1 Ndien idahaemi edikem ke ɔyɔhɔ isua ukara aba ye ita mme ebiere ikpe, eneni ikiduhe ke otu ikɔt Nephi ibɔhɔke ekedi ekpri ntaŋidem emi okodude ke ufɔk Abasi, emi akanamde mme mkpri utɔk odu ke otu mme owo, ndien mme ŋkpɔ emi eketre ke mkpere utit ɔyɔhɔ isua aba ye ita.

2 Ndien eneni ikiduhe ke otu mme owo ke ɔyɔhɔ isua aba ye inaŋ; ŋko ɔkpɔsɔŋ eneni ikiduhe ke ɔyɔhɔ isua aba ye ition.

3 Ndien edikem ke ɔyɔhɔ isua aba ye itiokiet, iŋ, ɔkpɔsɔŋ eneni ye mme uwak utɔk ema edu; ke ntak emi ata ediwak ema edu emi ekewɔrɔde ekpɔŋ isɔŋ Zarahemla, enyuŋ eka isɔŋ ke edere edere ndida isɔŋ oro nyene.

4 Ndien mmɔ ema esaŋa ke ata anyaŋ usuŋ, tutu ete ke mmɔ ema edisim mme ikpɔ mmɔŋ ye mme ediwak inyaŋ.

5 Iŋ, ndien ke akpanikɔ mmɔ ema esuana eduk ofuri mme ŋkaŋ isɔŋ oro, eduk mme ŋkaŋ ekededi emi owo mikisoboke ye emi mikinanake eto, ke ntak mme uwak owo emi ekebemde iso eda isɔŋ oro enyene.

6 Ndien owo ikisoboke ŋkaŋ isɔŋ oro ndomo kiet, ibɔhɔke ekedi eto; edi ke ntak akwa nsobo mme owo emi ekebemde iso eduŋ ke isɔŋ oro ke ekekot enye nsobo.

7 Ndien ke edide ke mkpri ibat eto ekedu ke iso isɔŋ oro, ke ntak oro mme owo emi ekekade do ekabade edi mme ata andifiɔk nkan ke ndinam utom ye cement; ke ntak oro mmɔ ema ebɔp mme ufɔk ye cement, ke esit emi mmɔ ema eduŋ.

8 Ndien edikem ete ke mmɔ ema etɔt enyuŋ esuana, enyuŋ eto isɔŋ ke usuk usuk eka isɔŋ ke edere edere, enyuŋ esuana tutu ete ke mmɔ etɔŋɔ ndifuk iso ofuri ererimbot, eto ke inyaŋ ke usuk usuk eka inyaŋ ke edere edere, eto ke inyaŋ ke edem usoputin eka inyaŋ ke edem usiahautin.

9 Ndien mme owo emi ekedude ke isɔŋ ke edere edere ekeduŋ ke mme tent, ye ke mme ufɔk cement, ndien mmɔ ema eyak eto ekededi emi eketibede ke iso isɔŋ ete ekɔri, man ke ini iso mmɔ enyene eto ndibɔp mme ufɔk mmɔ, iŋ, mme obio mmɔ, ye mme temple mmɔ, ye mme synagogue mmɔ, ye mme edisana ebiet mmɔ, ye utɔ kpukpru ufɔk mmɔ.

10 Ndien edikem ete nte eto akananade ata eti eti ke isɔŋ ke edere edere, mmɔ ema enɔ ediwak eka ke usuŋ ubom mbakara.

11 Ndien ke ntem mmɔ ema enam mme owo ke isɔŋ edere edere ete mmɔ ekan ebɔp mme ediwak obio, ke eto ye ke cement mbiba.

12 Ndien edikem ete ke ediwak ikɔt Ammon ema edu, emi ekedide mme Lamanite ke emana, ema eka ŋko ke isɔŋ oro.

13 Ndien idahaemi enim mme uwak ŋwed eke mme unam ŋkpɔ mme owo emi, emi ediwak mbon emi enimde, emi edɔŋɔde ediwak ŋkpɔ enyuŋ ekponde eti eti, abaŋa mmɔ.

14 Edi sese, ubak kiet ke itie ikie unam ŋkpɔ mbon emi, iŋ, mbuk mme Lamanite ye mme Nephite, ye mme ekɔŋ mmɔ, ye mme eneni, ye mme utɔk, ye mme ukwɔrɔ ikɔ mmɔ, ye mme prophecy mmɔ, ye uwat ubom mmɔ ye ndibɔp mme ubom mbakara mmɔ, ye ndibɔp mme temple mmɔ, ye mme synagogue ye mme edisana ebiet mmɔ, ye nnennen ido mmɔ, ye ibak mmɔ, ye mme uwot owo mmɔ, ye mme uyip inɔ mmɔ, ye udia ŋwo mmɔ, ye utɔ kpukpru mbubiam ye mme use, ikemeke ndiduk ke ŋwed emi.

15 Edi sese, mme ediwak ŋwed edu ye mme ediwak ŋwed ke utɔ ke utɔ, ndien edi mme Nephite ke akamba ubak ekenim mmɔ.

16 Ndien mme Nephite eyak mmɔ enɔ tɔŋɔ ke emana kiet tutu esim efen, kpa tutu mmɔ eduɔ eduk ke ndudue ndien ewot, edia ŋwo, enyuŋ eyire, enyuŋ ebine, enyuŋ ewot, enyuŋ esuan ke iso isɔŋ, enyuŋ ebuaha ye mme Lamanite tutu owo ikotke mmɔ aba mme Nephite, ekabade edi mbon ibak, ye mbon ikɔt, ye mbon obom, iŋ, ekabade edi mme Lamanite.

17 Ndien idahaemi ami mfiak ŋka mbuk mi; ke ntak oro, se ami ntiŋde amabe ke ini mme ɔkpɔsɔŋ eneni ekedude, ye mme eŋwan, ye mme ekɔŋ, ye mme utɔk, ke otu ikɔt Nephi.

18 Ɔyɔhɔ isua ukara aba ye itiokiet mme ebiere ikpe etre;

19 Ndien edikem ete ke ɔkpɔsɔŋ eneni amasuk odu ke isɔŋ, iŋ, kpa ke ɔyɔhɔ isua aba ye itiaba, ye ŋko ke ɔyɔhɔ isua aba ye itiaita.

20 Edi, Helaman ama etie ke itie ikpe ke unenikpe ye nte enende; iŋ, enye ama ekpeme ndinim mme ewuhɔ, ye mme ubiere ikpe, ye mme ibet Abasi; ndien enye ama anam se ekedide nnennen ke iso Abasi kpukpru ini; ndien enye ama asaŋa ke mme ido edinam ete esie, tutu ete ke enye ama oforo ke isɔŋ.

21 Ndien edikem ete ke enye ama enyene nditɔ iden iba. Enye osio enye emi ɔkɔsɔŋɔde enyiŋ eke Nephi, ndien enye emi ekekpride, enyiŋ eke Lehi. Ndien mmɔ etɔŋɔ ndikɔri nnɔ Jehovah.

22 Ndien edikem ete ke mme ekɔŋ ye mme eneni ema etɔŋɔ nditre, ke ekpri udomo, ke otu mbon mme Nephite, ke mkpere utit ɔyɔhɔ isua ukara aba ye itiaita mme ebiere ikpe nnɔ ikɔt Nephi.

23 Ndien edikem ke ɔyɔhɔ isua ukara aba ye usukkiet mme ebiere ikpe, ema esiak nka-iso emem ke isɔŋ oro, kpukpru ibɔhɔke mme ebuana ŋkari Gadianton owo inɔ akasiakde ke mme ŋkaŋ emi mme owo ekeduŋde ekan, emi edide ke ini oro mbon ekedude ke ibuot ukara mikifiɔkke; ke ntak oro mme ada ibuot ukara ikisoboke mmɔ isio ke isɔŋ.

24 Ndien edikem ete ke kpa ke isua emi ke ata akwa uforo amaduk ufɔk Abasi, tutu ete ke mme tɔsin ema edu emi ekedianade idem mmɔ ye ufɔk Abasi ndien ema ena uduɔkmmɔŋ enɔ ukabade esit.

25 Ndien ata akwa ekedi uforo ufɔk Abasi, ndien ata ediwak mme edidiɔŋ emi ekeŋwaŋade enɔ mme owo, ete tutu ke idem ama akpa mme akwa oku ye mme andikpep ebe se edomode.

26 Ndien edikem ete ke utom Jehovah ama oforo esim ndinim uduɔkmmɔŋ ye edidian nnɔ ufɔk Abasi Abasi, ediwak ukpɔŋ, iŋ, kpa mme duop mme tɔsin.

27 Ke ntem nnyin imikeme ndikut ite ke Jehovah enyene mbɔm abaŋa kpukpru mbon emi, ke akpanikɔ esit mmɔ, ekotde edisana enyiŋ esie.

28 Iŋ, ke ntem nnyin ikut ite ke usuŋ heaven eberede ɔnɔ kpukpruowo, akpan-akpan mbon emi edibuɔtde idem ke enyiŋ Jesus Christ, emi edide Eyen Abasi.

29 Iŋ, nnyin imikut ite ke owo ekededi emi oyomde ekeme ndinyene ikɔ Abasi, emi enyenede uwem ye odudu, emi edibahade inim nsio nsio kpukpru nsu ye mme afia ye mme ŋkari satan, inyuŋ ida owo Christ ke nnennen ye mfafaha usuŋ mbe nsinsi ukpe-ukut emi enimde ndi men idiɔk owo mmen—

30 Ndien anam ukpɔŋ mmɔ, iŋ, ukpɔŋ mmɔ emi mikemeke ndikpa, edu ke ubɔk nnasia Abasi ke obio ubɔŋ heaven, man otodo etie ye Abraham, ye Isaac, ndien ye Jacob, ye kpukpru ndisana ete nnyin, man otodo ekufiak ewɔrɔ aba.

31 Ndien ke isua emi nka-iso idaresit amadu ke isɔŋ Zarahemla, ye ke kpukpru nkan nkuk isɔŋ,ke akpanikɔ ke ofuri isɔŋ emi mme Nephite ekenyenede.

32 Ndien edikem ete ke emem ama odu ye ata akwa idaresit ke nsuhɔ ɔyɔhɔ isua aba ye usukkiet; iŋ, ndien ŋko nka-iso emem ye akamba idaresit ke ɔyɔhɔ isua ukara aba ye duop mme ebiere ikpe.

33 Ndien ke ɔyɔhɔ isua ukara aba ye duopekiet mme ebiere ikpe emem ama odu ŋko, ibɔhɔke ekedi ntaŋidem emi ɔkɔtɔŋɔde ndiduk ufɔk Abasi—idighe ke ufɔk Abasi Abasi, edi ke esit mme owo emi ekedɔhɔde ete ke mmɔ edi eke ufɔk Abasi Abasi—

34 Ndien mmɔ ema emenede ke ntaŋidem, tutu ekɔbɔ ediwak nditɔeka mmɔ. Idahaemi emi ekedi akwa idiɔk, emi akanamde ubak mme owo emi ekesuhɔdede idem ekan eyɔ ɔkpɔsɔŋ ukɔbɔ, enyuŋ ebe ke uwak ukut.

35 Edi mmɔ ema etre udia enyuŋ ebɔŋ akam ediwak ini, ndien ema ekop odudu ekan akpa ke nsuhɔde-idem mmɔ; enyuŋ esɔŋ idem ekan akpa ke mbuɔtidem Christ, tutu ukpɔŋ mmɔ ɔyɔhɔ ye idaresit ye ndɔŋ-esit, iŋ, tutu esim ndiyet nyuŋ nnam esit mmɔ asana, edisana emi edide ke ntak emi mmɔ eyakde esit mmɔ enɔ Abasi.

36 Ndien edikem ete ke ɔyɔhɔ isua aba ye duop ye iba eketre ke emem ŋko, ibɔhɔke ekedi ata ɔkpɔsɔŋ ntaŋidem emi okodukde esit mme owo; ndien ekedi ke ntak ata ekese inyene mmɔ ye uforo mmɔ ke isɔŋ oro; ndien enye ama ɔkɔri ke idem mmɔ ke usen ke usen.

37 Ndien edikem ke ɔyɔhɔ isua ukara aba ye duop ye ita mme ebiere ikpe, Helaman akpa, ndien Nephi akpan esie ɔtɔŋɔ ndikara ke itie esie. Ndien edikem ete ke enye ama etie ke itie ikpe ke nnen nnen ye nte enende; iŋ, enye ama enim mme ibet Abasi, onyuŋ asaŋa ke mme ido edinam esie.