“Palōfita ko ‘Ilaisiaá,” Ngaahi Talanoa ʻo e Fuakava Motuʻá (2022)
“Palōfita ko ʻIlaisiaá,” Ngaahi Talanoa ʻo e Fuakava Motuʻá
1 Ngaahi Tuʻi 16–18
Palōfita ko ʻIlaisiaá
Ko e tui ʻa ha fa‘ē mo e ngaahi mana ʻa e ‘Eikí
Na‘e ʻikai ha ‘uha ʻi he pule‘anga ʻo ‘Isilelí, pea naʻe mei ʻosi ʻa e vaí. Na‘e ʻikai ke sai‘ia ʻa e Tu‘i ko ʻĒhapí mo e Kuini ko Sisipelí ʻi he kau palōfita ‘a e ʻEikí. Na‘á na tāmateʻi foki ha niʻihi ʻo e kau palōfitá. Na‘e lotu ʻa e tu‘í mo e kuiní ki he ngaahi tamapuá ke ʻuha. Ka na‘e talaange ʻe he Palōfita ko ‘Ilaisiaá ʻe ‘ikai ʻomi ‘e he ʻEikí ha ‘uha ʻo laui ta‘u.
1 Ngaahi Tu‘i 16:29–33; 17:1; 18:13
Na‘e houhau ʻa e tuʻí mo e kuiní kia ‘Ilaisiā. Na‘e fakatokanga ʻa e ‘Eikí kia ʻIlaisiā ke toitoi koeʻuhi na‘e ʻi ha tu‘unga fakatuʻutāmaki ‘a ʻene mo‘uí.
Naʻe tataki ʻe he ʻEikí ‘a ʻIlaisiā ki ha ki‘i vaitafe pea fekau atu mo ha fanga manupuna ke ʻoatu haʻane meʻakai. Ka koe‘uhi naʻe ‘ikai ha ʻuhá, naʻe mōmoa ‘a e vaí, pea naʻe ‘ikai maʻu ʻe ʻIlaisiā ha vai.
Na‘e tataki ʻe he ‘Eikí ʻa ‘Ilaisiā ki ha fefine ʻi ha kolo mama‘o. Na‘e kole ange ‘e ʻIlaisiā ha vai mo e mā. Ka na‘á ne maʻu pē ha meʻa feʻunga ma‘ana mo hono fohá ki he ʻaho pē ‘e taha.
Na‘e ʻilo ‘e ʻIlaisiā ko ‘ene kiʻi me‘akai fakaʻosí pē ia. Na‘á ne palōmesi ange kapau te ne fafanga ia, ʻe foaki ange ʻe he ‘Eikí ʻa e me‘akai maʻa hono fāmilí kae ‘oua kuo toe tō mai ha ʻuha.
Na‘e ngaohi ʻe he fefiné ha mā ma‘a ʻIlaisiā. Pea hili iá naʻe fakaofo ʻa e tupu ʻo liunga lahi ʻene loló mo e mahoaʻá! Na‘e ʻi ai ha me‘akai feʻunga ma‘a ʻIlaisiā mo e fāmili ʻo e fefiné fakatouʻosi ʻi ha ngaahi ʻaho lahi.
ʻI ha ʻaho ʻe taha naʻe puke ʻa e foha ʻo e fefiné peá ne mate. Na‘á ne ʻeke kia ʻIlaisiā pe ko e hā ne tuku ai ʻe he ‘Eikí ke hoko ʻa e meʻa ko ‘ení ki aí.
Na‘e maʻu ‘e ʻIlaisiā ‘a e lakanga fakataulaʻeikí. Na‘á ne tāpuakiʻi hono fohá mo kole ki he ‘Eikí ke fakamoʻui ia. Naʻe toe mānava ʻa e kiʻi tamasiʻí, pea naʻe ʻilo ʻe he fefiné ko ʻIlaisiā ko ha palōfita ia ʻa e ʻEikí.