1 Ndien idahaemi edikem ke ɔyɔhɔ isua anaŋ ye itiokiet, mme Nephite ema esuk edu ke ibak, iŋ, ke akamba ibak, ke ini mme Lamanite ekekpemede nditim nnim mme ibet Abasi, nte ibet Moses edide.

2 Ndien edikem ete ke isua emi ke Samuel kiet ama odu, owo Lamanite, emi ekedide isɔŋ Zarahemla, ndien ɔtɔŋɔ ndikwɔrɔ ikɔ nnɔ mme owo. Ndien edikem ete ke enye ama ɔkwɔrɔ, ke ediwak usen, erikabare esit ɔnɔ mme owo, ndien mmɔ ema ebin enye esio, ndien enye ama oyom ndifiak nyɔŋ isɔŋ esie.

3 Edi sese, uyo Jehovah ama etiene enye, ete enye afiak aka, onyuŋ etiŋ nte prophet ɔnɔ mme owo ŋkpɔ ekededi emi edidukde enye esit.

4 Ndien edikem ete mmɔ iyakke enye oduk obio oro; ke ntak oro enye aka onyuŋ ɔdɔk ibibene esie, onyuŋ anyan ubɔk esie ndien ofiori ke ɔkpɔsɔŋ uyo, onyuŋ etiŋ nte prophet ɔnɔ mme owo ŋkpɔ ekededi emi Jehovah ekesinde ke esit esie.

5 Ndien enye ɔdɔhɔ mme owo ete: Esese, ami, Samuel, owo Lamanite, ntiŋ mme ikɔ Jehovah emi enye esinde ke esit mi; ndien esese enye esin ke esit mi ete ntiŋ nnɔ mme owo emi nte ke ofut nnen nnen ido odoro mme owo emi ke idem; ndien ke isua ikie inaŋ idibehe ifep ibɔhɔke ofut nnen nnen ido ɔduɔ ke idem mme owo emi.

6 Iŋ, akwa nsobo ebet mme owo emi, ndien ke akpanikɔ enye kedi etiene mme owo emi, ndien ŋkpɔ ndomo kiet idinyaŋake mbon emi ibɔhɔke edi erikabare esit ye mbuɔtidem ke Jehovah Jesus Christ, emi ke akpanikɔ edidide ke ererimbot emi, ndien eyebɔ ndutuhɔ ke ediwak ŋkpɔ ndien eye ewot enye enɔ mbon emi.

7 Ndien esese, angel Jehovah etiŋ enye ɔnɔ mi, ndien enye ama ada eti mbuk ɔnɔ ukpɔŋ mi. Ndien esese, ekedɔŋ mi enɔ mbufo ete ntiŋ nnɔ mbufo nko, man mbufo enyene eti mbuk; edi esese mbufo iyomke mi.

8 Ke ntak oro, ntem ke Jehovah ɔdɔhɔ: Ke ntak isɔŋ-esit mbon mme Nephite, ibɔhɔke mmɔ ekabare esit ami nyebɔ mmɔ ikɔ mi, ndien nyebɔ mmɔ Spirit mi, ndien ami ndiyɔhɔ mmɔ aba, ndien ami nyeŋwɔŋɔre esit nditɔ eka mmɔ mkpɔŋ mmɔ.

9 Ndien isua ikie inaŋ idibehe ifep mbemiso ami nnam ete emia mmɔ; iŋ, ami nyedise mmɔ ye ofut nko ye akaŋ nko ye udɔŋɔ.

10 Iŋ, ami nyedise mmɔ ye ufiop iyaresit, ndien eyedu mmɔ eke ɔyɔhɔ emana inaŋ emi edidude uwem, eke mme asua mbufo, ndikut ofuri nsobo mbufo; ndien ke akpanikɔ emi eyedi ibɔhɔke mbufo ekabare esit, ntem ke Jehovah ɔdɔhɔ; ndien mmɔ eke ɔyɔhɔ emana inaŋ eyesobo mbufo.

11 Edi edieke mbufo edikabare esit enyun efiak etiene Jehovah Abasi mbufo ami nyeŋwɔŋɔre iyaresit mi, Jehovah ɔdɔhɔ; iŋ, ntem ke Jehovah ɔdɔhɔ, ɔfɔfɔn ɔnɔ mmɔ emi edikabare esit inyuŋ iŋwɔŋɔre itiene mi, edi eyedɔdiɔk ɔnɔ enye emi midikabakere esit.

12 Iŋ, eyedɔdiɔk ɔnɔ akwa obio Zarahemla emi; koro sese, edi ke ntak mbon emi edide nnen nnen ke enyaŋa enye; iŋ, eyedɔdiɔk ɔnɔ akwa obio emi, koro ami mefiɔk nte, Jehovah ɔdɔhɔ, ke ediwak edu, iŋ, kpa mbon emi ewakde ekan ke akwa obio emi, emi edisɔŋde esit mmɔ ye ami, Jehovah ɔdɔhɔ.

13 Edi ɔfɔfɔn ɔnɔ mmɔ emi edikabare esit, koro mmɔ ke ami ndinyaŋa. Edi sese, ekpedi ike idighe ke ntak ndinen owo emi edude ke akwa obio emi, sese, ami mkpenam ete ikaŋ oto heaven ɔsuhɔre edi onyuŋ osobo enye.

14 Edi sese, edi ke ntak ndinen owo ke enyaŋa enye. Edi sese, ini kedi, Jehovah ɔdɔhɔ, ete ke ini mbufo edibinde ndinen owo isio ke otu mbufo, ini oro ke mbufo editim idem inɔ mbiara; iŋ, eyedɔdiɔk ɔnɔ akwa obio emi, ke ntak ibak ye mme mbubiam emi edude ke enye.

15 Iŋ, ndien eyedɔdiɔk ɔnɔ obio Gideon, ke ntak ibak ye mme mbubiam emi edude ke enye.

16 Iŋ, ndien eyedɔdiɔk ɔnɔ kpukpru obio emi edude ke ŋkanare nkuk isɔŋ, emi mme Nephite enyenede, ke ntak ibak ye mme mbubiam emi edude ke mmɔ.

17 Ndien sese, isuŋi eyesim isɔŋ emi, Jehovah mme Udim ɔdɔhɔ, ke ntak mme owo emi edude ke isɔŋ emi, iŋ, ke ntak ibak mmɔ ye mme mbubiam mmɔ.

18 Ndien eyetibe, Jehovah mme Udim ɔdɔhɔ, iŋ, akwa ye ata Abasi nnyin, ete ke owo ekededi emi edidipde mme inyene ke isɔŋ idikwe mmɔ aba, ke ntak akamba isuŋi ke isɔŋ, ibɔhɔke enye edi nnen nnen owo ndien edip enye ke Jehovah.

19 Koro ami nyom, Jehovah ɔdɔhɔ, nte mmɔ edip mme inyene mmɔ ke ami; ndien isuŋi enyene mmɔ emi midipke inyene mmɔ ke ami; koro owo ndomo kiet idipke inyene mmɔ ke ami ibɔhɔke edi nnen nnen owo; ndien owo ekededi emi midipke inyene esie ke ami, esuŋi enye, nko ye inyene oro, ndien owo ndomo kiet idifakke enye ke ntak isuŋi ke isɔŋ.

20 Ndien usen eyedi emi mmɔ edidipde mme inyene mmɔ, koro mmɔ esin esit mmɔ ke mme inyene; ndien ke ntak emi mmɔ esinde esit mmɔ ke mme inyene mmɔ, ndien mmɔ eyedip mme inyene ke ini mmɔ edifehede ke iso mme asua mmɔ; koro mmɔ idipke mmɔ ke ami, esuŋi mmɔ nko ye mme inyene mmɔ; ndien eyemia mmɔ ke usen oro, Jehovah ɔdɔhɔ.

21 Mbufo esese, mme owo akwa obio emi, enyuŋ ekpaŋ utɔŋ enɔ mme ikɔ mi; iŋ, ekpaŋ utɔŋ enɔ mme ikɔ emi Jehovah etiŋde; koro esese, enye ɔdɔhɔ ete ke esuŋi mbufo ke ntak mme inyene mbufo, ndien nko ke esuŋi mme inyene mbufo ke ntak emi mbufo esinde esit mbufo ke mmɔ, ndien mbufo ikpaŋke utɔŋ inɔ mme ikɔ enye emi eke ɔnɔde mbufo mmɔ.

22 Mbufo itihi Jehovah Abasi mbufo ke mme ŋkpɔ emi enye ɔdiɔŋde mbufo, edi mbufo eti mme inyene mbufo kpukpru ini, idighe ke ndikɔm Jehovah Abasi mbufo kabaŋa mmɔ; iŋ, esit mbufo iduhe ye Jehovah, edi mmɔ eyɔhɔ ye akwa ntaŋidem, enɔ unam-inua, ye akwa nkutidem, mme ufup, mme eŋwan, udu, mme ukɔbɔ, ye mme uwot owo, ye utɔ kpukpru ukwaŋ-ŋkpɔ.

23 Koro ke ntak emi ke Jehovah Abasi anam ete isuŋi esim isɔŋ emi, nko ye mme inyene mbufo, ndien emi ke ntak mme ukwaŋ-ŋkpɔ mbufo.

24 Iŋ, eyedɔdiɔk ɔnɔ mbon emi, ke ntak ini emi emi esimde mi, ete ke mbufo emebin mme prophet esio, enyuŋ esak mmɔ, enyuŋ etop mmɔ ke mme itiat, enyuŋ ewot mmɔ, enyuŋ enam mmɔ utɔ kpukpru ukwaŋ-ŋkpɔ.

25 Ndien idaha emi ke ini mbufo etiŋde ikɔ, mbufo edɔhɔ ete: Ekpedi mme usen nnyin ekedi ke mme usen mme ete nnyin ke eset, nnyin ikpe iwotke mme prophet: nnyin ikpe itɔhɔ mmɔ ke itiat, ndien ibin mmɔ isio.

26 Esese, mbufo emediɔk ekan mmɔ; koro adaŋa nte Jehovah odude uwem, edieke prophet edide ke ufɔt mbufo onyuŋ etiŋde ikɔ Jehovah ɔnɔ mbufo, emi etiede ntiense abaŋa mme idiɔk ŋkpɔ ye mme ukwaŋ-ŋkpɔ mbufo, mbufo eyaresit ye enye, enyuŋ ebin enye esio enyuŋ eyom kpukpru usuŋ ndiwot enye; iŋ, mbufo eyedɔhɔ ete ke enye edi prophet abiaŋa, ndien ke enye edi anam idiɔk ŋkpɔ, ye eke satan, koro enye etiede ntiense ete ke mme edinam mbufo edi idiɔk.

27 Edi esese, edieke owo edide ke ufɔt mbufo ndien ɔdɔhɔ mbufo ete: Enam emi, ndien ke ukwaŋ-ŋkpɔ iduhe; enam oko ndien ke mbufo idibɔhɔ ufen; iŋ, enye eyedɔhɔ ete: Esaŋa ke ntaŋidem esit mbufo; iŋ, esaŋa ke ntaŋidem enyin mbufo, enyuŋ enam se ededi emi esit mbufo oyomde—ndien edieke owo edide ke ufɔt mbufo onyuŋ etiŋde emi, mbufo eyedara enye, enyuŋ edɔhɔ ete ke enye edi prophet.

28 Iŋ, mbufo eyekpono enye, ndien mbufo eyenɔ enye inyene mbufo; mbufo eyenɔ enye gold mbufo, ye silver mbufo, enyuŋ esin enye nsɔŋ urua ɔfɔŋ; ndien ke ntak emi enye etiŋde nnem-inua ikɔ ɔnɔ mbufo, onyuŋ ɔdɔhɔde ete ke kpukpru ŋkpɔ ɔfɔn, ke ntak oro mbufo idikwe ndudue inɔ enye.

29 O mbufo idiɔk ye ukwaŋ emana; mbufo mme ɔsɔŋ-esit ye mbon nsɔŋ-ibuot, ke adaŋa didie ke mbufo ekere ke Jehovah ediyɔ mbufo? Iŋ, ke adaŋa didie ke mbufo ediyak mme ndisime ye mme nnan eda mbufo usuŋ? Iŋ, ke adaŋa didie ke mbufo edimek ekim ekan uŋwana?

30 Iŋ, esese, iyaresit Jehovah ɔfɔp mbufo kaŋa; esese, enye esuŋi isɔŋ emi ke ntak ukwaŋ-ŋkpɔ mbufo.

31 Ndien esese, ini ke edi emi enye esuŋide mme inyene mbufo, man mmɔ edi ndɔdɔrɔ, man mbufo ukukan umum mmɔ; ndien ke mme usen ubuene mbufo ke mbufo idikanke inyene mmɔ.

32 Ndien ke mme usen ubuene mbufo mbufo eyeseme enɔ Jehovah; ndien ke ikpikpu ke mbufo ediseme, koro mbiara mbufo esim mbufo kaŋa, ndien enam nsobo mbufo ɔsɔŋɔ ada; ndien ke ini oro ke mbufo ediseme enyuŋ etua ke usen oro, Jehovah mme Udim ɔdɔhɔ. Ndien ke ini oro ke mbufo ediseme, enyuŋ edɔhɔ ete:

33 O ete ke ekpedi ima ikabadee esit, iyuŋ iwotke mme prophet, iyuŋ itɔhɔ mmɔ ke itiat, iyuŋ ibinke mmɔ isio. Iŋ, ke usen oro mbufo eyedɔhɔ ete: O ete ke ekpedi ke nnyin ima iti Jehovah Abasi nnyin ke usen enye eke ɔnɔde nnyin mme inyene nnyin, ndien ke ini oro ke mmɔ mikpidɔrɔke man mmɔ etak nnyin; koro esese, mme inyene nnyin etak nnyin.

34 Esese, nnyin inim ŋkpɔ utom mi ndien mkpɔŋ enye ɔnyɔŋ; ndien esese, ebɔ nnyin mme ofut nnyin ke usen nnyin iyomde mmɔ inɔ ekɔŋ.

35 Iŋ, nnyin imidip mme inyene nnyin ndien mmɔ ewɔrɔ ekpɔŋ nnyin, ke ntak isuŋi isɔŋ.

36 O ete ke ekpedi nnyin ima ikabare esit ke usen emi ikɔ Jehovah ekedide etiene nnyin; koro esese esuŋi isɔŋ, ndien kpukpru ŋkpɔ ekabare edɔdɔrɔ, ndien nnyin ikanke imum mmɔ.

37 Esese, mme demon ekanare nnyin ekuk, iŋ, mme angel esie emi eyomde ndisobo ukpɔŋ nnyin ekanare nnyin ekuk. Esese, mme ukwaŋ-ŋkpɔ nnyin ekpon. O Jehovah, ndi afo ukemeke ndiŋwɔŋɔre iyaresit fo mkpɔŋ nnyin? Ndien emi edidi usem mbufo ke mme usen oro.

38 Edi esese, mme usen idomo mbufo ebe; mbufo emesik usen erinyaŋa mbufo tutu ini ebe ke nsinsi, ndien enam nsobo mbufo ɔsɔŋɔ ada; iŋ, koro mbufo emeyom ke ofuri eyo uwem mbufo se mbufo mikemeke ndinyene; ndien mbufo emeyom inemesit ke ndinam ukwaŋ-ŋkpɔ, ŋkpɔ emi misaŋake ye uduot eke nnen nnen ido emi odude ke akwa ye Nsinsi Ibuot.

39 O mbufo mbon isɔŋ emi, mbufo ekop mme ikɔ mi! Ndien ami mbɔŋ akam nte yak eŋwɔŋɔre iyaresit Jehovah ekpɔŋ mbufo, ndien yak mbufo ekabare esit enyuŋ ebɔ erinyaŋa.