1 Ndien idahaemi edikem ete ke ini Nephi ama eketiŋ mme ikɔ emi, sese, mme owo ema edu emi ekedide mme ebiere ikpe, emi ekeyuŋ edude ke ndedibe otu Gadianton, ndien mmɔ ema eyaresit, ndien mmɔ efiori, ekaŋ se enye eke etiŋde, edɔhɔ mme owo ete: Nsidi ntak emi mbufo mimumke owo emi inyuŋ ida enye idi, man ebiom enye ikpe nte asaŋde ye idiɔk ŋkpɔ emi enye anamde?

2 Nsidi ntak emi esede owo emi, enyuŋ ekopde nte enye osuŋide mbon emi ye mbet nnyin?

3 Koro sese, Nephi ama etiŋ ɔnɔ mmɔ abaŋa ukwaŋ ke mbet mmɔ; iŋ, ediwak ŋkpɔ ke Nephi eke etiŋ emi owo mikemeke ndiwet; ndien enye ikitiŋke ŋkpɔ ndomo kiet emi mikisaŋake ye mme ibet Abasi.

4 Ndien mme ebiere ikpe oro eke eyaresit esit ye enye koro enye eketiŋ ikɔ iŋwaŋ iŋwaŋ ye mmɔ abaŋa mme ndedibe utom ekim mmɔ; edi, mmɔ ikikemeke imum enye, koro mmɔ ema efehe mme owo mbak mmɔ ekumenede uyo ukaŋ mmɔ.

5 Ke ntak oro mmɔ ema efiori enɔ mme owo, ete: Nsidi ntak emi mbufo eyakde owo emi osuŋi nnyin? Koro sese enye obiom ikpe ɔnɔ kpukpru mbon emi, tutu esim nsobo; iŋ, ndien nko ete ke mme akwa obio nnyin emi ke eye ebɔ nnyin, ete ke nnyin idinyeneke ebiet ke mmɔ.

6 Ndien idahaemi nnyin iimifiɔk ke emi ikemeke nditibe, koro sese, nnyin iminyene odudu, ndien mme obio nnyin ekponi, ke ntak oro mme asua nnyin ikemeke ndinyene odudu ke idem nnyin.

7 Ndien edikem ete ke ntem ke mmɔ ekedemere mme owo ke iyaresit ebaŋa Nephi, enyuŋ esin eneni ke ufɔt mmɔ; koro ama odu usuk mmɔ emi eke efioride ete: Esana owo emi eyak, koro enye edi eti owo, koro mme ŋkpɔ oro emi enye etiŋde eye etibe ke akpanikɔ ibɔhɔke nnyin iyikabare esit;

8 Iŋ, esese, kpukpru mme ubiere ikpe emi enye etiede ntiense ɔnɔ, eyedisim nnyin; koro nnyin imɔfiɔk ite ke enye etie ntiense nnen nnen ɔnɔ nnyin abaŋa mme ukwaŋ-ŋkpɔ nnyin. Ndien esese mmɔ edi ediwak, ndien enye ɔfiɔk ke kpukpru ŋkpɔ emi eyedisimde nnyin kpa nte enye ɔfiɔkde mme ukwaŋ-ŋkpɔ nnyin;

9 Iŋ, ndien esese, ekpedi enye ikidighe prophet enye ikpitiehe ntiense ibaŋa mme ŋkpɔ oro.

10 Ndien edikem ete ke enyikhe ama omum mbon emi eke eyomde ndisobo Nephi ke ntak ndik mmɔ, tutu mmɔ ikimumke enye; ke ntak oro enye ama afiak ɔtɔŋɔ nditiŋ ikɔ nnɔ mmɔ, ke okutde ete ke enye okut mfɔn ke iso ndusuk owo, tutu ete ke nyɔhɔ nsuhɔ mmɔ ema efehe ndik.

11 Ke ntak oro enye ama yik nditiŋ mme ikɔ efen nnɔ mmɔ ete: Esese, nditɔ eka mi, ndi mbufo ikotke ite ke Abasi ama ɔnɔ owo kiet odudu, kpa Moses, ndimia mme mmɔŋ Iduduot Inyaŋ, ndien mmɔ ebahade ke edem mbiba, tutu ete ke mme Israelite, emi ekedide mme ete nnyin, esaŋa ebe ke nsat isɔŋ, ndien mme mmɔŋ ebedi ebagha mbon ekɔŋ mme Egyptian onyuŋ emen mmɔ?

12 Ndien idahaemi esese, edieke Abasi ɔkɔ ɔnɔde owo emi utɔ odudu oro, ndien ntak emi mbufo enenide ke ufɔt mbufo, enyuŋ edɔhɔde ete ke enye inɔhɔ mi odudu man ami mfiɔk kabaŋa mme ubiere ikpe emi edidide itiene mbufo ibɔhɔke mbufo ekabade esit?

13 Edi, esese, mbufo ikaŋke mme ikɔ mi ikpɔŋ, edi mbufo nko emekaŋ kpukpru mme ikɔ emi mme ete nnyin eke etiŋde, nko ye mme ikɔ emi owo emi, Moses, eke etiŋde, emi ekenɔde enye utɔ akwa odudu oro, iŋ, mme ikɔ emi enye etiŋde kabaŋa edidi Messiah.

14 Iŋ, ndi enye ikitiehe ntiense ete ke Eyen Abasi eyedi? Ndien kpa nte enye ekemenede urukikɔt emi ekenamde ke bronze ke wilderness, kpa ntre ke edimenede enye emi edidide.

15 Ndien kpa nte ediwak emi edisede urukikɔt oro eyedu uwem, kpa ntre ke ediwak emi edisede Eyen Abasi ye mbuɔtidem, enyenede spirit emi anuakhade, eyedu uwem, kpa uwem emi edide nsinsi.

16 Ndien idahaemi esese, Moses ikitiehe ntiense ikpɔŋ ibaŋa mme ŋkpɔ emi, edi ye kpukpru mme ndisana prophet, tɔŋɔ ke eyo esie tutu esim eyo Abraham.

17 Iŋ, ndien esese, Abraham ama okut kabaŋa edidi esie, ndien ama ɔyɔhɔ ye inemesit onyuŋ adaresit.

18 Iŋ, ndien esese ami ndɔhɔ mbufo, nte ke Abraham ikiifiɔkke mme ŋkpɔ emi ikpɔŋ, edi ediwak ema edu mbemiso eyo Abraham emi eke ekotde ke utɔ eke Abasi; iŋ, kpa ke utɔ eke Eyen esie; ndien emi man ewut mme owo, ke ata ediwak tɔsin isua mbemiso edidi esie, eteke erifak eyedi etiene mmɔ.

19 Ndien idahaemi ami moyom nte yak mbufo efiɔk, ete ke tɔŋɔ ke eyo Abraham ke ediwak mme prophet edu emi etiede ntiense ebaŋa mme ŋkpɔ emi; iŋ, esese, prophet Zenos ama etie ntiense uko uko abaŋa; ke ntak oro ema ewot enye.

20 Ndien esese, ŋko Zenock, ndien nko Ezias, ndien nko Isaiah, ye Jeremiah, (Jeremiah edide kpa prohet oro emi eke etiede ntiense abaŋa nsobo Jerusalem) ndien idaha emi nnyin imɔfiɔk ke ema esobo Jerusalem nte mme ikɔ Jeremiah ekedide. O ndien ntak Eyen Abasi midi dighe, nte prophecy esie edide?

21 Ndien idahaemi ndi mbufo eye eneni ete ke ema esobo Jerusalem? Ndi mbufo eye edɔhɔ ete ke edidem Babylon ikiwotke nditɔ Zedekiah, kpukpru ibɔhɔke Mulek? Iŋ, ndien ndi mbufo ikwe ite ke ubon Zedekiah edu ye nnyin, ndien ke ema ebin mmɔ esio ke isɔŋ Jerusalem? Edi esese, emi idighe kpukpru—

22 Ema ebin ete nnyin Lehi esio ke Jerusalem ke ntak emi enye eke etiede ntiense abaŋa mme ŋkpɔ emi. Nephi ŋko ama etie ntiense abaŋa mme ŋkpɔ emi, ndien nko ekpri ayak ke kpukpru mme ete nnyin, tutu ɔsuhɔde edisim ini emi; iŋ, mmɔ etie ntiense ebaŋa edidi Christ, ndien ebet, enyuŋ edaresit ke usen esie emi edidide.

23 Ndien esese, enye edi Abasi, ndien enye odu ye mmɔ, ndien enye ama ayarade idem esie ɔnɔ mmɔ, ete enye ama afak mmɔ; ndien mmɔ ema enɔ enye ubɔŋ, ke ntak enye emi edidide.

24 Ndien idahaemi, ke ntak emi mbufo efiɔkde mme ŋkpɔ emi ndien ikemeke ndikaŋ mmɔ ibɔhɔke mbufo esu nsu, ke ntak oro, ke enye emi mbufo eme enam idiɔk ŋkpɔ, koro mbufo eme esin kpukpru mme ŋkpɔ emi, isehe ata ediwak idiɔŋɔ emi mbufo ebɔde; iŋ, tutu ke mbufo eme ebɔ kpukpru ŋkpɔ, mme ŋkpɔ ke heaven, ye kpukpru ŋkpɔ emi edude ke isɔŋ, nte ntiense ete ke mmɔ edi akpanikɔ.

25 Edi esese, mbufo eme esin akpanikɔ, enyuŋ esɔŋ ibuot ye edisana Abasi mbufo; ndien kpa ke ini emi, utu ke ebono ŋkpɔ enɔ idem mbufo ke heaven, emi ŋkpɔ ndomo kiet midibiatke, ye emi ŋkpɔ ndomo kiet emi misanake midikagha, mbufo ekɔ enɔ idem mbufo iyaresit ebaŋa usen ubiere ikpe.

26 Iŋ, kpa ke ini emi mbufo ke edat, ke ntak mme uwot owo mbufo ye usaŋa use ye ibak mbufo, enɔ nsinsi nsobo; iŋ, ndien ibɔhɔke mbufo eye ekabare esit ɔyɔsɔp edisim mbufo.

27 Iŋ, esese enye idahaemi odu ke enyin-usuŋ mbufo; iŋ, mbufo eduk eka ke itie ikpe, enyuŋ eduŋɔde; ndien esese, ewot ebiere ikpe mbufo, ndien enye ana ke iyip esie; ndien eyen eka esie owot enye, emi oyomde nditie ke itie ikpe.

28 Ndien esese, mmɔ mbiba edu ke ndedibe otu mbufo, emi andisiak edide Gadianton ye idiɔk enye emi oyomde ndisobo mme ukpɔŋ owo.