1 Ndien idahaemi, edikem ete ke ediwak ema edu emi ekekopde mme ikɔ Samuel, owo Lamanite, emi enye eketiŋde ke enyɔŋ mme ibibene obio oro. Ndien kadaŋa nte ediwak emi ekebuɔtde idem ikɔ esie ema eka ekeyom Nephi; ndien ke ini mmɔ ekekade enyuŋ ekutde enye mmɔ eyarade mme idiɔk ŋkpɔ enɔ enye inyuŋ ikanke, eyom ete enim mmɔ baptism enɔ Jehovah.

2 Edi kadaŋa nte ediwak emi mike ibuɔtkde idem ke mme ikɔ Samuel ema eyaresit ye enye; ndien mmɔ ema etop enye ke mme itiat ke enyɔŋ ibibene, ndien nko ediwak ema etop enye ye idaŋ nte enye ekedade ke enyɔŋ ibibene; edi Sprit Jehovah ama odu ye enye, tutu ete ke mmɔ ikanke itɔ enye ye mme itiat mmɔ ŋko ye mme idaŋ mmɔ.

3 Idahaemi ke ini mmɔ ekekutde ete ke mmɔ ikanke itɔ enye, ediwak efen ema edu emi ekebuɔtde idem ke mme ikɔ esie, tutu ete ke mmɔ ema eka ebine Nephi ndina baptism.

4 Koro esese, Nephi ekenim baptism, onyuŋ etiŋ nte prophet, onyuŋ ɔkwɔrɔ, erikabare esit ɔnɔ mme owo, owut mme idiɔŋɔ ye mme utibe ŋkpɔ, anam mme utibe ŋkpɔ ke ufɔt mme owo, man mmɔ efiɔk ete ke Christ oro eyesɔp edi—

5 Etiŋ ɔnɔ mmɔ abaŋa mme ŋkpɔ emi anade nte esɔp edi, man mmɔ efiɔk enyuŋ eti ke ini emi mmɔ edidide ete ke ema enam mmɔ ebemiso efiɔk, man mmɔ ebuɔtidem; ke ntak oro kadaŋa nte ediwak emi ekebuɔtde idem ke mme ikɔ Samuel ema eka ebine enye man ena baptism, koro mmɔ ema edi edikabare esit enyuŋ eyarare mme idiɔk ŋkpɔ mmɔ.

6 Edi ubak mmɔ emi ekewakde ekan ike ibuɔtke idem ke mme ikɔ Samuel; ke ntak oro ke ini mmɔ ekekutde ete ke mmɔ ikanke itɔ enye ye mme itiat mmɔ ye mme idaŋ mmɔ, mmɔ eseme enɔ mme etubom eekɔŋ mmɔ, ete: Emum owo emi enyuŋ ebɔp enye, koro esese enye enyene demon; ndien ke ntak odudu demon emi odude ke enye nnyin ikanke itɔ enye ye mme itiat ye mme idaŋ nnyin; ke ntak oro emum enye enyuŋ ebɔp enye, enyuŋ eda enye ewɔrɔ.

7 Ndien nte mmɔ ekekade ndimum enye, sese, enye ama ɔfrɔ ke enyɔŋ ibibene ɔduɔ ke isɔŋ, onyuŋ efehe ɔwɔrɔ ke mme isɔŋ mmɔ, iŋ, ɔnyɔŋ obio esie, ndien ɔtɔŋɔ ndikwɔrɔ ikɔ nyuŋ ntiŋ nte prophet ke ufɔt ikɔ esie.

8 Ndien sese, owo ike ikopke ŋkpɔ ibaŋa enye aba ke ufɔt mme Nephite; ndien ke ntem ke ekedi ye mme ŋkpɔ mbon oro.

9 Ndien ke ntem ke ɔyɔhɔ isua ukara anaŋ ye itokiet mme ebiere ikpe nnɔ ikɔt Nephi eketre.

10 Ndien ke ntem ŋko ke ɔyɔhɔ isua ukara anaŋ ye itiaba mme ebiere ikpe eketre, ubak mme owo emi ekewakde ekan edu ke ntaŋidem ye ibak mmɔ, ndien ubak emi ekekpride akan etiŋ-enyin ke iso Abasi.

11 Ndien mme ŋkpɔ eketie ntem ŋko, ke ɔyɔhɔ isua ukara anaŋ ye itiaita mme ebiere ikpe.

12 Ndien ekpri ukpuhɔre ekedu ke mme ŋkpɔ mme owo, ibɔhɔke ke ekedi ke mme owo ema etɔŋɔ nditim nsɔŋ ke ukwaŋ-ŋkpɔ, enyuŋ etim enam se mike isaŋake ye mme ibet Abasi, ke ɔyɔhɔ isua ukara anaŋ ye usukkiet mme ebiere ikpe.

13 Edi edikem ke ɔyɔhɔ isua ukara anaŋ ye duop mme ebiere ikpe, ema enɔ mme owo ikpɔ idiɔŋɔ, ye mme utibe ŋkpɔ; ndien mme ikɔ mme prophet etɔŋɔ ndisu.

14 Ndien mme angel ema ewut mme owo idem, mme ɔfiɔk-ŋkpɔ owo, enyuŋ etiŋ nti mbuk akwa idaresit enɔ mmɔ; ke ntem ke isua emi se ewetde ke mme ŋwed Abasi etɔŋɔ ndisu.

15 Edi, mme owo etɔŋɔ ndisɔŋ esit mmɔ, kpukpru ibɔhɔke ekedi ubak mmɔ emi eketimde enim, mme Nephite nko ye mme Lamanite mbiba, ndien etɔŋɔ ndiberedem ke odudu mmɔ ye ke ifiɔk mmɔ, edɔhɔ ete:

16 Usuk mme ŋkpɔ mmɔ ema ekere nnen nnen, ke otu ata ediwak, edi esese, nnyin ima ifiɔk ite ke kpukpru akwa ye mme utibe ŋkpɔ emi ikemeke nditibe, emi etiŋde ebaŋa.

17 Ndien mmɔ etɔŋɔ ndikɔk ibuot ye ndineni ke ufɔt mmɔ, ete:

18 Idighe nnen nnen ete ke utɔ owo nte Christ eyedi; edieke edide ntre, ndien edieke enye edide Eyen Abasi, Ete enyɔŋ ye isɔŋ, nte etiŋde, ntak emi enye miwutke nnyin idem esie kpa ye mbon emi edidude ke Jerusalem?

19 Iŋ, ntak emi enye miwutke idem esie ke isɔŋ emi kpa ye ke isɔŋ Jerusalem?

20 Edi esese, nnyin imifiɔk ite ke emi edi idiɔk ido, emi mme ete nnyin ekeyakde enɔ nnyin, man enam nnyin ibuɔt idem ke akwa ye utibe ŋkpɔ emi editibede, edi idighe ke ufɔt nnyin, edi ke isɔŋ emi oyomde usuŋ, isɔŋ emi nnyin mifiɔkke; ke ntak oro mmɔ ekan enim nnyin ke unana ifiɔk, koro nnyin ikanke itie ntiense ye enyin nnyin ite ke mmɔ edi akpanikɔ.

21 Ndien mmɔ eyenam, oto ke ŋkari ye mme ndedibe utom idiɔk owo, usuk ndedibe ŋkpɔ emi nnyin mifiɔkke, emi edinimde nnyin ke isɔŋ man idi nditɔ ufɔk inɔ mme ikɔ mmɔ, nko ye nditɔ ufɔk inɔ mmɔ, koro nnyin iberede edem ke mmɔ ndikpep nnyin ikɔ; ndien ke ntem mmɔ eyenim nnyin ke unana ifiɔk edieke nnyin idiyakde idem nnyin inɔ mmɔ, ke ofuri eyo uwem nnyin.

22 Ye ediwak ŋkpɔ efen ke mme owo ekekere ke esit mmɔ, emi ekedide ndisime ye ikpikpu; ndien ama afina mmɔ eti eti, koro Satan ama edemere mmɔ ndinam ukwaŋ-ŋkpɔ kpukpru ini; iŋ, enye ama aka iso ndisuan mme etop emi owo mitimke inim ye mme eneni ke ofuri iso isɔŋ, man enye anam esit mme owo ɔsɔŋ abaŋa se idide eti ye se anade nte edi.

23 Ndien ke misehe mme idiɔŋɔ ye mme utibe ŋkpɔ emi ekenamde ke ufɔt ikɔt Jehovah, ye ediwak utibe ŋkpɔ emi mmɔ ekenamde, Satan ama etim omum esit mme owo ke ofuri iso isɔŋ.

24 Ndien ke ntem ke ɔyɔhɔ isua ukara anaŋ ye duop mme ebiere ikpe nnɔ ikɔt Nephi eketre.

25 Ndien ke ntem ke ŋwed Helaman eketre, nte ŋwed Helaman ye nditɔ esie edide.