1 Ndien ke ntem nnyin ikut nte edide nsu, nko ye nte esit nditɔ owo misɔŋke ida; iŋ, nnyin imikan ikut ite ke Jehovah ke anan utit mfɔn esie ama ɔdiɔŋ onyuŋ anam mbon emi edoride enyin ke enye eforo.

2 Iŋ, ndien nnyin iye ikut kpa ke ini oro ke ini enye edinamde ikɔt esie eforo, iŋ, ke mme iŋwaŋ mmɔ nditɔt, mme ufene mmɔ ye mme enaŋ mmɔ, ye ke gold, ye ke silver, ye ke kpukpru ŋkpɔ uto ke utɔ ke utɔ ye usɔ; ɔsuhɔ uwem mmɔ, onyuŋ enam mmɔ ebɔhɔ ewɔrɔ ke ubɔk mme asua mmɔ; anam esit mme asua mmɔ emem man mmɔ ekuŋwana ye mmɔ; iŋ, ke akpatre, enam kpukpru ŋkpɔ enɔ uŋwam ye inemesit ikɔt esie; iŋ, ndien oro edi ini emi mmɔ esɔŋde esit mmɔ, enyuŋ efre Jehovah Abasi mmɔ, enyuŋ edihi ke idak ikpat Ata Edisana—iŋ, ndien emi ke ntak ememde ɔnɔ mmɔ, ye ata ediforo mmɔ eti eti.

3 Ndien ke emi nnyin ikut ite ke ibɔhɔke Jehovah ɔtunɔ ikɔt esie ye ediwak ukut, iŋ, ibɔhɔke enye edise mmɔ ye mkpa ye ndik, ye akaŋ ye kpukpru utɔ udɔŋɔ, mmɔ iditihi enye.

4 O nso ndisime, nko nso ntaŋidem, ye se idiɔkde, ndien nso ndisɔp ndinam ukwaŋ-ŋkpɔ, nko nso ke ndinyɔni ndinam eti, ke nditɔ owo edi; iŋ, esɔp didie ndikpaŋ utɔŋ nnɔ mme ikɔ idiɔk owo, ye ndisin esit mbufo ke mme ikpikpu ŋkpɔ ererimbot!

5 Iŋ, esɔp didie ke ndimenere ke ntaŋidem mmɔ; iŋ, esɔp didie ndinam inua, ye ndinam kpukpru se idide ukwaŋ-ŋkpɔ; ndien enyɔni didie nditi Jehovah Abasi mmɔ, ye ndikpaŋ utɔŋ nnɔ mme item esie, iŋ, enyɔni didie ndisaŋa ke mme usuŋ ifiɔk!

6 Sese, mmɔ iyomke ite yak Jehovah Abasi mmɔ, emi eke obotde mmɔ, ada usuŋ onyuŋ akara mmɔ; isehe akwa mfɔn esie ye mbɔm esie kabaŋa mmɔ, mmɔ enyuŋ esin mme item esie, ndien mmɔ iyomke ete enye ada mmɔ usuŋ.

7 O didie ke ikpikpu nditɔ owo okpon; iŋ, mmɔ ekpri ekan ntan isɔŋ.

8 Koro sese, ntan isɔŋ aka mi ye ko, man abahare iba, ke uyo akwa ye nsinsi Abasi nnyin.

9 Iŋ, sese ke uyo esie ke mme obot ye mme ikpɔ obot enyek enyuŋ enyeŋe.

10 Ndien ke odudu uyo esie ke mmɔ ebomo, enyuŋ edi una-isɔŋ, iŋ, kpa ukem nte ebedeŋ.

11 Iŋ, ke odudu uyo esie ke ofuri isɔŋ enyek;

12 Iŋ, ke odudu uyo esie, ke mme itiat idak isɔŋ enyeŋ, tutu esim ufɔt esie.

13 Iŋ, edieke enye ɔdɔhɔde ererimbot ete—Daha—enam enye adaha.

14 Iŋ, edieke enye ɔdɔhɔde ererimbot ete—Afo eyefiak edem, man enam usen ɔniɔŋ ke ediwak hour—enam ntre;

15 Ndien ke ntem, nte ikɔ esie edide ererimbot afiak edem, ndien enye etie owo nte utin ada itie kiet; iŋ, ndien sese, emi edi ntre; koro ke akpanikɔ edi ererimbot akanare idighe utin.

16 Ndien sese, nko, edieke enye ɔdɔhɔde mme mmɔŋ akwa utuŋɔ mmɔŋ ete—Afo sat—enam ntre.

17 Sese, edieke enye ɔdɔhɔde obot emi ete—Afo dahada, nyuŋ di diduɔ ke obio oro, man ebuk enye—sese enam ntre.

18 Ndien sese, edieke owo edipde inyene ke isɔŋ, ndien Jehovah ɔdɔhɔ ete—Yak esuŋi enye, ke ntak ukwaŋ-ŋkpɔ esie emi ekedipde enye—sese, eyesuŋi enye.

19 Ndien edieke Jehovah ɔdɔhɔde ete—Esuŋi fi, ete ke owo ndomo idikwe fi tɔŋɔ ke ini emi ke iso ye ke nsinsi—sese, owo ndomo kiet ikwe enye tɔŋɔ ke emi ye ke nsinsi.

20 Ndien sese, edieke Jehovah ɔdɔhɔde owo ete—Ke ntak mme ukwaŋ-ŋkpɔ fo, eyesuŋi fi ke nsinsi—eyenam ntre.

21 Ndien edieke Jehovah ɔdɔhɔde ete—Ke ntak mme ukwaŋ-ŋkpɔ fo eyesibe fi esio ke iso mi—enye eyenam ete edi ntre.

22 Ndien eyedɔdiɔk ɔnɔ enye emi enye edidɔhɔde emi, koro eyetibe ɔnɔ enye emi edinamde ukwaŋ-ŋkpɔ, ndien owo idikanke inyaŋa enye; ke ntre, ke ntak emi, man enyaŋa mme owo, ke ekwɔrɔ erikabare esit.

23 Ke ntak oro, ɔfɔfɔn ɔnɔ mmɔ emi edikabare esit enyuŋ ekpaŋde utɔŋ enɔ uyo Jehovah Abasi mmɔ; koro mmɔ emi edi mmɔ emi edinyaŋade.

24 Ndien yak Abasi ayak, ke akwa uyɔhɔ esie, ete eda mme owo edi erikabare esit ye nti utom, man efiak enim mmɔ enɔ mfɔn, nte mme utom mmɔ edide.

25 Ndien ami meyom nte enyaŋa kpukpru owo. Edi nnyin ime ikot ite ke akwa ye akpatre usen ke usuk edu emi edibinde isio, iŋ, emi edibinde iduɔk ke iso Jehovah;

26 Iŋ, emi edisinde ke idaha anana utit ukut, anamde mme ikɔ osu emi ɔdɔhɔde ete: Mmɔ emi enamde eti eyenyene nsinsi uwem; ndien mmɔ emi enamde idiɔk eyenyene nsinsi ubiom ikpe. Ke emi ke edi. Amen.