1 Ndien edikem ke ɔyɔhɔ isua aba ye duopenaŋ ke uwak utɔk ema edu ke ufɔk Abasi, ndien eneni ama odu ke otu mme owo, tutu ete ke uduɔk iyip ama odu.

2 Ndien mbon emi ekesɔŋde ibuot ema ewot enyuŋ ebin esio ke isɔŋ oro, ndien mmɔ ema eka ebine edidem mme Lamanite.

3 Ndien edikem ete ke mmɔ ema edomo ndidemede mme Lamanite ke ekɔŋ ye mme Nephite; edi sese, ɔkpɔsɔŋ ndik amamum mme Lamanite, tutu ete ke mmɔ ikikpaŋke utɔŋ inɔ mme ikɔ mbon mfaŋa oro.

4 Edi edikem ke ɔyɔhɔ isua ukara aba ye efuteekiet mme ebiere ikpe, mbon mfaŋa ema edu emi ekedɔkde eto mme Nephite ebine mme Lamanite; ndien mmɔ ema ekeme ye mbon eken oro ndidemede mmɔ ke iyatesit mbaŋa mme Nephite; ndien mmɔ ke ofuri isua oro ekebeŋe idem enɔ ekɔŋ.

5 Ndien ke ɔyɔhɔ isua aba ye efutebaba mmɔ ema esuhɔde edi eŋwan ye mme Nephite, ndien mmɔ ema etɔŋɔ utom mkpa; iŋ, tutu ete ke ɔyɔhɔ isua ukara aba ye duop ye itiaita mme ebiere ikpe ke mmɔ ema ekan eda isɔŋ Zarahemla enyene; iŋ, ye ŋko kpukpru mme isɔŋ, tutu esim isɔŋ emi ekekperede isɔŋ Bountiful.

6 Ndien ema ebin mme Nephite ye mme mbon ekɔŋ Moronihah esin ke isɔŋ Bountiful.

7 Ndien mmɔ ema ebeŋe idem ebaŋa mme Lamanite, ke edem usoputin inyaŋ, tutu ke edem usiahautin, ke enye edide isaŋ usen kiet ɔnɔ owo Nephite, ekperede usuŋ emi mmɔ ekekpemede enyuŋ enimde mme mbon ekɔŋ mmɔ ndikpeme obio mmɔ ke edem edere.

8 Ndien ke ntem mbon mfaŋa mme Nephite oro, ye uŋwam ata ediwak mbon ekɔŋ mme Lamanite, ema enyene ofuri mme Nephite emi ekedude ke isɔŋ ke usuk usuk. Ndien kpukpru emi ekenam ke mme ɔyɔhɔ isua ukara aba ye efuteta ye efutenaŋ mme ebiere ikpe.

9 Ndien edikem ke ɔyɔhɔ isua ukara ata mme ebiere ikpe, Moronihah ama akan ye mbon ekɔŋ esie ke ndinyene ediwak mme ubak isɔŋ; iŋ, mmɔ ema efiak enyene ediwak obio emi ekeduɔde eduk ke ubɔk mme Lamanite.

10 Ndien edikem ke ɔyɔhɔ isua ukara ata ye kiet mme ebiere ikpe mmɔ ema ekan enyene kpa ibio kpukpru mme inyene mmɔ.

11 Idahaemi akwa ntak-urua mme Nephite emi, ye akpakip uwot owo emi okodude ke otu mmɔ, ikpikitibeke ekpedi ikidighe ke ntak ibak mmɔ ye mbubiam mmɔ emi okodude ke otu mmɔ; iŋ, ndien ekedi ke otu mbon emi ekedɔhɔde ke idu ke ufɔk Abasi Abasi.

12 Ndien ekedi ke ntak ntaŋidem esit mmɔ, ke ntak uwak inyene mmɔ, iŋ, ekedi ke ntak mmɔ ekefikde mme ubuene, esinde ndinɔ mbon ɔbiɔŋ udia mmɔ, esinde ndinɔ mbon iferi ɔfɔŋ mmɔ, enyuŋ emiade nditɔ eka mmɔ emi ekesuhɔdede idem ke mfuk, esakde sikidide edisana, ekaŋde spirit prophecy ye eke ediyarade, ewotde owo, ediade ŋwo, esude nsu, eyipde inɔ, esinde efibe, edahade eda ke mkpɔsɔŋ eneni, ye efehede ekeduk isɔŋ Nephi, ke otu mme Lamanite—

13 Ndien ke ntak ɔkpɔsɔŋ ibak mmɔ emi, ye mme mbure mmɔ ke odudu mmɔ, ema eyak mmɔ esin ke odudu mmɔ; ke ntak oro mmɔ ikiforoke, edi ema enam mmɔ ukut enyuŋ emia, enyuŋ ebin ke iso mme Lamanite, tutu mmɔ enana ekpri ayak ofuri isɔŋ mmɔ.

14 Edi sese, Moronihah ama ɔkwɔrɔ uwak ŋkpɔ ɔnɔ mme owo ke ntak ukwaŋ-ŋkpɔ mmɔ, ye ŋko Nephi ye Lehi, emi ekedide nditɔ Helaman, ema ekwɔrɔ uwak ŋkpɔ enɔ mme owo, iŋ, enyuŋ etiŋ nte prophet ebaŋa uwak ŋkpɔ enɔ mmɔ kabaŋa mme ukwaŋ-ŋkpɔ mmɔ, ye siditienede mmɔ edieke mmɔ mikabakede esit ke mme idiɔk ŋkpɔ mmɔ.

15 Ndien edikem ete ke mmɔ ema ekabade esit, ndien kadaŋa nte mmɔ ema ekekabade esit mmɔ ema etɔŋɔ ndiforo.

16 Koro ke ini Moronihah okutde ete ke mmɔ ema ekabade esit enye ama odomo ndida mmɔ usuŋ ke ebiet ye ebiet, ye ke obio ye obio, tutu mmɔ efiak enyene ibio inyene mmɔ ye ibio kpukpru isɔŋ mmɔ.

17 Ndien ke ntem ke ɔyɔhɔ isua ukara ata ye kiet mme ebiere ikpe eketre.

18 Ndien edikem ke ɔyɔhɔ isua ukara ata ye iba mme ebiere ikpe, ete Moronihah ikanke aba ibɔ mme inyene ito mme Lamanite.

19 Ke ntak oro mmɔ ema ekpɔŋ uduak mmɔ ndibɔ mme nsuhɔ isɔŋ mmɔ, koro mme Lamanite ema ewak eti eti ete ke usuŋ ikiduhe inɔ mme Nephite ndinyene odudu efen ke idem mmɔ; ke ntak oro Moronihah ama ada ofuri mme mbon ekɔŋ esie ekpeme mme ŋkaŋ oro emi enye ɔkɔbɔde.

20 Ndien edikem, ke ntak uwak ibat mme Lamanite mme Nephite ekedu ke ɔkpɔsɔŋ ndik, mbak mme Lamanite idikan mmɔ ubɔk, inyuŋ idihi, inyuŋ iwot inyuŋ isobo mmɔ.

21 Iŋ, mmɔ etɔŋɔ nditi mme prophecy Alma, ye ŋko mme ikɔ Mosiah; ndien mmɔ ema ekut ete ke mmɔ ekedi mbon nsɔŋ-ibuot, ndien ete ke mmɔ ema esin mme ibet Abasi;

22 Ndien ete ke mmɔ ema ekpuhɔ enyuŋ edihi ke idak ikpat mmɔ mme mbet Mosiah, mme enye emi Jehovah ɔkɔnɔde enye uyo ete ɔnɔ mme owo; ndien mmɔ ekut ete ke mme mbet mmɔ ema ebiara, ndien ete ke mmɔ ema ekabade edi mbon ibak, tutu ete ke mmɔ ema ebak ibak kpa nte mme Lamanite.

23 Ndien ke ntak ukwaŋ-ŋkpɔ mmɔ ufɔk Abasi ama ɔtɔŋɔ nditaha; ndien mmɔ etɔŋɔ nditre ndinim ke akpanikɔ spirit prophecy ye spirit ediyarade; ndien mme ubiere ikpe Abasi ema owuk enyin ese mmɔ ke iso.

24 Ndien mmɔ ema ekut ete ke idem ama emem mmɔ, nte nditɔeka mmɔ, mme Lamanite, ndien ke Spirit Jehovah ikitimke mmɔ inim aba; iŋ, ama adaha ɔkpɔŋ mmɔ koro Spirit Jehovah isiduŋke ke mme temple emi misanake—

25 Ke ntak oro Jehovah ama etre nditim mmɔ nnim ke utibe ye anana mbiet odudu esie, koro mmɔ ema eduɔ eduk idaha unana mbuɔtidem ye idiɔk ibak; ndien mmɔ ema ekut ete ke mme Lamanite ema ewak ata eti eti ekan mmɔ, ndien ibɔhɔke mmɔ esɔŋɔ emum Jehovah Abasi mmɔ ekama mmɔ eyekpa owo ikanke inyaŋa.

26 Koro sese, mmɔ ema ekut ete ke odudu mme Lamanite ama ɔsɔŋ nte odudu mmɔ, kpa eden ye eden. Ndien ke ntem mmɔ ema eduɔ eduk ɔkpɔsɔŋ ndudue emi; iŋ, ke ntem mmɔ ema ekabade emem idem, ke ntak ndudue mmɔ, ke ufaŋ isua miwakke.