1 Ndien edikem ete ke ini ɔyɔhɔ isua ukara ata ye iba mme ebiere ikpe ama eketre, kpukpru mme ŋkpɔ emi ema etibe ndien mme Lamanite ema ekabade, akamba ubak mmɔ, edi mme ndinen owo, tutu ete ke nnen nnen ido mmɔ ama akan eke mme Nephite, ke ntak nsɔŋɔ-nda mmɔ ye iwuk mmɔ ke edu-ukpono.

2 Koro sese, ediwak mme Nephite ema edu emi ekesɔŋde esit enyuŋ ikabakede esit enyuŋ ebak ibak ɔkpɔsɔŋ, tutu ete ke mmɔ ema esin ikɔ Abasi ye kpukpru ukwɔrɔ ikɔ ye nditiŋ nte prophet emi okodude ke otu mmɔ.

3 Edi, mbon ufɔk Abasi ema enyene akwa idaresit ke ntak nkabade esit mme Lamanite, iŋ, ke ntak ufɔk Abasi Abasi, emi ekesiakde ke otu mmɔ. Ndien mmɔ ema ebuana ye kiet eken, ndien ema edara ye kiet eken, ndien ema enyene akwa idaresit.

4 Ndien edikem ete ediwak mme Lamanite ema esuhɔde edi isɔŋ Zarahemla, enyuŋ etiŋ enɔ mbon mme Nephite usuŋ ukabade esit mmɔ, enyuŋ enɔ mmɔ item ebaŋa mbuɔtidem ye edikabade esit.

5 Iŋ, ndien ediwak ema ekwɔrɔ ikɔ ye ɔkpɔsɔŋ akwa odudu ye unen, tutu eda ediwak esuhɔde edi ntɔtuŋɔ nsuhɔre-idem, man edi mme ɔsuhɔde idem emi etienede Abasi ye Eyen erɔŋ.

6 Ndien edikem ete ediwak mme Lamanite ema eka isɔŋ ke edere edere; ndien ŋko Nephi ye Lehi ema eka isɔŋ ke edere edere, ndikwɔrɔ ikɔ nnɔ mme owo. Ndien ke ntem ke ɔyɔhɔ isua ata ye ita eketre.

7 Ndien sese, emem amadu ke ofuri isɔŋ, tutu ete mme Nephite ema eka ebiet ekededi emi mmɔ ekeyomde ndika ke isɔŋ oro, mme ke otu mme Nephite mme mme Lamanite.

8 Ndien edikem ete mme Lamanite ŋko ema eka ebiet ekededi emi mmɔ ekeyomde ndika, mme ekedi ke otu mme Lamanite mme mme Nephite; ndien ke ntem mmɔ ema enyene ebuana ye kiet eken, ke ndidep ye ke ndinyam, ye ke ndinyene udori, nte asaŋade ye uduak mmɔ.

9 Ndien edikem ete ke mmɔ ema enyene ekese inyene, mme Lamanite ye mme Nephite mbiba; ndien mmɔ ema enyene akpakip gold, ye sidibe, ye kpukpru utɔ nsɔŋ-urua ukwak, ke isɔŋ ke usuk usuk ye ke isɔŋ ke edere edere mbiba.

10 Idahaemi ekekot isɔŋ ke usuk usuk Lehi, ndien isɔŋ ke edere edere ekekot Mulek, emi ekekotde edian eyen Zedekiah; koro Jehovah ama ada Mulek edi isɔŋ ke edere edere, ye Lehi ke isɔŋ ke usuk usuk.

11 Ndien sese, kpukpru utɔ gold ema edu ke isɔŋ mbiba emi, ye sidibe, ye nsɔŋurua ukwak ke utɔ ke utɔ; ndien mme ɔfiɔk ubɔk utom ŋko ema edu, emi ekenamde utom ke kpukpru utɔ ukwak enyuŋ enam enye eye; ndien ke ntem mmɔ ema enyene inyene.

12 Mmɔ ema etɔ akpakip mkpasip, ke edem edere ye ke usuk mbiba; ndien mmɔ ema eforo ata eti eti, ke edem edere ye ke usuk mbiba. Ndien mmɔ ema etɔt enyuŋ ekɔri ekop odudu ata eti eti ke isɔŋ oro. Ndien mmɔ ema ebɔk mme ufene ye mme enaŋ, iŋ, ediwak enaŋ ubom.

13 Sese iban mmɔ ema enam utom enyuŋ efiak uruk ɔfɔŋ, enyuŋ enam utɔ kpukpru ɔfɔŋ, eke eti edifiak linen ye ɔfɔŋ ke utɔ ke utɔ, man efuk iferi mmɔ. Ndien ke ntem ɔyɔhɔ isua ata ye inaŋ ama ebe ke emem.

14 Ndien ke ɔyɔhɔ isua ata ye ition mmɔ ema enyene ŋko akwa idaresit ye emem, iŋ, ediwak ukwɔrɔ ikɔ ye mme prophecy kabaŋa sanade nte edi. Ndien ke ntem ke ɔyɔhɔ isua ata ye ition eketre.

15 Ndien edikem ete ke ɔyɔhɔ isua ukara ata ye itiokiet mme ebiere ikpe, sese, ubɔk emi owo mifiɔkke ama owot Cezoram nte enye eketiede ke itie ikpe. Ndien edikem ete ke kpa ke ukem isua oro, eyen esie, emi mme owo ekemekde ke itie esie, ema ewot ŋko. Ndien ke ntem ke ɔyɔhɔ isua ata ye itiokiet eketre.

16 Ndien ke ntɔŋɔ ɔyɔhɔ isua ata ye itiaba mme owo ema efiak etɔŋɔ ndibak ibak ata eti eti.

17 Koro sese, Jehovah amadiɔŋ mmɔ ke anyan ini ye mme inyene ererimbot tutu ete ke owo ikidemekede mmɔ inɔ iyatesit, inɔ mme ekɔŋ, mme inɔ uduɔk iyip; ke ntak oro mmɔ etɔŋɔ ndisin esit mmɔ ke mme inyene mmɔ; iŋ, mmɔ etɔŋɔ ndiyom ndinyene udori man mmɔ emenede ekan kiet eken, ke ntak oro mmɔ etɔŋɔ ndiwot mme owo ke ndibe, ye ndiyip inɔ nnyuŋ ndia ŋwo, man mmɔ enyene udori.

18 Ndien idahaemi sese, mme owot owo ye mme adia ŋwo oro ekedi ŋka emi Kishkumen ye Gadianton ekesiakde. Ndien idahaemi edikem ete ke ediwak ema edu, kpa ke otu mme Nephite, mbon ŋka Gadianton. Edi sese, mmɔ ema ewak ke ibat ekan ke otu ubak mme Lamanite ekebakde ibak ekan. Ndien ekekot mmɔ mme inɔ ye mme owot owo Gadianton.

19 Ndien ekedi mmɔ ekewot ada ibuot mme ebiere ikpe Cezoram, ye eyen esie, ke ini mmɔ eketiede ke itie ikpe; ndien sese, owo ikikwe mmɔ.

20 Ndien idahaemi edikem ete ke ini mme Lamanite ekekutde ete ke mme inɔ edu ke otu mmɔ mmɔ ema efuhɔ ata eti eti; ndien mmɔ ema edomo kpukpru usuŋ ke odudu mmɔ ndiwot mmɔ nsio ke iso isɔŋ.

21 Edi sese, satan ama edemede mme esit mme Nephite emi ekewakde ekan, tutu ete ke mmɔ ema ediana ye mme ŋka inɔ oro, ndien ema eduk ke mme ediomi ye mme uŋwɔŋɔ mmɔ, ete ke mmɔ eyekpeme enyuŋ etim kiet eken enim ke afanikɔŋ ndomo kiet emi edinimde mmɔ, man mmɔ ekubɔ ndutuhɔ ke mme uwot owo mmɔ, ye mme udia ŋwo mmɔ, ye mme inɔ mmɔ.

22 Ndien edikem ete ke mmɔ ema enyene mme idiɔŋɔ mmɔ, iŋ, mme ndedibe idiɔŋɔ mmɔ, ye mme ndedibe ikɔ mmɔ; ndien emi man mmɔ efiɔk eyeneka emi okodukde ke ediomi, man ibak ndomo kiet ekededi emi eyeneka esie edinamde enye ukubɔ ufen uto eyeneka esie, ŋko ye mbon emi edude ke ŋka oro, emi ekedukde ediomi emi.

23 Ndien ke ntem mmɔ ekan ewot owo, enyuŋ edia ŋwo, enyuŋ eyip inɔ, enyuŋ enam use ye kpukpru utɔ ibak, emi misaŋake ye mme mbet obio mmɔ ŋko ye mme mbet Abasi mmɔ.

24 Ndien owo ekededi emi odude ke ŋka mmɔ emi ediyarade ibak mmɔ ye mbubiam mmɔ inɔ ererimbot, eyebiom enye ikpe, idighe nte asaŋade ye mme mbet obio mmɔ, edi edi nte asaŋade ye mme mbet ibak mmɔ, emi Gadianton ye Kishkumen ekenɔde.

25 Idahaemi sese, edi mme ndedibe uŋwɔŋɔ ye mme ediomi emi ke Alma ɔkɔnɔ eyen esie uyo ete ekuduk ererimbot, mbak mmɔ ekudi usuŋ ndida mme owo nsuhɔde nduk nsobo.

26 Idahaemi sese, mme ndedibe uŋwɔŋɔ ye mme ediomi emi ikidighe idisim Gadianton ito mme ŋwed emi ekeyakde enɔ Helaman; edi sese, edi kpa owo oro emi akabiaŋade akpa ete ye eka nnyin ete edia mfri emi ekekpande ete ekudia ekesin mmɔ ke esit Gadianton—

27 Iŋ, kpa owo oro emi akanamde ubi ye Cain, ete ke edieke enye ediwotde eyeneka esie Abel ke ererimbot idifɔkke. Ndien enye amanam ubi ye Cain ye mme nsaŋa esie tɔŋɔ ke ini oro ka iso.

28 Ndien ŋko edi kpa owo oro ekesin ke esit mme owo ete ebɔp tower emi okoŋde ekem man mmɔ ekpesim heaven. Ndien ekedi kpa owo oro akabiaŋa mme owo emi eketode tower oro edi isɔŋ emi; emi ekesuande mme utom ekim ye mme mbubiam ke ofuri iso isɔŋ, tutu enye oduri mme owo ɔsuhɔde oduk ke ofuri nsobo, ye ke nsinsi hell.

29 Iŋ, edi kpa owo oro ekesin ke esit Gadianton ete osuk aka iso ye utom ekim, ye ndedibe uwot owo; ndien enye ada enye edi tɔŋɔ ke editɔŋɔ owo tutu esim ini emi.

30 Ndien sese, edi enye edi anditɔŋɔ kpukpru idiɔkŋkpɔ. Ndien sese, enye aka iso anam mme utom ekim esie ye ndedibe uwot owo, ndien ayak mme ubi mmɔ, ye mme eŋwɔŋɔ mmɔ, ye mme ediomi mmɔ, ye mme idiɔk uduak ibak mmɔ, tɔŋɔ ke emana ye emana nte enye akande ndinyene esit nditɔ owo.

31 Ndien idahaemi sese, enye etim omum esit mme Nephite akama; iŋ, tutu ete ke mmɔ ebak ibak ata eti eti; iŋ, ubak mmɔ emi ewakde ekan ema ewɔrɔ ekpɔŋ usuŋ nnennen ido, ndien edihi ke idak ikpat mmɔ mme ibet Abasi, enyuŋ eŋwɔŋɔde eduk usuŋ eke mmɔ, enyuŋ ebɔp mme ndem ke gold mmɔ ye sidibe mmɔ enɔ idem mmɔ.

32 Ndien edikem ete ke kpukpru mme ukwaŋ-ŋkpɔ emi ekedi wɔrɔ mmɔ ke ufaŋ isua emi mikiwakke, tutu ete ke akamba ubak esie ekedi wɔrɔ mmɔ ke ɔyɔhɔ isua ukara ata ye itiaba mme ebiere ikpe nnɔ ikɔt Nephi.

33 Ndien mmɔ ema ekɔri ke mme ukwaŋ-ŋkpɔ mmɔ ke ɔyɔhɔ isua ata ye itiaita ŋko, ke ɔkpɔsɔŋ mfuhɔ ye eseme ndinen owo.

34 Ndien ke emi nnyin ikut ite ke mme Nephite ema etɔŋɔ nditaha ke unana ndinim ke akpanikɔ, enyuŋ ekɔri ke ibak ye mme mbubiam, ke ini mme Lamanite eketɔŋɔde ndikɔri ata eti eti ke ifiɔk Abasi mmɔ; iŋ, mmɔ ema etɔŋɔ ndinim mme ewuhɔ ye mme ibet esie, ye ndisaŋa ke akpanikɔ ye ke edinen ke iso esie.

35 Ndien ke emi nnyin ikut ite ke Spirit Jehovah ama ɔtɔŋɔ ndidaha mkpɔŋ mme Nephite, ke ntak ibak ye isɔŋesit mmɔ.

36 Ndien ke emi nnyin ikut ite ke Jehovah ama ɔtɔŋɔ ndiŋwaŋa Spirit esie nnɔ mme Lamanite, ke ntak edide mmem mmem ye unyime mmɔ ndinim mme ikɔ esie ke akpanikɔ.

37 Ndien edikem ete ke mme Lamanite ema eyom ŋka mme inɔ Gadianton oro; ndien mmɔ ema ekwɔrɔ ikɔ Abasi ke otu mmɔ emi ekebakde ibak ekan, tutu ete ke ema esobo ŋka mme inɔ emi ofuri ofuri ke otu mme Lamanite.

38 Ndien edikem ke ubɔk efen, ete ke mme Nephite ema ebok mmɔ enyuŋ eŋwam mmɔ, ɔtɔŋɔde ke ubak mmɔ emi ekebakde ibak ekan, tutu mmɔ ema esuana ke ofuri isɔŋ mme Nephite, ndien ema etap ubak ndinen owo emi ekewakde tutu mmɔ ema esuhɔde edinim ke akpanikɔ mme utom mmɔ enyuŋ ebuana ke mme udia-ŋwo mmɔ, ye ndidiana ye mmɔ ke mme ndedibe uwot owo ye mme ebuana mmɔ.

39 Ndien ke ntem mmɔ ema eda ukara enyene ikpɔŋ, tutu ete ke mmɔ ema edihi ke idak ikpat mmɔ enyuŋ emia enyuŋ ekɔbɔ enyuŋ eŋwɔŋɔde edem mmɔ ewut mme ubuene ye mme suŋ-suŋ owo, ye mbon nsuhɔde-idem emi eketienede Abasi.

40 Ndien ke ntem nnyin ikut ite ke mmɔ ekedu ke idiɔk idaha, ke enyuŋ edat enɔ nsinsi nsobo.

41 Ndien edikem ete ke ntem ke ɔyɔhɔ isua ukara ata ye itiaita mme ebiere ikpe nnɔ ikɔt Nephi eketre.