“Taniela mo e Misi ‘a e Tuʻí,” Ngaahi Talanoa ʻo e Fuakava Motuʻá (2022)
“Taniela mo e Misi ‘a e Tuʻí,” Ngaahi Talanoa ʻo e Fuakava Motuʻá
Taniela 2
Taniela mo e Misi ʻa e Tuʻí
Ko e pōpoaki fakamisiteli ‘a e ʻOtuá ki he tu‘í
Na‘e ʻi ai ha misi ʻa e tuʻi ʻo Pāpiloné naʻá ne loto-mamahi ai. Na‘á ne fekau ke tala ange ‘e heʻene kau taula‘eikí mo e kau tangata potó ʻa e ʻuhinga ‘o e misí kiate ia.
Na‘e ʻikai fakahā ʻe he tuʻí kiate kinautolu ‘a e misí. Na‘á ne pehē kapau ʻoku maʻu ʻe he kau taulaʻeikí mo e kau tangata potó ha mālohi moʻoni, te nau lava ʻo tala ange kiate ia ʻa e misí mo hono ʻuhingá.
Na‘e tala ange ʻe he kau taula‘eikí mo e kau tangata potó ki he tuʻí ʻe ʻikai ke nau lava ‘o faka‘uhingaʻi ‘ene misí kapau ʻe ʻikai ke ne talaange kiate kinautolu. Na‘a nau pehē ʻe ʻikai lava ʻe ha taha ke fakahoko ia. Na‘e houhau ‘a e tuʻí peá ne folofola te ne tāmateʻi ‘a e kau tangata poto kotoa pē ʻi he pule‘angá, kau ai ʻa Taniela mo hono ngaahi kaungāme‘á.
‘I he omi ʻa e kau leʻo ʻa e tuʻí ke ʻave ʻa Taniela mo hono ngaahi kaungāmeʻá, na‘e kole ange ‘e Taniela ha taimi lahi ange koeʻuhi ke ne lava ʻo fakamatala ki he tuʻí ʻa e ʻuhinga ʻo ʻene misí. Na‘e ʻilo‘i ʻe Taniela ‘oku ʻiloʻi mo ʻafio‘i ʻe he ‘Otuá ‘a e meʻa kotoa pē, na‘a mo e ngaahi misí. Na‘e kole ange ʻe Taniela ki hono ngaahi kaungāme‘á ke nau lotu fakataha mo ia.
Na‘e fakahā ‘e he ʻOtuá kia Taniela ʻa e misi ʻa e tu‘í ʻi ha vīsone pea mo ako‘i kia Taniela ʻa hono ‘uhingá. Na‘e fakamālō ʻa Taniela ki he ʻOtuá ʻi hono tali ʻene ngaahi lotu mo hono ngaahi kaungāme‘á pea mo hono fakahaofi ʻenau moʻuí. Na‘á ne ʻalu leva ke fakamatala ki he tu‘í ʻa e ‘uhinga ʻo e misí.
Na‘e pehē ʻe Taniela naʻe ʻuhinga ʻa e misi ʻa e tu‘í ki ha fuʻu tā tongitongi lahi ʻaupito naʻe fakaʻauha ʻe ha maka naʻe tā mei he moʻungá. Naʻe fakafofongaʻi ʻe he tā tongitongí ʻa e ngaahi puleʻanga ʻo e māmaní. Ko e maka naʻe tā mei he moʻungá naʻá ne fakafofongaʻi ʻa e pule‘anga ʻo e ‘Otuá ʻa ia te ne fakafonu ʻa e māmaní kotoa pē. Na‘e ʻafio‘i ʻe he tu‘í naʻe lea ʻaki ʻe Taniela ʻa e mo‘oní.