1 Ndien idahaemi edikem ete Samuel, owo Lamanite, ama etiŋ nte prophet ata ediwak ŋkpɔ efen emi Mormon mikanke iwet.

2 Ndien sese, enye ama ɔdɔhɔ mmɔ ete: Esese, ami nnɔ mbufo idiɔŋɔ; ke isua ition emi edidide, ndien esese, ke Eyen Abasi edidi ndifak kpukpru mbon emi edibuɔtde idem ke enyiŋ esie.

3 Ndien esese, emi ke ami ndinɔ mbufo nte idiɔŋɔ edidi esie; koro esese, akwa uŋwana oyodu ke heaven, tutu ete ke okoneyo mbemiso enye edi ke ekim ididuhe, tutu ete ke eyetie owo nte edi uwemeyo.

4 Ke ntak oro, usen kiet ye okoneyo kiet ye usen kiet eyedu, nte edi usen kiet ndien ke okoneyo iduhe; ndien emi edidi idiɔŋɔ inɔ mbufo; koro mbufo eyefiɔk ebaŋa edisiaha utin nko ye edisop esie; ke ntak oro mmɔ eyefiɔk ke akpanikɔ ete ke edi usen iba ye okoneyo kiet; edi okoneyo idikimke; ndien enye eyedi okoneyo oro mbemiso enye amana.

5 Ndien esese, obufa ntanta-ɔfiɔŋ oyodu emi edidahade ida, utɔ emi akanam mbufo mikwe; ndien emi nko eyedi idiɔŋɔ ɔnɔ mbufo.

6 Ndien esese emi idighe kpukpru, ediwak idiɔŋɔ ye mme utibe ŋkpɔ eyedu ke heaven.

7 Ndien eyedikem ete ke idem eye akpa mbufo, enyuŋ edi utibe, tutu ete ke mbufo eyeduɔ ke isɔŋ.

8 Ndien eyedikem ete owo ekededi emi edibuɔtde idem ke Eyen Abasi, kpa oro edinyene nsinsi uwem.

9 Ndien esese, ntem ke Jehovah ɔnɔ mi uyo, oto ke angel esie, ete ami ndi nyuŋ ndɔhɔ mbufo ŋkpɔ emi; iŋ, enye ɔnɔ uyo ete ami ntiŋ nte prophet mme ŋkpɔ emi nnɔ mbufo; iŋ, enye ɔdɔhɔ mi ete: Seme nɔ mbon emi, ekabare esit enyuŋ etim usuŋ Jehovah.

10 Ndien idahaemi, ke ntak emi ami ndide owo Lamanite, ndien nyuŋ ntiŋ nnɔ mbufo mme ikɔ emi Jehovah ɔnɔde mi uyo, ndien ke ntak emi eke ɔsɔŋde ɔnɔ mbufo, mbufo emeyaresit ye ami enyuŋ eyom ndiwot mi, ndien ebin mi esio ke ufɔt mbufo.

11 Ndien mbufo eyekop mme ikɔ mi, koro, ke ntak emi ke ami ndi ke enyɔŋ mme ibibene obio emi, man mbufo ekop enyuŋ efiɔk mme ubiere ikpe Abasi emi ebetde mbufo ke ntak mme ukwaŋ-ŋkpɔ mbufo, ndien nko man mbufo efiɔk se idɔŋɔde ke erikabare esit;

12 Ndien ŋko man mbufo efiɔk ebaŋa edidi Jesus Christ, Eyen Abasi, Ete enyɔŋ ye isɔŋ, Andibot kpukpru ŋkpɔ tɔŋɔ ke eritɔŋɔ; nko man mbufo efiɔk mme idiɔŋɔ edidi esie, man mbufo ebuɔtidem ke enyiŋ esie.

13 Ndien edieke mbufo ebuɔtde idem ke enyiŋ esie mbufo eyekabare esit ke kpukpru mme idiɔk ŋkpɔ mbufo, man otodo mbufo enyene erifen ebaŋa mmɔ oto ke mme edidot esie.

14 Ndien esese, ko, idiɔŋɔ efen ke ami nnɔ mbufo, iŋ, idiɔŋɔ mkpa esie.

15 Koro esese, ana nte enye akpa ke akpanikɔ man erinyaŋa edi; iŋ, ana nte enye onyuŋ akabare edi akpan akpan ete enye akpa, man enam eriset ke mkpa eke mkpa etibe, man otodo eda mme owo edi iso Jehovah.

16 Iŋ, esese, mkpa esie anam eriset ke mkpa etibe, onyuŋ afak kpukpru owo oto akpa mkpa—man mkpa eke spirit; eke kpukpru owo, otode iduɔ Adam ke ekesibede esio ke iso Jehovah, etie nte ekpa, ke mme ŋkpɔ emi edibede ifep ye mme ŋkpɔ eke spirit mbiba.

17 Edi esese, eriset ke mkpa Christ afak owo, iŋ, kpa kpukpru owo, onyuŋ ada mmɔ afiak edi ke iso Jehovah.

18 Iŋ, ndien anam etibe se idɔŋɔde ke erikabare esit, ete owo ekededi emi akabare esit owo idikpihi inyuŋ imen isin ke ikaŋ; edi owo ekededi emi midikabakere esit eyekpi enyuŋ emen esin ke ikaŋ; ndien do mkpa eke spirit afiak edi ɔnɔ mmɔ, iŋ, ɔyɔhɔ mkpa iba, koro efiak esibe mmɔ esio ke mme ŋkpɔ abaŋade nnen nnen ido.

19 Ke ntak oro mbufo ekabare esit, mbufo ekabare esit, mbak ke ndifiɔk mme ŋkpɔ emi ndien inamke mmɔ mbufo eyeyak idem mbufo esin ke idak ubiom ikpe, ndien eda mbufo esuhɔre edi mkpa ɔyɔhɔ iba emi.

20 Edi esese, nte nkedɔhɔde mbufo kabaŋa idiɔŋɔ efen, idiɔŋɔ mkpa esie, esese, ke usen oro emi enye edikutde mkpa utin eyekim onyuŋ esin ndinɔ mbufo uŋwana esie; ndien nko ɔfiɔŋ ye mme ntanta-ɔfiɔŋ; ndien uŋwana ididuhe ke iso isɔŋ emi, tɔŋɔ ke ini emi enye edikutde mkpa, ke ufaŋ usen ita, tutu esim ini emi enye edifiakde iset ke mkpa.

21 Iŋ, ke ini emi enye ediyakde ukpɔŋ esie mme obuma ye mme emireŋ-emireŋ eyedu ke ufaŋ ediwak hour, ndien isɔŋ eye enyeŋ onyuŋ enyeŋe; ndien mme itiat emi edude ke iso isɔŋ emi, emi edude ke enyɔŋ isɔŋ ye ke idak, emi mbufo efiɔkde idaha emi ete ke esɔŋ idem, mme ke ubak esie emi okponde akan edi oboro kiet, eyebomo;

22 Iŋ, eyewai mmɔ iba, ndien tutu amama eyekut mmɔ ye ndudu ye nwaha, ye mme ubak emi ebomode ke iso ofuri isɔŋ, iŋ, ke enyɔŋ isɔŋ ye ke idak mbiba.

23 Ndien esese, mme akwa oyobio eyedu, ndien ediwak obot eyedu emi edinamde edi unaisɔŋ, nte itighede, ndien ediwak ebiet eyedu emi ekotde itighede idahaemi emi edikabare idi mme obot, emi enyɔŋ mmɔ edikoŋde.

24 Ndien eyewiri ediwak usuŋ, ndien ediwak obio eyewuro.

25 Ndien eyekubɔre ediwak udi, ndien mmɔ eyesana ediwak okpo mmɔ eyak; ndien ediwak ndisana owo eyewut ediwak idem.

26 Ndien esese, ntem ke angel ɔdɔhɔ mi; koro enye ama ɔdɔhɔ mi ete ke ana mme obuma ye mme emireŋ-emireŋ edu ke ufaŋ ediwak hour.

27 Ndien enye ama ɔdɔhɔ mi ete ke ini obuma ye emireŋ-emireŋ edidude, ye oyobio oro, ete ke ana mme ŋkpɔ emi edu, ndien ete ke ana ekim ofuk iso ofuri isɔŋ ke ufaŋ usen ita.

28 Ndien angel ama ɔdɔhɔ mi ete ke ediwak eyekut mme ŋkpɔ emi ekponde ekan emi, man mmɔ ebuɔtidem ete ke mme idiɔŋɔ emi ye mme utibe ŋkpɔ emi ana etibe ke ofuri iso isɔŋ emi, man ntak ukudu unɔ unana edibuɔt idem ke ufɔt nditɔ owo—

29 Ndien emi man enyaŋa owo ekededi emi edibuɔtde idem, ndien owo ekededi emi midibuɔtke idem, yak nnen nnen ubiere ikpe esim mmɔ; ndien nko edieke ikpe obiomde mmɔ mmɔ eda enɔ idem mmɔ ubiom ikpe mmɔ.

30 Ndien idahaemi eti, eti, nditɔ eka mi, ete ke owo ekededi emi atakde, atak ɔnɔ idem esie; ndien owo ekededi emi anamde ukwaŋ-ŋkpɔ, anam enye ɔnɔ idem esie; koro esese, mbufo emenyene ufaŋ; enɔ mbufo unen ndinam ŋkpɔ nnɔ idem mbufo; koro esese, Abasi ɔnɔ mbufo ifiɔk ndien enye anam mbufo enyene ufaŋ.

31 Enye ayak mbufo ete efiɔk eti ye idiɔk, ndien enye ayak mbufo ete mbufo emek uwem mme mkpa; ndien mbufo emekeme ndinam eti ndien efiak enim mbufo enɔ enye emi edide eti, mme efiak enim eti enɔ mbufo; midighe mbufo emekeme ndinam idiɔk, ndien efiak enim enye emi edide idiɔk enɔ mbufo.