1 Sese, idahaemi edikem ete ke ini Nephi ama eke etiŋ mme ikɔ emi, ndusuk irenowo emi ekedude ke otu mmɔ efehe eka itie ubiere ikpe; iŋ, edi owo ition ekeka, ndien mmɔ etiŋ ke ufɔt mmɔ, nte mmɔ ekekade ete:

2 Esese, idahaemi nnyin iye ifiɔk ke akpanikɔ mme owo emi edi prophet ndien mme Abasi ɔnɔ enye uyo ete etiŋ nte prophet mme utɔ utibe ŋkpɔ oro ɔnɔ nnyin. Esese, nnyin inimke ite ke enɔ enye; iŋ, nnyin inimke ite ke enye edi prophet; edi, edieke ŋkpɔ emi, emi enye etiŋde kabaŋa ada ibuot mme ebiere ikpe edide akpanikɔ, ete ke enye akpa, ndien nnyin iyinim ite ke mme ikɔ efen emi enye etiŋde edi akpanikɔ.

3 Ndien edikem ete ke mmɔ ema efehe ye ofuri ukeme mmɔ, enyuŋ edisim itie ikpe; ndien sese, ada ibuot mme ebiere ikpe ama ɔduɔ ke isɔŋ, onyuŋ ana ke iyip esie.

4 Ndien idahaemi sese, ke ini mmɔ ekekutde emi idem ama akpa mmɔ ata eti eti, tutu ete ke mmɔ ema eduɔ ke isɔŋ; koro mmɔ ikinimke mme ikɔ emi Nephi eketiŋde abaŋa ada ibuot mme ebiere ikpe.

5 Edi idahaemi, ke ini emi mmɔ ekekutde, mmɔ ema enim, ndien ndik ama omum mmɔ mbak kpukpru ubiere ikpe emi Nephi eketiŋde idisim mmɔ; ke ntak oro mmɔ ema enyek idem, ndien ema eduɔ ke isɔŋ.

6 Idahaemi, ke ini emi eke ewotde ada ibuot mme ebiere ikpe—ke edide eyen eka esie ekisine ɔfɔŋ edip idem ndien ekim enye, ndien enye efehe, ndien nditɔ ufɔk efehe eke etiŋ enɔ mme owo, efiori mkpo ete ke ewot owo ke ufɔt mmɔ;

7 Ndien sese mme owo ema esobo idem mmɔ ɔtɔ kiet ke ebiet itie ikpe—ndien sese, ke mkpaidem mmɔ, mmɔ ema ekut mme irenowo ition oro emi eke eduɔde ke isɔŋ.

8 Ndien idahaemi sese, mme owo ikifiɔkke ŋkpɔ ndomo kiet ibaŋa mme otu owo emi eke bohode ɔtɔ kiet ke iŋwaŋ Nephi; ke ntak oro mmɔ ema etiŋ ke ufɔt mmɔ ete: Mme irenowo emi edi mbon emi eke ewotde ebiere ikpe, ndien Abasi amia mmɔ man mmɔ idifehe ikpɔŋ nnyin.

9 Ndien edikem ete ke mmɔ ema emum mmɔ, ndien ebɔp mmɔ enyuŋ esin mmɔ ke ufɔk ŋkpɔkɔbi. Ndien ema enɔ ewuhɔ ete ke ema ewot ebiere ikpe, ndien ke ema emum mme owot owo oro enyuŋ esin mmɔ ke ufɔk ŋkpɔkɔbi.

10 Ndien edikem ete ke mkpɔŋ mme owo ema esobo idem mmɔ ɔtɔ kiet ndifuhɔ ye nditre udia, ke itie ebukde akwa ada ibuot mme ebiere ikpe oro emi eke ewotde.

11 Ndien ntem nko ye mme ebiere ikpe oro emi eke edude ke iŋwaŋ Nephi, enyuŋ ekopde mme ikɔ esie, ema eboho nko ke ebiet ubuk owo oro.

12 Ndien edikem ete mmɔ ebup mme owo, ete: Enye mme owo ition emi eke edɔŋde ete eka ekeduŋɔde ebaŋa ada ibuot mme ebiere, mme enye ama akpa? Ndien mmɔ ebɔrɔ enyuŋ edɔhɔ ete: Kabaŋa mme owo ition emi mbufo edɔhɔde ete ke mbufo ema edɔŋ, nnyin ifiɔkke; edi mme owo ition edu emi edide mme owot owo, emi nnyin isinde ke ufɔk ŋkpɔkɔbi.

13 Ndien edikem ete mme ebiere ikpe oro ema eyom ete eda mmɔ edi; ndien ema eda mmɔ edi, ndien esese mmɔ ekedi mme owo ition oro ekedɔŋde; ndien esese mme ebiere ikpe ema ebup mmɔ man efiɔk ebaŋa ŋkpɔ emi, ndien mmɔ edɔhɔ mmɔ kpukpru se mmɔ ekenamde, ete:

14 Nnyin ima ifehe inyuŋ idi ebiet itie ikpe, ndien ke ini nnyin ikikutde kpukpru ŋkpɔ kpa nte Nephi eke etiede ntiense, idem ama akpa nnyin tutu ete ke nnyin ima iduɔ ke isɔŋ; ndien ke ini idem ɔkɔsɔŋde nnyin, esese mmɔ ema esin nnyin ke ufɔk ŋkpɔkɔbi.

15 Idahaemi, kabaŋa mkpa owo emi, nnyin ifiɔkke owo emi anamde ŋkpɔ emi; ndien emi ikpɔŋ ke nnyin ifiɔk, nnyin ima ifehe idi nte mbufo eke eyomde, ndien esese enye ama akpa, nte mme ikɔ Nephi edide.

16 Ndien idahaemi edikem ete ke mme ebiere ikpe ema enam ŋkpɔ emi anwaŋa mme owo, ndien edɔhɔ Nephi, ete: Sese, nnyin imifiɔk ke Nephi emi ama anam ediomi ye owo kiet ete owot ebiere ikpe, ndien man enye etiŋ ɔnɔ nnyin, man enye anam nnyin ikabade esit itiene mbuɔtidem esie, man enye emenede idem esie edi akamba owo, emi Abasi emekde, ye prophet.

17 Ndien idahaemi esese, nnyin iye duŋɔre owo emi, ndien enye eyeyarede ndudue esie onyuŋ anam nnyin ifiɔk andiwot ebiere ikpe emi.

18 Ndien edikem ete ema esana owo ition oro eyak ke usen ubuk owo. Edi, mmɔ ema esua enɔ mme ebiere ikpe ebaŋa mme ikɔ emi enye eke etiŋde abaŋa Nephi, enyuŋ eneni ye mmɔ kiet kiet, tutu ete ke mmɔ ema etimere mmɔ.

19 Edi, mmɔ enam ete emum Nephi enyuŋ ebɔp enye, enyuŋ eda enye edi ke iso otu owo, ndien mmɔ etɔŋɔ ndibup enye mbume ke mme nsio nsio usuŋ man mmɔ etimere enye, man mmɔ edori enye ikɔ enɔ mkpa—

20 Edɔhɔ enye ete: Afo omoduk odu; anie idi owo emi owotde owo emi? Idahaemi tiŋ nnɔ nnyin, nyuŋ yime dudue fo; edɔhɔ ete, Sese, se okuk mi; ndien nko nnyin iyinɔ fi uwem fo edieke afo editiŋde ɔnɔ nnyin, onyuŋ enyimede ediomi emi afo aka anamde ye enye.

21 Edi Nephi ɔdɔhɔ mmɔ ete: O mbufo mme ndisime, mbufo emi minaŋa mbobi ke esit, mbufo mme nnan, ye mbufo mbon nsɔŋ-ibuot, ndi mbufo emefiɔk adaŋa nte Jehovah Abasi mbufo ediyakde mbufo ete mbufo eka iso ke mme usuŋ idiɔk ŋkpɔ mbufo?

22 O akpana nte mbufo etɔŋɔ nditua nyuŋ nseme, ke ntak akwa nsobo emi ebetde mbufo ke ini emi, ibɔhɔke mbufo eye ekabade esit.

23 Esese mbufo edɔhɔ ete ke ami mma nam ediomi ye owo ete enye owot Seezoram, ada ibuot mme ebiere ikpe nnyin. Edi esese, ami ndɔhɔ mbufo, nte ke emi edi ntak emi ami ntiede ntiense nnɔ mbufo man mbufo efiɔk ebaŋa ŋkpɔ emi; iŋ, kpa nte ntiense nnɔ mbufo, nte ke mma mfiɔk ibak ye mme mbubiam emi edude ke ufɔt mbufo.

24 Ndien ke ntak emi ami nnamde ntem, mbufo edɔhɔ ete ke ami mma nam ediomi ye owo nte enye anam ŋkpɔ emi; iŋ, koro ami nkowutde mbufo idiɔŋɔ emi. mbufo eyaresit ye ami, ndien eyom ndisobo uwem mi.

25 Ndien idahaemi esese, ami nyewut mbufo idiɔŋɔ efen, ndien nse mme mbufo eyeyom ndiwot mi ke ŋkpɔ emi.

26 Esese ami ndɔhɔ mbufo nte: Eka ufɔk Seantum, emi edide eyen eka Seezoram, enyuŋ edɔhɔ enye ete—

27 Ndi Nephi, prophet ŋkari, emi etiŋde ediwak idiɔk ŋkpɔ nte prophet abaŋa mbon emi, ama enyime ye afo, ke ntak oro afo owot Seezoram, emi edide eyen eka fo?

28 Ndien esese, enye eye ɔdɔhɔ mbufo ete, Iŋ iŋ.

29 Ndien mbufo eye ɔdɔhɔ enye ete: Ndi afo omowot eyen eka fo?

30 Ndien enye ayada ye ndik, ndien idifiɔkke se anade nte etiŋ. Ndien esese, enye ayakaŋ ɔnɔ mbufo; ndien enye eye anam nte idem akpa imɔ; edi, enye eye ɔdɔhɔ mbufo ete ke imɔ iduehe.

31 Edi esese, mbufo eyeduŋɔre enye, ndien mbufo eyekut iyip ke isɔŋ ɔfɔŋ esie.

32 Ndien ke ini mbufo ekutde emi, mbufo eye edɔhɔ ete: Iyip emi oto mmɔŋ? Ndi nnyin ifiɔkke ite ke edi iyip eyen eka fo?

33 Ndien ke ini oro ke idem edinyek enye, ndien editie ntɔŋ-ntɔŋ, nte mkpa esim enye.

34 Ndien ke ini oro ke mbufo edidɔhɔ ete: Ke ntak ndik emi ye ntɔŋ emi odorode fi ke iso, sese, nnyin imɔfiɔk ite ke afo emedue.

35 Ndien ke ini oro ke ndik emi okponde akan edidoro enye ke idem; ndien enye eye ayarade ɔnɔ mbufo, ndien idikaŋke aba ete ke imɔ inam uwot owo emi.

36 Ndien ke ini oro ke enye edidɔhɔ mbufo, ete ke ami, mfiɔkke ŋkpɔ ndomokiet mbaŋa ŋkpɔ oro ibɔhɔke edi odudu Abasi ɔnɔ mi. Ndien ke ini oro ke mbufo edifiɔk ete ke ami ndi owo akpanikɔ, ndien ke edi Abasi ɔnɔ mi ɔsɔk mbufo.

37 Ndien edikem ete ke mmɔ ema eka, enyuŋ enam, kpa nte Nephi ɔkɔdɔhɔde mmɔ. Ndien sese, mme ikɔ emi enye eketiŋde ekedi akpanikɔ; koro nte mme ikɔ edide enye ama akaŋ; ndien nko nte mme ikɔ edide enye ama ayarade.

38 Ndien ema emen ewut enye ete ke enye ke idem esie ekedi kpa owot owo oro, tutu ete ke ema esana owo ition oko eyak, ntre nko ke ekedi ye Nephi.

39 Ndien ndusuk mme Nephite ema edu emi eke ebuɔtde idem ke mme ikɔ Nephi; ndien ndusuk nko ema edu, emi eke ebuɔtde idem ke ntak ikɔ ntiense owo ition oro, koro mmɔ ema ekabade esit ke ini mmɔ eke edude ke ufɔk ŋkpɔkɔbi.

40 Ndien idahaemi ndusuk ema edu ke otu mme owo, emi eke edɔhɔde ete ke Nephi edi prophet.

41 Ndien mbon efen ema edu emi eke edɔhɔde ete: sese, enye edi abasi, koro ibɔhɔke enye ekedi abasi enye ikpifiɔkke kpukpru ŋkpɔ emi. Koro sese, enye etiŋ ekikere esit nnyin ɔnɔ nnyin, ndien nko ɔdɔhɔ nnyin mme ŋkpɔ; ndien enye enam nnyin inyene ifiɔk ibaŋa ata aniwot ada ibuot mme ebiere ikpe nnyin.