1 Ndien edikem ke ɔyɔhɔ isua ukara aba ye iba mme ebiere ikpe, ke ini Moronihah amakafiak asiak emem ke ufɔt mme Nephite ye mme Lamanite, sese owo ndomo kiet ikiduhe ndida itie ikpe; ke ntak oro eneni afiak ɔtɔŋɔ ndidu ke otu mme owo kabaŋa owo emi anade nte ada itie ikpe.

2 Ndien edikem ete ke ema emek Helaman, emi ekedide eyen Helaman, ete eda itie ikpe, ke uyo mme owo.

3 Edi sese, Kishkumen, emi okowotde Pahoran, ama ana ebet ndiwot Helaman ŋko; ndien ŋka esie ema eda ye enye, emi ekedukde ke ediomi ete owo ndomo kiet okufiɔk ibak esie.

4 Koro Gadianton kiet ama odu, emi ekenyenede ɔkpɔsɔŋ usɔ ke uwak ikɔ, ye ŋko ke ŋkari esie, ndinam ndedibe utom uwot owo ye inɔ; ke ntak oro enye akabade edi ada usuŋ ke ŋka Kishkumen.

5 Ke ntak oro enye ama eneminua ye mmɔ, ŋko ye Kishkumen, ete ke edieke mmɔ edinimde enye ke itie ikpe ke enye ayayak ete enim mbon ŋka esie ke itie odudu ye unen ke otu mme owo; ke ntak oro Kishkumen ama oyom ndiwot Helaman.

6 Ndien edikem ke enye akaiso ekpere itie ikpe ndiwot Helaman, sese eyenufɔk Helaman kiet, ke ɔkɔwɔrɔde ke okoneyo, ndien ke ɔkɔbɔde, oto ke ndikpuhɔ idem, ifiɔk eke mme ŋkari oro emi ŋka emi ekenimde ndiwot Helaman—

7 Ndien edikem ete enye osobo ye Kishkumen, ndien enye ɔnɔ enye idiɔŋɔ; ke ntak oro Kishkumen anam enye ɔfiɔk uduak esie, oyom ete enye ada enye aka itie ikpe man enye owot Helaman.

8 Ndien ke ini eyenufɔk Helaman amakɔfiɔk ofuri esit Kishkumen, ye nte ekedide uduak esie ndiwot owo, ndien ŋko ete ke ekedi uduak kpukpru mbon emi ekedude ke ŋka esie ndiwot owo, ye ndiyip inɔ, ye ndinyene odudu, (ndien emi ekedi ndedibe uduak mmɔ, ye ebuana ŋkari mmɔ) eyenufɔk Helaman ɔdɔhɔ Kishkumen ete: Yak nnyin ika itie ikpe.

9 Idahaemi emi ama enem Kishkumen esit ata eti eti, koro enye ekekere ke enye ayanam uduak esie; edi sese, eyenufɔk Helaman, nte mmɔ ekekade itie ikpe, ama ekim Kishkumen kpa ke esit, ndien enye ɔduɔ akpa isioroke uyo. Ndien enye efehe onyuŋ ɔkɔdɔhɔ Helaman kpukpru mme ŋkpɔ emi enye okokutde, onyuŋ okopde, onyuŋ anamde.

10 Ndien edikem ete ke Helaman ama ɔdɔŋ ete ekemum mme ŋka inɔ ye mme owot owo ke ndibe emi, man ewot mmɔ nte asaŋade ye mbet.

11 Edi sese, ke ini Gadianton okokutde ete ke Kishkumen ikinyɔŋke idi enye amafehe ndik ete ke ewot enye; ke ntak oro enye anam ete ŋka esie etiene enye. Ndien mmɔ efehe ewɔrɔ ke isɔŋ oro, ke ndedibe usuŋ, eduk esit wilderness; ndien ke ntem ke ini Helaman ɔkɔdɔŋde ete ekemum mmɔ mmɔ ikiduhe ke ebiet ndomo kiet.

12 Ndien eyetiŋ ediwak ŋkpɔ ebaŋa Gadianton emi ke emi amakebe. Ndien ke ntem ke ɔyɔhɔ isua ukara aba ye iba mme ebiere ikpe nnɔ ikɔt Nephi eketre.

13 Ndien sese, ke utit ŋwed emi mbufo eyekut ete ke Gadianton emi amakabade edi ntak nsobo, iŋ, ekpri ayak ke ndisobo ikɔt Nephi ofuri ofuri.

14 Esese ami ndɔhɔke utit ŋwed Helaman, edi ami ndɔhɔ utit ŋwed Nephi, emi ami ndade kpukpru mbuk emi ami ŋwetde.