Ŋwed Mormon
Mbuk mme Nephite. Mme ekɔŋ ye mme eneni mmɔ, ye mme utɔk mmɔ. Ŋko ye mme prophecy ediwak ndisana prophet, mbemiso Christ edi, nte asaŋade ye mme ŋwed Helaman, emi ekedide eyen Helaman, ŋko ye nte asaŋade ye mme ŋwed nditɔ esie, tutu ɔsuhɔde esim edidi Christ. Ndien ŋko ediwak mme Lamanite ekabade esit. Mbuk edikabade esit mmɔ. Mbuk nnennen ido mme Lamanite, ye ibak ye mme mbubiam mme Nephite, nte asaŋsade ye ŋwed Helaman ye nditɔ esie, tutu ɔsuhɔde esim edidi Christ, emi ekotde ŋwed Helaman, ye mme ŋkpɔ efen.
Ibuot 1
Pahoran ɔyɔhɔ iba akabade edi ada ibuot mme ebiere ikpe ndien Kishkumen owot enye—Pacumeni ada itie ikpe—Coriantumr ada mme mbon ekɔŋ mme Lamanite usuŋ, omum Zarahemla, onyuŋ owot Pacumeni—Moronihah akan mme Lamanite onyuŋ afiak enyene Zarahemla, ndien ewot Coriantumr. Ŋkpɔ nte 52 -50 M.C.
1 Ndien idahaemi sese, edikem ke ntɔŋɔ ɔyɔhɔ isua ukara aba mme ebiere ikpe nnɔ ikɔt Nephi, ata ɔkpɔsɔŋ mfina ɔtɔŋɔ ndidu ke otu mbon Nephite.
2 Koro sese, Pahoran ama akpa, onyuŋ aka usuŋ ofuri ererimbot; ke ntak oro ɔkpɔsɔŋ eneni ama ɔtɔŋɔ ndidu kabaŋa owo emi anade nte enyene itie ikpe ke otu nditɔ eka, emi ekedide nditɔ Pahoran.
3 Idahaemi emi edi mme enyiŋ mmɔ emi ekenenide eneni eyom itie ikpe, emi ŋko ekenamde mme owo eneni eneni: Pahoran, Paanchi, ye Pacumeni.
4 Idahaemi emi idighe ofuri nditɔ Pahoran (koro enye ama enyene ediwak), edi emi edi mmɔ emi ekenenide eneni eyom itie ikpe; ke ntak oro, mmɔ ema enam ubahade ita ke otu mme owo.
5 Edi, edikem ete ema emek Pahoran ke uyo mme owo ete edi ada ibuot mme ebiere ikpe ye andikara nnɔ ikɔt Nephi.
6 Ndien edikem ete Pacumeni, ke ini enye okokutde ete ke enye ikanke inyene itie ikpe, enye ama adiana ye uyo mme owo.
7 Edi sese, Paanchi, ye ubak mbon oro emi ekeyomde ete enye edi andikara mmɔ, ama eyatesit ata eti eti; ke ntak oro, enye ama oyom ndida nnem-inua nnam mbon oro edaha eda ke nsɔŋibuot ye nditɔ eka mmɔ.
8 Ndien edikem ke ini enye okoyomde ndinam emi, sese, ema emum enye, enyuŋ ekpe ikpe enɔ enye nte asaŋade ye uyo owo, ndien ebiom enye ikpe enɔ mkpa; koro enye ama adaha ada ke nsɔŋibuot onyuŋ oyom ndibiat uwɔrɔ ufin mme owo.
9 Idahaemi ke ini mbon oro emi ekeyomde ete enye edi andikara mmɔ ekutde ete ke ebiom enye ikpe enɔ mkpa, ke ntak oro mmɔ ema eyatesit, ndien sese, mmɔ edɔŋ Kishkumen, ete aka itie ikpe Pahoran, onyuŋ okowot enye ke ini enye etiede ke itie ikpe.
10 Ndien nditɔ-ufɔk Pahoran ema ebine enye; edi sese, itɔk Kishkumen ama ɔsɔp eti eti ete ke owo ndomo kiet ikikanke isime enye.
11 Ndien enye aka ebine mbon emi ekedɔŋde enye, ndien mmɔ kpukpru eduk ke ediomi, iŋ, etomo ke nsinsi Andibot mmɔ, ete ke mmɔ ididɔhɔke owo ndomo kiet ete ke Kishkumen okowot Pahoran.
12 Ke ntak oro, owo ikifiɔkke Kishkumen ke otu ikɔt Nephi, koro enye ama ɔkpuhɔde idem ke ini emi enye okowotde Pahoran. Ndien Kishkumen ye ŋka esie, emi ekediomide ye enye, ema ebuaha idem mmɔ ke otu mme owo, ke usuŋ emi owo mikikemeke ndikut kpukpru mmɔ; edi kpa nte ediwak mmɔ emi ekekutde ema ebiom mmɔ ikpe enɔ mkpa.
13 Ndien idahaemi sese, ekemek Pacumeni, nte asaŋade ye uyo mme owo, ete edi ada ibuot mme ebiere ikpe ye andikara nnɔ mme owo, ndikara ke itie eyeneka eise Pahoran; ndien ekedi nte asaŋade ye unen esie. Ndien ekenam kpukpru emi ke ɔyɔhɔ isua ukara aba mme ebiere ikpe; ndien ama enyene utit.
14 Ndien edikem ke ɔyɔhɔ isua ukara aba ye kiet mme ebiere ikpe, ete ke mme Lamanite ema etaŋ anana ibat mbon ekɔŋ mme owo ebok, enyuŋ enɔ mmɔ mme akaŋkaŋ, ye mme ikwa ye mme utigha, ye mme idaŋ, ye mme ukwak ukpeme ibuot, ye mme ukwak ikpanesit, ye utɔ kpukpru ukwak ukpeme idem ke utɔ ke utɔ.
15 Ndien mmɔ efiak esuhɔde edi man mmɔ eŋwana eŋwan ye mme Nephite. Ndien owo emi enyiŋ esie ekedide Coriantumr akada mmɔ usuŋ; ndien enye okoto ubon Zarahemla; ndien enye ekedi owo emi ɔkɔwɔrɔde ɔkpɔŋ otu mme Nephite; ndien enye ekedi akamba ye enyene odudu edenowo.
16 Ke ntak oro, edidem mme Lamanite, emi enyiŋ esie ekedide Tubaloth, emi ekedide eyen Ammoron, ekerede ete ke Coriantumr, sia edide enyene odudu owo, eyekeme ndibiɔŋɔ mme Nephite, ye odudu esie ŋko ye akwa ifiɔk esie, tutu ete ke ndidɔŋ enye aka ke enye eyenyene odudu ke idem mme Nephite—
17 Ke ntak oro enye ama edemede mmɔ ke iyatesit, ndien enye ama osobo mme mbon ekɔŋ esie ɔtɔ kiet, ndien enye ama emek Coriantumr ete edi ada usuŋ mmɔ, ndien enye amanam ete mmɔ esaŋa eka isɔŋ Zarahemla ndiŋwana ye mme Nephite.
18 Ndien edikem ete ke ntak ɔkpɔsɔŋ eneni ye ɔkpɔsɔŋ mfina ke ukara, ete ke mmɔ ikinimke mbon ukpeme emi ekemde ke isɔŋ Zarahemla; koro mmɔ ekekere ke mme Lamanite ididukke esit mme isɔŋ mmɔ ndiŋwana ye akwa obio oro Zarahemla.
19 Edi edikem ete ke Coriantumr ama asaŋa ke ibuot uwak udim esie, onyuŋ ediŋwana ye mme andiduŋ ke obio oro, ndien isaŋ mmɔ ama ɔsɔp ata eti eti ete ke ini ikiduhe inɔ mme Nephite ndisobo mbon mme ekɔŋ mmɔ ɔtɔ kiet.
20 Ke ntak oro Coriantumr ama owot mbon ukpeme emi ekedude ke usuŋ emi esaŋade eduk obio oro, ndien onyuŋ asaŋa ye ofuri mbon ekɔŋ esie oduk obio oro, ndien mmɔ ema ewot kpukpru owo emi ekebiɔŋɔde mmɔ, tutu ete ke mmɔ ema eda ofuri obio oro enyene.
21 Ndien edikem ete ke Pacumeni, emi ekedide ada ibuot mme ebiere ikpe, ama efehe ke iso Coriantumr, ekesim mme ibibene obio oro. Ndien edikem ete ke Coriantumr ama amia enye ke ibibene, tutu enye akpa. Ndien ke ntem ke eyo Pacumeni eketre.
22 Ndien idahaemi ke ini Coriantumr okutde ete ke enye ama enyene obio Zarahemla, onyuŋ okut ete ke mme Nephite ema efehe ke iso mmɔ, enyuŋ ewot, enyuŋ emum, ndien etop esin ke ufɔk ŋkpɔkɔbi, ndien ete ke enye ama enyene ata ɔkpɔsɔŋ ebiet ke ofuri isɔŋ, esit esie ama ɔbɔ uko tutu ete ke enye amakpere ini ndika eŋwan ye ofuri isɔŋ.
23 Ndien idahaemi enye ikisuhɔke ke isɔŋ Zarahemla, edi enye ama asaŋa ye ediwak mbon ekɔŋ, ke akpanikɔ aka obio Bountiful; koro ekedi mkpe-mbiere esie ndika iso nyuŋ mkpi usuŋ esie mbe ye akaŋkaŋ, man enye enyene isɔŋ ke ŋkaŋ edem edere.
24 Ndien, ke ekerede ete ke odudu mmɔ emi ɔsɔŋde akan okodu ke ufɔt isɔŋ, ke ntak oro enye ama asaŋa aka, inɔhɔ mmɔ ini ndisobo idem mmɔ ɔtɔ kiet ibɔhɔke ekedi ke mkpri eboho; ndien ke utɔ usuŋ emi mmɔ ema eŋwana ye mmɔ enyuŋ ekpi mmɔ ebono ke isɔŋ.
25 Edi sese, isaŋ Coriantumr emi mbe ke ufɔt isɔŋ oro ama ɔnɔ Moronihah akamba ufɔn abaŋa mmɔ, isehe akamba ibat mme Nephite emi eke ewotde.
26 Koro sese, Moronihah ama ekere ete ke mme Lamanite ididomoke ndiduk ufɔt isɔŋ, edi ete ke mmɔ eyeŋwana ye mme obio emi akanadede mme adaŋa ekuk nte mmɔ ekenamde ke akpa; ke ntak oro Moronihah ama anam ete yak mme mbon ekɔŋ mmɔ emi esɔŋde idem ekpeme mme ŋkaŋ oro ekanade mme adaŋa ekuk.
27 Edi sese, idem ikinyekke mme Lamanite nte enye okoyomde, edi mmɔ ema ediduk ke ufɔt isɔŋ, enyuŋ emum akpan obio emi ekedide obio Zarahemla, ndien kesaŋa ebe ke mme akpan ŋkaŋ isɔŋ, ewot mme owo ye akpakip uwotowo, mbiba iden, iban, ye nditɔŋwɔŋ, eda ediwak obio enyene ye ediwak mkpɔsɔŋ ebiet.
28 Edi ke ini Moronihah amakɔfiɔk emi, enye ye unana ubiatini ɔdɔŋ Lehi ye mbon ekɔŋ ekanade man ebiɔŋɔ mmɔ mbemiso mmɔ edisim isɔŋ Bountiful.
29 Ndien ntem ke enye akanam; ndien enye amabiɔŋɔ mmɔ mbemiso mmɔ edisim isɔŋ Bountiful, onyuŋ aŋwana ye mmɔ, tutu ete mmɔ etɔŋɔ ndifiak edem ŋka isɔŋ Zarahemla.
30 Ndien edikem ete Moronihah amabiɔŋɔ mmɔ ke mfiak-edem mmɔ, ndien ama aŋwana ye mmɔ, tutu ete ke ama akabade edi ata ɔkpɔsɔŋ eŋwan emi ɔyɔhɔde ye iyip; iŋ, ema ewot ediwak, ndien ke otu ibat owo emi ekewotde ema ekut Coriantumr ŋko.
31 Ndien idahaemi, sese, mme Lamanite ikikanke ifiak edem ke usuŋ ndomo kiet, idighe ke edem edere, mme ke usuk usuk, mme ke edem usiaha utin, mme ke edem usop utin, koro mme Nephite ema ekanade mmɔ ekuk ke ofuri ŋkaŋ.
32 Ndien ke ntem ke Coriantumr eke esin mme Lamanite ke otu mme Nephite, tutu ete ke mmɔ ekedu ke idak odudu mme Nephite, ndien ema ewot enye ke idem esie, ndien mme Lamanite ema eyak idem mmɔ esin ke ubɔk mme Nephite.
33 Ndien edikem ete ke Moronihah ama afiak ada obio Zarahemla enyene, ndien anam ete yak mme Lamanite emi ekemumde nte mbon ŋkpɔkɔbi ewɔrɔ ke isɔŋ oro ke emem.
34 Ndien ke ntem ke ɔyɔhɔ isua ukara aba ye kiet mme ebiere ikpe eketre.