1 Ndien edikem ete ke ubahade ama odu ke ufɔt mme owo, tutu ete ke mmɔ ema ebahade eka mi ye ko enyuŋ eka mme usuŋ mmɔ, eyak Nephi ikpɔŋ, nte enye akadade ke ufɔt mmɔ.

2 Ndien edikem ete Nephi asaŋa usuŋ esie aka ufɔk esie, kekere abaŋa mme ŋkpɔ emi Jehovah owutde enye.

3 Ndien edikem ete nte enye ekekerede ntem—ke enye ama ɔfuhɔ ke ntak ibak mbon mme Nephite, mme ndedibe utom ekim mmɔ, ye mme uwot owo mmɔ, ye mme udia-ŋwo mmɔ, ye mme kpukpru utɔ ukwaŋ-ŋkpɔ—ndien edikem ete nte enye eke ekerede ntem ke esit esie, sese, uyo edi etiene enye ete:

4 Ɔfɔfɔn ɔnɔ fi, Nephi, ke ntak mme ŋkpɔ emi afo anamde; koro ami mokut nte afo ye unana mmem-idem ɔkwɔrɔde ikɔ, emi ami nnɔde fi, ɔnɔ mbon emi. Ndien afo ufeheke mmɔ, ndien afo uyomke uwem fo, edi afo oyom uduak mi, ye ndinim mme ibet mi.

5 Ndien idahaemi, ke ntak emi afo anamde emi ye ata unana mmem-idem, sese, ami nyediɔŋ fi ke nsinsi; ndien ami nyenam fi enyene akwa odudu ke utiŋ ikɔ ye ke edinam, ke mbuɔtidem ye ke mme utom; iŋ, tutu ete ke eye enam kpukpru ŋkpɔ enɔ fi nte ikɔ fo edide, koro afo udubeŋeke se misaŋake ye uduak mi.

6 Sese, afo edi Nephi, ndien ami ndi Abasi. Sese, ami ntiŋ nnɔ fi ke iso mme angel mi, nte ke afo eye enyene odudu ke idem mbon emi, ndien eye amia isɔŋ ye akaŋ, ndien ye udɔŋɔ, ndien nsobo, nte ibak mbon emi edide.

7 Sese, ami mɔnɔ fi odudu, nte ŋkpɔ ekededi emi afo edidiande ke isɔŋ eyedian ke heaven; ndien ŋkpɔ ekededi emi afo editatde ke isɔŋ eyetat ke heaven; ndien ke ntem ke afo edinyene odudu ke ufɔt mbon emi.

8 Ndien ke ntem, edieke afo edidɔghɔde temple emi ete yak asiaha iba, eyenam enye ntre.

9 Ndien edieke afo edidɔghɔde obot emi ete, Duɔ ke isɔŋ nyuŋ di una-isɔŋ, eyenam enye ntre.

10 Ndien sese, edieke afo edidɔghɔde ete yak Abasi amia mbon emi, eyetibe ntre.

11 Ndien idahaemi sese, ami nnɔ fi uyo, nte yak afo aka onyuŋ etiŋ ɔnɔ mbon emi, ete ke ntem ke Jehovah Abasi ɔdɔhɔ, emi edide Abasi Ibom ete: Ibɔhɔke mbufo ekabare esit eyemia mbufo, tutu ke nsobo.

12 Ndien sese, idahaemi edikem ete ke ini emi Jehovah ama eketiŋ mme ikɔ emi ɔnɔ Nephi, enye ama etre inyuŋ ikaha ufɔk esie, edi afiak aka ebine otu owo emi eke esuanade ke iso isɔŋ, onyuŋ ɔtɔŋɔ nditiŋ nnɔ mmɔ ikɔ Jehovah emi eketiŋde enɔ enye, kabaŋa nsobo mmɔ edieke mmɔ mikabakere esit.

13 Idaha emi sese, ke misehe akamba utibe ŋkpɔ emi Nephi eke anamde ke nditiŋ nnɔ mmɔ kabaŋa mkpa ada ibuot mme ebiere ikpe, mmɔ ema esɔŋ esit mmɔ inyuŋ ikpaŋke utɔŋ inɔ mme ikɔ Jehovah.

14 Ke ntak oro Nephi ama etiŋ ikɔ Jehovah ɔnɔ mmɔ, ete: Ibɔhɔke mbufo ekabare esit, ntem ke Jehovah ɔdɔhɔ, eyemia mbufo tutu ke nsobo.

15 Ndien edikem ete ke ini Nephi ama eketiŋ ikɔ ɔnɔ mmɔ, sese, mmɔ ema esuk esɔŋ esit mmɔ inyuŋ ikpaŋke utɔŋ inɔ mme ikɔ esie; ke ntak oro mmɔ ema esuŋi enye, enyuŋ eyom ndimum enye man mmɔ esin enye ke ufɔk ŋkpɔkɔbi.

16 Edi sese, odudu Abasi ama odu ye enye, ndien mmɔ ikanke imum enye isin ke ufɔk ŋkpɔkɔbi, koro Spirit ama omum enye onyuŋ ada enye ɔwɔrɔ ke ufɔt mmɔ.

17 Ndien edikem ete ke ntem enye ama asaŋa ke Spirit, ke otu ke otu, ɔkwɔrɔ ikɔ Abasi, tutu enye ɔkwɔrɔ ɔnɔ kpukpru mmɔ, mme ɔnɔ enye ke ufɔt kpukpru owo.

18 Ndien edikem ete mmɔ ikpaŋke utɔŋ inɔ mme ikɔ esie; ndien mme eneni etɔŋɔ ndidu, tutu ete ke mmɔ ema ebahare ye idem mmɔ enyuŋ etɔŋɔ ndiwot kiet eken ye ofut.

19 Ndien ke ntem ke ɔyɔhɔ isua ukara ata ye duop ye kiet mme ebiere ikpe nnɔ ikɔ Nephi eketre.