuéra—Péina ápe, peguejýta ha peñemboʼýta ýpe, ha che rérape pemongaraíta chupekuéra.

24 Ha koʼág̃a péina ápe, koʼãva haʼe umi ñeʼẽ pejétava, pehenóivo chupekuéra héra rupi, pejévo:

25 Jesucristo omeʼẽvo chéve autorida, che romongarai Túva, ha Taʼýra, ha Espíritu Santo rérape. Amén.

26 Ha upémarõ pemoñapymimbaitéta chupekuéra ýpe, ha pesẽ jeýta upe ýgui.

27 Ha upéicha pemongaraíta che rérape; ha péina ápe, añetehápe che haʼe peẽme, pe Túva, ha Taʼýra, ha Espíritu Santo haʼe peteĩ; ha che haʼe Túva ryepýpe, ha pe Túva chepype, ha Túva ha che peteĩnte.

28 Ha haʼe haguéicha peẽme, upéicha pemongaraíta. Ha ndaiporimoʼãi ñeʼẽʼapi pende apytépe, koʼág̃a peve oĩ haguéicha; ni ndaiporimoʼãi ñeʼẽʼapi pende apytépe che doctrina reheguávape, koʼapeve oĩ haguéicha.

29 Añetehápe, añetehápe che haʼe peẽme, upe oguerekóva joavy rehegua espíritu ndahaʼéi che mbaʼe, ha katu haʼe aña mbaʼe, haʼéva joavy túva, ha haʼe omokyreʼỹ pochýpe yvyporakuéra korasõ, oñorairõ hag̃ua peteĩva ambue ndive.

30 Péina ápe, péva ndahaʼéi che doctrina, yvyporakuéra korasõ toñemokyreʼỹ pochýpe, peteĩva ambue rehe; ha katu kóva haʼe che doctrina, topa umi mbaʼe.

31 Péina ápe, añetehápe, añetehápe, che haʼe peẽme, che amombeʼúta peẽme che doctrina.

32 Ha kóva haʼe che doctrina, ha haʼe doctrina Túva omeʼẽvaʼekue chéve; ha che ameʼẽ testimónio Túvagui, ha Túva omeʼẽ testimónio chehegui, ha Espíritu Santo omeʼẽ testimónio Túvagui ha chehegui; ha che atestifika Túva heʼiha mayma yvypórape, opa hendápe, toñearrepenti ha tojerovia cherehe.

33 Ha opavave ojeroviáva cherehe, ha oñemongaraíva, upéva ojesalváta; ha umíva haʼe umi ohupytýtava Tupã rréino.

34 Ha umi ndojeroviáiva cherehe, ni noñemongaraíriva, oñekondenáta.

35 Añetehápe, añetehápe, che haʼe peẽme, kóva haʼeha che doctrina, ha che ameʼẽ testimónio Túva mbaʼeha; ha opavave ojeroviáva cherehe ojerovia avei Túvare; ha Túva otestifikáta chupe chehegui, oútagui chupe tata ha Espíritu Santo reheve.

36 Ha upéicha Túva omeʼẽta testimónio chehegui, ha Espíritu Santo omeʼẽta chupe testimónio Túvagui ha chehegui; Túva, ha che, ha Espíritu Santo haʼe haguére peteĩ.

37 Ha che haʼe jey peẽme, peñearrepentivaʼerãha, ha toiko pendehegui mitã michĩvaicha, ha peñemongarai che rérape, térã mbaʼevéicharamo ndapehupytymoʼãi koʼã mbaʼe.

38 Ha che haʼe jey peẽme, peñearrepentivaʼerãha, ha peñemongarai che rérape, ha peiko mitã michĩvaicha, térã mbaʼevéicharõ ndapehupytymoʼãi Tupã rréino.

39 Añetehápe, añetehápe, che haʼe peẽme, kóva haʼeha che doctrina, ha umi ojogapóva upéva ári, ojogapo che ita ári, ha umi añaretã rokẽ ndaipuʼakamoʼãi hesekuéra.

40 Ha umi heʼíva hetave térã saʼive kóvagui, ha omoĩva che doctrinarõguáicha, umíva ou añágui, ha ndojogapói che ita ári; ha katu ojogapo peteĩ yvyguigua pyenda ári, ha umi añaretã rokẽ ojepeʼa omog̃uahẽ hag̃ua chupekuéra ou vove amaguasu ha oipeju vove yvytu hiʼarikuéra.

41 Upévare, peho ko tavayguakuérape, ha pemombeʼu umi ñeʼẽ che añeʼẽvaʼekue, yvy opaha peve.