1 Ndien idahaemi, ndima nditɔ eka mi, esese, ami ndɔhɔ mbufo nte ibɔhɔke mbufo ekabare esit eyeyak ufɔk mbufo enɔ mbufo nte ndon.

2 Iŋ, ibɔhɔke mbufo ekabare esit, iban mbufo eyenyene akwa ntak ndifuhɔ ke usen mmɔ edinɔde nditɔ eba; koro mmɔ eyeyom ndifehe ndien ebiet udibe ididuhe; iŋ, ndien eyedɔdiɔk ɔnɔ mmɔ emi eyomode, koro mmɔ eyedobi ndien ikanke ifehe; ke ntak oro, eyedihi mmɔ ndien eyeyak mmɔ ete etak.

3 Iŋ, eyedɔdiɔk ɔnɔ mbon emi emi ekotde ikɔt Nephi ibɔhɔke mmɔ eyekabare esit, ke ini mmɔ edikutde kpukpru mme idiɔŋɔ ye mme utibe ŋkpɔ emi ediwutde mmɔ; koro esese, mmɔ ekedi mbon emi Jehovah ekemekde; iŋ, ikɔt Nephi ke enye ama, ndien nko ke enye etunɔ mmɔ; iŋ, ke mme usen ukwaŋ-ŋkpɔ mmɔ ke enye etunɔ mmɔ ke ntak emi enye amade mmɔ.

4 Edi esese nditɔ eka mi, mme Lamanite ke enye asua koro mme utom edi idiɔk kpukpru ini, ndien emi ke ntak ukwaŋ-ŋkpɔ ido mme ete mmɔ. Edi esese, erinyaŋa edi etiene mmɔ oto ke ukwɔrɔ ikɔ mme Nephite; ndien ke ntak emi ke Jehovah anam mme usen mmɔ ebighi.

5 Ndien ami meyom nte yak mbufo ekut ete ke ubak mmɔ emi ewakde ekan edu ke usuŋ utom mmɔ, ndien mmɔ etim esaŋa ke iso Abasi, ndien mmɔ ekpeme ndinim mme ibet esie ye mme ewuhɔ esie ye mme ubiere ikpe esie nte ibet Moses edide.

6 Iŋ, ami ndɔhɔ mbufo, nte ke ubak mmɔ emi ewakde ekan ke enam emi, ndien mmɔ ke edomo ye nsin ifik emi mikpaha mba man mmɔ eda nyɔhɔ nsuhɔ nditɔ eka mmɔ edi ifiɔk akpanikɔ; ke ntak oro ediwak edu emi edianade ke ibat mmɔ ke usen ke usen.

7 Ndien esese, mbufo emefiɔk ke idem mbufo, koro mbufo emetie ntiense ebaŋa enye, koro kadaŋa nte ediwak mmɔ emi edade edi ifiɔk akpanikɔ, ye ndifiɔk idiɔk ye mbubiam ido mme ete mmɔ, ndien eda mmɔ ete ebuɔtidem ke edisana ŋwed Abasi, iŋ, mme prophecy mme prophet, emi ewetde, emi adade mmɔ aka mbuɔtidem ke Jehovah, ye erikabare esit, mbuɔtidem ye erikabare esit emi adade ukpuhɔre ke esit ɔsɔk mmɔ—

8 Ke ntak oro, kadaŋa nte ediwak emi enyenede emi, mbufo emefiɔk ke idem mbufo ke enyene iwuk enyuŋ esɔŋɔeda ke akpanikɔ, ye ke ŋkpɔ emi enamde mmɔ ebɔhɔ.

9 Ndien mbufo emefiɔk nko ete ke mmɔ ebuk mme ŋkpɔ ekɔŋ mmɔ, ndien mmɔ efehe ndimen mmɔ mbak ke usuŋ ndomo kiet mmɔ enam idiɔk ŋkpɔ; iŋ, mbufo emekeme ndikut ete ke mmɔ efehe ndinam idiɔk ŋkpɔ—koro esese mmɔ idiyakke idem mmɔ inɔ ete mme asua mmɔ edighi enyuŋ ewot, ndien idimenekere ofut mmɔ ibaŋa mmɔ, ndien emi ke ntak mbuɔtidem mmɔ ke Christ.

10 Ndien idahaemi, ke ntak nsɔŋɔnda mmɔ ke ini mmɔ ebuɔtde idem ke ŋkpɔ oro emi mmɔ ebuɔtde idem, koro ke ntak iwuk mmɔ ke ini enamde aŋwaŋa mmɔ, esese, Jehovah eyediɔŋ mmɔ onyuŋ anam mme usen mmɔ ebighi, isehe ukwaŋ-ŋkpɔ mmɔ—

11 Iŋ, edieke mmɔ etahade ke unana edinim Jehovah eyenam mme usen mmɔ ebihi, tutu ini edi emi mme ete nnyin eketiŋde ebaŋa, nko ye prophet Zenos, ye ediwak prophet eken, kabaŋa ndifiak nnim nditɔ eka nnyin, mme Lamanite, ke itie ifiɔk akpanikɔ—

12 Iŋ, ami ndɔhɔ mbufo, nte ke mme ini iso ke mme eŋwɔŋɔ Jehovah eyesim nditɔ eka nnyin, mme Lamanite; ndien ke misehe ediwak ukut emi mmɔ edinyenede, ndien ke misehe ke eyebin mmɔ enɔ iso ye edem ke iso isɔŋ, enyuŋ eyom, ndien eyemia enyuŋ esuan ke aŋwa, ke minyeneke ebiet udibe, Jehovah eyenyene mbɔm abaŋa mmɔ.

13 Ndien emi edi nte prophecy edide, ete ke eyefiak eda mmɔ edi ke ata ifiɔk, emi edide ifiɔk Andifak mmɔ, ye akwa ye ata ekpeme-erɔŋ mmɔ, enyuŋ ebat mmɔ esin ke otu erɔŋ esie.

14 Ke ntak oro ami ndɔhɔ mbufo, ke eyefɔn ye mmɔ akan mbufo ibɔhɔke mbufo ekabare esit.

15 Koro esese, ekpedi ema ewut mmɔ ikpɔ utom emi ekewutde mbufo, iŋ, mmɔ emi etahade ke unana edinim ke ntak mme ido mme ete mmɔ, mbufo eyekut ke idem mbufo ete ke mbufo idifiakke itaha aba ke unana edinim.

16 Ke ntak oro, ke Jehovah ɔdɔhɔ ete: Ke akpanikɔ ami ndisoboke mmɔ ofuri ofuri, edi nyenam ete ke usen ifiɔk mi mmɔ eyefiak enyɔŋ edi etiene mi, ntem ke Jehovah ɔdɔhɔ.

17 Ndien idahaemi esese, Jehovah ɔdɔhɔ, kabaŋa mbon mme Nephite: Edieke mmɔ midikabakere esit, inyuŋ ikpeme ndinam uduak mi, ami nyesobo mmɔ ofuri ofuri, Jehovah ɔdɔhɔ, ke ntak unana edini mmɔ nsehe ediwak ikpɔ utom emi ami nnamde ke ufɔt mmɔ; ndien ke akpanikɔ adaŋa nte Jehovah odude uwem ke mme ŋkpɔ emi editibe, Jehovah ɔdɔhɔ.