1 Ndien edikem ete kpa ke isua emi, sese, Nephi ama ayak itie ikpe ɔnɔ edenowo emi enyiŋ esie ekedide Cezoram.

2 Koro nte edide ete ke ekedi uyo mme owo akasiak mme mbet ye mme ukara mmɔ, ndien mbon emi ekemekde idiɔk ema ewak ekan mbon emi ekemekde eti, ke ntak oro mmɔ ekedat enɔ nsobo, koro mme mbet ema ebiara.

3 Iŋ, ndien emi ikidighe kpukpru; mmɔ ekedi mbon nsɔŋ-ibuot, tutu ete ke mbet ye unenikpe ikanke ikara mmɔ, ibɔhɔke ekedi ke ndisobo mmɔ.

4 Ndien edikem ete ke Nephi amakop ɔkpɔsɔŋ mfuhɔ ke ntak ukwaŋ-ŋkpɔ mmɔ; ndien enye asana itie ikpe ayak, onyuŋ ada ɔnɔ idem esie ndikwɔrɔ ikɔ Abasi ke ofuri nsuhɔ eyo esie, ye eyeneka esie Lehi ŋko, ke ofuri nsuhɔ eyo esie;

5 Koro mmɔ ema eti mme ikɔ emi ete mmɔ Helaman eketiŋde ɔnɔ mmɔ. Ndien emi edi mme ikɔ emi enye eketiŋde:

6 Esese, nditɔ mi, ami nyom nte yak mbufo eti ndinim mme ibet Abasi; ndien ami nyom nte yak mbufo etiŋ mme ikɔ emi enɔ mme owo. Esese, ami mɔnɔ mbufo mme enyiŋ mme akpa ete nnyin emi ekewɔrɔde ke isɔŋ Jerusalem; ndien emi ami nnam nte ke ini mbufo etide enyiŋ mbufo mbufo eyeti mmɔ; ndien ke ini mbufo etide mmɔ mbufo eyeti mme edinam mmɔ; ndien ke ini mbufo etide mme edinam mmɔ mbufo eyefiɔk nte edɔhɔde ete, ŋko ye ewetde, ete ke mmɔ ema efɔn.

7 Ke ntak oro, nditɔ mi, ami nyom nte yak mbufo enam sifɔnde, man ekpetiŋ ebaŋa mbufo, ndien ŋko ekpewet, kpa nte etiŋde enyuŋ ewetde ebaŋa mmɔ.

8 Ndien idahaemi nditɔ mi, esese ami menyene mme ŋkpɔ efen ndiyom nto mbufo, se nyomde edi, nte mbufo ekunam mme ŋkpɔ emi man mbufo ebure mbure, edi yak mbufo enam mme ŋkpɔ emi ndinim mme ŋkpɔ uto nnɔ idem mbufo ke heaven, iŋ, emi edide nsinsi, emi midibiarake; iŋ, man mbufo enyene enɔ ukpono eke nsinsi uwem, emi nnyin inyenede ntak ndikere ke ema enɔ mme ete nnyin.

9 O eti, eti, nditɔ mi, mme ikɔ emi edidem Benjamin eketiŋde ɔnɔ ikɔt esie ; iŋ, eti ete ke usuŋ mme ŋkpɔ efen iduhe emi ekemede ndinyaŋa owo, ibɔhɔke oto ke iyip usio-isop Jesus Christ, emi edidide; iŋ, eti ete ke enye kedi ndifak ererimbot.

10 Ndien eti ŋko mme ikɔ emi Amulek eketiŋde ɔnɔ Zeezrom, ke obio Ammonihah; koro enye ama ɔdɔhɔ enye ete ke akpanikɔ ke Jehovah eyedi ndifak ikɔt esie, edi ke enye ididihe ndifak mmɔ ke mme idiɔk ŋkpɔ mmɔ, edi ndifak mmɔ nsio ke mme idiɔk ŋkpɔ mmɔ.

11 Ndien ke enye enyene odudu emi ete esie ɔnɔde enye ndifak mmɔ nsio ke mme idiɔk ŋkpɔ mmɔ ke ntak edikabade esit; ke ntak oro enye ama ɔdɔŋ mme angel esie ete editiŋ mme etop idaha eke edikabade esit, emi adade odudu Andifak edi, ɔnɔ edinyaŋa ukpɔŋ mmɔ.

12 Ndien idahaemi, nditɔ mi, eti, eti ete ke edi ke itiat eke Andifak nnyin, emi edide Christ, Eyen Abasi, ke ana nte mbufo ebɔp itiat idak isɔŋ mbufo; man ke ini satan edidɔŋde mkpɔsɔŋ ofum esie, iŋ, mme eto eduat esie ke idio, iŋ, ke ini kpukpru edim-itiat esie ye ɔkpɔsɔŋ oyobio esie edimiade mbufo, oro idinyeneke odudu ndomo kiet ke idem mbufo ndiduri mbufo nsuhɔde ŋka ukpe ukut ye anana utit idiɔk, ke ntak itiat emi mbufo ebɔpde, emi edide ata itiat idak isɔŋ, itiat idak isɔŋ emi edide edieke mme owo ebɔpde edori mmɔ ikemeke ndiduɔ.

13 Ndien edikem ete ke emi ekedi mme ikɔ emi Helaman ekepepde nditɔ esie; iŋ, enye amakpep mmɔ uwak ŋkpɔ emi owo miwetke, ŋko ye uwak ŋkpɔ emi ewetde.

14 Ndien mmɔ ema eti mme ikɔ esie; ndien ke ntak oro mmɔ eka iso, enim mme ibet Abasi, ndikpep ikɔ Abasi ke otu ikɔt Nephi, tɔŋɔde ke obio Bountiful;

15 Ndien etodo eka obio Gid; ndien eto ke obio Gid eka obio Mulek;

16 Ndien kpa tɔŋɔde ke obio kiet eka efen, tutu mmɔ ema eka iso ke otu kpukpru ikɔt Nephi emi ekedude ke isɔŋ usuk usuk; ndien etodo eka isɔŋ Zarahemla, ke otu mme Lamanite.

17 Ndien edikem ete ke mmɔ ema ekwɔrɔ ye akwa odudu, tutu ete ke mmɔ ema etimede ediwak mbon mfaŋa oro emi ekewɔrɔde ekpɔŋ mme Nephite, tutu ete ke mmɔ ema edi enyuŋ eyarade mme idiɔk ŋkpɔ mmɔ ndien ema ena uduɔkmmɔŋ enɔ edikabade esit, ndien ke ini kiet enyɔŋ etiene mme Nephite man edomo ndikpe mmɔ ubɔk mbaŋa mme idiɔk emi mmɔ ekenamde.

18 Ndien edikem ete Nephi ye Lehi ema ekwɔrɔ enɔ mme Lamanite ye ata akwa odudu ye unen, koro ema enɔ mmɔ odudu ye unen man mmɔ etiŋ ikɔ, ndien ema enɔ mmɔ ŋko sinade nte mmɔ etiŋ—

19 Ke ntak oro mmɔ ema etiŋ ke ata mkpa-idem mme Lamanite, ke edikabade mmɔ esit, tutu ete ke tɔsin itiaita mme Lamanite emi ekedude ke isɔŋ Zarahemla ye nkan nkuk ema ena uduɔkmmɔŋ enɔ edikabade esit, ndien ema enim ke akpanikɔ ibak mme ido mme ete mmɔ.

20 Ndien edikem ete ke Nephi ye Lehi ema etodo edika isɔŋ Nephi.

21 Ndien edikem ete ke mbon ekɔŋ mme Lamanite ema emum mmɔ enyuŋ etop esin ke ufɔk ŋkpɔkɔbi; iŋ, kpa ke ukem ufɔk ŋkpɔkɔbi oro emi nditɔufɔk Limhi ekesinde Ammon ye nditɔ eka esie.

22 Ndien ke ini ema eketop mmɔ esin ke ufɔk ŋkpɔkɔbi ke ediwak usen inɔhɔ udia, sese, mmɔ eka ke ufɔk ŋkpɔkɔbi ndimum mmɔ man mmɔ ewot mmɔ.

23 Ndien edikem ete ke ema ekanade Nephi ye Lehi ekuk nte ekpedi ke ikaŋ, tutu ete ke mmɔ ikidehede ituk mmɔ ke ntak ndik mbak ikaŋ idita mmɔ. Edi, ikaŋ ikitaha Nephi ye Lehi; ndien ekedi nte mmɔ ekeda ke esit ikaŋ ndien ikaŋ ikitaha mmɔ.

24 Ndien ke ini mmɔ ekekutde ete ke adaha ikaŋ akakanade mmɔ okuk, ndien ke ikitaha mmɔ, esit mmɔ ama ɔbɔ ndɔŋesit.

25 Koro mmɔ ema ekut ete ke mme Lamanite ikidehede ituk mmɔ; ŋko mmɔ ikidehedei isaŋa ikpere mmɔ, edi eda nte mmɔ edi imum ke mkpaidem.

26 Ndien edikem ete ke Nephi ye Lehi ema eda enyuŋ etɔŋɔ ndidɔhɔ mmɔ, ete: Ekufehe ndik, koro esese, edi Abasi owut mbufo utibe ŋkpɔ emi, ke emi owutde mbufo man ke mbufo ikanke ituk nnyin ubɔk ndiwot nnyin.

27 Ndien sese, ke ini mmɔ emaeketiŋ mme ikɔ emi, isɔŋ ama enyeŋe ata eti eti, ndien mme ibibene ufɔk ŋkpɔkɔbi ema enyeŋe nte mmɔ emɔŋ eduɔ ke isɔŋ; edi sese, mmɔ ikiduɔhɔ. Ndien sese, mmɔ emi ekedude ke ufɔk ŋkpɔkɔbi ekedi mme Lamanite ye mme Nephite emi ekedide mbon mfaŋa.

28 Ndien edikem ete ke obubit enyɔŋ amafuk mmɔ, ndien idiɔk uteŋe(ɔkpɔsɔŋ) ndik amamum mmɔ.

29 Ndien edikem ete ke uyo ama edi nte oto ke enyɔŋ obubit enyɔŋ edi, ete: Mbufo ekabade esit, mbufo ekabade esit, ekunyuŋ eyom ndiwot mme isuŋutom mi aba emi ami ndɔŋde nnɔ mbufo nte etiŋ nti mbuk enɔ mbufo.

30 Ndien edikem ke ini mmɔ ekopde uyo emi, enyuŋ ekutde ete ke idighe uyo obuma, ŋko ke ikidighe uyo akwa ndutime uyom, edi sese, ekedi suŋ-suŋ uyo mfɔnmma emem, nte ekpekedi odu, ndien ama ekim tutu esim ata ukpɔŋ—

31 Ndien kpa ye uyo ekedide mmem mmem, sese isɔŋ enyeŋe ata eti eti, ndien mme ibibene ufɔk ŋkpɔkɔbi afiak enyeŋe, nte ekeyom ndiduɔ nsim isɔŋ; ndien sese obubit enyɔŋ, emi okofukde mmɔ, ikitarake—

32 Ndien sese uyo oro afiak edi, ete: Mbufo ekabade esit, mbufo ekabade esit, koro obio ubɔŋ heaven ekpere; ndien ekudomo aba ndiwot mme isuŋutom mi. Ndien edikem ete ke isɔŋ amafiak enyeŋe, ndien mme ibibene enyeŋe.

33 Ndien ŋko ɔyɔhɔ ikata uyo oro edi, ndien amatiŋ mme utibe ikɔ ɔnɔ mmɔ emi owo mikemeke nditiŋ; ndien mme ibibene ema efiak enyeŋe, ndien isɔŋ enyeŋe nte oyom ndibahade nsio nsio.

34 Ndien edikem ete ke mme Lamanite ikikanke ifehe ke ntak obubit enyɔŋ emi okofukde mmɔ; iŋ, ndien ŋko mmɔ ikikanke isio ikpat ke ntak ndik emi okomumde mmɔ.

35 Idahaemi kiet amadu ke otu mmɔ emi ekedide owo Nephite ke emana, emi ekedide owo ufɔk Abasi Abasi ke ini kiet edi ama ɔwɔrɔ ɔkpɔŋ mmɔ.

36 Ndien edikem ete ke enye ama akanade idem esie, ndien sese, enye amakut ke obubit enyɔŋ oro mme iso Nephi ye Lehi; ndien sese, mmɔ ema eyama ata eti eti, kpa nte mme iso mme angel. Ndien enye ama okut ete ke mmɔ ema emenede enyin mmɔ ese heaven; ndien mmɔ ekedu ke ido nte etiŋ ikɔ mme emenede uyo mmɔ enɔ owo emi mmɔ ekutde.

37 Ndien edikem ete ke edenowo emi amafiori ɔnɔ otuowo, man mmɔ eŋwɔŋɔde ese. Ndien sese, ema enɔ mmɔ ukeme ete mmɔ eŋwɔŋɔde enyuŋ ese; ndien mmɔ ema ekut mme iso Nephi ye Lehi.

38 Ndien mmɔ ema edɔhɔ edenowo oro ete: Sese, nso ke kpukpru mme ŋkpɔ emi ewɔrɔ, ndien anie idi owo emi mbon emi edade eneme nneme?

39 Idahaemi enyiŋ edenowo oro ekedi Aminadab. Ndien Aminadab ama ɔdɔhɔ mmɔ ete: Mmɔ eneme nneme ye mme angel Abasi.

40 Ndien edikem ete mme Lamanite ema edɔhɔ enye ete: Nso ke nnyin idinam, man ikpisio obubit enyɔŋ emi ofukde nnyin?

41 Ndien Aminadab ama ɔdɔhɔ mmɔ ete: Ana nte mbufo ekabade esit, enyuŋ ebeŋe uyo oro, tutu mbufo enyene mbuɔtidem ke Christ, Alma, ye Amulek, ye Zeezrom ekekpepde mbufo; ndien ke ini mbufo enamde emi, eyesio obubit enyɔŋ emi ete okufuk mbufo.

42 Ndien edikem ete kpukpru mmɔ etɔŋɔ ndibeŋe uyo enye emi ekenyeŋede isɔŋ; iŋ, mmɔ ema ebeŋe tutu obubit enyɔŋ ama atara.

43 Ndien edikem ete ke ini mmɔ ekeŋwɔŋɔdede enyin mmɔ, enyuŋ ekutde ete ke obubit enyɔŋ ama atara ke ifukke mmɔ, sese, mmɔ ema ekut ete ke adaha ikaŋ, amakanade mmɔ okuk, iŋ kpukpru ukpɔŋ.

44 Ndien Nephi ye Lehi ekedu ke otu mmɔ; iŋ, ema ekanade mmɔ ekuk; iŋ, eketie nte mmɔ edu ke esit edemeikaŋ, edi ikitaha mmɔ, ŋko enye ikitaha mme ibibene ufɔk ŋkpɔkɔbi oro; ndien mmɔ ekeyɔhɔ ye idaresit oro emi owo mikanke itiŋ ibaŋa enyuŋ eyɔhɔ ye ubɔŋ.

45 Ndien sese, Edisana Spirit Abasi ama ɔsuhɔde oto ke heaven edi, onyuŋ oduk ke esit mmɔ, ndien mmɔ ema eyɔhɔ nte ekpedi ye ikaŋ, ndien mmɔ ekan etiŋ mme utibe ikɔ.

46 Ndien edikem ete ke uyo ama edi ɔnɔ mmɔ, iŋ, edinem uyo, nte ekpedi odu, ete:

47 Emem, emem odu ye mbufo, ke ntak mbuɔtidem mbufo ke Edima Eyen mi, emi okodude tɔŋɔ ke editɔŋɔ ererimbot.

48 Ndien idahaemi, ke ini mmɔ ekopde emi mmɔ emenede enyin mmɔ nte ekpese ebiet emi uyo oro okotode; ndien sese, mmɔ ema ekut nte mme enyɔŋ ekeberede; ndien mme angel esuhɔde edi enyuŋ edinam utom enɔ mmɔ.

49 Ndien ekedi ŋkpɔ nte owo ikie ita ekekut enyuŋ ekop mme ŋkpɔ emi; ndien ema edɔhɔ mmɔ ete eka ekudu ke mkpaidem, ŋko yak mmɔ ekuyik.

50 Ndien edikem ete mmɔ ema eka, enyuŋ enam utom enɔ mme owo, etiŋ ke ofuri nkanade mme isɔŋ oro ebaŋa kpukpru mme ŋkpɔ emi mmɔ ekekopde enyuŋ ekutde, tutu ete ke ediwak ubak mme Lamanite ema ekpuhɔ ekikere ebaŋa mmɔ, ke ntak mme akpan idiɔŋɔ emi mmɔ ekebɔde.

51 Ndien kpa nte ediwak emi ekepuhɔde ekikere ema eyak mme ŋkpɔ ekɔŋ mmɔ enim, ŋko ye usua mmɔ ye ido mme ete mmɔ.

52 Ndien edikem ete ke mmɔ ema eyak enɔ mme Nephite mme isɔŋ inyene mmɔ.