1 Ndien idahaemi edikem ke ɔyɔhɔ isua ukara ata ye duop ye iba mme ebiere ete ke mme eneni ema ekɔri, tutu ete ke mme ekɔŋ ema edu ke ofuri isɔŋ ke ufɔt kpukpru ikɔt Nephi.

2 Ndien ekedi ndedibe otu mme inɔ emi ekenam utom nsobo ye ibak emi. Ndien ekɔŋ emi ama aŋwana ke ofuri isua oro; ndien ema eŋwana enye ke ɔyɔhɔ isua ata ye duop ye ita nko.

3 Ndien edikem ete ke isua emi ke Nephi ama eseme ɔnɔ Jehovah, ete:

4 O Jehovah, kuyak ete ewot mbon emi ke ofut; edi O Jehovah, yak akaŋ odu ke isɔŋ emi, man edemere mmɔ ke nditi Jehovah Abasi mmɔ, ndien ekeme ndidi ke mmɔ eyekabare esit enyuŋ eŋwɔŋɔre etiene fi.

5 Ndien ntre ke ekenam, nte mme ikɔ Nephi edide. Ndien ɔkpɔsɔŋ akaŋ ama odu ke isɔŋ oro, ke ufɔt ofuri ikɔt Nephi. Ndien ke ntem ke ɔyɔhɔ isua ata ye duop ye inaŋ akaŋ ama aka iso, ndien utom nsobo ke ofut ama etre edi ama ɔsɔŋ ke akaŋ.

6 Ndien utom nsobo emi ama aka iso nko ke ɔyɔhɔ isua ata ye duop ye ition. Koro ema emia isɔŋ ete enye asat, ndien enye ike iŋwumke mkpasip ke ini mkpasip; ndien ema emia ofuri isɔŋ, ke ufɔt mme Lamanite kpa ye ke ufɔt mme Nephite, ke ntre ema emia mmɔ ete mmɔ etak ke mme tɔsin ke ŋkaŋ isɔŋ emi ekediɔkde akan.

7 Ndien edikem ete mme owo ema ekut ete ke mmɔ eyetak ke akaŋ, ndien mmɔ etɔŋɔ nditi Jehovah Abasi mmɔ; ndien mmɔ etɔŋɔ nditi mme ikɔ Nephi.

8 Ndien mme owo etɔŋɔ ndikpe mme ada ibuot mme ebiere ikpe mmɔ ye mme ada usuŋ mmɔ ubɔk, man mmɔ edɔhɔ Nephi ete: Sese, nnyin ime ifiɔk ete ke afo edi owo Abasi, ndien ke ntak oro seme nɔ Jehovah Abasi nnyin man enye ɔŋwɔŋɔre akaŋ emi ɔkpɔŋ nnyin, mbak kpukpru mme ikɔ emi afo etiŋde abaŋa nsobo nnyin idisu.

9 Ndien edikem ete mme ebiere ikpe ema edɔhɔ Nephi, nte mme ikɔ emi eke eyomde edide. Ndien edikem ete ke ini Nephi ekekutde ete ke mme owo ema ekabare esit enyuŋ esuhɔre idem mmɔ ke ɔfɔŋikpo, enye afiak eseme ɔnɔ Jehovah, ete:

10 O Jehovah, sese mbon emi ekabare esit; ndien mmɔ ekwɔk otu Gadianton esio ke ufɔt mmɔ tutu ete ke mmɔ esop, ndien mmɔ edip mme ndedibe uduak mmɔ ke isɔŋ.

11 Idaha emi, O Jehovah, ke ntak nsuhɔre-idem mmɔ emi ŋwɔŋɔre iyaresit fo, ndien yak iyaresit fo ɔyuhɔ ke nsobo mme idiɔk owo oro emi afo osobode.

12 O Jehovah, ŋwɔŋɔre iyaresit fo, iŋ, ufiop iyaresit fo, nyuŋ nam akaŋ emi etre ke isɔŋ emi.

13 O Jehovah, kpaŋutɔŋ nnɔ mi, nyuŋ nam etibe nte mme ikɔ mi edide, nyuŋ dɔŋ edim edi ke iso isɔŋ, man enye eŋwum mfri esie, ye mkpasip esie ke ini mkpasip.

14 O Jehovah, afo ama akpaŋutɔŋ ɔnɔ mme ikɔ mi ke ini nkedɔhɔde nte, Yak akaŋ odu, man udɔŋɔ ofut etre; ndien ami mefiɔk ke afo, kpa ke ini emi, eyekpaŋ utɔŋ ɔnɔ mme ikɔ mi, koro afo emedɔhɔ ete: Edieke mbon emi ekabare esit ami nyesuhɔ mmɔ.

15 Iŋ, O Jehovah, ndien afo omokut ete ke mmɔ ekabare esit, ke ntak akaŋ ye udɔŋɔ ye nsobo emi esimde mmɔ.

16 Ndien idahaemi, O Jehovah, ŋwɔŋɔre iyaresit fo fep, ndien fiak domo se mme mmɔ eyenam utom enɔ fi? Ndien edieke edide ntre, O Jehovah, afo eyediɔŋ mmɔ nte mme ikɔ fo edide emi afo etiŋde.

17 Ndien edikem ke ɔyɔhɔ isua ata ye duop ye itiokiet Jehovah ama ɔŋwɔŋɔre iyaresit esie ɔkpɔŋ mme owo, onyuŋ anam ete edim edep ke iso isɔŋ, tutu ete ke enye ama oŋwum mfri esie ke ini mfri. Ndien edikem ete enye ama oŋwum mkpasip esie ke ini mkpasip esie.

18 Ndien sese, mme owo ema edara enyuŋ etoro Abasi, ndien ofuri iso isɔŋ ama ɔyɔhɔ ye idara; ndien mmɔ ike iyomke aba ndiwot Nephi, edi mmɔ ema eda enye nte akwa prophet, ye owo Abasi, enyenede akwa odudu ye unen emi Abasi ɔnɔde enye.

19 Ndien sese, Lehi, eyen eka esie, ike idaha enye ke edem kabaŋa mme ŋkpɔ edinen ido.

20 Ndien ke ntem ama edikem ete ikɔt Nephi etɔŋɔ ndifiak foro ke isɔŋ oro, enyuŋ etɔŋɔ ndibɔp mme ŋwure ebiet mmɔ, enyuŋ etɔŋɔ nditɔt nyuŋ ntara, tutu ete ke mmɔ ema eyɔhɔ ofuri iso isɔŋ, ke edem edere ye ke usuk usuk mbiba, tɔŋɔ ke inyaŋ ke edem usop utin ke edem usiaha utin.

21 Ndien edikem ete ke ɔyɔhɔ isua ata ye duop ye itiokiet ama etre ke emem. Ndien ke ɔyɔhɔ isua ata ye duop ye itiaba ama ɔtɔŋɔ ke emem; ndien ufɔk Abasi ama atara ke iso ofuri isɔŋ; ndien ubak mme owo emi ekewakde ekan, mme Nephite ye mme Lamanite mbiba, ema eduk ufɔk Abasi; ndien mmɔ ema enyene ata emem ke isɔŋ oro; ndien ke ntem ke ɔyɔhɔ isua ata ye duop ye itiaba eketre.

22 Ndien ŋko mmɔ ema enyene emem ke ɔyɔhɔ isua ata ye duop ye itiaita, ibɔhɔke ekedi mme eneni ifaŋ kabaŋa ukpep-ŋkpɔ emi mme prophet ekesiakde.

23 Ndien ke ɔyɔhɔ isua ata ye duop ye usukkiet ɔkpɔsɔŋ ewan ama ɔtɔŋɔ ndidu. Edi edikem ete ke Nephi ye Lehi, ye ediwak nditɔ eka mmɔ emi ekefiɔkde ebaŋa mme ibuot ukpep-ŋkpɔ, ke enyenede ediwak eriyarare ke usen ke usen, ke ntak oro mmɔ ema ekwɔrɔ ikɔ enɔ mme owo, tutu ete ke mmɔ ema etre eŋwan mmɔ kpa ke isua oro.

24 Ndien edikem ete ke ɔyɔhɔ isua ukara anaŋ mme ebiere ikpe nnɔ ikɔt Nephi, ibat-ibat mbon emi eke ewɔrɔde ekpɔŋ ikɔt Nephi ema edu, emi eke ekade ebine mme Lamanite ke mme isua emi eke ebede, ndien ema eda enɔ idem mmɔ enyiŋ mme Lamanite, ndien nko ibat-ibat owo emi ekedide mme ata ubon mme Lamanite, ke ntak emi mmɔ ekedemere mmɔ ke iyaresit, mme mbon emi eke ewɔrɔde ekpɔŋ, ke ntak oro mmɔ etɔŋɔ ekɔŋ ye nditɔ eka mmɔ.

25 Ndien mmɔ ema ewot owo enyuŋ edia ŋwo; ndien mmɔ efiak edem efehe eka mme obot, ye wilderness ye mme ndedibe ebiet, edip idem mmɔ man mme owo ukukut mmɔ, ebɔ edian ke ibat mmɔ ke usen ke usen; kadaŋa nte mbon emi eke ewɔrɔde ekpɔŋ eke ekade ebine mmɔ.

26 Ndien ntem ke ini, iŋ, kpa ke ufaŋ isua mike iwakke, mmɔ ekabare edi ata akamba otu inɔ; ndien mmɔ ema eyom kpukpru mme ndedibe uduak Gadianton; ndien ke ntem mmɔ ekabare edi mme inɔ Gadianton.

27 Idahaemi sese, mme inɔ emi ema enam ata ataghare, iŋ kpa akamba nsobo ke ufɔt ikɔt Nephi, nko ye ke ufɔt mbon mme Lamanite.

28 Ndien edikem ete ke ama ɔfɔn ete etre utom nsobo emi; ke ntak oro mmɔ edɔŋ mbon ekɔŋ emi esɔŋde idem eka wilderness ye ke mme enyɔŋ obot man eyom otu mbon inɔ emi, enyuŋ ewot mmɔ.

29 Edi sese, edikem ete kpa ke isua oro ema ebin mmɔ efiak edem esin ke mme isɔŋ mmɔ. Ndien ke ntem ke ɔyɔhɔ isua ukara anaŋ mme ebiere ikpe nnɔ ikɔt Nephi eketre.

30 Ndien edikem ke ntɔŋɔ ɔyɔhɔ isua anaŋ ye kiet mmɔ ema efiak eka ebine otu inɔ emi, ndien ema ewot ediwak mmɔ; ndien ema edise mmɔ nko ye ediwak nsobo.

31 Ndien ema ekpak mmɔ ete ewɔrɔ ke wilderness ye ke mme obot eka mme isɔŋ mmɔ, ke ntak ata ediwak ibat mbon inɔ oro emi eke eyɔhɔde mme obot ye wilderness.

32 Ndien edikem ete ke ntem ke isua emi eketre. Ndien mme inɔ emi ema esuk ekɔri enyuŋ ekop odudu, tutu ete ke mmɔ ema ekan ofuri mbon ekɔŋ mme Nephite, nko ye eke mme Lamanite; ndien mmɔ ema enam ɔkpɔsɔŋ ndik esim mme owo ke ofuri iso isɔŋ.

33 Iŋ, koro mmɔ ema edise ediwak ŋkaŋ isɔŋ oro, enyuŋ enam ediwak nsobo ke mmɔ; iŋ, ema ewot ediwak, enyuŋ etaŋ ediwak efen nte mbon ŋkpɔkɔbi eduk ke wilderness, iŋ, ndien ata akpan akpan iban mmɔ ye nditɔ mmɔ.

34 Idahaemi akwa idiɔk emi, emi ekesimde mme owo ke ntak ukwaŋ-ŋkpɔ mmɔ, ama afiak edemere mmɔ ke nditi Jehovah Abasi mmɔ.

35 Ndien ke ntem ke ɔyɔhɔ isua ukara anaŋ ye kiet mme ebiere ikpe eketre.

36 Ndien ke ɔyɔhɔ isua anaŋ ye iba mmɔ ema efiak etɔŋɔ ndifre Jehovah Abasi mmɔ. Ndien ke ɔyɔhɔ isua anaŋ ye ita mmɔ etɔŋɔ ndikop odudu ke ukwaŋ-ŋkpɔ. Ndien ke ɔyɔhɔ isua anaŋ ye inaŋ mmɔ ikinehekede mme usuŋ mmɔ.

37 Ndien edikem ke ɔyɔhɔ isua anaŋ ye ition mmɔ ema ekop odudu ekan akpa enyuŋ ekop odudu ekan akpa ke ntaŋidem mmɔ, ye ke ibak mmɔ; ndien ke ntem ke mmɔ ekedat enɔ nsobo.

38 Ndien ke ntem ke ɔyɔhɔ isua anaŋ ye ition eketre.